Hechos 23:1-35
23 Pabloꞌ sacerdote npiiçthẽꞌjweꞌsx vxiteꞌ judiu nthẽꞌjsaweꞌsx pkhaakhesatx thegçxaꞌ, naꞌwẽk weꞌwe:
—Yakhthẽꞌjweꞌsx, adxaꞌ ãçxpkaçx Dxus dxiꞌpte jxpubath sũhwaꞌj yuꞌsaꞌ jiꞌphmeeth jĩteꞌ,
2 sacerdote npiiçthẽꞌj Ananiasaꞌ Pablo yuwega petxa kaakh pukate ih ũssatx.
3 Açaꞌ Pabloꞌ naꞌwẽk weꞌwe:
—Ãateçxáa ew weꞌweçxaꞌ ũuste yuꞌ ewmée yaakxpaꞌga idxaꞌs Dxus kastigaĩna. Idxaꞌ ley jxkaahniçxáꞌs kxtey yuusath ¿sũjuꞌgáꞌ? Txãꞌwẽçxaꞌ ¿kĩjxaꞌga adxaꞌs petxakajaꞌ? Leyaꞌ txãꞌwẽ jxkaajaꞌçmeꞌ jĩteꞌ,
4 kxte ũssaꞌ naꞌwẽtx weꞌwe:
—Dxusna selpisáa sacerdote npiiçthẽꞌjaꞌs txãꞌwẽ wẽesxuwaꞌj jiꞌphmeeg jĩteꞌ,
5 Pabloꞌ pasçxaꞌ:
—Dxusna selpisáa sacerdote npiiçthẽꞌjna sũjuꞌçmeꞌntka. Jiiwaçaꞌ, txãꞌwẽ paswaꞌjmeeneꞌtka yuꞌ. Txãꞌwẽ yuukahmeníik Dxus librutewa naꞌwẽ ptaꞌsxiꞌ: Iidx çxhabte jxkaahsaꞌs juunaꞌ weꞌwenu jĩꞌk naa paꞌga.
6 Txajũꞌ kxte pkhaakhesaweꞌsxaꞌ saduceo vxiteꞌ fxariseoweꞌsx txãaweꞌsxtewa jiyuçxaꞌ, Pabloꞌ naꞌwẽk sus weꞌwe:
—Yakhthẽꞌjweꞌsx, adxaꞌ fxariseo jiꞌj, fxariseo íiçxáath. Uusaaweꞌsxaꞌ kiꞌ ĩtxĩ yuuwaꞌjsa yuhtaꞌ sũhna yaakxsath. Txãa paꞌga yuuçxáa adxaꞌs ewmeesaꞌ jĩna ũstaꞌ.
7 Txãꞌwẽ weꞌweteꞌ, fxariseo vxiteꞌ saduceoweꞌsx yakh txãaweꞌsx pweꞌsx juunaꞌ weꞌweçxa puutx txuteetx.
8 (Saduceoweꞌsxaꞌ uusaaweꞌsxaꞌ kiꞌ ĩtxi yuutxna sũjuꞌçmeetaꞌ, saꞌ uuteꞌ nasaa ũus vxiteꞌ angelesweꞌsx txãꞌwẽsa ũstxna sũjuꞌçwameetaꞌ, naapkaçxhaꞌ fxariseoweꞌsxaꞌ txãꞌwẽsa jxuka ũstxna sũjuꞌtx, txãasatx puutx txutee.)
9 Txãꞌwẽ yũuçxa txãaweꞌsx pweꞌsx wala sustxi ũusçxa weꞌwena. Açaꞌ fxariseoweꞌsx juꞌgusa ley kaapiyaꞌjsaweꞌsx maaíi yuꞌ kiiteçxa naꞌwẽtx weꞌwe:
—Naa piçthẽꞌjaꞌ ewmée yũusameꞌ. Meeçxaꞌ Dxus angel wáꞌ yuꞌ, meeçxaꞌ uusáa ũus wáꞌ txãꞌwẽ vxyaa, nawa jiimeeçxaꞌ kuçx weꞌwemeeyuga. Txãꞌwẽmeꞌ, jiimeeçxaꞌ Dxusaꞌs wáa açeweꞌwesa yuꞌnjaꞌw jĩꞌtx.
10 Seenaꞌ ũusaçxana susteꞌ, komadanteꞌ Pabloꞌs ikhewáatxna sũhna ũukhçxa soldautx yuukaahçxa, Pabloꞌs kutxiꞌkhaakh pkhaakhesa ksxavxyu kuartel yatnay jxũna uꞌkhan.
11 Txãa kusteꞌ, Jesukristoꞌ Pabloꞌs vxyaaçxa naꞌwẽk weꞌwe:
—Pablo, ũukhnu. Ay Jerusalente naꞌwẽg weꞌwe adxna ptaꞌsxna, txãꞌwẽy weꞌwewaꞌj jiꞌphgu Romatewa jĩk.
Pabloꞌs ikhyaꞌ puutx weꞌweni
12 Kuskuskhẽꞌ judiuweꞌsx maaíi yuꞌ Pabloꞌs ikh wẽesa naꞌwẽtx puutx weꞌwe: Pabloꞌs ikhmeeçxa yuꞌ kĩh yuhwa ũꞌmeꞌnjaꞌw jĩna.
13 Txãꞌwẽ Pabloꞌs ikhmeeçxa yuꞌ kĩh yuhwa ũꞌyaꞌmée puutx weꞌwesaꞌ kuarenta piçthẽꞌj jxthaakwetx yuꞌ.
14 Txãꞌwẽ yũuwaꞌjaꞌs puutx weꞌweçxatx uꞌj sacerdote npiiçthẽꞌj vxiteꞌ judiu nthẽꞌjsaweꞌsx tasxna naꞌjĩna ptaꞌsxyaꞌ:
—Kweꞌsxaꞌ Pabloꞌs ikhmeeçxa yuꞌ kĩh yuhwa ũꞌmeꞌnjaꞌw jĩnathaꞌw puutx weꞌwe Dxus dxiꞌpte.
15 Açaꞌ ãçxhaꞌ iꞌkweꞌsx nthẽꞌjsaweꞌsx jxuka pkhaakheçxa mpẽjxwe komadanteꞌs: Kuskusaꞌ Pabloꞌs mkaah kweꞌsx tasxte, txajx yuweꞌs jwee ew paapẽjx yaꞌwathaꞌw jĩna. Naapkaçxhaꞌ kweꞌsxaꞌ ayte paꞌjmeyna ikhyaꞌ dxiꞌthe yupuꞌnjaꞌw jĩꞌtx.
16 Txãꞌwẽ puutx weꞌweçte Pablo npeꞌsx nçxiꞌk jiyuçxaꞌ, Pabloꞌs ptaꞌsxyaꞌ uꞌkh kuartel yatna.
17 Açaꞌ Pabloꞌ jiyuçxaꞌ, teeçx kpiitanaꞌs paꞌyaçxa naꞌwẽk weꞌwe:
—Naa luuçxaꞌs meen peꞌjna meꞌj komadante tasxna, txãa yakh puutx weꞌwewaꞌj jiꞌphaꞌ jĩteꞌ,
18 kpiitanaꞌ luuçxaꞌs peꞌjçxa komadante tasxte kũhçxa ptaꞌsxku:
—Karcelte ũssa Pabloꞌ adxaꞌs paꞌyaçxa naa luuçxaꞌs peꞌjna kaakh, ayte idx yakh puutx weꞌwewaꞌj jiꞌphaꞌ jĩteꞌ,
19 komadanteꞌ luuçxaꞌs kusete puꞌkisna uꞌjçxa paaçte pẽjxku:
—¿Kĩhga weꞌwe wẽjeꞌ? jĩteꞌ,
20 luuçxaꞌ ptaꞌsxku:
—Judiuweꞌsxaꞌ naꞌwẽtx puutx weꞌwe: Kuskusaꞌ idxaꞌs pẽyiꞌnjaꞌw Pabloꞌs kaakhan, judiu nthẽꞌjsaweꞌsx tasxna yuuweꞌs jwee ew pẽjxyaꞌwathaꞌw jĩçxa.
21 Nawa txãꞌwẽ dxihna sũhçxa Pabloꞌs kaahmeeneꞌga. Txãꞌwẽmeꞌ, piçthẽꞌj kuarenta jxthaakwesa Pabloꞌs ikhmeeçxa yuꞌ kĩh yuhwa ũꞌmeꞌnjaꞌw jĩna Dxus dxiꞌpte puutx weꞌweçxa dxiꞌthe yupna ũstaꞌ. Saꞌ idx maꞌjĩtewa txãꞌsçxáan ũythasna ũstaꞌ jĩteꞌ,
22 komadanteꞌ luuçxaꞌs naꞌjĩna weꞌweçxak kaah:
—Komadanteꞌs ptaꞌsxthu jĩna kim yuhnawa ptaꞌsxmeeneꞌga jĩçxa.
Neꞌjweꞌsx Fxelix tasxte Pabloꞌs kaahni
23 Txajũꞌ komadanteꞌ eꞌz kpiitantxi paꞌyaçxa Cesarea çxhabna uꞌjyaꞌ pheuꞌkhaakh. Doscientos soldau çxidaçxáa uꞌjwetxna, jibateweꞌsx setenta, vxiteꞌ lansa jiꞌphsa doscientos, saꞌ ayjxu kasejetxna kus las nwewete.
24 Saꞌ txãꞌwẽy Pablo aꞌjwaꞌj jibawa pheuꞌkhaakh, neꞌjweꞌsx Fxelix tasxte ikhmée ew dukhkahn.
25 Txãaweꞌsx yakh karta kaakh naꞌwẽ fxiꞌjçxa:
26 Klaudio Lisias fxiꞌjaçthu neꞌjweꞌsx Fxelixaꞌs weçxana.
27 Naa piçthẽꞌjaꞌs judiuweꞌsxaꞌ karcelte txahçxa ikhyaꞌwatx yuꞌ. Nawa romano nasatewa jiyuçxaꞌ, adxaꞌ soldau yakh uꞌjçxa nweꞌweth.
28 ¿Kĩh yũupaꞌgakiꞌtx txãꞌwẽ açeꞌ? sũhçxa jxũna uꞌth judiuweꞌsx nthẽꞌjsaweꞌsx tasxna.
29 Açaꞌ txãaweꞌsx ley paꞌgaçxáata txãꞌwẽ açeꞌ, nawa ikhyaꞌ yuꞌ ãjawaꞌjmeek yuꞌ saꞌ karcelte txajxaꞌwa ãjawaꞌjmeꞌ.
30 Nawa Pabloꞌs ikhyaꞌ yuuçxáa jĩna puutx weꞌweçxa yupna ũstaꞌ jĩniꞌs jiyuth. Txãasa iidx tasxte kajaçthu. Pabloꞌs açesatxwa weꞌweth kĩh yũupaꞌganeꞌkwe açeꞌ nawa neꞌjweꞌsx tasxte uꞌjçxa puutx weꞌweneꞌkwe jĩth. Txãꞌwẽçxáath idxaꞌs ptaꞌsxiꞌ jĩnak fxiꞌj.
31 Txajũꞌ soldauweꞌsxtxi txãꞌwẽ jxkaajxãꞌtheꞌ, Pabloꞌs peꞌjnaꞌwa kusçxáa uꞌjtx Antípatris çxhabna.
32 Kuskuskhẽꞌ soldau çxidaçxáa uꞌjsaꞌ kiꞌ sxawedtxi kuartel yatna, naapkaçxhaꞌ jibateweꞌsxaꞌ uꞌjtx Pablo yakh.
33 Cesarea çxhabte paꞌjçxaꞌ, kartaꞌs ũsnaꞌwa Pablonawa dukhtxi neꞌjweꞌsxaꞌs.
34 Txajũꞌ neꞌjweꞌsxaꞌ kartaꞌs lẽeyçxaꞌ pẽjxku Pabloꞌs: ¿Majũweꞌsxga? jĩna. Saꞌ Ciliciajũweꞌsxtewa jiyuçxaꞌ,
35 naꞌwẽk weꞌwe:
—Iidx yuuweꞌs jiyuꞌnja idxna açesaweꞌsx pãatxhĩꞌkhyaꞌ paꞌthe jĩk.
Txajũꞌ Pabloꞌs Herodes txaahni yatte kxuuphku thegwaꞌjsa txahçxa.
