Hechos 28:1-31
28 Kxte jxukaysa uumée paꞌjçxathaꞌw jiyu txãa ĩkh pxãhte kiweꞌ Maltaga yaase yuꞌ.
2 Kxte uꞌpsa nasaꞌ kweꞌsxtxi waꞌlmée jxpaꞌgaçxa, ipx wala yuthçxa kweꞌsxtxi bajçxyaꞌ piꞌkxtxi, nus txãꞌwẽ wala paꞌjna ũspaꞌga.
3 Txajũꞌ Pabloꞌ eꞌkx uhdx pkhakhçxa, ipxte ãsxiçku yuꞌ, naapkaçxhaꞌ txãa ipx pxãjũ ul weeswee ũphna kasehçxa Pablo kusetek waꞌkx.
4 Txãꞌwẽ Pablo kusete ul waꞌkxteꞌ, kxte ũssaꞌ naꞌwẽtx weꞌwe txãaweꞌsx pweꞌsx:
—Naa piçthẽꞌjaꞌ nasa ikhsana. Makwe ĩkhte yuꞌ uumeetewa, Dxusaꞌ ĩtxi uꞌju jxthãasmeeneꞌ jĩꞌtx.
5 Açaꞌ Pabloꞌ kuseꞌs yahtaçxa ulaꞌs ipxkhẽ akhku, nawa txajx kuse yuꞌ kĩhwa yuumeꞌ.
6 Açaꞌ nasa thegna ũssa yuꞌ ¿Maꞌwẽn uukx? sũhna jxukaysa ũythasnatx ũsuꞌ. Nawa kĩhwa yuumeyna wala txaçx yuuteꞌ:
—Pabloꞌ nasa ikhsamée wejxwa Dxusna jĩꞌtx.
7 Txãa kiwete teeçx neꞌjweꞌsx jxtuhthesa uꞌpuꞌk Publio yaasesa. Txajx uuthasx jaꞌdatetkaꞌw paꞌj kweꞌsxaꞌ, açaꞌ txãa piçthẽꞌjaꞌ kweꞌsxtxi wala ew jxpeꞌkh tekh enpkaçx.
8 Txãa ensuꞌ Publio neyaꞌ ãçaꞌnaga ũsuꞌ kakwesekte eeçxáa uçxiꞌçxçxa. Açaꞌ Pabloꞌ thegyaꞌ uꞌjçxa, peekizeçxa Dxus yakh puutx weꞌweteꞌ, çxhãçxhak.
9 Txajũꞌ txãa kiwete vxite ãçaꞌsaweꞌsxwa paꞌjçxaꞌ, jxuka katxhiçxatx neeyũu.
10 Txajũꞌ kweꞌsxtxi wala peeygãhçxa kĩjkĩhwa dxiꞌthe peejiniꞌs jxukatx pees, barkote khẽeçxa kiꞌ uꞌjyaꞌwagaçxhaꞌ.
Roma çxhabte Pablo paꞌjni
11 Malta kiwete tekh aꞌte ũsçxaçxáa, Alejadría kiwejuweꞌsx barko kxte ũsuꞌk nus pĩipkaçx txãate khẽeçxathaꞌw uꞌj. Txãa barkoꞌ yaçte eꞌz dxus ĩtximeesatxku piisani jiꞌphuꞌ, Kastor vxiteꞌ Polux yase jiꞌphsa.
12 Txajũ kasehçxaꞌ, Sirakusa çxhabte paꞌjçxa, tekh enthaꞌw ũsuꞌ.
13 Txajũ kiꞌ uꞌthaꞌw kiwe pukagaçxaçxáa, saꞌ Regio çxhabtethaꞌw paꞌj. Kuskuskhẽꞌ eꞌsu wejxa sẽhteꞌ, thẽymée uꞌjyaꞌ ãjaçxa eꞌz enkhẽꞌ Puteoli çxhabte paꞌthaꞌw.
14 Kxteaꞌ puutx uythaꞌw yakhthẽꞌjweꞌsxtxi, açaꞌ txãaweꞌsxaꞌ piꞌkxtxi txãaweꞌsx yatte teeçx kiꞌsu ũskahn. Txajũ kasehçxathaꞌw Roma çxhabna uꞌj.
15 Romate yakhthẽꞌjweꞌsxaꞌ kweꞌsx yuhtewa jii yãꞌtha yuꞌ, saꞌ teeçx ahte Tres Tabernas yaasesa utxate teeçx çxhab ũsuꞌk Fxoro de Apio kxteta puꞌthegyaꞌ yuwéꞌ. Açaꞌ Pabloꞌ txãaweꞌsxtxi uyçxaꞌ, Dxusaꞌs wala weçxana ũuste wẽt wẽtku yajkx.
16 Romate paꞌjnaꞌwa, soldau kpiitanaꞌ vxite preesutxiꞌ dukhku kxte karcelte thegsa npiiçthẽꞌjaꞌs, nawa Pablo yuꞌsaꞌ vxite yatte fxiik txah teeçx soldau thegwaꞌjsa txahçxa.
Roma çxhabte paꞌjçxa Dxus yuweꞌs ptaꞌsxni
17 Kxte paꞌjni tekh en skhẽwniiteꞌ, Pabloꞌ paꞌya kaakh kxte Romate judiu npiiçthẽꞌjweꞌsxtxi. Saꞌ pkhaakheteꞌ, naꞌwẽk weꞌwe:
—Adxaꞌ kĩhwa ewmée yuꞌ yũumeeth judiuweꞌsxtxi, saꞌ kweꞌsx yaçgaweꞌsx kaapiyaꞌjniꞌswa ahçena fxiꞌzeꞌçmeeth. Makwe txãꞌwẽtewa, Jerusalente adxaꞌs tudçxa romanoweꞌsxtxi dukhtxi.
18 Açaꞌ romanoweꞌsxaꞌ paapẽjxtxi, nawa ewmée yũuniꞌs yuꞌ uymeeçxaꞌ, adxaꞌs txhweete wẽetx ikhwaꞌthe nvxiht-yaꞌ yuꞌ ãjameeçxa.
19 Txãꞌwẽtewa, judiuweꞌsx yuꞌ kaatxhweteꞌjmeetaꞌ. Açaꞌ txãꞌwẽ yãꞌtheꞌ, adxaꞌ romanoweꞌsxtxi jxkaahsa Cesaraꞌsthu piꞌkx adx yuweꞌs paapẽykahn. Nawa judiuweꞌsx adxna preesuꞌjsa yuutxiꞌ pãatxhĩꞌkhyaꞌwameeth.
20 Txãasath iꞌkweꞌsxtxi paꞌya txãꞌjĩna ptaꞌsxyaꞌ. Israelweꞌsxaꞌ ũythasuꞌthaꞌw Dxus tasxuh yuusa Kristoꞌs txãa paꞌga yuuçxáa adxaꞌ naꞌwẽ kadenaju tudni ũsthu.
21 Txãꞌwẽ ptaꞌsxteꞌ, naꞌwẽtx weꞌwe:
—Judeajũ idxna nuyweꞌwena kaahni karta kĩhwa iijxpaꞌgameethaꞌw kweꞌsxaꞌ, txajũ judiuweꞌsx paꞌjçxawa ptaꞌsxiꞌçmeetaꞌ idxaꞌs açeweꞌweni yuꞌsaꞌ.
22 Ãçxh uꞌse ptaꞌsxniꞌs mteewa jxukatx açeweꞌweꞌ, açaꞌ txãꞌsaꞌ idxaꞌ ¿maa sũjuꞌga? Iidx yaakxniꞌs jiyu wẽethaꞌw jĩçxaꞌ,
23 vxite ente kiꞌ paꞌjyaꞌ neeyũuçxa txãa en ãhteꞌ, wala kuh pkhaakheçxa paꞌjtx Pablo ũsni yatte. Açaꞌ Pabloꞌ kusíi ptaꞌsxçxa kusna kĩhpkaçxku ptaꞌsx Dxus jxkaahwaꞌjaꞌs. Saꞌ Moises fxiꞌjni ley vxiteꞌ Dxus yuwe ptaꞌsxsa txãniiteyweꞌsx fxiꞌjni maꞌwẽçxahneꞌta Jesusaꞌs weꞌwena fxiꞌj txãꞌsnak ãate kaajiyuꞌj.
24 Açaꞌ maaíi yuꞌ Pablo ptaꞌsxniꞌs waꞌlmeetx jxpaꞌga, nawa vxite yuꞌ waꞌltxi.
25 Txãꞌwẽ maaíi yuꞌ nwẽeseꞌj wẽemeeçxa txuteena uꞌjweçteꞌ, Pabloꞌ naꞌwẽk txãaweꞌsxtxi weꞌwe:
—Dxus yuwe ptaꞌsxsa Isaiasaꞌs Dxus Espiritu kweꞌweꞌtheꞌ, isa yuh naꞌjĩna ptaꞌsxneꞌ kweꞌsx yaçgaweꞌsxtxiꞌ:
26 Uꞌjçxa txãa nasatxiꞌ naꞌjĩna mpeetaꞌsx:
Iꞌkweꞌsxaꞌ wẽseꞌjçxawa, jiyumeeneꞌkwe.
Meeçxaꞌ uyuwáꞌkwe, nawa jiyumeeneꞌkwe.
27 Txãa paꞌgatey txãaweꞌsx ũuste jiyuwaꞌj yuꞌsaꞌ jiꞌphmée yãꞌthaꞌ,
Saꞌ wẽseꞌjyaꞌwa waꞌluꞌtx.
Txãaweꞌsx yafxaꞌ aphanitaꞌ, uymeeçxaꞌ nwẽeseꞌjmeetxna.
Saꞌ ũustewa ew jiyumeetxna.
Saꞌ adx tasxtewa utxameetxna pkaltxi peltunãykahn jĩnak weꞌwe.
28 Iꞌkweꞌsxaꞌ mjiyuwe: Ãçxhũyãꞌjaꞌ Dxus ewte nvxiitwaꞌjaꞌs judiu jiꞌjmée vxite nasaçxáatx ptaꞌsxwaꞌjaꞌ, açaꞌ txãaweꞌsxaꞌ nwẽeseꞌjetxna.
29 Txãꞌwẽ Pablo weꞌweteꞌ, judiuweꞌsxaꞌ txãaweꞌsx pweꞌsx wala kuh jwed weꞌwena uꞌjtx.
30 Pabloꞌ eꞌz anxu utak yat pkiꞌjçxa txaahni ũsuꞌ, saꞌ kxte thegyaꞌ paꞌjsatx jxukaysatxku jxpaꞌgaꞌ.
31 Kxteaꞌ kim yuhwa kuçx yuuniméek fxiꞌzeꞌ Dxus jxkaahwaꞌj enaꞌs ptaꞌsxna, txãꞌwẽy Jesukristo kaapiyaꞌjniꞌswa ãatek ptaꞌsxna fxiꞌzeꞌ.
