Hechos 21:1-40
21 Yakhthẽꞌjweꞌsxtxi nvxihtçxa, barkote khẽenaꞌwa teehwed uꞌthaꞌw teeçx ahte Kos yaasesate. Saꞌ vxite enkhẽꞌ Rodas kiwete paꞌthaꞌw. Txãajũ Pátara çxhabnathaꞌw uꞌj.
2 Pátara çxhabte paꞌjçxa, teeçx barko uythaꞌw Fxenicia kiwen uꞌjsa, txãatethaꞌw khẽeçxa uꞌj.
3 Çxipre kiweꞌs uynathaꞌw skhẽw, txãꞌ jebu juꞌguk neeyũu. Txãꞌwẽ uꞌjçxathaꞌw Siria kiwete paꞌj. Saꞌ Tiro çxhabte uꞌkathaꞌw barkoꞌ kxte karga spãasxwaꞌkh jiꞌphuꞌ naa paꞌga.
4 Kxteꞌ Kristoꞌs nwẽeseꞌjsaweꞌsxtxithaꞌw uy, saꞌ siete enthaꞌw ũsuꞌ txãaweꞌsx yakh. Açaꞌ txãaweꞌsxtxi Dxus Espiritu kaajiyuꞌtheꞌ, Pabloꞌs ptaꞌsxtxi Jerusalenna uꞌjmeeneꞌga jĩna.
5 Txãꞌwẽtewa, siete en skhẽuuçpkaçxhaꞌ, kasehthaꞌw. Açaꞌ Kristoꞌs nwẽeseꞌjsaweꞌsx jxukaysa nyuuweꞌsx petx luuçx yãꞌjçxa piꞌkxna yuweꞌtx çxhab ekaju kasehpkaçx. Saꞌ kxte ĩkh pukate peejxũkweçxa Dxus yakh puutx weꞌweçxa,
6 psxaꞌdna weçxanaꞌwa barkote khẽethaꞌw. Naapkaçxhaꞌ txãaweꞌsxaꞌ sxawedtxi yatna.
7 Kweꞌsxaꞌ Tiro çxhabuh barkote uꞌjçxa, Tolemaida çxhabtethaꞌw paꞌj. Kxte teeçx enthaꞌw ũsuꞌ yakhthẽꞌjweꞌsxtxi weçxana.
8 Vxite kuskuskhẽꞌ Pablo vxiteꞌ txãa yakh uꞌjusa yãꞌjçxa kasehthaꞌw Cesarea çxhabna uꞌjyaꞌ. Kxte paꞌjçxaꞌ, Fxelipe yatna uꞌjçxa kxtethaꞌw deh. Txãa yuꞌ Pedro txhitxhku siete diákono txãateweꞌsxku yuꞌ Jesukristo kaapiyaꞌjniꞌs jxpaꞌgaçxa ptaꞌsxna pekũhsa.
9 Txãa Fxelipeꞌ pahz niisa knaꞌsasak jiꞌphuꞌ, Dxus weꞌweniꞌs ptaꞌsxsa.
10 Kxte maz en ũspkaçxhaꞌ, teeçx piçthẽꞌj paꞌkh, Agabo yaasesa Judea kiwejuweꞌsx, Dxus kĩh yũuyaꞌwatewa dxiikhẽy ptaꞌsxsa.
11 Txãꞌ kweꞌsxtxi puutx uyçxaꞌ, Pablo jxtudniꞌs pẽjxçxa peekíiçxáa çxida petx kuse yakh yaꞌjytudçxa naꞌwẽk weꞌwe:
—Dxus Espirituꞌ ptaꞌsxiꞌk, Jerusalente judiuweꞌsxaꞌ naa jxtudni namuꞌs naꞌwẽ tudçxa vxite nasatx dukhetxna jĩk.
12 Txãꞌjĩniꞌs wẽseꞌjçxaꞌ, kweꞌsx vxiteꞌ Cesareateweꞌsx yãꞌjçxa wala neevxisxathaꞌw Pabloꞌs Jerusalenna uꞌkhamen.
13 Nawa Pabloꞌ naꞌwẽk pas:
—¿Kĩjxaꞌkwe txakwe nxusna ũꞌneꞌ, adxna khaawãsxiꞌj wẽeçxa? Adxaꞌ Jesukristoꞌs selpiipaꞌga tudniçxáa yuumée, Jerusalente uuwaꞌj maꞌk yuu nawa txãꞌsaꞌ ũukhuꞌçmeeth jĩk.
14 Neevxisxayaꞌ ãjameeyãꞌjçxaꞌ, Dxus maꞌwẽ jxthãasteꞌ kxtey yuuna jĩnaçxáathaꞌw weꞌwe.
15 Txãa eꞌsuꞌ, pheuꞌjnaꞌwa Jerusalenna uꞌthaꞌw.
16 Açaꞌ Cesareate yakhthẽꞌjweꞌsx piꞌkxna yuweꞌtx, vxiteꞌ txãaweꞌsx yakh teeçx piçthẽꞌj Çxipre kiwejuweꞌsx, wala txaçxyãꞌj Dxus yakh fxiꞌzesa Mnasón yaasesawa yuweꞌk. Açaꞌ kweꞌsxaꞌ txajx yatte dejxaꞌthaꞌw puutx weꞌwe.
Pablo Jerusalente paꞌjçxa Jakobo tasxna uꞌjni
17 Jerusalente paꞌtheꞌ, kxte yakhthẽꞌjweꞌsxaꞌ wala weçxana jxpaꞌgatx.
18 Vxite enkhẽꞌ Pabloꞌ kweꞌsx yakh uꞌkh Jakobo yatna paꞌjyaꞌ, açaꞌ kxteaꞌ ancianoweꞌsx jxukaysatx ũsuꞌ.
19 Pabloꞌ weçxana jxãꞌjçxaꞌ, ptaꞌsxku judiu jiꞌjmée vxite nasa ksxavxysuwa Dxus yuweꞌs ptaꞌsxteꞌ, txãaweꞌsxtxi Dxus maꞌwẽ yũuniꞌswa jxuka.
20 Açaꞌ wẽseꞌjçxaꞌ, Dxusaꞌs wala weçxaçxa naꞌwẽtx ptaꞌsx Pabloꞌs:
—Yakhthẽꞌj, idxaꞌ jiiyãꞌjneꞌga judiu jiꞌjweꞌsx wala kuhsa Jesus kaapiyaꞌjniꞌs jxpaꞌgasa ũstaꞌ, saꞌ txãaweꞌsxaꞌ Moises leyaꞌs nvxihtmeete ewna jĩꞌtx.
21 Txãaweꞌsxaꞌ naꞌjĩniꞌsta jiyu: Idxaꞌ judiuweꞌsx jxukaysatx vxite kiwejuweꞌsxtxi kaapiyaꞌjçxa Moises jxkaahniꞌs nwẽeseꞌjmeeneꞌkwe, saꞌ iꞌkweꞌsx luuçxtxiwa cirkuncidãimeeneꞌkwe, kĩh yuhnawa kxtey yuuwaꞌjmeꞌ, txãꞌjĩnak ptaꞌsxiꞌ jĩniꞌs jiitaꞌ.
22 Saꞌ iidx paꞌjniꞌs jiyuçxaꞌ, txãaweꞌsxaꞌ idxaꞌs wẽseꞌjyaꞌ pkhaakhetxna, açaꞌ ¿kĩh yũukxthaꞌw?
23 Wejxwa naꞌwẽ yũuneꞌga: Ayte pahz piçthẽꞌj ũstaꞌ. Txãaweꞌsxaꞌ Dxus yatte uꞌkayaꞌ ãjawaꞌjaꞌs Moises ley jxkaajaꞌk txãꞌsaꞌ kxtey yuuyaꞌ ũstaꞌ.
24 Açaꞌ idxaꞌ txãaweꞌsxtxi dxuus yatna peꞌjna uꞌjçxa ley jxkaahni kiꞌswaꞌjaꞌs kxtey kxuꞌjuꞌjuneꞌga petx idx yãꞌjçxa. Saꞌ kxte dukhwaꞌjaꞌswa idxçxaçxáa deweeneꞌga. Txajũꞌ txãaweꞌsxaꞌ dxkhasaꞌs ktxiidxiꞌjitxna idxwa txãꞌwẽy. Txãꞌwẽ leyaꞌs kxtey yuuteꞌ, maawa jiyutxna txãꞌwẽ Pabloꞌ leyaꞌs nvxiitwaꞌjaꞌ jĩnak jxkaajaꞌ jĩçxaꞌ ĩsxiijaꞌneꞌta sũhna.
25 Nawa judiu jiꞌjmée vxite nasaçxawa Jesus kaapiyaꞌjniꞌs jxpaꞌgasaweꞌsx yuꞌ ley jxkaahniꞌs kxtey yuuwaꞌj jiꞌphmeetaꞌ. Txãaweꞌsxtxiꞌ kweꞌsxaꞌ ptaꞌsxna fxiꞌjyãꞌthaꞌw naꞌwẽ yũuwaꞌjaꞌs: Dxus ĩtximeesatx weçxayaꞌ tajkx ikhni çxiçxaꞌs ũꞌwaꞌjmeꞌ, eenawa ũꞌwaꞌjmeꞌ, tajkxaꞌs thukçxa ikhnisa çxiçxaꞌswa ũꞌwaꞌjmeꞌ, saꞌ ptammeesaꞌ pkal yũuna fxiꞌzewaꞌjmeꞌ jĩna ptaꞌsxnisaçxáꞌs kxtey yuuwaꞌjsataꞌ jĩtx.
Dxuus yatte Pabloꞌs tudni
26 Txajũꞌ Pabloꞌ txãa pahz piçthẽꞌjtx peꞌjna uꞌjçxaꞌ, kuskus enkhẽꞌ ley jxkaahniꞌs jxuka kxtey yuuçxak dxuus yat dxiite uꞌka kĩh entepkaçx kiꞌsyaꞌwaçxawa txãatx ptaꞌsxyaꞌ.
27 Saꞌ siete en kiꞌswaꞌjtx jxuka jxãꞌjaçpkaçxhaꞌ, Asia kiwejuweꞌsx judiuweꞌsx paꞌjçxa Pabloꞌs dxuus yatte uyçxaꞌ, nasa jxukaysatx kaaũusçxaꞌjnaꞌwa Pabloꞌs tudçxa
28 naꞌwẽtx sus weꞌwe:
—Israelweꞌsx, mpuꞌçxwe. Naa piçthẽꞌjíik msuuwa jxuka nasa jxukaysatx kaapiyaꞌjna pekũjuꞌ kweꞌsx jiꞌjtx açeweꞌwena, Moises leynawa txãꞌwẽy. Saꞌ dxuus yatnawa açeweꞌweꞌk. Saꞌ txãꞌwẽçxáa yũumée, ãçxhaꞌ judiu jiꞌjmée griegoweꞌsxtxiwa dxuus yat dxiite kaꞌgak kazx vxitna jĩꞌtx.
29 Efxeso çxhabuweꞌsx Trófximo yakh Pabloꞌ Jerusalente ũste neꞌta uy, txãasatx dxuus yat dxiite kaꞌgaꞌjneꞌ sũhçxa txãꞌjĩna weꞌweꞌ.
30 Txãꞌjĩna ptaꞌsxni seenaꞌ susteꞌ, nasaꞌ wala dud kũhçxa Pabloꞌs tudçxa dxuus yat ekaju wezxna kutxiꞌjiçpkaçxhaꞌ, vxitxaꞌs aphtxi.
31 Ikhyaꞌwatx yuꞌ, nawa komadanteꞌ jiyuk Jerusalen çxhabteweꞌsx seenaꞌ susna ũstaꞌ jĩniꞌs.
32 Txajũꞌ komadanteꞌ soldau vxiteꞌ txãaweꞌsx pweꞌsx jxtuhthesatx pkhakhçxa wuwuuçxáatx kũh nasa susna ũsnite. Açaꞌ komadante vxiteꞌ soldauweꞌsxtxi uyçxaꞌ, Pabloꞌs ikhmeetaꞌ.
33 Txajũꞌ komadante kũhçxa Pabloꞌs eꞌz kadenajuk tudkaah. Txãꞌwẽ yũuçxak pẽjx ¿kimna saꞌ kĩhga yũu? jĩna.
34 Nawa nasa txãꞌwẽ jxukaysa sus weꞌwena ũsteꞌ, komadante jiyuyaꞌ ãjameeçxaꞌ, kuartel yatna jxũna uꞌkhaakh.
35 Kuartel yat vxitxte kũhnaçxáa soldauweꞌsxaꞌ Pabloꞌs yakhçxatx uꞌj, txãꞌwẽ nasaꞌ ikh wẽesa eꞌste neeuna:
36 —Naa piçthẽꞌjaꞌs ikhwaꞌjaꞌ jĩna sus weꞌwena yuupaꞌga.
Pablo kuartel vxitxuh weꞌweni
37 Pabloꞌs kuartel yatte kaꞌgaꞌjaçteꞌ, txãꞌ naꞌwẽk weꞌwe griego yuweju komadanteꞌs:
—¿Maz yuweçxáawa kweꞌweꞌjmeemaꞌg? jĩteꞌ, komadante pasçxaꞌ:
—Idxaꞌ ¿griegowáꞌga?
38 Txãꞌwẽçxaꞌ ¿nyafxíi entey teeçx Egiptojuweꞌsx naꞌwẽ nasa ikhsaçxaçxáatx kuatro mil ãh nasa uꞌpnimeete pkhakhçxa puii kiisku txãameeneꞌga? jĩteꞌ,
39 Pabloꞌ naꞌjĩk:
—Adxaꞌ judiuth. Cilicia kiwete Tarso çxhab jxtuhthesateweꞌsxthu. Açaꞌ naa nasatx weꞌwewaꞌjaꞌs ũsuneꞌga jĩteꞌ,
40 komadanteꞌ ũythasku. Naapkaçxhaꞌ Pabloꞌ kuartel vxitxte yujunaꞌwa kuseju sxuunaꞌ yuuwaꞌjaꞌs ptaꞌsxteꞌ, jxuka sxuunaꞌ yuutx, açaꞌ naꞌwẽk weꞌwe hebreo yuweju:
