Hechos 6:1-15
6 Txãa ensuꞌ Kristoꞌs jxpaꞌgasaweꞌsx wala pehnateꞌ, kxtee griego yuweju weꞌwesaweꞌsxaꞌ judiu yuweju weꞌwesaweꞌsxtxi ũusçxa weꞌwewaꞌj uytxi kweꞌsx jiꞌj vxiuda yuutxiꞌ ew sãꞌjĩmée ũstaꞌ een isa peesni ũꞌaꞌs jĩteꞌ,
2 Jesus jxkaahnisaweꞌsx docesa jiyuçxaꞌ, Kristoꞌs jxpaꞌgasaweꞌsxtxi jxuka pkhakhçxa naꞌjĩtx:
—Dxus yuweꞌs ptaꞌsxmée, sãꞌjĩwaꞌjçxáꞌs jxthaakwe paꞌpçxuyaꞌ yuꞌ ãjãmeꞌnjaꞌw kweꞌsxaꞌ.
3 Txãꞌwẽ yũuyaꞌmée iꞌkweꞌsx yakh ũssa yakhthẽꞌjweꞌsx siete piçthẽꞌj mtxhiitxhwe, Dxus dxiꞌpte ew fxiꞌzesa, Dxus Espirituꞌs ũuste jxpaꞌgasa, maꞌwẽ yũuwaꞌjaꞌswa ew jiisatx. Txãꞌwẽ yuuçxa txãaweꞌsxtxi dukheꞌnjaꞌw sãꞌjĩna ũswaꞌj mjĩiaꞌs.
4 Açaꞌ kweꞌsxaꞌ Dxus yuweꞌs kaapiyaꞌjwaꞌjçxáꞌs theguꞌnjaꞌw, Dxus yakh puꞌvxitumée puutx weꞌwena jĩteꞌ, jxukaysa txãꞌwẽ yũuwaꞌjaꞌs yajkxtxi.
5 Saꞌ Dxus yakh jxpubamée fxiꞌzesa Estebanaꞌstxi txhitxh Dxus Espirituꞌs ũuste jiꞌphsa. Vxiteꞌ Fxelipe, Prókoro, Nikanor, Timón, Parmenas, Nikolas Antiokía çxhabuweꞌsx txãaweꞌsxtxi txhitxhnisa neeyũu. Txãa Nikolasaꞌ judiumeeçxawa judiuweꞌsx naꞌwẽy yuuna fxiꞌzeyaꞌ utxasaak yuꞌ.
6 Txãa piçthẽꞌjtx txhitxhçxaꞌ, peꞌjna uꞌjtx Jesus jxkaahnisaweꞌsx tasxte, açaꞌ txãaweꞌsxaꞌ dxikthesu peekizeçxa Dxus yakh puutx weꞌwetx txãaweꞌsx paꞌgate.
7 Txajũꞌ Dxus yuweꞌ walaana uꞌkh, açaꞌ Kristoꞌs jxpaꞌgasawa Jerusalente seenaꞌ wala pehnak, txãa paꞌga kxtee judiuweꞌsx sacerdote yuhwa Jesus kaapiyaꞌjniꞌs jxpaꞌgatx wala kuhsa.
Estebanaꞌs preesuꞌjni
8 Açaꞌ Estebanaꞌ Dxus puꞌçxteꞌ, kim yuhwa ãjanimeesaꞌswa kaavxyaꞌjaꞌjnak fxiꞌzeꞌ txãa çxhabte.
9 Txãꞌwẽ yũuteꞌ, judiu vxite kiwejuweꞌsx Cirene, Alejadría, Cilicia, Asia txãa kiwesuweꞌsxaꞌ Esteban yakh ũusçxa weꞌwena kasehtx. Txãaweꞌsxaꞌ karceluh txhweetenisa txãaweꞌsx pweꞌsxçxáa fxiitx pkhaakheni yat jiꞌphuꞌ.
10 Nawa txãaweꞌsxaꞌ pasyaꞌ ãjaꞌçmeetaꞌ Estebanaꞌ Dxus Espiritu kaaũusutheꞌjniꞌs weꞌweteꞌ.
11 Txajũꞌ vxitetx vxyu dukhtxi txãꞌwẽ Moisesaꞌs açeweꞌwena Dxusnawa açeꞌk jĩna ĩsxiina pãatxhĩꞌkhkahn.
12 Txãꞌwẽ yũuçxatx kaaũusçxaꞌj nasa ekajuweꞌsx vxiteꞌ judiu nthẽꞌjsaweꞌsx vxiteꞌ Dxus leyaꞌs kaapiyaꞌjsaweꞌsxtxi. Saꞌ Estebanaꞌs tudçxa jxũna uꞌjtx judiu nthẽꞌjsaweꞌsx tasxte.
13 Saꞌ pakwetx naꞌwẽ ĩsxiina ptaꞌsxwaꞌjsa: Naa piçthẽꞌjaꞌ een isa dxuus yataꞌs açeweꞌwena txãꞌwẽy Dxus leyaꞌswa açeweꞌwena nesku yuꞌ.
14 Jesus Nasarethũweꞌsxaꞌ naa dxuus yataꞌs ivxiituçxa, Moises kaapiyaꞌjniꞌswa ivxiituwaꞌjsaꞌ jĩna kaapiyaꞌjniꞌs kweꞌsxaꞌ wẽseꞌthaꞌw.
15 Txãꞌjĩna ĩsxiiteꞌ, judiu nthẽꞌjsaweꞌsx vxiteꞌ kxtee pkhaakheçxa ũssaꞌ Esteban dxiꞌpte thegçxaꞌ Dxus angel naꞌwẽtetx uy.
