Hechos 4:1-37
4 Pedro Juan yakh nasatx weꞌwena ũsiyna, sacerdoteweꞌsx vxiteꞌ dxuus yatte thegsaweꞌsx npiiçthẽꞌj vxiteꞌ saduceo txãaweꞌsx paꞌjtx tud-yaꞌ.
2 Txãꞌwẽ Jesuswa maꞌwẽga ĩtxi yuu txãꞌwẽy uusaaweꞌsxwa ĩtxi yuuwaꞌjaꞌ jĩna Pedroweꞌsxaꞌ nasatx kaapiyaꞌjna ũste jiyuçxatx wala ũusaçxana paꞌjçxa,
3 preesuꞌjçxa karcelte kxuuph kuskuuspkaçx, kusuçyãꞌkh yuꞌ naa paꞌga.
4 Nawa Pedroweꞌsx ptaꞌsxniꞌs wẽseꞌjçxa Kristoꞌs jxpaꞌgasa yuꞌ seenaꞌ wala kuh yuꞌtx, piçthẽꞌjçxáatx isani cinko miltxi yuꞌ.
5 Kuskuus enkhẽꞌ judiuweꞌsx npiiçthẽꞌjweꞌsx vxiteꞌ judiu nthẽꞌjsaweꞌsx vxiteꞌ Dxus ley kaapiyaꞌjsa
6 vxiteꞌ sacerdote npiiçthẽꞌj Anas vxiteꞌ Kaifxas, Juan, Alejandro vxiteꞌ jxukaysa sacerdote npiiçthẽꞌj nweꞌsxwa pkhaakhetx Jerusalente.
7 Saꞌ Pedroweꞌsxtxi peꞌjyaꞌ kaahçxa txãaweꞌsx ksxavxyte txahçxa paapẽjxtxi:
—¿Kim puꞌçxtekwe naꞌwẽ yũuyaꞌ ãjaꞌ? meeçxawa ¿kimga jxkaah? jĩteꞌ,
8 Pedroꞌ txajx ũuste Dxus Espirituꞌs jxuka jiꞌphçxaꞌ, naꞌwẽk pas:
—Judiu npiiçthẽꞌjweꞌsx, Israel nthẽꞌjsaweꞌsx:
9 Iꞌkweꞌsxaꞌ paapẽyiꞌiꞌkwe kweꞌsx maꞌwẽ yũuçxa naa ãçaꞌsaꞌs nuykatxhitewa jiyuyaꞌ.
10 Açaꞌ iꞌkweꞌsx dxiꞌpte teehwed ãate ptaꞌsxiçthaꞌw, kxah Israelweꞌsx jxuka jiyutxna. Naa piçthẽꞌj ayte iꞌkweꞌsx dxiꞌpte ũsaꞌ txãꞌ Jesukristo Nasarethũweꞌsx nuykatxhini ũsaꞌ. Txãa Jesukristoꞌs iꞌkweꞌsxaꞌ kluuste kaafxuçuꞌjiꞌkwe, nawa Dxusaꞌ uuniijũ kiꞌ ĩtxi vxitku.
11 Txãa Jesusaꞌs iꞌkweꞌsxaꞌ ahçeiꞌkwe yat txaahsaweꞌsxwa maꞌwẽta: Naa kwetaꞌ selpimeꞌ jĩçxa wãatahtewa txãaíi wejx selpisáa yuu txãꞌwẽysak yuꞌ.
12 Kim yuhwa txãa naꞌwẽy nasatx nweꞌweyaꞌ ãjawaꞌjsa yuꞌ meeaꞌ naa kiwete, naasáa Dxus kaahni Jesus yuuçxáa kweꞌsxtxi nweꞌwewaꞌjsaꞌ jĩk Pedroꞌ.
13 Pedroweꞌsxaꞌ kim yakh yuhwa piyana ũssamée naasáa Jesus yakh yuuçxáa piyana uꞌjusaçxawa weh yuhwa ũukhna sxiigmée weꞌweteꞌ, judiutx jxkaahsaweꞌsx wẽseꞌjçxaꞌ kuhtx yajkx.
14 Txãapkaçxhaꞌ katxhisa piçthẽꞌjaꞌ txãaweꞌsx yakh ijk ũsuꞌ, açaꞌ ewmée yũuna ũsiꞌkwe jĩyaꞌ ãjameetaꞌ.
15 Txajũꞌ Pedroweꞌsxtxiꞌ eka kaseh kaahtx txãaweꞌsx pweꞌsxçxáa puutx weꞌweyaꞌ.
16 Saꞌ naꞌwẽtx puutx weꞌwe:
—¿Kĩh yũukxthaꞌw naa eꞌz piçthẽꞌjweꞌsxtxiꞌ? Txãaweꞌsxaꞌ naa ãçaꞌsaꞌs txãꞌwẽ nuykatxhiniꞌs maa maawa Jerusalenteweꞌsx jxuka jiitaꞌ, açaꞌ kweꞌsxaꞌ txãꞌwẽ nuykatxhimeetaꞌ jĩyaꞌ ãjameꞌnjaꞌw.
17 Nawa mtee mteewa nasatx jwee tuutheꞌkhamen juunaꞌ weꞌweꞌnjaꞌw, kxah peena yuꞌ Jesus kaapiyaꞌjniꞌs ptaꞌsxmeetxna jĩçxaꞌ,
18 Pedroweꞌsxtxiꞌ kiꞌ paꞌyaçxa, wala juunaꞌ weꞌwetx:
—Ãçxhaꞌ peena yuꞌ bagaçxte yuhwa Jesus kaapiyaꞌjniꞌs kaapiyaꞌjmeeneꞌkwe jĩteꞌ,
19 Pedroweꞌsxaꞌ naꞌwẽtx pas:
—Iꞌkweꞌsx ũus miiyajkxwe. ¿Iꞌkweꞌsx jxkaahniçxáꞌs nwẽeseꞌjçxaꞌ, Dxus jxkaahni yuꞌsaꞌ nwẽeseꞌjmeete wáa ewna?
20 Kĩjkĩhwa kweꞌsx yafxju yuu uyna wẽseꞌjna yuuniꞌs weh yuhwa sxuunaꞌ yuuyaꞌ ãjameꞌnjaꞌw jĩteꞌ,
21 judiutx jxkaahsaweꞌsxaꞌ maꞌwẽ yuhwa kaapeçxukweꞌjyaꞌ ãjameeçxaꞌ, juunaꞌ weꞌweçxaçxáa kaatxhweeteꞌjtx. Txãꞌwẽmeꞌ, nasaꞌ jxukay Dxusçxáanatx tuutheꞌjna ũsuꞌ txãꞌwẽ ãçaꞌsa katxhipaꞌga.
22 Txãa katxhisaꞌ kuarenta anxu jxthaakwek jiꞌphuꞌ.
Dxus yuweꞌs ũukhmée ptaꞌsxwaꞌjaꞌs pẽyni
23 Txajũꞌ Pedroweꞌsxaꞌ txhweeteníi yuuçxaꞌ, uꞌjtx txãaweꞌsxtxi piꞌkxna uꞌjusaweꞌsx tasxna. Kxte paꞌjçxaꞌ, jxuka ptaꞌsxtxi judiutx jxkaahsaweꞌsx maꞌwẽ weꞌwete txãꞌwẽy.
24 Açaꞌ txãꞌjĩniꞌs wẽseꞌjçxaꞌ, jxukaysa Dxus yakh naꞌjĩnatx puutx weꞌwe:
—Cielu, kiwe, ĩkh wala, kxte kĩjkĩhçxah ũstxna txãatx jxuka vxit-sa Dxus,
25 naꞌwẽg kweꞌweꞌj idxna selpisáa Davxidaꞌs:
¿Kĩh yuupaꞌgata vxite nasa majũweꞌsxwa txakwe ũusaçxana susteꞌ, nasaꞌ kxulçxáawa maꞌwẽ yũuwaꞌjaꞌswa pakwéꞌ?
26 Naa kiwete jxkaahsaꞌ weeçxiꞌtx,
Açaꞌ çxhabte npiiçthẽꞌj pkhaakheçxa, Dxusaꞌs ahçeçxa txãꞌwẽy Nçxiꞌknawa açeꞌtx jĩꞌk.
27 Txãꞌjĩni kxtey yuuk. Txãa paꞌgatx Herodes vxiteꞌ Poncio Pilato kxtee Israelweꞌsx petx vxite nasa yãꞌjçxa iidx Nçxiꞌk Jesus kĩh pkal yuhwa jiꞌphmeesaꞌs kaag txãꞌsna ahçeçxa naa çxhabte pkhaakhe,
28 maꞌwẽ yũuwaꞌjaꞌswa idx maꞌwẽneꞌga vxitçxa nvxiht txãnii entey txãꞌsaꞌ jxuka kxtey yuuyaꞌ.
29 Nawa idxaꞌ txãaweꞌsx ewmée yũuyaꞌ yaakxnijũ nweꞌweçxa kweꞌsxtxi meen kçxhãaçxhaꞌj, kxah iidx yuweꞌs kĩhte yuhwa ũukhmée ptaꞌsxiꞌnjaꞌw.
30 Saꞌ idx puꞌçxteꞌ, ãçaꞌsatxwa nuykatxhiçxa kĩjkĩhwa kaavxyaꞌjaꞌjaꞌnjaꞌw iidx Nçxiꞌk Jesusaꞌs piꞌkxçxa.
31 Txãꞌjĩna Dxus yakh puutx weꞌwena jxãꞌjaçpkaçxhaꞌ, txãaweꞌsx pkhaakheniteꞌ ehd uꞌkh, naapkaçxhaꞌ Dxus Espirituꞌ txãaweꞌsx ũuste khẽeteꞌ, Dxus yuweꞌs ũukhméetx ptaꞌsxiꞌ.
Txãaweꞌsx jiꞌphuniꞌs kxteeçxah jiꞌphuni
32 Kristoꞌs ũuste jxpaꞌgasaꞌ teeçxsa maꞌwẽ yũuwaꞌjaꞌs yajkxteꞌ, jxukaysa txãꞌwẽçxaçxáa yũuwaꞌjaꞌsçxáatx yaakiꞌ. Maa yuhwa naꞌ adx jĩꞌ jĩmeetx fxiꞌzeꞌ. Kĩhwa jiꞌphuniꞌsaꞌ jxukaysa jaꞌdaçxaçxáatx jxtxudeꞌ.
33 Jesus jxkaahnisaweꞌsxaꞌ jweeíiçxáatx ũukhmée ptaꞌsxiꞌ Jesus uuçxawa kiꞌ ĩtxi yuuniꞌs, açaꞌ Dxusaꞌ jxukaysatx wala puꞌçxhiꞌk.
34 Txãaweꞌsx ksxavxyte kim yuhwa jxpeejxsameetx yuꞌ. Txãꞌwẽ maawa txãaweꞌsx kiwe vxiteꞌ yat txãꞌwẽsatx txweyçxa vxyuꞌs jxũna paꞌjçxa,
35 Jesus jxkaahnisaweꞌsx kusetetx dukheꞌ, açaꞌ txãaweꞌsxaꞌ maaçxah jxpeejxtewa txãaweꞌsxtxi txudeedeꞌtx.
36 Txãn ensuꞌ teeçx piçthẽꞌj levxita José yaasesa ũsuꞌk, Çxipre kiwete upxsa. Açaꞌ Jesus jxkaahnisaweꞌsxaꞌ Bernabé yasetx kiꞌp. Txãa yase yuꞌ, Kvxiisxaꞌjsa jĩniꞌ.
37 Txãa piçthẽꞌjaꞌ txajx kiweꞌs txweyçxa vxyuꞌs jxũna paꞌjçxa Jesus jxkaahnisaweꞌsxtxi dukhku.
