Hechos 8:1-40
8 Estebanaꞌs ikheçteꞌ, Sauloꞌ weçxanak ũsuꞌ.
Isa txãn entetx iiméh seenaꞌ ahçeyaꞌ takh Dxus yakh fxiꞌzesa Jerusalenteweꞌsxtxi. Txãꞌwẽ yũuteꞌ, jxukaysa pũsxitx Judea kiwesu vxiteꞌ Samariasu, naasáa Jesus jxkaahnisaweꞌsxçxáatx neeyũu Jerusalente.
2 Estebanaꞌs ikhteꞌ, pedaayaꞌ jxũna uꞌjtx Dxus yakh fxiꞌzesa yakhthẽꞌjweꞌsx wala ũꞌnena.
3 Naapkaçxhaꞌ Sauloꞌ Dxus yakh fxiꞌzesaweꞌsxtxi ahçeçxa yat iisak pakwena uꞌj txajũ juunaꞌ yuuna kutxiꞌjçxa karcelte ktxaajaꞌjyaꞌ piçthẽꞌj petx uꞌy yãꞌjçxa.
4 Nawa Jerusalen çxhabu ũphna uꞌjsa yuꞌ, Dxus yuweꞌs mteewa iiptaꞌsxtxi uꞌjweꞌ.
Dxus yuweꞌs Samariate ptaꞌsxni
5 Txajũꞌ Fxelipeꞌ Samaria kiwete teeçx çxhabte paꞌjçxa Kristoꞌ kimtewa ptaꞌsxku.
6 Açaꞌ kxtee nasa pkhaakhesaꞌ Fxelipe weꞌweniꞌs wala jxpaꞌyajkx wẽseꞌjtx, saꞌ kim yuhwa ãjãnimeesaꞌs kaavxyaꞌjaꞌjniꞌswa uytxi.
7 Txãꞌwẽ maazkuẽe nasawa katxhinitx neeyũꞌ txãꞌwẽ txãaweꞌsx ũuste eçx ewmeesa sus weyna kasehte. Saꞌ txãꞌwẽy ẽseyaꞌ ãjasamée vxiteꞌ çxida puuple uꞌjuyaꞌ ãjasameewa katxhitx.
8 Txãꞌwẽ yũuteꞌ, txãa çxhabte nasa jxukaysa wala weçxana ũsuꞌtx.
9 Txãa çxhabteꞌ teeçx dxijxuusáa Simon yaasesaꞌ Samariate nasatx wala kaypubaꞌjna ũsuꞌk, adxaꞌ kĩhtewa jxuka jiisath jĩna.
10 Açaꞌ txãꞌsnaçxaçxáatx nwẽeseꞌjna weçxana ũsuꞌ luuçx maꞌk yuu thẽꞌjsa maꞌk yuu nawa jxuka naꞌjĩna:
—Naa piçthẽꞌjaꞌs Dxusneꞌ puꞌçxhiꞌ jĩꞌtx.
11 Saꞌ txajx jxkaahniꞌs jxukatx nwẽeseꞌjeꞌ, txãꞌwẽ txajx dxijxuuni yakh wala txaçxyãꞌj kaypubaꞌjna ũsuꞌneꞌ naa paꞌga.
12 Nawa Fxelipeꞌ Dxus jxkaahwaꞌjaꞌs ptaꞌsxna paꞌjçxa, Jesukristoꞌ Dxus kaahnisaꞌ jĩteꞌ jiyuçxaꞌ, piçthẽꞌj petx uꞌy yãꞌjçxa yuꞌte yaꞌbautisãytxi.
13 Açaꞌ txãꞌwẽ txãa dxijxuusaawa Fxelipe ptaꞌsxniꞌs jiyuçxaꞌ, yuꞌte yaꞌbautisãyçxa Fxelipe yakh uꞌjuꞌk. Saꞌ txãꞌwẽ kĩjkĩhwa kaavxyaꞌjaꞌtheꞌ txãꞌsna uyçxaꞌ kujk yajkxna uꞌjuꞌ.
14 Txajũꞌ Jesus jxkaahnisa Jerusalente ũssaꞌ txãꞌwẽ Samariateweꞌsxwa Dxus yuweꞌs txãaweꞌsx ũuste jxpaꞌgaçxa yaꞌbautisãytxi jĩniꞌs jiyuçxaꞌ, kaahtx Pedroꞌs Juan yakh.
15 Açaꞌ kxtee txãaweꞌsx paꞌjçxaꞌ, Dxus yakh puutx weꞌwetx Dxus yuweꞌs jxpaꞌgasa Samariateweꞌsx paꞌgate, Dxus Espirituꞌs jxpaꞌgakahn.
16 Txãꞌwẽmeꞌ, nyafxíi yuꞌ Dxus Espirituꞌs jiꞌphmeetx yuꞌ, naasáa Jesusaꞌsçxáatx jxpaꞌgaçxa yuꞌte yaꞌbautisãysa yuꞌ.
17 Txajũꞌ Pedroweꞌsxaꞌ txãaweꞌsx dxikthesu peekizeçxa Dxus yakh puutx weꞌweteꞌ, Dxus Espirituꞌs jxpaꞌgatx.
18 Açaꞌ txãꞌwẽ yũuteçxáa Dxus Espiritu kĩjaçte uyçxaꞌ, txãa dxijxuusáa Simonaꞌ vxyu ũs wẽek
19 naꞌjĩna:
—Iꞌkweꞌsx txãꞌwẽ ãjaniꞌs adxnawa mahwe, kxah adxwa dxikthesu peekizeteçxáa maawa Dxus Espirituꞌs jxpaꞌgatxna jĩteꞌ,
20 Pedro pasçxaꞌ:
—Iidx vxyuꞌ idx yakh jaꞌda vxituna, Dxus peesniꞌs vxyu yakhgu wey wẽjeꞌ naa paꞌga.
21 Idxaꞌ kweꞌsx naꞌwẽy yuuwaꞌj yuꞌsaꞌ leꞌçxkwe yuhwa jxpaꞌgawaꞌj jiꞌphmeeg, Dxus dxiꞌpte ewmeeg yaakiꞌ naa paꞌga.
22 Txãꞌwẽ ewmée yũuwaꞌjçxáꞌs yaakxniꞌs nvxihtçxa, Dxusaꞌs mneeweꞌwe. Txãꞌwẽ yũuteꞌ, peltunaĩwáana.
23 Txãꞌwẽmeꞌ iidx ũuste iiwejçx iiwejçx yaakxwaꞌjçxáana uta jiꞌphgu, açaꞌ txãꞌwẽ yaakxnisaꞌ jxuka idxaꞌs tudçxa jiꞌphaꞌ jĩteꞌ,
24 Simon pasçxaꞌ:
—Iꞌkweꞌsxaꞌ adx paꞌgate Dxus yakh meen puutx weꞌwewe. Txãꞌwẽmeꞌ, Dxusaꞌ peltunãyweꞌsxmeetaꞌ adxaꞌs jĩk.
25 Txajũꞌ Jesus jxkaahnisaweꞌsxaꞌ Dxus yuweꞌs ptaꞌsxçxa txajũ kasehtx Samaria kiwesu vxiteꞌ çxhabkuẽsu Dxus yuweꞌs ptaꞌsxyaꞌ. Saꞌ txãꞌwẽ yũuçxatx Jerusalenna kiꞌ sxawed.
Fxelipeꞌ Etiopiajuweꞌsx yakh puutx weꞌweni
26 Txãa eꞌsuꞌ Dxus angelaꞌ Fxelipeꞌs naꞌjĩnak jxkaah:
—Ayjxu kasehçxa meꞌj Jerusalenu Gasa çxhabna uꞌjni dxiꞌjsu.
Txãa dxiꞌjaꞌ nasa uꞌpnimeesuk skhẽwna ũsuꞌ.
27 Txãꞌjĩteꞌ, Fxelipeꞌ txãa dxiꞌthe uꞌjweççxaꞌ teeçx piçthẽꞌj eunuko Etiopía kiwejuweꞌsx uꞌjweçtek uy. Txãa piçthẽꞌjaꞌ Etiopía kiwete reina Kadace tasxte vxyuu jxaawsak yuꞌ. Saꞌ Dxusaꞌs weçxayaꞌ paꞌjsak yuꞌ Jerusalente.
28 Txãasak txajx kiweníi sxawedna txajx uꞌjni kaçxetilxate kaçxçxa Dxus yuwe ptaꞌsxsa Isaias libruꞌs lẽeyna uꞌjweç yuꞌ.
29 Txajũꞌ Dxus Espirituꞌ Fxelipeꞌs weꞌwek: Kaçxetilxate uꞌjsaꞌs kpajkxyaꞌ meꞌj jĩteꞌ,
30 Fxelipe utxaana sẽhçxaꞌ Isaias librute naꞌjĩna lẽeyniꞌs wẽseꞌjçxaꞌ pẽjxku:
—¿Jiyuꞌgáꞌ iidx lẽeyniꞌs? jĩteꞌ,
31 txãa piçthẽꞌjaꞌ naꞌjĩk:
—¿Maꞌwẽ yũuçxa jiyukiꞌth? kimwa ptaꞌsxmeeteꞌ jĩçxaꞌ, Fxelipeꞌs kaçxetilxate tejkaçxa pukate kaçxkaakh.
32 Saꞌ Dxus librute naꞌwẽ fxiꞌjniꞌsku lẽeyna uꞌjweç yuꞌ:
Piisxakuẽ naꞌwẽk ikhyaꞌ jxũna uꞌjni yuu.
Piisxakuẽwa maꞌwẽga khas wakaçteꞌ pebeꞌçmée, txãꞌwẽy txãawa pebeemeꞌ.
33 Ãhmeekwesa naꞌwẽ yuupaꞌga, nweꞌwenimeek uu,
Açaꞌ txajx luuçx jĩnisa kim yuhwa neeyũumeetaꞌ.
Txãꞌ naa kiwete txaçx fxiꞌzemeyna ikhnik yuu naa paꞌga.
34 Txajũꞌ txãa piçthẽꞌj lẽeyna uꞌjsaꞌ pẽjxku Fxelipeꞌs:
—Adxaꞌs meen peetaꞌsx, Dxus yuwe ptaꞌsxsa ayte weꞌweꞌk txãꞌ ¿kimnaga weꞌweꞌ? ¿Peekx uuwaꞌjaꞌs wáꞌ weꞌweꞌ? meeçxaꞌ ¿vxitesa uuwaꞌjaꞌs wáꞌ ptaꞌsxiꞌ? jĩteꞌ,
35 Fxelipeꞌ txãa lẽeyniꞌs ptaꞌsxku: Naꞌ Jesus uuwaꞌjaꞌsku weꞌweꞌ jĩna.
36 Txajũꞌ teeçx ahte yuꞌte paꞌjçxaꞌ, txãa piçthẽꞌj Etiopiajuweꞌsxaꞌ naꞌjĩk:
—Ayte yuꞌ uꞌpaꞌ açaꞌ adxaꞌ ãçxhíi yaꞌbautisãy wẽewaçaꞌ, ¿ãjãmaꞌth? jĩteꞌ, Fxelipeꞌ naꞌjĩk:
37 —Iidx ũusuh jxuka txãꞌwẽ Jesusaꞌ Dxus Nçxiꞌkneꞌ yuꞌ sũhçxa yuꞌ, yaꞌbautisãyyaꞌ ãjaneꞌga jĩna ptaꞌsxteꞌ, txãa piçthẽꞌj pasçxaꞌ:
—Jesukristoꞌ Dxus Nçxiꞌk yuh yuꞌneꞌ sũjuꞌth adxaꞌ jĩk.
38 Txajũꞌ kaçxetilxaꞌs kxuujuꞌjçxa, eꞌzíi yuꞌte kĩhçxa Fxelipeꞌ bautisãyku txãa Etiopiajuweꞌsxaꞌs.
39 Txãa yuꞌju kasejeçpkaçxhaꞌ, Dxus Espirituꞌ Fxelipeꞌs jxũna uꞌkh, açaꞌ txãa Etiopiajuweꞌsxaꞌ peena yuꞌ uymeeçxawa txajx dxiꞌthe wala wẽtwẽt weçxana uꞌkh.
40 Txajũꞌ Fxelipeꞌ Azoto çxhabte paꞌjçxaꞌ, çxhab iisak Dxus yuweꞌs ptaꞌsxna uꞌj, Cesarea çxhabte paꞌphkaçx.
