Hechos 20:1-38
20 Yuwe susni pçuuteꞌ, Pabloꞌ Dxus yakh fxiꞌzesaweꞌsxtxi paꞌyaçxa wala ew yuꞌkxpehçxak txãaweꞌsxtxi weçxaçxa Macedonia kiwen uꞌj.
2 Txãa kiwesu jxuka pekũjk yakhthẽꞌjweꞌsx ũukhweꞌsxte kçxhãaçxhaꞌjna. Saꞌ txajũꞌ Grecia kiwenwa uꞌkh.
3 Kxte tekh aꞌte ũsçxaꞌ, barkote khẽeçxa Siria kiwen uꞌjyaꞌwak yuꞌ. Nawa judiuweꞌsx ikhyaꞌwataꞌ txãa dxiꞌthe jĩniꞌs jiyuçxaçxáa, barkote uꞌjmée çxidaçxáa maa dxiꞌjuneꞌ paꞌj txãꞌwẽyku sxawedxaꞌ yajkx, Macedonia kiwejuy uykhẽwna.
4 Txãa yakh piꞌkxna uꞌjtx Sópater Bereajuweꞌsx, Aristarko vxiteꞌ Segudo Tesalonikajuweꞌsx vxiteꞌ Gayo Derbejuweꞌsx vxiteꞌ Timoteo vxiteꞌ Tíkiko Trófximo txãaweꞌsxaꞌ Asia kiweteweꞌsxtxi yuꞌ.
5 Txãa yakhthẽꞌjweꞌsxaꞌ dxiꞌj pxãjũ yaçte uꞌjçxa Troas çxhabtetx kweꞌsxtxi ũythas.
6 Pan lewadura jiꞌphmée ũꞌni fxiesta skhẽwniitethaꞌw kweꞌsxaꞌ kaseh, Fxilipos çxhabuh barkote khẽeçxa, saꞌ tahç enteꞌ kpajkxthaꞌw Troas çxhabte. Kxte siete enthaꞌw ũsuꞌ.
Troas çxhabte Pablo weçxayaꞌ paꞌjni
7 Kiꞌsen enteꞌ, Dxus yakh fxiꞌzesaweꞌsx yakh pkhaakhethaꞌw kxteçxah pkhaakheçxa ũꞌyaꞌ. Naapkaçxhaꞌ Pabloꞌ Dxus yuweꞌs kaapiyaꞌkh. Txãꞌwẽ kuskuskhẽꞌ uꞌjwe jiꞌphçxaꞌ, txaçx kuspxãhnpkaçxku ptaꞌsxna ũsuꞌ,
8 teeçx piesate ẽete wala kuh lampara pkiꞌtanisa ũsuꞌtx kxtee.
9 Açaꞌ kxte teeçx piçtakx Eutiko yaasesak wentanate kaçxçxa uꞌpuꞌ. Txãꞌwẽ Pabloꞌ wala jxuꞌj weꞌweteꞌ, txãa piçtakxaꞌ dee wẽeçxa dehna uꞌpíi saapajkxku yat ẽe walaju, açaꞌ uuniisaꞌstxi kiis.
10 Txãꞌwẽ yũuteꞌ, Pabloꞌ saꞌjçxa, txãa uusaꞌs psxaꞌdçxa naꞌwẽk weꞌwe:
—Yakhthẽꞌjweꞌsx, nxusnuwe, kiꞌ ĩtxi yuuk jĩnak ptaꞌsx.
11 Txajũꞌ Pabloꞌ kiꞌ ẽe yatte tejkaçxa Santa Cenaꞌs puuçku. Txãꞌwẽ yũuçxa khikhyna sẽhpkaçx ptaꞌsxçxak uꞌj.
12 Txãa piçtakxaꞌ kiꞌ ĩtxi yuuteꞌ, peꞌjna uꞌjçxa jxukaysa wala weçxana neeyũutx.
Troas çxhabu Mileto çxhabna uꞌjni
13 Kweꞌsxaꞌ barkote khẽeçxa yaçte uꞌthaꞌw Asón çxhabna, Pabloꞌs kxte ũythasyaꞌ. Naapkaçxhaꞌ txãꞌ çxidajk uꞌj.
14 Asón çxhabujk kweꞌsx yakh barkote khẽe, açaꞌ txajũthaꞌw Mitilene çxhabna uꞌj.
15 Txajũ kiꞌ kasehçxa vxite enkhẽꞌ Kío kiwe pukasuthaꞌw skhẽw. Saꞌ vxite enkhẽꞌ Samos kiwetek barkoꞌ dudte utxaa. Txajũ kiꞌ uꞌjçxaꞌ, teeçx ahte Trogilio yaasesate paꞌjçxathaꞌw jxkaase. Txajũꞌ vxite enkhẽꞌ kiꞌ uꞌjçxaꞌ Mileto çxhabte paꞌthaꞌw.
16 Pabloꞌ Asia kiwete jxthẽeyuuyaꞌmée, Efxeso çxhabte uꞌkameꞌ, Jerusalente dud paꞌjçxa Pentekostes fxiestate ũsyaꞌ sũhçxa.
Mileto çxhabu Efxesoteweꞌsxtxi paꞌyani
17 Saꞌ Mileto çxhabte paꞌjçxaꞌ, Efxeso çxhabte ancianoweꞌsxtxi paꞌyak naꞌwẽ weꞌweyaꞌ:
18 —Adxaꞌ Asia kiwete nyafxçxah paꞌjíi kĩhtka yũuna fxiꞌze ãçxpkaçx txãꞌsaꞌ iꞌkweꞌsxaꞌ jii iꞌkwe.
19 Judiuweꞌsx açepaꞌga txakwe wala nxuswaꞌj en paꞌthewa, Jesukristoꞌs een isa selpiina bagaçxtewa iꞌkweꞌsxtxi ũꞌne petx khakh puꞌçxna nesthu yuꞌ kim yuhnawa iiwejçx weꞌwemée.
20 Iꞌkweꞌsxtxi selpiwaꞌjsa Dxus yuweꞌs ptaꞌsxmée yuꞌ yuumée, nasaa ksxavxysu yat-suwa kaapiyaꞌjna nesthu yuꞌ.
21 Txãꞌwẽy judiuweꞌsx vxiteꞌ judiu jiꞌjmée txãaweꞌsxtxiwa jxukaysatx ptaꞌsxthu: Dxus tasxte sxawedxaꞌ pkaltxi nvxihtçxa kweꞌsxtxi jxpeꞌjsa Jesukristoꞌswa ũuste miipaꞌgawe jĩna.
22 Ãçxhaꞌ uꞌjweçthu Jerusalenna Espiritu kaahni. Nawa jiimée uꞌjweçthu kxte jwee kĩhçxa yuuneꞌthewa.
23 Naasáa naꞌwẽ yuuçxáa jiith: maa çxhabte uꞌthewa Dxus Espirituꞌ ptaꞌsxna nesku yuꞌ karcelte kxuuphni wala nxuswaꞌj jiꞌphgu jĩna.
24 Nawa txãꞌsaꞌ yaakiꞌçmeeth, saꞌ adx uuwaꞌjaꞌs yuhwa ũukhuꞌçmeeth. Jesukristo neeweꞌwek Dxus peeygãaniꞌs txãꞌsna uu entepkaçx weçxana ptaꞌsxna fxiꞌzewaççxáa, txãꞌwẽena sũjuꞌth.
25 Ayte iꞌkweꞌsx yakh ũsçxaꞌ Dxus jxkaahwaꞌj enaꞌs ptaꞌsxthu txãꞌs wẽseꞌjsa ayteweꞌsxaꞌ adxaꞌs ãçxhuyãꞌjaꞌ peena yuꞌ uymeeneꞌkwe sũjuꞌth.
26 Nawa adxaꞌ iꞌkweꞌsxtxi kaapiyaꞌjyãꞌth naꞌ yuuwemeeth,
27 txãa paꞌgatey Dxus jxthãasniꞌs paaçte nvxihtmée jxuka ãateçxaçxáath ptaꞌsx naa paꞌga.
28 Açaꞌ ãçxhaꞌ peekíi yaꞌmpaꞌyajkxwe, txãꞌwẽy Jesukristo ee pkawçxa weynisa Dxus luuçxtxiwa ew jxpeꞌjna, Dxus Espirituꞌ iꞌkweꞌsxtxik thegwaꞌjsa nvxiht naa paꞌga.
29 Jiith adx uꞌtheꞌ, vxite paꞌjatxna Dxus yakh fxiꞌzesaweꞌsxtxi ivxiitu wẽena, sxĩꞌj weesweewa maꞌwẽta piisxaatx ivxiituꞌ txãꞌwẽy yũuyaꞌ.
30 Jxpaꞌyakxmeeçxaꞌ, iꞌkweꞌsx pweꞌsxíiwa kasejeneꞌkwe isasaꞌs ptaꞌsxipkaçxte kaypubaꞌjwaꞌjçxáꞌs ptaꞌsxna Dxus yakh fxiꞌzesatx kaypubaꞌjna.
31 Iꞌkweꞌsxaꞌ miiyajkxwe, adxaꞌ tekh anxuth teeçxsa naꞌwẽçxah yuꞌkxpehna ũsuꞌ en petx kus yãꞌjçxa ũꞌne petx khakh.
32 Ãçxhaꞌ yakhthẽꞌjweꞌsxtxi Dxusaꞌs neeweꞌweçxa txajx kusete nvxiituçthu txajx kaapiyaꞌjniꞌs peçxkanamée fxiꞌzekahn, txãa paꞌgatey txajx yuweꞌ kçxhãaçxhaꞌjna weçxana kaafxiꞌzeꞌjçxa cielute txajx nweꞌwenisa jxukaysa yakh ũswaꞌjaꞌswa ũsyaꞌ ãjawaꞌjsaꞌ.
33 Adxaꞌ iꞌkweꞌsx yakh ũsçxaꞌ, vxyu, ropa, txãꞌwẽsa pees jxthãasna fxiꞌzemeeth kim yuhnawa.
34 Iꞌkweꞌsxaꞌ ew jii iꞌkwe txãꞌwẽ yũumée, adx kuseju mjĩiçxath kĩh peejiniꞌswa uyuꞌ, vxiteꞌ adx yakh uꞌjusaweꞌsx jĩiwa txãꞌwẽy.
35 Txãꞌwẽ vxite jxpeejxsatx puꞌçxwaꞌjaꞌs kaapiyaꞌjnath fxiꞌze bagaçxtewa. Txãꞌwẽ yũukahníik Jesukristowa naꞌjĩꞌ: Peessa yakh wejx weçxa yujaꞌ jxpaꞌgasate jxthaakwe jĩꞌk.
36 Pabloꞌ weꞌwena jxãꞌjçxaꞌ, jxukaysa yakh peejxũkweçxa Dxus yakh puutx weꞌwek.
37 Txajũꞌ jxukaysa ũꞌnena psxaꞌdçxa Pabloꞌs weçxatx.
38 Txãꞌwẽ peena yuꞌ uymeeneꞌkwe jĩteꞌ, wala nxusna ũsuꞌtx, saꞌ piꞌkxna uꞌjtx barkote khẽepkaçx.
