Hechos 5:1-42
5 Txãꞌwẽy Ananiasweꞌsx ptamwa txãaweꞌsx kiweꞌs txweytxi.
2 Ananiasaꞌ kiwee txweyni vxyuꞌs pxãhnçxáak jxũna uꞌjçxa jxuka dukheçthu jĩna Jesus jxkaahnisaweꞌsx kusete nvxiht. Txãꞌwẽ ĩsxiiwaꞌjaꞌs ptamíi puutx weꞌweçxatx txãꞌwẽ yũu.
3 Açaꞌ Pedroꞌ naꞌwẽk weꞌwe Ananiasaꞌs:
—Eçxthẽꞌjaꞌs ¿kĩjxaꞌga iidx ũuste kaꞌgaꞌjna ũsuꞌ, txãꞌwẽ kiwee txweyni vxyuꞌs pxãhnçxáa dukheççxa jxuka dukheçthu jĩna Dxus Espirituꞌs ĩsxiikahn?
4 Kiweꞌ iidx jĩineꞌ yuꞌ, açaꞌ txweyteꞌ vxyuuwa iidx jĩineꞌ yuꞌ. Açaꞌ ¿kĩjxaꞌga teehwed isasaçxáꞌs ptaꞌsxmée ĩsxiiyaꞌ yajkx? Kweꞌsxtxiçxáa ĩsxiimée, Dxusnawa ĩsxiig jĩk.
5 Txãꞌjĩniꞌs wẽseꞌjnaꞌwa, Ananiasaꞌ uuniik wete. Açaꞌ txãꞌwẽ yũuniꞌs nasa maawa jxuka jiyusaꞌ seenaꞌ wala ũukhwaꞌjaꞌs jiꞌphutx.
6 Txajũꞌ piçtakxweꞌsx kũhçxa, txãa uuníi kakweꞌs yapçxa pedaayaꞌ jxũna uꞌjtx.
7 Txãꞌwẽ yũuni tekh ora skhẽuuçpkaçxhaꞌ, Ananias nyu Safxirawa paꞌkh, nmiꞌ uuniꞌs jiimée.
8 Açaꞌ Pedroꞌ pẽjxku:
—Mpeetaꞌsxwe, ¿iꞌkweꞌsx kiweꞌs kxaz paꞌgateçxáa dxih txweykweꞌ? jĩna pẽjxteꞌ, txãa uꞌy pasçxaꞌ:
—Isa, txãꞌwẽteçxáa yuh txweythaꞌw jĩnak pas.
9 Txajũꞌ Pedroꞌ naꞌjĩnak weꞌwe:
—Iꞌkweꞌsxaꞌ ¿kĩjxaꞌkwe Dxus Espirituꞌs ĩsxiiwaꞌjaꞌs ptamíi puutx weꞌweꞌ? Iꞌkwe nmiꞌaꞌ txãꞌwẽ ĩsxiipaꞌga uuteꞌ, txãꞌsna pedasáa ãçxhçxáa kũjuçtaꞌ, saꞌ iꞌkwenawa jxũna uꞌjwetxna pedaayaꞌ
10 jĩçpkaçxhaꞌ, txãa uꞌywa Pedro tasxga uuniik wete. Açaꞌ Ananiasna pedasáa piçtakxweꞌsx kũhçxa, Safxirawa uuníi ũste uyçxaꞌ, jxũna uꞌjçxa nmiꞌ pukasuy pedaatx.
11 Açaꞌ Dxus yakh fxiꞌzesaweꞌsx txãꞌwẽy vxite nasawa txãꞌwẽ seenaꞌ yũuniꞌs jiyuçxaꞌ, wala ũukhwaꞌj jiꞌphutx.
Kim yuhwa ãjanimeesatx wala kaavxyaꞌjaꞌjni
12 Jesus jxkaahnisaweꞌsxaꞌ kim yuhwa ãjãnimeesaꞌs kĩjkĩhwa kaavxyaꞌjaꞌjnatx ũsuꞌ çxhabte nasaa ksxavxysu. Saꞌ Dxus yakh fxiꞌzesaweꞌsx txãaweꞌsx pweꞌsx yuꞌ dxuus yat pwaꞌtetx pkhaakheꞌ Salomon jĩi jĩꞌtx kxtee.
13 Nawa Dxus yakhmée fxiꞌzesa yuꞌ kim yuhwa txãaweꞌsx yakh pkhaakhena utxaꞌçmeetaꞌ, txãꞌwẽ seenaꞌ yũute ũukhçxa. Nawa txãaweꞌsxaꞌ ekaju yuꞌ Dxus yakh fxiꞌzesatx wala ewçxáa weꞌwena fxiꞌzeꞌtx.
14 Txãꞌwẽtewa piçthẽꞌj petx uꞌy yãꞌjçxa Kristoꞌs txãaweꞌsx ũuste jxpaꞌgasa jweeíiçxáatx seenaꞌ wala pehnana uꞌj.
15 Txãjũꞌ ãçaꞌsatx aadaste kutxiꞌjçxa Pedro skhẽuwaꞌjsutx khikheꞌ, kxah Pedro psxũꞌjuꞌniçxáꞌswa jxpaꞌgasaꞌ katxhitxna sũhçxatx txãꞌwẽ yũꞌ.
16 Jerusalen peekuꞌjsuweꞌsxwa nasa seenaꞌ wala paꞌjtx, txãaweꞌsx ãçaꞌsatx peꞌjçxa vxiteꞌ eçx iiyamunisatxwa peꞌjçxa, saꞌ jxukay nuykatxhinitx neeyũꞌ.
Pedro Juanweꞌsxtxi ahçeçxa ikh wẽeni
17 Txajũꞌ sacerdote npiiçthẽꞌjaꞌ kxtee ũssa saduceoweꞌsx yakh seenaꞌ wala ahçeçxa
18 Jesus jxkaahnisaweꞌsxtxiꞌ tudçxa karcelte txahtx.
19 Nawa Dxus angel kus kũhçxa karcel vxitxaꞌs phaadeçxa naꞌjĩçxak eka kutxiꞌj:
20 —Dxus yatna kiꞌ uꞌjçxa nasatxiꞌ ptaꞌsxineꞌkwe Dxus yakh fxiꞌzewaꞌjaꞌs jĩteꞌ,
21 wala kusíitey Dxus yatna uꞌjçxa ptaꞌsxyaꞌ takhtxi. Naapkaçxhaꞌ sacerdote npiiçthẽꞌj vxiteꞌ kxtee ũssa judiu nthẽꞌjsaweꞌsx jxukaysa pkhaakheçxa Jesus jxkaahnisaweꞌsxtxiꞌ karceluh kutxiꞌjyaꞌ kaahtx.
22 Açaꞌ policiaweꞌsxaꞌ karcelte uymeeçxaꞌ, ptaꞌsxyaꞌ kiꞌ sxawedtxi:
23 —Karcel vxitxaꞌ wala ew aphni ũsaꞌ, açaꞌ kxtee thegsawa vxitxte lajkxméetx ũs yuꞌ. Açaꞌ kweꞌsx kũhçxa vxitxaꞌs phaadeteꞌ, Pedroweꞌsxaꞌ meetx yuꞌ jĩtx.
24 Txãꞌjĩna ptaꞌsxteꞌ, sacerdote npiiçthẽꞌjweꞌsx vxiteꞌ kxtee dxuus yatte thegsaweꞌsx npiiçthẽꞌj jxukaysa naꞌwẽtx yaakiꞌ: Naa yuweꞌ ¿maꞌwẽ yũuwaꞌjsakx? sũjuçpkaçxhaꞌ,
25 teeçx piçthẽꞌj ptaꞌsxna kũjk:
—Karcelte ktxajaꞌjiꞌkwe txãaweꞌsxaꞌ dxuus yatte yãꞌj kiꞌ kaapiyaꞌjna ũstaꞌ nasatx jĩk.
26 Txajũꞌ dxuus yatte thegsaweꞌsx npiiçthẽꞌjaꞌ policia yakh uꞌjçxa jxũna kũhtx kĩhwa pkxumée, Pedroweꞌsx juꞌgusa nasaꞌ ũusaçxaçxa kwet wãatatahweꞌsxte.
27 Saꞌ judiu nthẽꞌjsaweꞌsx tasxte jxũna kũhteꞌ, sacerdote npiiçthẽꞌjaꞌ naꞌwẽk pẽjx:
28 —Kweꞌsxaꞌ iꞌkweꞌsxtxiꞌ bagaçxte yuhwa peena yuꞌ ptaꞌsx kaahmeethaꞌw Jesus kaapiyaꞌjniꞌs. Açaꞌ iꞌkweꞌsxaꞌ ¿kĩjkwe yuu? Naa Jerusalente mtee mteewa jxuka iꞌkweꞌsx kaapiyaꞌjniꞌs yuutaçxa kweꞌsxtxi yuuwesa vxit yaꞌwaiꞌkwe Jesus uuniꞌs.
29 Txãꞌjĩteꞌ, Pedroweꞌsx pasçxaꞌ:
—Kweꞌsxaꞌ nasaa jxkaahni yuutxiꞌ nwẽeseꞌjwaꞌj jiꞌphmeethaꞌw, naasáa Dxusçxáana nwẽeseꞌjwaꞌjsathaꞌw.
30 Kweꞌsx yaçgaweꞌsx txãaweꞌsx Dxusaꞌ Jesusaꞌs kiꞌ ĩtxi vxitku kluuskhẽ aꞌkxçxa iꞌkweꞌsx ikhniꞌs.
31 Dxusaꞌ txãꞌwẽ yũuçxa cielute txajx pukate paçu juꞌgte kiꞌpçxa Jxkaahwaꞌjsak vxit, kxah Israelweꞌsxaꞌ txãaweꞌsx pkaltxi nvxihtçxa Dxus tasxte sxawedte, Jesusaꞌ nweꞌwena.
32 Txãꞌwẽ yũuniꞌs kweꞌsxaꞌ jiithaꞌw, açaꞌ Dxusaꞌ txajx Espirituꞌs ũsku txãꞌsna nwẽeseꞌjsatx txãa Espirituwa jiiaꞌ jĩteꞌ,
33 judiu nthẽꞌjsaweꞌsx jweeíiçxáa ũusaçxaçxa Pedroweꞌsxtxi ikhyaꞌwatx yuꞌ.
34 Nawa kxtee txãaweꞌsx ksxavxyte teeçx fxariseo Gamaliel yaasesa uꞌpuꞌk, Dxus leyaꞌs kaapiyaꞌjsa wala jxtuhthesa. Txãꞌ Jesus jxkaahnisaweꞌsxtxi eka dudte kutxiꞌkhaahçxa,
35 judiu nthẽꞌjsaweꞌsxtxi naꞌwẽk weꞌwe yujuçxa:
—Israelweꞌsx, naa piçthẽꞌjweꞌsxtxi naꞌwẽ yũuyaꞌwaiꞌkwe txãꞌsaꞌ mpaꞌyajkxwe.
36 Iꞌkweꞌsxaꞌ miyajkxwe: teeçx enteꞌ vxyaak teeçx piçthẽꞌj Teudas yaasesa wala çxhãçxhasath jĩna, açaꞌ txajx juꞌgu uꞌjsa kuatrocientos nasatx yuꞌ. Nawa txãa npiiçthẽꞌjaꞌs ikhnik yuu, açaꞌ txajx nasaꞌ jxuka pũsxiteꞌ, txãa yuweꞌ pçuuk.
37 Txãꞌwẽ yũuni eꞌsu, nasatx eçte ãsx enteꞌ, teeçx piçthẽꞌj txãꞌwẽy vxyaak, Judas Galileajũweꞌsx, açaꞌ txajx juꞌgusa nasa wala kuh utxaatx. Nawa txãa Judasaꞌs ikhteꞌ, txajx juꞌgusawa jxuka pũsxitx.
38 Txãa paꞌga naa piçthẽꞌjweꞌsxtxiꞌ kuçx yuunuwe. Naa yuweꞌ piçthẽꞌjweꞌsxçxáa weꞌweniçxa yuꞌ, kĩhwa yũumeetewa pçuuna.
39 Nawa Dxus jĩi wáana açaꞌ txãꞌsaꞌ iꞌkweꞌsxaꞌ ivxiituyaꞌ ãjãmeeneꞌkwe. Dxus yakh puiisáa yuuyaꞌmée mpaꞌyajkxwe jĩteꞌ,
40 Isa yuh weꞌwek sũhnatx neeyũu jxukaysa. Txajũꞌ Jesus jxkaahnisaweꞌsxtxi paꞌyaçxaꞌ: Ãçxhaꞌ peena yuꞌ Jesus kaapiyaꞌjniꞌs ptaꞌsxmeeneꞌkwe jĩna weꞌweçxa, wala peçxujkweçxaçxáa txhwetetx.
41 Açaꞌ Jesus jxkaahnisaweꞌsxaꞌ judiu nthẽꞌjsaweꞌsx tasxuh wala weçxana kasehtx txãꞌwẽ Jesus kaapiyaꞌjniꞌs ptaꞌsxpaꞌga pxthaa yuuwaꞌjaꞌs jiꞌphuthaꞌw sũhna.
42 Maa ente yuhwa sxuunaꞌ fxiꞌzemée een isa Dxus yuweꞌs kaapiyaꞌjna txãꞌwẽy Jesukristo ĩtxi yuuniꞌswa ptaꞌsxna pekũhna nestxi yuꞌ yat-su vxiteꞌ dxuus yatte.
