Hechos 27:1-44
27 Italia kiwen kweꞌsxtxi kaajxaꞌ puutx weꞌweyãꞌjçxaꞌ, Pablo vxite preesu yãꞌjçxa dukhtxi Batalxón Augusto yaasesate kpiitan Julio kusete.
2 Txajũꞌ Adramitio çxhabte barko Asia kiwen uꞌjsate khẽethaꞌw, açaꞌ Aristarkowa yuweꞌk, Macedonia kiwete Tesalónika çxhabteweꞌsx.
3 Kuskuskhẽꞌ Sidón çxhabte paꞌthaꞌw. Açaꞌ kpiitan Julioꞌ Pabloꞌs namiku yat-suk paꞌjyaꞌ kaah txãaweꞌsx sãꞌjĩkahn. Txãa kpiitanaꞌ Pablo yakh wala ewsa yuꞌk, txãasak txãꞌwẽ yũu.
4 Sidón çxhabuh kasehçxaꞌ, Çxipre kiweꞌs jebu juꞌguthaꞌw nvxihtna khẽw, wejxa yuppaꞌga.
5 Txajũꞌ Cilicia Panfxilia kiwesu utxa skhẽwna uꞌjçxa, Lisia kiwete Mira çxhabtethaꞌw paꞌj.
6 Kxteaꞌ soldau kpiitanaꞌ teeçx barko Alejadriajuweꞌsx Italia kiwen uꞌjsaꞌsku uy. Saꞌ kweꞌsxtxi kxtek kaatekaꞌj txajũ kiꞌ uꞌjyaꞌ.
7 Nawa txãꞌwẽ wejxa yupna ũsteꞌ, wala kuh en tuudkuẽçxah uꞌjçxa, wala thẽy paꞌthaꞌw Gnido çxhab dxiꞌpte. Txajũ uꞌjçxaꞌ, Salmon kiwee dxiꞌpsuthaꞌw skhẽw, Kreta kiwesu taꞌguna.
8 Saꞌ txãa kiwe pukasu wala thẽy uꞌjçxa, teeçx ahte paꞌthaꞌw Bwenos Pwertos yaasesate. Txãꞌ Lasea çxhab utxatek neeyũꞌ.
9 Txãꞌwẽ thẽy uꞌjçxa wala en ivxiitpaꞌga, nus paꞌjwaꞌj en utxaak ĩkhte uꞌjwaꞌj seenaꞌ ũukhũukhsa. Txãa paꞌgak Pabloꞌ yuꞌkxpeh
10 naꞌjĩna:
—Jxukaysa mwẽeseꞌjwe, kweꞌsx uꞌjwaꞌjaꞌ wala ũukhũukhaꞌ. Barko petx karga vxituna, açaꞌ kweꞌsxwa uuwaꞌjaꞌs jiꞌphuwáꞌnjaꞌw.
11 Txãꞌjĩtewa, soldau kpiitanaꞌ Pabloꞌs nwẽeseꞌjmée barko namu vxiteꞌ barko thegsaweꞌsx weꞌweniçxáꞌsku nwẽeseꞌj.
12 Kxte çxhabaꞌ nus ente ũswaꞌj ewmeek yuꞌ. Txãa paꞌgatx jxukaysa uꞌjyaꞌ yajkx Kreta kiwete Fxenice çxhabte paꞌjçxa nus enaꞌs kxte yuꞌskhẽwyaꞌ sũhçxa, Fxenice çxhabteꞌ nus ente ũswaꞌj ũukhũukh meek yuꞌ naa paꞌga.
Mar pxãhte wejxaa wala kiiteni
13 Bwenos Pwertos yaasesajũ kasejeçte yuꞌ, wejkuẽçxáak wejxana ũsuꞌ, açaꞌ Fxenice çxhabte paꞌjyaꞌ ãjawáꞌnjaꞌw sũhçxa uꞌjtx Kreta kiwe pukasu tuudkuẽçxah.
14 Nawa wejkuẽ uꞌjweçpkaçxhaꞌ, wejxaa wala kweꞌsx uꞌjwaꞌj dxiꞌpuh sẽhçxa barkoꞌs yupku.
15 Saꞌ txajũyãꞌjaꞌ maꞌwẽwa jxũna uꞌkh. Açaꞌ barkoꞌs kaajxaꞌ ãjameeyãꞌjçxaꞌ, kuçx yuumeethaꞌw wejxa maꞌwẽwa jxũna uꞌkhan.
16 Ĩkh pxãhte kiwe leꞌçxkuẽsa Klauda yaasesa eꞌssuthaꞌw skhẽw, kxsũaꞌ wejxa txakwe çxhãçxhameek ũs yuꞌ. Açaꞌ barko leꞌçxkuẽ jxũçxa uꞌjnisaꞌs wala thẽyçxáawa kaatekaꞌjyaꞌ ãjãthaꞌw barko walate.
17 Txajũꞌ barko walaꞌs lasu walaju pxãjũjx tudthaꞌw suweekahmen. Saꞌ txitx wala Sirte yaasesate wáa waçuyaꞌ uꞌjwena sũhna ũukhçxa, ẽete tela walaꞌs spajkxtxi wejxa maꞌwẽwa barkoꞌs jxũna uꞌkhan.
18 Txãꞌwẽ wejxa seenaꞌ çxhãçxha ũsteꞌ, kuskuskhẽꞌ kargaꞌs ĩkhkhẽ pũsxyaꞌ takhtxi.
19 Açaꞌ tekh en yuuçteꞌ, kweꞌsxíiwa ĩkhkhẽ pũsxyaꞌ puꞌçxthaꞌw barko ẽseekahn.
20 Txãꞌwẽ wejxa seenaꞌ yuuna ũsteꞌ, sek, estrelxa, kĩh yuhwa vxyaameetaꞌ maazkuẽe enwa. Açaꞌ kweꞌsx yuuwa ĩtxĩ yuumeꞌnjaꞌw sũhwaꞌjaꞌsçxáathaꞌw jiꞌphuꞌ.
21 Txãꞌwẽ maazkuẽe en kĩh yuhwa ũꞌmée yuhna ũssatx Pabloꞌ naꞌwẽk weꞌwe:
—Iꞌkweꞌsxaꞌ adx weꞌweniꞌs nwẽeseꞌjçxa Kreta kiwejũ kasehmeewaçaꞌ, naꞌwẽ nxus knayna ivxiituwaꞌjmeeneꞌtkaꞌw yuꞌ.
22 Nawa ãçxhaꞌ ũukhnuwe. Ayte uꞌjsa kim yuhwa uumeetxna, makwe barko yuꞌ suweeçxa vxitutewa.
23 Adxaꞌ Dxusna selpisaath, açaꞌ ãçxh kus Dxus angel vxyaaçxa
24 naꞌwẽk weꞌwe: Pablo, ũukhnu. Idxaꞌ Romate jxkaahsa tasxte utxaawaꞌj jiꞌphgu, açaꞌ txãa paꞌga Dxusaꞌ nweꞌweyaꞌwaꞌ ay barkote uꞌjsa jxukaysatx jĩk.
25 Txãa paꞌga iꞌkweꞌsxaꞌ ũukhmée çxhãçxha miiyajkxwe. Adxaꞌ Dxusçxáanath yaakiꞌ, angel weꞌweniꞌ kxtey yuuna sũhna.
26 Saꞌ ĩkh pxãhte kiwe leꞌçxkuẽsate nvxiitni yuꞌnjaꞌw jĩk Pabloꞌ.
27 Adria ĩkhte wejxa jxũna uꞌjni eꞌz kiꞌsu ãjaçteꞌ, txãa kuspxãh yuuçpkaçxhaꞌ, barkote thegsaweꞌsxaꞌ kiwe utxasu uꞌjweççxatx jiyu.
28 Saꞌ makhwe ĩkh dxiitewa jiyuyaꞌ isatx, açaꞌ treinta y seis metroçxáak dxii yuꞌ. Txajũꞌ yaç yaçte uꞌjçxa kiꞌ isatx, açaꞌ kxteaꞌ weintisiete metroçxáak dxii yuꞌ.
29 Txajũꞌ penxate wáa iikaꞌnjaꞌw sũhna ũukhçxa, barkoꞌs neewewaꞌjsa pahz çam walatx ĩkhkhẽ akh barko eꞌskhẽ, wejxa jxũna uꞌkhamen. Saꞌ wala ũukhna ũythastxi khijkxpkaçx.
30 Naapkaçxhaꞌ barkote thegsaweꞌsxaꞌ barko yaçkhẽ vxite çam walatx ĩkhkhẽ akheçthaꞌw jĩnaçxáa barko leꞌçxkuẽꞌs ĩkhkhẽ spaakiçtxi yuꞌ, txãate khẽeçxa kasehna uꞌj wẽeçxa.
31 Nawa Pabloꞌ ptaꞌsxku soldau kpiitan vxiteꞌ soldauweꞌsxtxi:
—Naaweꞌsxaꞌ barkojũ kasehna uꞌtheꞌ, iꞌkweꞌsxaꞌ ĩtxi yuumeeneꞌkwe jĩteꞌ,
32 soldauweꞌsxaꞌ barko leꞌçxkuẽ tudni lasutx spẽꞌthçxa ĩkhkhẽ wãatahtx barko leꞌçxkuẽꞌs.
33 Txajũꞌ Pabloꞌ kusíitey neeweꞌwek jxukaysatx kĩhçxáawa ũꞌkahn:
—Iꞌkweꞌsx dehmée txãꞌwẽy ũꞌwamée ũsni eꞌz kiꞌsu yãꞌj yuuçaꞌ.
34 Açaꞌ iꞌkweꞌsxtxi neeweꞌweꞌth kĩhçxáawa ũꞌkahn. Txãꞌwẽmeꞌ, kasejxaꞌ yaꞌçxhãçxhameena. Ãçxhaꞌ ũukhnuwe. Iꞌkweꞌsx maa yuhwa vxitumeeneꞌkwe.
35 Txãꞌjĩnaꞌwa, Pabloꞌ jxukaysa dxiꞌpte Dxusaꞌs weçxaçxa panaꞌs ũꞌk.
36 Txajũꞌ jxukaysa wejx ũukhmée txãaweꞌsxwa ũꞌtx.
37 Barkote uꞌjsa jxukaçxah yuꞌ doscientos setenta y seis nasathaꞌw yuꞌ.
38 Kĩh ũꞌ wẽeçxawa txãꞌsna ũꞌna jxãꞌjçxaꞌ, skuutxhaꞌs ĩkhkhẽ pũsxthaꞌw barko jweeíiçxáa ẽseekahn.
Barko ĩkh dxiikhẽ khẽeni
39 Khijkxna jxãꞌjniteꞌ, barkote thegsaweꞌsxaꞌ jiyumeetaꞌ maa kiwete paꞌjçxawa. Nawa ĩkh pukasu kiwe ukwesa uꞌpte uyçxaꞌ, kxte nuypaꞌjyaꞌ ãjãwáꞌnjaꞌw sũhçxa kxtetx uꞌjyaꞌ yajkx.
40 Saꞌ çam wala ĩkh dxiikhẽ akhnisa lasutx spẽꞌthnaꞌwa, telaꞌs ẽete kiꞌ kiisçxa, barkoꞌs tuudkuẽçxah jxũna uꞌjtx ukwete paꞌjyaꞌ.
41 Nawa teeçx ahte ĩkh jwee yuꞌ dxiimeete yuꞌ seenaꞌ çxhãçxha ukapajkxna ũsuꞌk kxtek kũjxaꞌ uꞌj barkoꞌ. Açaꞌ barko ĩçhaꞌ kiwete waçuna kũhteꞌ, maꞌwẽ yuhwa ẽsemeꞌ, naapkaçxhaꞌ barko eꞌsu yuꞌtũçxhasáa ujkana kũhçxa jxuka suwuuçku yuꞌ.
42 Txãꞌwẽ yuuçteꞌ, soldauweꞌsxaꞌ preesutx jxuka ikhyaꞌwatx yuꞌ, pehdna kasehçxa iyuweꞌsxte.
43 Nawa soldau kpiitanaꞌ Pabloꞌs nweꞌweyaꞌ yajkxku, saꞌ kiikheꞌjmeeçxa naꞌwẽk jxkaah:
—Maawa pehdxaꞌ jiisaꞌ iꞌkweꞌsx khuẽꞌy yaçte meꞌjwe,
44 naapkaçxhaꞌ vxiteꞌ taplasu mkhẽewe, meeçxawa barko peꞌlasu txãꞌwẽ yũuçxa mkaasehwe jĩteꞌ, txãꞌwẽ yũuçxa jxukay kiwete paꞌthaꞌw uumée.
