Hechos 2:1-47
2 Pentekostes fxiesta en ãhteꞌ, jxukaysa kxteeçxaçxáatx pkhaakheçxa ũsuꞌ.
2 Naapkaçxhaꞌ cieluju wejxaa wala naꞌwẽ susna kĩhçxa txãaweꞌsx ũsni yatte jxuka utak.
3 Naapkaçxhaꞌ ipx beeni naꞌwẽsatx jxukaysa kajkwesu vxyaa.
4 Açaꞌ jxukaysa jaꞌdaçxah txãaweꞌsx ũuste Dxus Espiritu yuuçxaçxáa jxuka khẽeteꞌ, txãꞌsna jxpaꞌgaçxa maa nasa weꞌweni yuweꞌswa weꞌweyaꞌ ãjatx, Dxus Espiritu maa yuweju weꞌwewaꞌjaꞌs jxkaatheꞌ txãaju.
5 Txãn ensuꞌ Dxus jxkaahniꞌs nwẽeseꞌjsa judiuweꞌsx maa maa kiwejũwa paꞌjçxatx ũsuꞌ Jerusalente.
6 Txajũꞌ txãa seenaꞌ susniꞌs wẽseꞌjçxaꞌ, nasa jxukaysa pkhaakhetx. Saꞌ txãꞌwẽ teeçxsa naꞌwẽçxah txãaweꞌsx weꞌweni yuweju weꞌweniꞌs jiyuçxaꞌ, wala kuh yajkxna neeyũutx
7 ¿Maꞌwẽçxakiꞌtx txãꞌwẽ yũu? sũhna. Saꞌ txãaweꞌsx pweꞌsx naꞌjĩnatx puutx paapẽyiꞌ:
—Naꞌwẽ weꞌwena ũstaꞌ txãaweꞌsxaꞌ jxukay ¿Galileajũweꞌsxmeetxnáꞌ?
8 Saꞌ ¿maꞌwẽçxata nasa iisa kweꞌsx yuweju weꞌweyaꞌ ãjaꞌ?
9 Ayte ũsthaꞌw Partiajũweꞌsx, Mediajũweꞌsx, Elamjũweꞌsx, Mesopotamiajũweꞌsx, Judeajũweꞌsx, Kapadociajũweꞌsx, Pontojũweꞌsx, Asia kiwejũweꞌsx,
10 Fxrigia vxiteꞌ Panfxilia kiwejũweꞌsx, Egipto vxiteꞌ Afxrika Cirene kiweteweꞌsx, txãꞌwẽy Romajũweꞌsxwa ayte ũsthaꞌw. Maaíi yuꞌ upxhíi judiuweꞌsxthaꞌw, açaꞌ vxiteꞌ judiumeeçxawa judiuweꞌsx naꞌwẽy Dxus jxkaahniꞌs nwẽeseꞌjsa ũsthaꞌw.
11 Txãꞌwẽy Kretajuweꞌsx vxiteꞌ Arabiajuweꞌsxwa ũsthaꞌw. Nawa jxukaysa Dxus yuwe zhiçxkwesaꞌsthaꞌw wẽseꞌjeꞌ, kweꞌsx weꞌweni yuweju ptaꞌsxpaꞌga jĩꞌtx.
12 Txãꞌwẽ yũuniꞌs jxukaysa wala kuh jwed weꞌwena ũsuꞌtx naꞌjĩna:
—¿Kĩh yũuyaꞌ txãꞌwẽ yuuçki? jĩꞌtx.
13 Naapkaçxhaꞌ vxite yuꞌ açeweꞌwena npeevxysxijkana naꞌjĩꞌtx:
—Naaweꞌsxaꞌ vxino pus tudxçxa tũuçxa txãꞌwẽ weꞌwen ũstaꞌ jĩꞌtx.
Pedro nyafxçxah nasatx weꞌweni
14 Txajũꞌ Pedroꞌ Jesus jxkaahnisaweꞌsx oncesa yakh yujuçxa sus weꞌwena naꞌjĩk:
—Judeateweꞌsx vxiteꞌ Jerusalenteweꞌsx iꞌkweꞌsxaꞌ ew jiyuçxa neeyũuyaꞌ ew mwẽeseꞌjwe adx ptaꞌsxyaꞌwath txãꞌsna:
15 Naa piçthẽꞌjweꞌsxaꞌ tũunitxna jĩꞌiꞌkwe nawa txãꞌwẽ meetaꞌ. Kusíi las nweweçxáꞌ açaꞌ ¿maꞌwẽ tũuni yuukxthaꞌw?
16 Naꞌwẽ yuuk txãꞌ Dxus yuwe ptaꞌsxsa Joel weꞌwek txãak kxtey yuu. Txãꞌ naꞌjĩꞌk:
17 Dxus weꞌweçxaꞌ:
Nmeh ensuꞌ, adx Espirituꞌs naa kiwete nasa jxukaysatx makwewa ũsuꞌnja,
Açaꞌ iꞌkweꞌsx nçxiꞌk iꞌkweꞌsx niisa txãaweꞌsxaꞌ adx yuweꞌs ptaꞌsxitxna.
Naapkaçxhaꞌ piçtakxweꞌsxaꞌ cieluju zhiçxkwesa vxyaaniꞌs uyuutxna,
Açaꞌ thẽꞌjsaweꞌsxaꞌ ewsa ksxaꞌutxna.
18 Saꞌ adxaꞌs selpisaaweꞌsxtxi piçthẽꞌj maꞌk yuu meeçxaꞌ uꞌy maꞌk yuu nawa txãaweꞌsxtxi adx Espirituꞌs makwewa ũsuꞌnja, adx yuweꞌs ptaꞌsxkahn.
19 Txajũꞌ cielujũ kim yuhwa uynimeesa zhiçxkwesa kaavxyaꞌjaꞌjaꞌnja:
Saꞌ naa kiweteꞌ ũukhũukhsa kaavxyaꞌjaꞌjaꞌnja: ee, ipx wala, aah wala txãꞌwẽsatx.
20 Açaꞌ sekaꞌ kus naꞌwẽ çxhiꞌdxina, aꞌtewa ee naꞌwẽ beh yuuna.
Nawa kweꞌsxtxi nweꞌwesa kĩiwaꞌj en zhiçxkwesa ãhmeyna txãꞌwẽ yuuna.
21 Açaꞌ maawa jxukaysa Dxusaꞌs neeweꞌwena fxiꞌzesaꞌ txãa enteꞌ nweꞌweni yuutxna jĩꞌk.
22 Ãçxhaꞌ Israelweꞌsx mwẽeseꞌjwe naꞌjĩyaꞌwath: Jesus Nasarethũweꞌsx Dxus kaahnisa iꞌkweꞌsx ksxavxysu kĩjkĩhwa ewsaçxaçxáanak kaavxyaꞌjaꞌj ãçãꞌsatx nuykatxhina, uusaatx ĩtxĩ vxitna Dxus puꞌçxte, Jesukristoꞌ txãꞌwẽk yũu. Txãꞌwẽ yũuniꞌs jiiyãꞌjneꞌkwe.
23 Nawa txãꞌsaꞌ kluuste fxuççxa ikhkahn iꞌkweꞌsxaꞌ dukhiꞌkwe nasa ewmeesa kusete. Txãꞌwẽ uuwaꞌjaꞌs Dxusneꞌ txhitxhçxa nvxiht txãniitey, txãa paꞌga iꞌkwe txãꞌwẽ yũu.
24 Nawa Dxusaꞌ kiꞌ ĩtxi vxitçxa uuníi seenaꞌ ũukhũukhsaju kutxiꞌkh, txãa paꞌgatey ikhsaꞌ bagaçxtewa uuniiçxáa jiꞌphuyaꞌ yuꞌ ãjawaꞌjsameek yuꞌ naa paꞌga.
25 Jesus uuçxa kiꞌ ĩtxi yuuwaꞌjaꞌs Davxidaꞌ naꞌjĩnak ptaꞌsx:
Adxna jxpeꞌjsaꞌ bagaçxte yuhwa puꞌvxitumée adx yakh nesku yuꞌ.
Txãꞌ adx pukate ũsaꞌ paçu juꞌgte, kĩh yuhnawa ũukhkahmén adxaꞌs nweꞌwena.
26 Txãa paꞌgak adx ũuste txakwe wala weçxweçxa ũusutheꞌ, açaꞌ weçxaawaꞌj yuuçxáꞌsthu weꞌweꞌ.
Txãa paꞌga adx kakweꞌ kiꞌ ĩtxi kiiteena sũhnaçxáa skhẽwuꞌnja,
27 Txãa paꞌgatey idxaꞌ adx ũusaꞌs uusaaweꞌsx ũsnite nvxihtmeeneꞌga,
Saꞌ idxaꞌs selpisáa kakweꞌswa suweepkaçx yuꞌ khikhmeeneꞌga.
28 Pçuwaꞌjmée ĩtxi ũswaꞌthe paꞌjwaꞌjaꞌs kaapiyaꞌjg,
Saꞌ iidx ũsnite weçxana ũswaꞌjaꞌs yuuçxáa ũsuneꞌga jĩna fxiꞌjniꞌ.
29 Yakhthẽꞌjweꞌsx ew mjiyuwe: Naꞌwẽ kweꞌsx yaçgaweꞌsx Davxid weꞌwek txãꞌ peekx uuwaꞌjaꞌsíiçxáa txãꞌjĩꞌçmeꞌ. Txãꞌwẽmeete íiçxáa Davxid uuteꞌ pedaatx, açaꞌ txajx kakweꞌ txkaa ũsaꞌ pedaní ãçxpkaçx.
30 Nawa Davxidaꞌ Dxus yuwe ptaꞌsxsak yuꞌ. Txãasak jii yuꞌ Dxusaꞌ teeçx ũsyaꞌ puutx weꞌwek txajx jiꞌtheweꞌsx txãꞌ Kristok yuꞌ Davxid naꞌwẽy jxkaahwaꞌjsa txãꞌsnak jii yuꞌ.
31 Kristo uuçxa ĩtxi kiiteeçte uyna ũssa naꞌwẽk ptaꞌsx Davxidaꞌ. Txãasak naꞌjĩ: txajx ũusaꞌ uusaaweꞌsx ũsnite neeyũumeena, açaꞌ txajx kakwe khaꞌtxwa suweemeena.
32 Davxid weꞌweꞌk Jesus txãꞌsnak Dxusaꞌ uuniijũwa kiꞌ ĩtxi vxit, açaꞌ kweꞌsxaꞌ jxukaysa uysaathaꞌw, txãasa ew jiithaꞌw.
33 Saꞌ txãa Jesusíik Dxus pukate paçu juꞌgte kãhpkaçx peꞌjna uꞌjni yuu. Saꞌ kxteꞌ Ney ũsyaꞌ neeyũuk txajx Espirituꞌs txãꞌsaꞌ jxpaꞌgaçxak txãa Espirituꞌs kweꞌsxtxi makwewa ũs. Açaꞌ txãꞌsiꞌkwe iꞌkweꞌsxaꞌ jxuka uyna wẽseꞌj.
34 Davxid txãꞌwẽ cielute tejkameꞌ, txajíik Davxidíiwa naꞌjĩꞌ:
Dxusaꞌ adxna jxpeꞌjsaꞌs naꞌjĩk:
Adx pukate paçu juꞌgte mkaaçx,
35 Idxna açesatx idxçxaçxáꞌs nwẽeseꞌjwaꞌjaꞌs vxitna jxãꞌphkaçx jĩk.
36 Israelweꞌsx jxukaysa ew mjiyuwe: Naa Jesusaꞌs iꞌkweꞌsxaꞌ kluuste kaafxuçuꞌjiꞌkwe txãꞌsnak Dxusaꞌ Kristo jxkaahwaꞌjsa vxit.
37 Txãꞌjĩna ptaꞌsxte wẽseꞌjçxaꞌ, ũuste wala nxus yajkxtxi. Saꞌ Pedroweꞌsxtxi pẽjxtxi:
—Yakhthẽꞌjweꞌsx, ãçxhaꞌ ¿maꞌwẽ yũukxthaꞌw? jĩteꞌ,
38 Pedro pasçxaꞌ:
—Iꞌkweꞌsx pkaltxi nvxihtçxa, Dxus tasxte misxawedwe, saꞌ Jesukristoꞌs ũuste jxpaꞌgaçxa yuꞌtewa yaꞌbautisãywe, kxah iꞌkweꞌsx pkaltxi peltunãyni yuuna. Txãꞌwẽ yũuteꞌ, iꞌkweꞌsxtxiwa Dxusaꞌ txajx Espirituꞌs ũsuna.
39 Txãa paꞌgatey Dxusaꞌ txajx Espirituꞌs ũsyaꞌ neeyũuk txãꞌ iꞌkweꞌsx jĩi petx iꞌkweꞌsx luuçx jĩi yãꞌjçxaꞌ, saꞌ maazkuẽesa majũweꞌsxwa ũstxna Dxus paꞌyanisa txãaweꞌsxwa jxpaꞌgatxna jĩꞌk.
40 Txãꞌwẽ weꞌwena wala yuꞌkxpejk Pedroꞌ naꞌjĩna:
—Nasa ewmeesa ksxavxyte jxpubana fxiꞌzemée Dxus tasxte mutxaawe ewte neeyũuyaꞌ jĩnak ptaꞌsx.
41 Açaꞌ Pedro ptaꞌsxniꞌs nwẽeseꞌjçxa yuꞌte yaꞌbautisãytxi. Txãa enteꞌ tekh mil ãhtx Kristoꞌs jxpaꞌga.
42 Saꞌ Pedroweꞌsx kaapiyaꞌjniꞌs piyaçxaꞌ, jxukaysa Dxusaꞌs çxhãçxha yajkxnatx neeyũu. Saꞌ txutemée kxteeçxahtx pkhaakhena fxiꞌzeꞌ, Dxus yakh puutx weꞌwena, ũꞌwaꞌjaꞌswa kxteeçxah ũꞌna.
Puutx kxteeçxah ewçxáa fxiꞌzeni
43 Txajũꞌ nasa jxukaysa wala kuh yajkxna ũsuꞌtx, naapkaçxhaꞌ Pedroweꞌsxaꞌ ãçaꞌsatx nuykatxhina kim yuhwa ãjanimeesaꞌswa kaavxyaꞌjaꞌjnatx ũsuꞌ.
44 Jxukaysa Kristoꞌs jxpaꞌgasaꞌ txutemeetx kxteeçxah fxiꞌzeꞌ, saꞌ kĩh jiꞌphuniꞌswa jaꞌdaçxaçxáatx puutx peesuꞌsna fxiꞌzeꞌ.
45 Saꞌ txãaweꞌsx jiꞌphuniꞌs txweyçxa vxyuꞌs kxteeçxah pkhakhçxatx peejiina fxiꞌzesatx peesuꞌ txãaweꞌsx peejiniꞌs puꞌçxna.
46 Een isatx dxuus yatte pkhaakheꞌ, saꞌ ũꞌwaꞌjaꞌs yuꞌ yat iisatx piꞌkiꞌ ũusuh jxuka weçxana,
47 saꞌ Dxusnawa txãꞌwẽy weçxana. Txãꞌwẽ yũuteꞌ, nasaꞌ txãaweꞌsxtxiꞌ wala ew weꞌweꞌtx. Açaꞌ Dxusaꞌ een isak txajx luuçxtxiꞌ nuypehnana uꞌjweꞌ ewte neeyũuwaꞌjsatx.
