Hechos 3:1-26
3 Teeçx enteꞌ Pedro Juan yakhtxi dxuus yatte kũjuç yuꞌ, kusuçte las treste Dxus yakh puutx weꞌwewaꞌj orate.
2 Kxteꞌ teeçx piçthẽꞌj upxhíi çxida puuple uꞌjuyaꞌ ãjasameek uꞌp yuꞌ. Txãꞌsaꞌ een isatx yakhna kũhçxa dxuus yat Vxitx Zhiçxkwesa jĩnisa pukate kiꞌpuꞌ kxtee nasa uꞌkasatx lmusxnu peꞌwna uꞌpkahn.
3 Txãa puupleꞌ Pedro Juan yakh dxuus yatte uꞌkayaꞌ kũjuçte uyçxaꞌ, lmusxnu thãasku.
4 Açaꞌ Pedroweꞌsxaꞌ txãa puuple dxiꞌpte ew thegçxaꞌ, Pedroꞌ naꞌjĩk:
—Mtheg kweꞌsxtxi jĩteꞌ,
5 txãa puupleꞌ ¿kĩh peesyaꞌwatxki? sũhna ewku txãaweꞌsx dxiꞌpte theg.
6 Açaꞌ Pedro weꞌweçxaꞌ:
—Vxyu yuꞌ kĩh yuhwa jiꞌphmeeth. Nawa adx jiꞌpthu txãꞌsçxáawa peesuꞌnja: Jesukristo Nasarethũweꞌsx idxaꞌs ãçxhíi nuykatxhina açaꞌ kiiteçxa ew mneeyũu jĩnaꞌwa,
7 Pedroꞌ paçu kusete uwenaꞌ puꞌkisku, açaꞌ naa dudtey fxidxaꞌ kuꞌleteꞌ, çxidaꞌ jxuka ewtxi neeyũu.
8 Txajũꞌ txãa ãçaꞌsaꞌ ũphçxak kiite, saꞌ uꞌjuyaꞌ ãjaçxa txãaweꞌsx yakhíi dxuus yatte uꞌkak, ũphũuphna Dxusna weçxana tuutheꞌjna.
9 Txajũꞌ txãa çxida puupleꞌ txãꞌwẽ ũphũuphna Dxusna weçxana yuute nasa jxukaysa uyçxaꞌ, kuh yajkxna ũukhtxi.
10 Txãa nasaꞌ çxida puupleꞌs jiitx yuꞌ txãꞌwẽ dxuus yat Vxitx Zhiçxkwesa jĩnisa pukate kaçxçxa lmusxnu thãasna uꞌpsate.
Dxus yuweꞌs Pedro ptaꞌsxni
11 Çxida puuple uꞌjuyaꞌ ãjasameeçxawa katxhiyãꞌjçxaꞌ, Pedroweꞌsxtxi uweçxa txhweetemée uꞌjuteꞌ, nasa jxukaysa wala kuh yajkxna Pedroweꞌsxtxi thegyaꞌ seenaꞌ wala kuh pkhaakhetx dxuus yat pwaꞌ Salomon jĩi jĩꞌtx kxtee.
12 Txãꞌwẽ nasa pkhaakheteꞌ, Pedroꞌ naꞌjĩk:
—Israelweꞌsx, ¿kĩh yuupaꞌgakwe iꞌkweꞌsxaꞌ txãꞌwẽ ũukh weꞌwena kuh yaakiꞌ? Naa piçthẽꞌjaꞌs kweꞌsx txãꞌwẽ Dxus naꞌwẽ nuykatxhiçxa ew uꞌjuwaꞌjaꞌs peesuçthas iꞌkwe yajkxna kweꞌsxtxi theguꞌ.
13 Mwẽeseꞌjwe: Kweꞌsx yaçgaweꞌsx Abrahan, Isaak, Jakob txãaweꞌsx Dxusaꞌ txajx Nçxiꞌk Jesusaꞌs cielute seenaꞌ jxtuhthesa vxitku naꞌwẽ iꞌkweꞌsx yuꞌ ahçeçxa jxkaahsa Pilato kusete dukhiꞌkwe. Açaꞌ Pilato yuꞌ txhweeteyaꞌ yajkxtewa, iꞌkweꞌsx yuꞌ kaatxhweeteꞌjmée iꞌkwe,
14 wejxwa kĩhwa yuuwemeesaꞌ, mitxhwete jĩpkaçxte, iꞌkweꞌsx yuꞌ teeçx piçthẽꞌj wala yuuwesa ewmeesaçxáꞌs iꞌkwe txhweete kaah.
15 Txãꞌwẽ yũuçxa iꞌkweꞌsxaꞌ Jesus ĩtxi kaafxiꞌzeꞌjwaꞌjsa yuꞌsaꞌ kiikheꞌjiꞌkwe. Nawa Dxusaꞌ txãꞌsaꞌ kiꞌ ĩtxi vxitniꞌs kweꞌsxaꞌ uysaathaꞌw, txãasa jiithaꞌw.
16 Txãasathaꞌw Jesusaꞌ nuykatxhina sũhçxa txajx yaseꞌs kxsusna piꞌkx, naa piçthẽꞌj iꞌkweꞌsx jiyunisaꞌs nuykatxhikahn. Txãa Jesus nuykatxhipaꞌga yuuçxáa naa piçthẽꞌjaꞌ jxuka ew katxhiteꞌ, iꞌkweꞌsx jxukaysa uyna ũsiꞌkwe.
17 Yakhthẽꞌjweꞌsx, txãꞌwẽ yũuiꞌkwe nawa jiimeeçxaneꞌkwe txãꞌwẽ yũu sũjuꞌth, txãꞌwẽy jxkaahsaweꞌsxwa jiimeeneꞌta yuꞌ.
18 Nawa iꞌkweꞌsx txãꞌwẽ yũuwaꞌjaꞌs Dxusaꞌ yaçtey ptaꞌsxku txajx yuwee ptaꞌsxsaweꞌsxtxi naꞌjĩna: Kristoꞌ wala pxthaa paꞌga yuuna jĩna açaꞌ txãꞌ kxtey yuukahn iꞌkwe txãꞌwẽ ikh.
19 Txãꞌwẽ yũupaꞌga Dxus tasxte sxawedçxa iꞌkweꞌsx pkalpaꞌga perdon mpẽjxwe txãa pkaltxi khũkhni yuuyaꞌ. Txãꞌwẽ yũuçxaꞌ weçxana ũswaꞌj enaꞌs jiꞌphuneꞌkwe,
20 Dxus kaahni Kristo Jesus jxkaajxaꞌ kĩhte. Txãꞌ iꞌkweꞌsxtxi ew yũuwaꞌjsaꞌ jĩnik yuꞌ txãníi entey.
21 Ãçxhíi yuꞌ Jesukristoꞌ cieluteçxáa ũswaꞌjsaꞌ, Dxus naa kiwete kĩhnawa jxuka pheuꞌphkaçx. Nyafx entey Dxus yuwe ptaꞌsxsaweꞌsx txãꞌwẽtx Kristoꞌ naa kiwete jxkaajxaꞌ kĩiwaꞌjsaꞌ jĩna ptaꞌsx naa paꞌga txãꞌ kxtey yuuna.
22 Txãꞌwẽy Moiseswa naꞌjĩk: Dxusaꞌ iꞌkweꞌsx jĩi teeçx kaajxaꞌwaꞌ iꞌkweꞌsx jiꞌtheweꞌsx txajx yuweꞌs ptaꞌsxwaꞌjsa, adxaꞌs maꞌwẽga kaah txãꞌwẽy. Txãꞌs mwẽeseꞌjwe, maꞌwẽ jxkaathewa jxuka kxtey yuuna.
23 Txãꞌwẽmeꞌ, maawa Dxus yuwe ptaꞌsxsaꞌs nwẽeseꞌjsameꞌ, Israelweꞌsx tasxuh txudeni neeyũuçxa jxukaysa vxituwaꞌthaꞌ jĩk.
24 Ew mjiyuwe: Dxus yuwe ptaꞌsxsa Samwel fxiꞌzenijũjxweꞌsx jxukaysatx ãçxh naa ensu Kristo kĩiwaꞌjaꞌsçxaçxáa weꞌwena ptaꞌsx.
25 Açaꞌ iꞌkweꞌsxaꞌ Dxus yuwee ptaꞌsxsaweꞌsx jiꞌjiꞌkwe, saꞌ txãꞌwẽy Dxusaꞌ txãniitey Abrahan yakhwa puutx weꞌwek iꞌkweꞌsxtxi ew yũuwaꞌjaꞌs naꞌjĩna: Naa kiwete nasaꞌ jxukaysa bedicionaꞌs jxpaꞌgatxna iidx jiꞌj paꞌgate jĩna weꞌwek txãꞌsnawa jxpaꞌgasaiꞌkwe.
26 Txajíik Dxusaꞌ txajx Nçxiꞌkaꞌs nyafxteꞌ iꞌkweꞌsx tasxte khuẽꞌyku kaah iꞌkweꞌsxtxi nweꞌwekahn, kxah iꞌkweꞌsxaꞌ teeçxsa naꞌwẽçxah ewmée yũuniꞌs nvxiitkahnku txãꞌwẽ yũu jĩk.
