Hechos 7:1-60
7 Txajũꞌ sacerdote npiiçthẽꞌjaꞌ Estebanaꞌs pẽjxku:
—¿Naꞌwẽ ptaꞌsxiꞌtx txãꞌ jxuka isa yuhnaꞌ? jĩteꞌ,
2 Estebanaꞌ ptaꞌsxyaꞌ takhku:
—Yakhthẽꞌjweꞌsx, naꞌs mwẽeseꞌjwe: Kweꞌsx Dxus cieluteweꞌsxaꞌ yaçgathẽꞌj Abrahanaꞌs vxyaak Harán kiwete uꞌpxaꞌ uꞌjmey nee Mesopotamia kiwete ũsiyna.
3 Saꞌ naꞌwẽk jxkaah: Iidx kiwe petx iidx nweꞌsx jxuka nvxihtçxa meꞌj kiwe ũsyaꞌwath kxtee.
4 Txãꞌjĩteꞌ, Abrahanaꞌ Kaldea kiweju kasehçxa Harán kiwetek uꞌpxaꞌ uꞌj. Txajũꞌ Abrahan neyaꞌ Harán kiwete uuteꞌ, Dxusaꞌ Abrahanaꞌs peꞌjna yuweꞌk naa kiwete ãçxh ũsiꞌkwe kxtee.
5 Nawa Dxusaꞌ Abrahanaꞌs naa kiwete nuypaꞌjçxaꞌ, kiwe leꞌçxkuẽçxáa yuhwa txagaçxhíi yuꞌ ũsmeꞌ. Nawa idxaꞌs eꞌsuçxáawa naa kiweꞌs ũsuꞌnja, açaꞌ idx uuteꞌ, iidx luuçx jĩi neeyũuna jĩk. Txãn ensuꞌ Abrahanaꞌ luuçx jiꞌphmeetewa txãꞌwẽk iidx luuçx jĩi jĩna puutx weꞌwe.
6 Abrahan jiꞌj maꞌwẽ fxiꞌzewaꞌjaꞌswa Dxusaꞌ ptaꞌsxku: Iidx jiꞌjweꞌsxaꞌ vxite kiwesu pkxuuna jxpeꞌjni kuatrocientos anxu fxiꞌzetxna.
7 Txãꞌwẽtewa txãa pkxuusaweꞌsxtxiꞌ kastigaĩꞌnja, kxah iidx jiꞌjaꞌ txajũ kasehçxa naa kiwete adxaꞌs selpiiyaꞌ yuwetxna jĩk.
8 Dxusaꞌ Abrahan yakh puutx weꞌweçxaꞌ, txãa puutx weꞌweniꞌs peçxkanayaꞌmée jĩçxa cirkuncidãy kaakh txajx luuçxtxiꞌ. Txãa paꞌgak Abrahanaꞌ txajx nçxiꞌk Isaak upxhni oçxo en ãjaçpkaçxhaꞌ, cirkuncidãy. Txãꞌwẽy Isaakwa txajx nçxiꞌk Jakobaꞌs cirkuncidãyku. Açaꞌ Jakobwa txajx nçxiꞌkweꞌsx docesatx txãꞌwẽyçxaçxáak yuu. Txãa Jakob nçxiꞌkweꞌsx txãꞌwẽ Israelweꞌsx jiꞌj docesa neyweꞌsxtaꞌ.
9 Txãa Jakob nçxiꞌkweꞌsxaꞌ nyakh Joseꞌs ahçeçxa txweytxi, Egipto kiwen jxũna uꞌkhan. Nawa Dxusaꞌ José yakh txuteméek ũsuꞌ nxuste fxiꞌzeçtewa nweꞌwena.
10 Txãasak Egiptote jxkaahsa Fxaraon dxiꞌpte ew fxiꞌzewaꞌjaꞌs ũs. Txãꞌwẽ yũuteꞌ, Fxaraonaꞌ Joseꞌs Egiptote neꞌjweꞌsx kiꞌpçxa jxkaahsa yataꞌs thegwaꞌjsak nvxiht.
11 Txãn ensuꞌ Egipto kiwete jxuka Kanaan kiwete yãꞌjçxa wala wẽje paꞌkh kxũusuꞌjwaꞌjsa, açaꞌ kweꞌsx yaçgathẽꞌjaꞌ ũꞌwaꞌj uymeetaꞌ.
12 Nawa Jakobaꞌ Egipto kiwete skuutxh txweywaꞌj ũsaꞌ jĩniꞌs jiyuçxaꞌ, txajx nçxiꞌk kweꞌsx yaçgaweꞌsxtxi kaakh. Txãa entetx nyafxçxah Egipto kiwen uꞌj.
13 Eꞌsu kiꞌ uꞌtheꞌ, Joseꞌ ptaꞌsxku: Adxaꞌ iꞌkweꞌsx nyakhthu jĩna. Açaꞌ Egipto kiwete jxkaahsaꞌ jiyuk Joseꞌ kiim jiꞌthewa.
14 Txajũꞌ Joseꞌ txajx ney Jakob petx nweꞌsx jxukaysatx yuukaakh. Txãaweꞌsxaꞌ setenta y cinko ãhtx yuꞌ.
15 Txãꞌwẽ yũupaꞌgak Jakobaꞌ Egipto kiwen uꞌpxaꞌ uꞌjçxa kxtee uu, açaꞌ kweꞌsx jiꞌj nyafxteweꞌsxwa txãa kiwetee uutx.
16 Nawa eꞌsu txaçxteꞌ, José dxiꞌthtxi jxũna yuhçxa Sikem kiwetetx pedáa, Abrahanaꞌ Hamor nçxiꞌkweꞌsxtxi kiwe weyku uusaatx pedawaꞌj jĩçxa kxtee.
17 Dxusaꞌ Abrahanaꞌs kiwe ũswaꞌj en ãjaçteꞌ, Israelweꞌsx Egiptote ũssa wala pehnatx.
18 Naapkaçxhaꞌ Egipto kiwete jxkaahwaꞌjsaꞌ Joseꞌs jiimeesak uꞌka.
19 Txãa jxkaahsaꞌ kweꞌsx yaçgaweꞌsxtxi ahçena pkxuuyaꞌ takhku, luuçx uꞌse upxsatx ktheguꞌjmée uukahn.
20 Naapkaçxhaꞌ txãa ensuꞌ Moiseswa upxku Dxus peeygãani wala zhiçxkwesa. Açaꞌ neyweꞌsxaꞌ yatte tekh aꞌte jxpeꞌjtx.
21 Nawa jwee yuꞌ jxpeꞌjyaꞌ ãjameeçxaꞌ, yuꞌwala pukaga sũthteꞌ, jxkaahsa niisa uyçxaꞌ, txãak nuywala txajx luuçx naꞌwẽ vxitçxa.
22 Txãa paꞌgak Moisesaꞌ kĩhtewa jxuka kaapiyaꞌjni yuu Egipto kiweteweꞌsx naꞌwẽy, saꞌ kĩhtewa jxtuhthesak yuꞌ.
23 Moisesaꞌ kuarenta anxu jiꞌphuçxaꞌ, txajx nweꞌsx Israelweꞌsx ũsnite thegyaꞌ uꞌjyaꞌ yajkxku.
24 Kxtee ũsçxa uyku teeçx Egiptoteweꞌsx txãꞌwẽ Israelweꞌsx teeçxsaꞌs pkxuuna ũste, açaꞌ Moisesaꞌ ãhmeekwesa juꞌgu yuuçxa Egiptoteweꞌsxaꞌs ikhku.
25 Israelweꞌsxaꞌ Dxusneꞌ kaah kweꞌsxtxi nweꞌweyaꞌ sũjkahnku txãꞌwẽ yũu Moisesaꞌ, nawa txãaweꞌsxaꞌ txãa sũhmeetaꞌ.
26 Kuskuskhẽꞌ Moisesaꞌ uyku eꞌz Israelitaweꞌsx puiina ũste, saꞌ naꞌjĩnak nweꞌwe wẽe: Iꞌkweꞌsxaꞌ pxakhsaiꞌkwe, saꞌ ¿kĩjxaꞌkwe puiꞌ? jĩteꞌ,
27 vxiteꞌs uyisáꞌ Moisesaꞌs çxatxçxa naꞌjĩk: ¿Kimga idxaꞌs npiiçthẽꞌjsa kweꞌsxtxi nweꞌwewaꞌjsa naꞌwẽ vxitçxa nvxiht?
28 Jũꞌna maꞌwẽga Egiptoteweꞌsxaꞌs ikh ¿txãꞌwẽy adxnawa ikheꞌnja sũjuwáꞌga? jĩteꞌ,
29 Moisesaꞌ txãa kiweju ũphna uꞌjçxa Madian kiwenku uꞌj. Kxteek txajx kiwemeete paꞌjçxa uꞌpuꞌ, saꞌ eꞌz luuçxku jiꞌphu.
30 Txãa kiwete Sinai vxiç utxasu nasa uꞌpnimeete kuarenta anxu fxiꞌzeçteꞌ, çhũçh tasxte ipx behnak vxyaa. Txãa pxãhte Dxus angelaꞌsku uy.
31 Txãꞌwẽ uyçxaꞌ, Moisesaꞌ kuh yajkxna utxaak ew thegyaꞌ. Naapkaçxhaꞌ Dxus weꞌweni naꞌwẽk pthũuse:
32 Adxaꞌ iidx yaçgaweꞌsx Abrahan, Isaak, Jakob txãaweꞌsx Dxusthu jĩteꞌ, Moisesaꞌ ũukhna yayaçxa thegmeꞌ.
33 Açaꞌ Dxusaꞌ Moisesaꞌs weꞌweçxaꞌ: Iidx pelgatxiꞌs mpahde, ayteꞌ kĩh pkal yuhwa jiꞌphmeesa ũsthu naa paꞌga.
34 Saꞌ Egiptote adx nasa pxthaa yuuniꞌs uythu, saꞌ pxthaa weꞌweniꞌswa wẽseꞌth. Txãasath yuwéꞌ nweꞌweyaꞌ. Açaꞌ adx jxkaahniꞌs nwẽeseꞌjçxa Egipto kiwen uꞌjweneꞌga jĩk.
35 Israelweꞌsxaꞌ nyafxíꞌ Moisesaꞌs naꞌjĩnatx ahçe: ¿Kimga idxaꞌs npiiçthẽꞌjsa kweꞌsxtxi nweꞌwewaꞌjsa naꞌwẽ vxitçxa nvxiht? Txãꞌjĩna ahçetewa, Dxusaꞌ çhũçh tasxte ipx ksxavxyuh vxyaaçxaꞌ, Moisesaꞌs kaakh npiiçthẽꞌjsa naꞌwẽ nweꞌweyaꞌ.
36 Moisesku txãꞌwẽ kweꞌsx yaçgaweꞌsxtxi Egipto kiwejuh kutxiꞌj txãa kiwete kĩjkĩhwa seenaꞌsa kaavxyaꞌjaꞌjçxa. Txãꞌwẽy Ĩkh Wala Behsajuwa kutxiꞌkh saꞌ nasa uꞌpnimeesu kuarenta anxuk txãꞌwẽ kim yuhwa ãjãnimeesaꞌs kaavxyaꞌjaꞌjna ũsuꞌ.
37 Txãa Moisesíiçxáak Israelweꞌsxtxi naꞌwẽ ptaꞌsx: Iꞌkweꞌsx jiꞌj teeçxsaꞌs kutxiꞌjçxa Dxusaꞌ kaajxaꞌwaꞌ txajx yuweꞌs ptaꞌsxkahn, naꞌwẽk adxnawa kaah txãꞌwẽy. Açaꞌ txãꞌsaꞌ nwẽeseꞌjwaꞌj jiꞌphiꞌkwe jĩk Moisesaꞌ.
38 Moisesku txãꞌwẽ nasa uꞌpnimée kiwete ũsuꞌ kweꞌsx yaçga Israelweꞌsx yakh. Saꞌ Dxus angel yakhwa Sinaí vxiç walate puutx weꞌweçxa kweꞌsx yaçgaweꞌsxtxi ptaꞌsxku. Saꞌ Dxus jxkaahna kwet taplate fxiꞌjnitxwa jxpaꞌgak kweꞌsxtxi ũsyaꞌ.
39 Txãꞌwẽ yũutewa, kweꞌsx yaçga Israelweꞌsxaꞌ Moisesaꞌs nwẽeseꞌjmée ahçeçxa, Egipto kiweníi sxawedxaꞌwatx yuꞌ.
40 Txajũꞌ Aaronaꞌs naꞌwẽtx weꞌwe: Kweꞌsxtxi peꞌjna uꞌjwaꞌjsa dxus naꞌwẽsa mpheuꞌj. Txãꞌwẽmeꞌ Moises Egipto kiwejũ kweꞌsxtxi kutxiꞌjsa kĩhneꞌ yuu nawa vxyaameꞌ.
41 Txãꞌjĩçxaꞌ txãaweꞌsx kuseju klaa luuçx naꞌwẽ pheuꞌjçxa txãꞌsnatx wala weçxana tajkx ikhçxa kab.
42 Txãꞌwẽ yũuteꞌ, Dxusaꞌ txãaweꞌsx tasxuh txuteek, ẽe walasu estrelxa ũstaꞌ txãaçxáatx neeweꞌwekahn. Txãꞌwẽ yũuwaꞌjaꞌs Dxus yuwe ptaꞌsxsaweꞌsx librute naꞌwẽ fxiꞌjniꞌ:
Israelweꞌsxaꞌ nasa uꞌpnimée kiwete kuarenta anxu ũsçxaꞌ,
¿adxna weçxayaꞌkwe tajkx ikhçxa kabna ũsuꞌáꞌ?
43 Weh yuhwa txãꞌwẽ yũumée adxna weçxapkaçxte,
Naasáa dxus ĩtximeesa Molokçxáanaiꞌkwe txajaꞌ,
Txãꞌwẽy estrelxa Renfxán yaasesaꞌs iꞌkwe neeweꞌweꞌ iꞌkweꞌsx kuseju pheuꞌjnisatx.
Txãa paꞌga iꞌkweꞌsxtxi naa kiwejũ kutxiꞌjçxa Babilonia kiwen kaajxaꞌwath jĩna fxiꞌjniꞌ.
44 Kweꞌsx yaçgaweꞌsxaꞌ nasa uꞌpnimée kiwete ũsçxaꞌ, Dxusna weçxana ũsni yat jiꞌphuꞌtx, Dxusaꞌ maꞌwẽneꞌ Moisesaꞌs vxitkaah txãꞌwẽy vxitçxatx jiꞌphuꞌ.
45 Açaꞌ txãꞌsnatx kweꞌsx yaçgaweꞌsx Joswé yakh yuusaꞌ jxpaꞌgaçxa jxũna yuwéꞌ. Saꞌ judiu jiꞌjmée vxite nasa ũsni kiwete kaꞌgaꞌjçxa, Davxid entepkaçxtxi jiꞌphuꞌ. Txãa kiweꞌs Dxus puꞌçxte vxite nasatx kutxiꞌjçxa txãaweꞌsxtxi iiyamu.
46 Dxus peeygãanisa Davxidaꞌ teeçx dxuus yat txaahwaꞌj pheuꞌkh kxtee Jakob jiꞌjweꞌsx Dxus ũswaꞌj.
47 Nawa txãa dxuus yataꞌs Salomonku txah.
48 Txãꞌwẽtewa, Dxus cieluteweꞌsxaꞌ piçthẽꞌjweꞌsx txaahni yatte yuꞌ ũswaꞌjsa yuꞌçmeꞌ. Txãꞌwẽçxaíik Dxusaꞌ txajx yuwee ptaꞌsxsaꞌs naꞌwẽ kweꞌweꞌj:
49 Cieluçxáa adx jxkaahna ũswaꞌjaꞌ,
Açaꞌ kiweꞌ adx çxida txahwaꞌjçxáa vxitnisaꞌ.
Txãꞌwẽteꞌ, ¿maꞌwẽ adx ũswaꞌj yat txajakiꞌkwe naa kiwete?
¿Teeçx ahte adx jxkaasewaꞌj adx vxitnimeesa ũsmanx?
50 Nakwe seenaꞌ kĩjkĩhwa ũstaꞌ nawa txãꞌ jxuka adx vxitnisaçxaçxáataꞌ jĩꞌk Dxusaꞌ.
51 Txãꞌwẽtewa, Dxus yuweꞌs iꞌkweꞌsx ũuste jxpaꞌgayaꞌ waꞌlçxa thũꞌwẽꞌs aphçxa iꞌkwe fxiꞌzeꞌ Dxusaꞌs jiimée naꞌwẽ. Bagaçxtewa Dxus Espirituꞌs ahçenaçxáa ũsiꞌkwe iꞌkweꞌsx yaçgaweꞌsx naꞌwẽy.
52 Iꞌkweꞌsx yaçgaweꞌsx ¿maaçxaꞌ Dxus yuwe ptaꞌsxsaweꞌsxtxi pkxuusamée ũstxmanx? Teeçx yujaꞌ kĩh pkal yuhwa jiꞌphmeesa jĩna ptaꞌsxsaweꞌsxtxi ikhtxi. Ãçxhaꞌ iꞌkweꞌsxaꞌ txãa pkal jiꞌphmeesaꞌs ahçeçxa ikhiꞌkwe.
53 Dxus angel iꞌkweꞌsxtxi Dxus leyaꞌs ũstewa, nwẽeseꞌjeꞌçmée iꞌkwe jĩteꞌ,
54 txãaweꞌsxaꞌ wẽseꞌjçxaꞌ, kiꞌthtxi ksuusuꞌjnatx ũusaçxa Estebanaꞌs.
Estebanaꞌs ikhni
55 Txãꞌwẽtewa, Estebanaꞌ Dxus Espirituꞌs ũuste jxukak jiꞌph yuꞌ, saꞌ cielute pagayçxa Dxus uꞌpni seenaꞌ zhiçxkwesaꞌs uyku, txãꞌwẽy Jesuswa Dxus pukate yujuçxa ũstek uy.
56 Saꞌ txãꞌwẽsaꞌs uyçxaꞌ naꞌjĩk:
—Mthegwe, adxaꞌ uyna ũsthu cieluteweꞌsx Dxus Nçxiꞌk Nasa Yuusáꞌ Ney pukate ũsaꞌ jĩçpkaçxhaꞌ,
57 txãaweꞌsxaꞌ thũꞌwẽtx yaaphçxa, sus weyçxa jxukaysa Estebanaꞌs ãaphtxi ikhyaꞌ.
58 Saꞌ çxhabuh kutxiꞌjçxa Estebanaꞌs açesaweꞌsxaꞌ kwet wãatatahtx, txãaweꞌsx atxhtxi teeçx piçtakx Saulo yaasesaꞌs ktheguꞌjçxa.
59 Kwet wãatatajaçpkaçxhaꞌ, Estebanaꞌ naꞌjĩnak Dxus yakh puutx weꞌwe:
—Jesus, adx ũusaꞌs miipaꞌga jĩnaꞌwa,
60 peejxũkweçxa susku weꞌwe naꞌjĩna:
—Meen peltunaĩ naꞌwẽ yũuçtaꞌ txãaweꞌsxtxiꞌ.
Txãꞌwẽ weꞌwenaꞌwa uuk Estebanaꞌ.
