Hechos 22:1-30
22 —Yakhthẽꞌj vxiteꞌ thẽꞌjsaweꞌsx, mwẽeseꞌjwe adx weꞌweniꞌs jĩteꞌ,
2 hebreo yuweju weꞌweniꞌs wẽseꞌjçxaꞌ, wejxtxi sxuunaꞌ yuu. Txajũꞌ Pabloꞌ naꞌjĩk:
3 —Adxaꞌ judiuth, Cilicia kiwete Tarso çxhabte upxsa. Nawa ayte Jerusalente Gamaliel kaapiyaꞌjni walasaath, kweꞌsx yaçgaweꞌsx leyaꞌs wala ew nwẽeseꞌjna. Bagaçxtewa Dxusaꞌs ũusuh jxukath selpiina fxiꞌzeꞌ, naa ente iꞌkweꞌsx maꞌwẽkwe selpiꞌ txãꞌwẽy.
4 Adxaꞌ nyafxíꞌ Jesus kaapiyaꞌjniꞌs nwẽeseꞌjsatx ahçeçxa kiikheꞌjna vxitetxiꞌ tudçxa jxũna uꞌth piçthẽꞌj petx uꞌy yãꞌjçxa karcelte txajxaꞌ.
5 Sacerdote npiiçthẽꞌj vxiteꞌ judiu nthẽꞌjsaweꞌsx jxukaysa jiitaꞌ txãꞌwẽ Jesukristo yakh fxiꞌzesatx tudwaꞌjaꞌs Damaskote yakhthẽꞌj judiuweꞌsxtxi ptaꞌsxna karta pẽyniꞌs. Txãꞌwẽ yũuçxath uꞌj tudçxa ay Jerusalente nuypaꞌjçxa kastigãyyaꞌ.
Pabloꞌ Dxus yakh fxiꞌzeyaꞌ utxaaççxa txãa maꞌwẽneꞌ yũu txãꞌsna ptaꞌsxni
(Hch 9.1-19; 26.12-18)
6 Nawa adxaꞌ ẽepxãh Damasko çxhabte utxaana paꞌjaçpkaçxhaꞌ, naa dudte ẽe walaju eenak kweeth adx dxiꞌpte uymeenus.
7 Açaꞌ kiwega weteeçpkaçxhaꞌ, naꞌwẽk weꞌweni pthũuse: Saulo, Saulo, ¿kĩh yũupaꞌgaga adxaꞌs ahçeçxa pkxuuyaꞌ pakwéꞌ? jĩteꞌ,
8 pẽjxthu: Idxaꞌ ¿kimga? Txajũꞌ naꞌwẽk ptaꞌsx: Idx naꞌwẽ ahçeçxa pkxuuyaꞌ pakweꞌg txãath Jesus Nasarethuweꞌsx jĩk.
9 Açaꞌ adx yakh uꞌjsaꞌ txãꞌwẽ eenaꞌ kweethniꞌs uyçxa wala ũukhtxi. Nawa adxaꞌs weꞌweni yuꞌsaꞌ jiyumeetaꞌ.
10 Txajũꞌ adxaꞌ naꞌjĩnath weꞌwe: ¿Kĩhga yũu jxthãasuꞌ? jĩteꞌ, Kiiteçxa Damaskon meꞌj, kxte yaꞌptaꞌsxina kĩh yũuwaꞌjaꞌswa jĩnak jxkaah.
11 Txãꞌwẽ eenaꞌ kweethnijũçxáa uyyaꞌ ãjãmeeteꞌ, adx yakh piꞌkxna uꞌjsaweꞌsxaꞌ adxaꞌs puꞌkisçxa uꞌjtx Damaskote paꞌj.
12 Kxteaꞌ teeçx piçthẽꞌj uꞌpuꞌk Ananias yaasesa, Moises leyaꞌs jxuka nwẽeseꞌjsa. Txãꞌwẽ nwẽeseꞌphaꞌgatx kxte judiuweꞌsxaꞌ txãa Ananiasaꞌs wala jxtuhthesaꞌ jĩna weꞌweꞌ.
13 Txãa Ananiasaꞌ adxaꞌs thegyaꞌ paꞌjçxaꞌ, naꞌwẽk weꞌwe: Yakhthẽꞌj Saulo, idxaꞌ uyyaꞌ ãjawaꞌjaꞌs kiꞌ mpaꞌga jĩçpkaçxhaꞌ, thegçxaꞌ uyyaꞌ ãjath.
14 Txajũꞌ naꞌwẽk ptaꞌsx: Kweꞌsx yaçgaweꞌsxtxi jxpeꞌjsa Dxusaꞌ idxaꞌs nyafxiiteyku txhitxh txãꞌsna nwẽeseꞌjwaꞌjsa, saꞌ kĩh pkal yuhwa jiꞌphmeesaꞌs yafxju uyçxa txajx yuweju weꞌweniꞌswa wẽseꞌjwaꞌjsa.
15 Ãçxhaꞌ idxaꞌ naa kiwete jxukaysa dxiꞌpte Dxus yuweꞌs ptaꞌsxyaꞌ uꞌjweneꞌga saꞌ maꞌwẽçxahneꞌga uyna wẽseꞌjna yuu txãꞌsnawa ptaꞌsxyaꞌ.
16 Saꞌ ¿kĩjxaꞌçxáa txakwe wala jxthẽeyuukiꞌg? Ãçxhíi kiitenaꞌwa yuꞌte yaꞌbautisãyçxa Jesukristoꞌs ũusuh jxuka miiyajkx iidx pkal peltunãyni yuukahn jĩnak jxkaah.
Judiu jiꞌjmée vxite nasatx Dxus yuweꞌs ptaꞌsxyaꞌ kaahniꞌs Pablo ptaꞌsxni
17 Txãa eꞌsuꞌ Jerusalenna kiꞌ sxawedçxa dxuus yatna Dxus yakh puutx weꞌweyaꞌ uꞌtheꞌ, Jesusaꞌ adxaꞌs kxte vxyaaçxa,
18 naꞌwẽk weꞌwe: Jerusalenuh dudçxáa mkaaseh. Txãꞌwẽmeꞌ, idxaꞌ makwe ptaꞌsxtewa nwẽeseꞌjmeetxna jĩteꞌ,
19 naꞌwẽth pas: Adx txãꞌwẽ judiuweꞌsx pkhaakheni yat-su uꞌjçxa kxsũ idxna neeweꞌwesatx karcelte txahna vxitetxiꞌ kxuuphsath.
20 Saꞌ idxna neeweꞌwena selpisáa Esteban eeaꞌs pkawuuçtewa uynath ũsuꞌ, txãꞌwẽ yũuni ewna sũhna. Saꞌ ikhsaweꞌsx atxhtxi thegsath yuꞌ jĩtewa,
21 Jesusaꞌ naꞌjĩnak jxkaah: Meꞌjçxáa, adxaꞌ jxuꞌj kaajxaꞌwath judiu jiꞌjmée vxite nasatx ptaꞌsxyaꞌ jĩk.
Pabloꞌs komadante nweꞌweni
22 Txãꞌwẽ judiu jiꞌjmée vxite nasatx ptaꞌsxyaꞌ jĩniꞌs wẽseꞌjçxatx, kiꞌ ũusaçxana naꞌjĩna sus weꞌwe:
—Txãa piçthẽꞌjaꞌs ikhteçxáa ewna. Peena yuꞌ ĩtxi fxiꞌzemeena jĩꞌtx.
23 Txãꞌwẽ sus weꞌwena, txãaweꞌsx atxhtxi ẽete wãatahna kiweꞌs paçxçxa txãꞌwẽy yuuteçxáa,
24 komadanteꞌ Pabloꞌs kuartel yatte kaꞌgaꞌkhaahçxa peçxuukwekaakh, txãꞌwẽ yũuna khaawãsxiꞌjçxak pẽjxyaꞌwa yuꞌ kĩh yũupaꞌga nasaꞌ txãꞌwẽ wala ũusaçxana ahçetewa jiyuyaꞌ.
25 Nawa tuduçpkaçxhaꞌ, Pabloꞌ naꞌwẽk weꞌwe kpiitanaꞌs:
—Iꞌkweꞌsxaꞌ romano nasaꞌs peçxujkwete ¿ewmanx? kĩh yuuwetewa jiyumey.
26 Txãꞌwẽ weꞌweteꞌ, kpiitanaꞌ naꞌwẽk ptaꞌsxyaꞌ uꞌj komadanteꞌs:
—Naꞌwẽ yũuniꞌs mpaꞌyajkx. Txãꞌwẽmeꞌ, naa piçthẽꞌjaꞌ romano nasaꞌ jĩteꞌ,
27 komadanteꞌ Pablo tasxte utxaaçxa pẽjxku:
—Isa idxaꞌ ¿romano nasa dxihgáꞌ? jĩna. Açaꞌ Pablo pasçxaꞌ:
—Txãꞌwẽ íith jĩk.
28 Txajũꞌ komadante weꞌweçxaꞌ:
—Adxaꞌ wala vxyu dukhçxaçxáa romano nasa yuuna paꞌth jĩteꞌ, Pablo pasçxaꞌ:
—Adxaꞌ upxhíi txãa yãꞌth yuꞌ jĩk.
29 Txajũꞌ Pabloꞌs peçxuukwewaꞌjsaꞌ kuçx yuumée nvxihttxi. Açaꞌ komadante yuhwa txãꞌwẽ romano nasatewa jiyuçxaꞌ, wala ũukhku txãꞌwẽ tudpaꞌga.
Judiu nthẽꞌjsaweꞌsx tasxte Pabloꞌs txaahni weꞌwekahn
30 Judiuweꞌsxaꞌ kĩh yũupaꞌganeꞌta Pabloꞌs açeꞌ nawa txãꞌsna jiyu wẽeçxa, kuskuskhẽꞌ komadanteꞌ jxkaakh sacerdote npiiçthẽꞌjweꞌsx vxiteꞌ judiu nthẽꞌjsaweꞌsx jxukaysatx pkhaakhekahn. Txãꞌwẽ yũuçxak kadenatx khihbçxa txãaweꞌsx tasxte txah Pabloꞌs.
