Hechos 26:1-32
26 Txajũꞌ Agripaꞌ naꞌwẽk Pabloꞌs weꞌwe:
—Idx kĩh yũuna fxiꞌzeçxawa mpeetaꞌsx jĩteꞌ, Pabloꞌ kuseꞌs kiisçxa naꞌwẽk ptaꞌsx:
2 —Judiuweꞌsxaꞌ adxaꞌs ewmeesaꞌ jĩnatx pãatxhĩꞌkheꞌ txãꞌsaꞌ jxkaahsa Agripa iidx dxiꞌpte ãate ptaꞌsxwaꞌjaꞌs jiꞌphuçxaꞌ wala weçxaꞌth.
3 Idxaꞌ jxuka ew jiig kweꞌsx judiu jiꞌj fxiꞌzeni vxiteꞌ naꞌwẽ fxiyfxiyçxah yajkxçxa puutx weꞌweꞌthaꞌw txãꞌsna. Txãasa wejx waꞌlmée mwẽeseꞌj.
Kristoꞌs jxpaꞌgamey Pablo fxiꞌzeni
4 Adx leꞌçxkuẽjũjx maꞌwẽneꞌtka fxiꞌze adx kiwete vxiteꞌ Jerusalente txãꞌsaꞌ judiuweꞌsx jxukaysa jiitaꞌ.
5 Fxariseoweꞌsxaꞌ seenaꞌ juunaꞌ jxkaajaꞌtx Dxus leyaꞌs jxuka kxtey yuukahn adxaꞌ txãateweꞌsxthu yuꞌ piçtakxtey, açaꞌ txãaweꞌsxaꞌ jiitaꞌ naꞌ txãꞌsaꞌ ptaꞌsxyaꞌ ãjatxna waꞌlmeeçxa yuꞌ.
6 Dxusaꞌ kweꞌsx yaçgaweꞌsx yakh puutx weꞌweçxa uusaaweꞌsxtxi kiꞌ ĩtxĩ vxit-yaꞌ neeyũuk txãꞌsaꞌ kxtey yuuna sũhnath fxiꞌzeꞌ, naa paꞌga yuuçxáatx paapẽjxyaꞌ ayte nuypaꞌj.
7 Jxkaahsa Agripa mjiyu: Israelweꞌsx docesate jiꞌj jxukaysatx kiꞌ ĩtxi yuuwaꞌjaꞌs ũythasuꞌ, txãasatx een isa petx kus Dxusaꞌs selpiꞌ. Txãꞌwẽ yũuwaꞌjaꞌs ũythaspaꞌga yuuçxáatx judiuweꞌsx adxaꞌs ewmeesaꞌ jĩçxa açeꞌ.
8 Dxusaꞌ txãꞌwẽ uusaaweꞌsxtxi ĩtxi vxituna ¿sũjuꞌçmeekweꞌ wakx iꞌkweꞌsxwa?
Dxus yakh fxiꞌzesatx pkxuuniꞌs ptaꞌsxni
9 Adxaꞌ nyafxíiaꞌ Jesus Nasarethuweꞌsxaꞌs ahçeçxa kĩhwa yuꞌnja sũhçxa,
10 Jerusalente sacerdote npiiçthẽꞌjweꞌsx jxkaatheꞌ, Jesus kaapiyaꞌjniꞌs nwẽeseꞌjsaweꞌsx maazkuẽesatxwa karcelte txahth. Saꞌ ikheçte uyçxaꞌ, ew yuh yuuçtaꞌ sũhnath fxiꞌzeꞌ.
11 Maazkuẽe uswa iipkxuuth, Jesus yaseꞌs açeweꞌwekahn. Msuuwa judiuweꞌsx pkhaakheni yat-su txãꞌwẽçxaçxáath yuu. Saꞌ seenaꞌ pxũuskwe yuuteꞌ, vxite kiwesuwa uꞌth, txãꞌwẽy ahçeçxa pkxuuyaꞌ.
Pabloꞌ Dxus yakh fxiꞌzeyaꞌ utxaniꞌs kiꞌ ptaꞌsxni
(Hch 9.1-19; 22.6-16)
12 Txãꞌwẽ yũuyaꞌ sũhçxa, Damasko dxiꞌj uꞌjweçthu yuꞌ, sacerdote npiiçthẽꞌjweꞌsx kaahni.
13 Nawa jxkaahsa mwẽeseꞌj: dxiꞌthe uꞌjweçte ẽepxãh yuuçpkaçxhaꞌ, sekte jxthaakwe eenaꞌsa ẽejũ kweethku adx vxiteꞌ piꞌkxna yuusáa jxukaysatx.
14 Txajũꞌ jxukaysa wetethaꞌw, naapkaçxhaꞌ adxaꞌ wẽseꞌth hebreo yuweju naꞌwẽ weꞌweniꞌs: Saulo, Saulo, ¿kĩjxaꞌga adxaꞌs ahçeçxa pkxuuyaꞌ pakwéꞌ? Idxaꞌ peekíiçxáa yaꞌkpãꞌyuuwaꞌjaꞌs pakwena ũsgu jĩteꞌ,
15 pẽjxthu: ¿Idxaꞌ kimga? jĩteꞌ, ptaꞌsxku: Adxaꞌ Jesusthu, idx naꞌwẽ ahçeçxa pkxuuyaꞌ pakweꞌg txãath.
16 Nawa ãçxhaꞌ mkiite. Ãçxh naꞌwẽ vxyaath saꞌ vxite entewa vxyaꞌnja, açaꞌ txãꞌwẽk vxyaa jĩna mteewa ptaꞌsxyaꞌ uꞌjweneꞌga adxna selpiina.
17 Idxaꞌs nweꞌweꞌnja judiuweꞌsx kuseju, saꞌ judiu jiꞌjmée vxite nasa kiwesu kajaçthu kxsũwa nweꞌweꞌnja.
18 Txãaweꞌsx tasxsu kajaçthu, açaꞌ idxaꞌ txãaweꞌsx yafxtxi phaadeneꞌga, peena yuꞌ çxhiꞌdxte fxiꞌzemée eenaꞌsaꞌs uykahn, saꞌ eçxthẽꞌj kusete fxiꞌzemée Dxus yakh fxiꞌzekahn. Adxaꞌs jxpaꞌgasaꞌ txãaweꞌsx pkaltxi peltunãyni neeyũuçxa cielute ũswaꞌjaꞌs jxpaꞌgatxna Dxus txhitxhnisaweꞌsx yakh jaꞌdaçxah jĩk adxaꞌs.
Pabloꞌs Kristo vxyaaçxa jxkaahniꞌs kxtey nwẽeseꞌjni
19 Agripa, idxaꞌsthu ptaꞌsxiꞌ: Txãꞌwẽ vxyaaçxa weꞌweniꞌs waꞌlmée kxtey nwẽeseꞌjçxa
20 Damaskote ũssaweꞌsx khuẽꞌytxi ptaꞌsxthu Dxus yuweꞌs, eꞌsuꞌ Jerusalente, vxiteꞌ Judea kiwesu jxuka. Saꞌ judiu jiꞌjmée vxite nasatxwa piꞌkxthu, pkaltxi nvxihtçxa Dxusaꞌs pakweçxa ew yũuna mfxiꞌzewe jĩna.
21 Txãꞌwẽ yũupaꞌgatx judiuweꞌsxaꞌ dxuus yatte adxaꞌs tudçxa ikh wẽe.
22 Nawa Dxus puꞌçxteꞌ, ãçxpkaçx Dxus yuweꞌs leꞌçxkwe yuhwa jxpubameeth ptaꞌsxna fxiꞌzeꞌ jxtuhthesa maꞌtx yuu maꞌwẽsatxwa jxukaysatx. Saꞌ Dxus yuwe ptaꞌsxsaweꞌsx vxiteꞌ Moises ptaꞌsxni txãaju bagaçxte yuhwa fxiy yuꞌ ptaꞌsxiꞌçmeeth.
23 Txãaweꞌsxaꞌ naꞌwẽtx ptaꞌsx: Dxus tasxuh yuusa Kristoꞌ wala pxthaa yuuçxa uuçxawa kiꞌ txãa khuẽꞌy ĩtxĩ yuuna, saꞌ eenaꞌte fxiꞌzewaꞌjaꞌs ptaꞌsxina kweꞌsx jiꞌjtx txãꞌwẽy vxite kiweju nasatxwa jĩnatx ptaꞌsx. Txãꞌwẽyçxáath adxwa ptaꞌsxiꞌ.
Pabloꞌ Agripaꞌs Kristo tasxte kuutxaꞌjaꞌjdxijk
24 Pablo txãꞌwẽ weꞌweteꞌ, Fxestoꞌ naꞌjĩnak sus weꞌwe:
—Pablo, luuku yuunig. Jwee wala piyaçxaneꞌga txãꞌwẽ luuku yuu jĩteꞌ,
25 Pablo pasçxaꞌ:
—Neꞌjweꞌsx Fxesto idxaꞌ mjiyu: Adxaꞌ luukumeeçxa íith ũus yajkxçxa jxpubamée isasaçxáana ptaꞌsxiꞌ.
26 Txãa yuweꞌs jxkaahsa Agripa ayte uꞌpaꞌ txãawa ew jiiaꞌ. Txãa paꞌgath adxaꞌ thaamemée ptaꞌsxiꞌ txajx dxiꞌpte. Naa yuweꞌ paaçte sũthçxa weꞌwenisameꞌ. Txãa paꞌga jxkaahsawa txãa yuweꞌs ew jiina sũjuꞌth.
27 ¿Dxus yuwe ptaꞌsxsaweꞌsx weꞌweniꞌs ew jiiyuhmeegáꞌ wakx, jxkaahsa Agripa? Idxaꞌ jiiyuhneꞌga sũjuꞌth jĩteꞌ,
28 Agripaꞌ naꞌwẽk weꞌwe:
—Adxaꞌs Kristo juꞌgu vxit-yaꞌ leꞌçxkuẽeg pejíi jĩteꞌ,
29 Pablo weꞌweçxaꞌ:
—Leꞌçxkuẽe maꞌk pejíi meeçxaꞌ wala maꞌk pejíi nawa idxçxáamée, ayte ãçxh wẽseꞌjna ũstaꞌ txãaweꞌsx jxukaysatxku Kristo juꞌgu yuu jxthãasuꞌ Dxusaꞌ, adxwa maꞌwẽtka Kristo juꞌgu yuu txãꞌwẽy, nawa kadenaju tudnimée.
30 Pablo txãꞌwẽ weꞌweteꞌ, jxukaysa kiitetx, jxkaahsa, neꞌjweꞌsx, Berenice kxte ih paꞌjsa jxuka.
31 Saꞌ fxiitx txuteena uꞌj, naꞌjĩna puutx weꞌweyaꞌ txãaweꞌsx pweꞌsx:
—Naa piçthẽꞌjaꞌ kĩh yuhwa yuuwemeesaꞌ ikhkahn yuuwa. Saꞌ karcelteçxáa yuhwa ũswaꞌj jiꞌphmeꞌ jĩçxaꞌ,
32 Agripaꞌ naꞌwẽk weꞌwe Fxestoꞌs:
—Txãꞌwẽ txãaíi Cesar paapẽyni wejx ewna jĩmeewaçaꞌ, naa piçthẽꞌjaꞌs txhweteyaꞌ ewna jĩk.
