Hechos 24:1-27
24 Tahç enteꞌ sacerdote npiiçthẽꞌj Ananiasaꞌ paꞌkh Cesarea çxhabte judiu nthẽꞌjsaweꞌsx yãꞌjçxa, saꞌ teeçx yuwee puꞌçxsa Tértulo yaasesaꞌsku peꞌjçxa paꞌj. Txãaweꞌsxaꞌ utxaatx neꞌjweꞌsx tasxte Pabloꞌ ewmeesaꞌ jĩna pãatxhĩꞌkhyaꞌ.
2 Txajũꞌ Pabloꞌs nuykũhteꞌ, Tértuloꞌ Fxelixaꞌs ptaꞌsxku:
—Weçx uꞌpuꞌga, neꞌjweꞌsx. Iidx jxkaahnite, mteewa wẽt fxiꞌzena ũsthaꞌw.
3 Mteewa txãꞌwẽçxaçxáa wẽt fxiꞌzena ũsthaꞌw, Fxelix idx txãꞌwẽ ew yũupaꞌga. Txãasathaꞌw wala weçxáꞌ.
4 Nawa idxaꞌs jwee yuꞌ en kaavxituꞌjyaꞌwameeth, dudte meen mwẽeseꞌj kweꞌsx weꞌweniꞌs.
5 Naa piçthẽꞌjaꞌ iiméh seenaꞌ ewmeesatewa kweꞌsxaꞌ kpajkxthaꞌw. Maa kiwesuwa jxuka judiuweꞌsxtxi txuhdena puii kiisna ũsaꞌ. Saꞌ txãaíi Nasarethuweꞌsxaꞌs nwẽeseꞌjsa npiiçthẽꞌjaꞌ.
6 Dxuus yatte yuhwa nasa pkalsatx kaꞌgaꞌjyaꞌwak yuꞌ kazx vxitna. Txãa paꞌga kweꞌsxaꞌ tudthaꞌw, kweꞌsx ley maꞌwẽ jxkaatheꞌ kxtey yuuyaꞌ.
7 Nawa komadante Lisias kweꞌsx yakh jaꞌda wala juunaꞌ kũhçxa kusaꞌkh,
8 saꞌ açesaweꞌsxaꞌ neꞌjweꞌsx tasxte pãatxhĩꞌkhyaꞌ uꞌjwetxna jĩnak jxkaah. Kweꞌsx weꞌweniꞌ ĩsxiinimée jxuka isatewa jiyuyaꞌ idx yuu mpẽjx naa piçthẽꞌjaꞌs jĩnak weꞌwe.
9 Txajũꞌ judiuweꞌsx kxte ih ũssawa txãꞌ jxuka isasa yujaꞌ jĩna weꞌweteꞌ,
10 neꞌjweꞌsxaꞌ kuseju ptaꞌsxku Pabloꞌs weꞌwekahn. Açaꞌ Pabloꞌ naꞌwẽk weꞌwe:
—Adxaꞌ jiith idxaꞌ wala kuh anxu yãꞌj kweꞌsx kiwete jxkaahna ũsgu. Txãa paꞌga adxaꞌ iidx dxiꞌpte ũukhmée pasyaꞌwath adx maꞌwẽsaçxawa.
11 Idx yuu mpaapẽjx txãaweꞌsx weꞌweniꞌ isa dxihtewa jiyuyaꞌ. Dxusaꞌs Jerusalente neeweꞌweyaꞌ adx paꞌjni doce ençxáa yuuçaꞌ.
12 Adxaꞌ txãa doce ensuꞌ dxuus yatte nasatx kaapuiꞌjna judiuweꞌsx pkhaakheni yat-su çxhabte msuu yuhwa txãꞌwẽ yũuna ũsuꞌçmeeth.
13 Açaꞌ ewmée yũunisaꞌ naataꞌ jĩna ãate kaavxyaꞌjaꞌjyaꞌ yuꞌ kim yuhwa ãjameetxna naa nasaꞌ.
14 Nawa ãateth ptaꞌsxiꞌ Dxus tasxte paꞌjwaꞌj dxiꞌjaꞌs ãçxh uꞌse kaajiyuꞌjnisaꞌ ĩsxiinisaꞌ jĩꞌtx txãꞌsnath nwẽeseꞌjeꞌ kweꞌsx yaçgaweꞌsxtxi jxpeꞌjsa Dxusaꞌs selpiina. Saꞌ txãꞌwẽ Dxus jxkaahni leyte fxiꞌjni vxiteꞌ Dxus yuwe ptaꞌsxsaweꞌsx fxiꞌjnitx jxukath kxtey nwẽeseꞌjeꞌ.
15 Txãaweꞌsxwa maꞌwẽneꞌta Dxusaꞌs nwẽeseꞌjna yaakiꞌ txãꞌwẽyçxáath adxwa nwẽeseꞌjna yaakiꞌ. Uusaaweꞌsxaꞌ kiꞌ ĩtxi yuutxna ewsa maꞌtx yuu meeçxaꞌ ewmeesa maꞌtx yuu nawa jaꞌdaçxah sũhnath yaakiꞌ.
16 Txãasath Dxus dxiꞌpte vxiteꞌ piçthẽꞌjweꞌsx dxiꞌptewa yuuwemée fxiꞌzewaꞌjaꞌs paꞌpçxuꞌ.
17 Adxaꞌ vxite kiwesu maz anxu pekũhna uꞌjuçxaꞌ, adx kiwen uꞌth judiuweꞌsxtxi vxyu peesyaꞌ kaahnitx dukhna Dxus ofxredaꞌswa ũsyaꞌ.
18 Adxaꞌ txãꞌwẽ yũuna ley jxkaahniꞌswa kiꞌsna jxãꞌjçxa dxuus yatte ũspkaçxhaꞌ, judiuweꞌsx Asia kiwejuweꞌsx paꞌjçxa dxuus yatte uytxi. Nawa nasatx kĩh yuhwa kaapuiꞌjna ũsuꞌçmeeth.
19 Txãꞌwẽ uysaaweꞌsx ayte pãatxhĩꞌkhyaꞌ yuuwaꞌj jiꞌphtaꞌ, adx ewmée yũuna ũstewa uyçxaꞌ.
20 Meeçxaꞌ komadante pkhakhte judiu nthẽꞌjsaweꞌsx vxiteꞌ sacerdote npiiçthẽꞌjweꞌsx kxte ũssa iꞌkweꞌsxçxáawa adx ewmée yũuniꞌs uywáꞌkwe naꞌ mpeetaꞌsxwe.
21 Adxaꞌ kxte ũsçxaꞌ, Uusaaweꞌsxaꞌ kiꞌ ĩtxi yuutxna jĩnaçxáath weꞌwe txãꞌsna wáꞌkwe ewméek yuu sũjuꞌkx jĩk.
22 Fxelixaꞌs ew yãꞌkh ptaꞌsxni yuꞌ, txãasak txãꞌwẽçxáa wẽseꞌjçxaçxáa:
—Komadante Lisias paꞌthe, txãa yuweꞌs pheuꞌjuꞌnja jĩçxa nvxiht.
23 Txajũꞌ Fxelixaꞌ kpiitanaꞌs jxkaakh:
—Pabloꞌs txhweetenu. Nawa jwee jxthaakwe juunaꞌ yũumée miipeꞌj, saꞌ txajx namikuweꞌsx yakh puutx weꞌwewaꞌjaꞌswa mes jĩk.
24 Maz en skhẽwniiteꞌ, Fxelixaꞌ txajx nyu Drusila yakh kiꞌ kũhçxa Pabloꞌs paꞌya kaakh, Jesukristo ptaꞌsxniꞌs weꞌwekahn. Txãa uꞌyaꞌ judiuk yuꞌ.
25 Açaꞌ Pabloꞌ ptaꞌsxku Dxus dxiꞌpte ew fxiꞌzewaꞌjaꞌ, saꞌ peekx kakweꞌs ewmée yũuna jxpeꞌjwaꞌjmeꞌ. Txãꞌwẽmeꞌ, nmeh enteꞌ Dxusaꞌ kastigaĩna jĩna weꞌweteꞌ, Fxelixaꞌ wala ũukhçxa naꞌwẽk weꞌwe:
—Ãçxhíi yuꞌ txãꞌwẽçxáa mpeetaꞌsx. Vxite ente adx en jiꞌphuçxa kiꞌ paꞌyaꞌnja jĩk.
26 Pabloꞌ vxyu dukheꞌnja txhwetekahn jĩwáana sũhçxak txãꞌwẽ maz uswa paꞌya Fxelixaꞌ txãa yakh puutx weꞌweyaꞌ.
27 Txãꞌwẽ eꞌz anxupkaçx Pabloꞌs karcelte jxpeꞌjna ũsçxaçxáa Fxelixaꞌ neꞌjweꞌsx kasejk, açaꞌ vxite neꞌjweꞌsx Porcio Fxestok uꞌka. Nawa Fxelixaꞌ judiuweꞌsx yaaçeni fxiꞌze wẽemeeçxa, Pabloꞌs karcelte nvxihtku.
