Hechos 9:1-43
9 Naapkaçxhaꞌ Saulo yuꞌ ikhwẽena nesku yuꞌ Jesusaꞌs nwẽeseꞌjsaweꞌsxtxi. Txãasak sacerdote npiiçthẽꞌj tasxna uꞌj,
2 karta pẽjxyaꞌ Damasko çxhabna uꞌjçxa judiuweꞌsx pkhaakheni yat-su Jesusaꞌs nwẽeseꞌjsatx pakweçxaꞌ piçthẽꞌj petx uꞌy tudçxa Jerusalenna preesu jxũna uꞌjyaꞌ.
3 Damaskote paꞌjyaꞌ utxaana uꞌjweçpkaçxhaꞌ, txajx dxiꞌpte uymeenusku cieluju eenaꞌsa kweeth.
4 Açaꞌ Sauloꞌ weteçxaꞌ wẽseꞌkh naꞌwẽ weꞌweniꞌs:
—Saulo, Saulo, ¿kĩh yũupaꞌgaga adxaꞌs ahçeçxa pkxuuyaꞌ pakwéꞌ? jĩteꞌ, Sauloꞌ pẽjxku:
5 —Idxaꞌ ¿kimga? jĩna. Saꞌ naꞌwẽ weꞌweniꞌsku wẽseꞌj:
—Adxíi Jesusthu, idx naꞌwẽ ahçeçxa pkxuuyaꞌ pakweꞌg txãath. Idxaꞌ peekíiçxáa yaꞌkpãꞌyuuwaꞌjaꞌs pakwena ũsgu jĩteꞌ,
6 Sauloꞌ ũukhnite yayana naꞌjĩk:
—Idxaꞌ ¿kĩhga yũu jxthãasuꞌ adxaꞌs? jĩteꞌ, naꞌwẽk pas Jesusaꞌ:
—Kiiteçxa meꞌj çxhabna. Kxtee paꞌthe yaꞌptaꞌsxina kĩh yũuwaꞌjaꞌswa jĩk.
7 Txãꞌwẽ yũuteꞌ, Saulo yakh uꞌjsaꞌ wala ũukhtxi, txãꞌwẽ puutx weꞌwetewa kimnawa uymeeçxa.
8 Txajũꞌ Sauloꞌ kiiteçxawa uyyaꞌ ãjameꞌ. Açaꞌ puꞌkisçxa jxũna uꞌjtx Damaskon.
9 Kxteꞌ tekh en uyyaꞌ ãjamée, txãꞌwẽy kĩhwa ũꞌmeek uꞌpuꞌ.
10 Damaskoteꞌ Jesusna nwẽeseꞌjsa Ananias yaasesak uꞌpuꞌ. Txãꞌsaꞌ Jesus vxyaaçxa naꞌwẽk weꞌwe:
—Ananias jĩna paꞌyateꞌ, Ananias pasçxaꞌ:
—¿Kĩh kaajxaꞌwaga? jĩteꞌ,
11 Jesus weꞌweçxaꞌ:
—Teeçx klxiikhun Kuꞌle yaasesate meꞌj. Kxtee paꞌjçxa Judas yatte pẽyineꞌga: Teeçx piçthẽꞌj Tarsojuweꞌsx Saulo yaasesaꞌs peejxthu jĩna. Txãa piçthẽꞌjaꞌ Dxus yakh puutx weꞌwena uꞌpaꞌ.
12 Saꞌ teeçx piçthẽꞌj Ananias yaasesa paꞌjçxa kiꞌ uyyaꞌ ãjakahn txajx kakwete peekizeeçtek ksxaꞌw.
13 Txãꞌjĩna weꞌweniꞌs wẽseꞌjçxaꞌ Ananiasaꞌ naꞌjĩk:
—Adxaꞌs maawa wala iiptaꞌsxtaꞌ Jerusalente idx yakh fxiꞌzesaweꞌsxtxi txãꞌwẽ wala pkxuusaꞌ txãa piçthẽꞌjaꞌ jĩꞌtx.
14 Saꞌ ãçxwa naa çxhabte yujaꞌ sacerdote npiiçthẽꞌjweꞌsxtxi karta pẽjxçxa idxna yaakxsaweꞌsxtxi preesu jxũna uꞌjyaꞌ jĩteꞌ,
15 Jesus pasçxaꞌ:
—Idxaꞌ meꞌjçxáa. Txãa piçthẽꞌjaꞌ adx txhitxhnisaꞌ adx yuweꞌs ptaꞌsxwaꞌjsa nasa vxite kiwejuweꞌsxtxi, jxkaahsaweꞌsxtxi, saꞌ Israelweꞌsxtxiwa ptaꞌsxwaꞌjsaꞌ.
16 Adxaꞌ txãa piçthẽꞌjaꞌs ptaꞌsxiꞌnja adxna selpiina uꞌjupaꞌga makwe pkxuuni yuuwaꞌjaꞌswa jĩteꞌ,
17 Ananiasaꞌ Saulo uꞌpni yatna uꞌjçxaꞌ, txajx kakwete peekizeçxa naꞌjĩk:
—Yakhthẽꞌj Saulo, dxiꞌthe idx yuhte Jesus vxyaaneꞌ txãak adxaꞌs kaah idx kiꞌ uyyaꞌ ãjaçxa Dxus Espirituꞌs ũuste jxuka jxpaꞌgakahn jĩçpkaçxhaꞌ,
18 yafxte aphsa ubuteꞌ, kiꞌ uyyaꞌ ãjaçxaꞌ, kiiteçxa yaꞌbautisãyku.
19 Txajũꞌ ũꞌwaꞌjaꞌs kiꞌ jxpaꞌgaçxa çxhãçxhak, saꞌ Damaskotee ũsuꞌk maz enwa Jesusaꞌs nwẽeseꞌjsaweꞌsx yakh.
Sauloꞌ Damaskote Dxus yuweꞌs ptaꞌsxni
20 Txajũꞌ Sauloꞌ Dxus yuweꞌs ptaꞌsxyaꞌ takhku judiuweꞌsx pkhaakheni yat-su Jesusaꞌ Dxus Nçxiꞌkaꞌ jĩna.
21 Açaꞌ wẽseꞌjsa jxukay kuh yajkxna naꞌwẽtx weꞌweꞌ:
—¿Naa piçthẽꞌjíi txãꞌwẽ Jerusalente Jesusaꞌs neeweꞌwesatx ikh wẽena fxiꞌzesameenáꞌ? Saꞌ ¿txãꞌwẽy ayteweꞌsxtxiwa preesu jxũna uꞌjçxa sacerdote npiiçthẽꞌjweꞌsx kusete dukhyaꞌ sũhçxa yuusa yuꞌçmeenáꞌ? jĩꞌtx.
22 Txãꞌjĩçtewa Saulo yuꞌ jweeíiçxáak çxhãçxha ptaꞌsxiꞌ Jesusaꞌ Dxus tasxu yuusa Kristo yuh yuꞌk jĩna, saꞌ kxtee Damaskote judiuweꞌsxtxi maꞌwẽ paswaꞌjaꞌs yuhwa jiꞌphmeek nvxiituꞌ.
Judiuweꞌsx ikhyaꞌwatewa Saulo iyuni
23 Txãa eꞌsu txaçxteꞌ, judiuweꞌsxaꞌ Sauloꞌs ikhyaꞌ puutx weꞌweçxa
24 çxhabu kasehni vxitxte en kuswa yupna nestxi yuu. Açaꞌ txãꞌwẽ yũuniꞌs Sauloꞌ jiyuk.
25 Açaꞌ Sauloꞌs piꞌkxna uꞌjusaweꞌsxaꞌ kusçxáa Sauloꞌs kanasta walate akhçxa çxhab peekuꞌj uphnikhẽtx ekaju spajkx açesa kusejũ nweꞌweyaꞌ.
Jerusalente Saulo paꞌjni
26 Txãa eꞌsuꞌ Sauloꞌ Jerusalente paꞌjçxaꞌ, Jesusaꞌs nwẽeseꞌjsaweꞌsx yakh pkhaakhe wẽek. Nawa kxteeweꞌsx jxukaysa ũukhtxi Jesusaꞌs nwẽeseꞌjsameewáana sũhçxa.
27 Txãꞌwẽtewa Bernabé yuꞌ peꞌjna uꞌjçxa Jesus jxkaahnisaweꞌsx tasxte nuypaꞌjçxa naꞌwẽk ptaꞌsx:
—Sauloꞌs Jesus vxyaak Damasko dxiꞌthe uꞌjweçte, saꞌ txãa yakh puutx weꞌwek. Açaꞌ Sauloꞌ Damaskote paꞌjçxa Jesus kaapiyaꞌjniçxaçxáꞌsku ptaꞌsxna ũsuꞌ jĩna ptaꞌsxteꞌ, Sauloꞌs ũukhmée jxpaꞌgatx.
28 Açaꞌ Jerusalente ũsuꞌk txãaweꞌsx yakh pkhaakhena.
29 Saꞌ judiuweꞌsx griego yuweju weꞌwesa yakh ũukhmeek puutx weꞌweꞌ Jesus kaapiyaꞌjniꞌs ptaꞌsxna. Nawa txãaweꞌsx yuꞌ ahçeçxa ikhyaꞌwatx yuꞌ.
30 Açaꞌ txãꞌwẽ yũuniꞌs yakhthẽꞌjweꞌsx jiyuçxaꞌ, Sauloꞌs peꞌjna uꞌjtx Cesarea çxhabna. Txajũ Tarso çxhabnatx kaah.
31 Txajũꞌ Dxus yakh fxiꞌzesa Judea, Galilea, Samariasuweꞌsxaꞌ kim yuhnawa ũukhmée jweeíiçxáatx çxhãçxhana uꞌj Dxusçxáana nwẽeseꞌjna. Açaꞌ Dxus Espiritu puꞌçxteꞌ, jweeíiçxáatx pehnana uꞌj.
Eneas katxhini
32 Txajũꞌ Pedroꞌ yakhthẽꞌjweꞌsxtxi Dxus yuweꞌs ptaꞌsxyaꞌ kasehçxaꞌ, Lida çxhabte Jesusaꞌs nwẽeseꞌjsaweꞌsxtxiwa thegyaꞌ uꞌkh.
33 Kxteꞌ teeçx piçthẽꞌj Eneas yaasesa oçxo anxuk ãçaꞌna ũsuꞌ ẽseyaꞌ ãjameeçxa.
34 Açaꞌ Pedroꞌ naꞌjĩk:
—Eneas, idxaꞌs Jesukristo nuykatxhina. Açaꞌ kiiteçxa iidx deeniꞌs mkiis jĩçpkaçxhaꞌ, txãa piçthẽꞌjaꞌ naa dudtey kiitek.
35 Açaꞌ kxtee Lida çxhabte vxiteꞌ Sarón kiwete ũssa jxukaysa uyçxaꞌ, Jesusaꞌs nwẽeseꞌjyaꞌ utxaatx.
Dorkas kiꞌ ĩtxi yuuni
36 Txãn ensuꞌ Jope çxhabte Jesusaꞌs nwẽeseꞌjsa teeçx uꞌpuꞌk Tabita yaasesa. Txãꞌ griego yuweteꞌ Dorkasku yaase yuꞌ. Txãa uꞌyaꞌ wala puꞌçxna fxiꞌzeꞌk maawa peejxsatxiꞌ.
37 Txãa ensuꞌ Dorkasaꞌ ãçaꞌçxa uuk. Açaꞌ uuníi kakweꞌs kpẽeuꞌjçxa ẽe yatgatx khikh.
38 Pedro ũsni Lida çxhabaꞌ Jope çxhab yakh utxak yuꞌ. Açaꞌ Jope çxhabte Jesusaꞌs nwẽeseꞌjsaweꞌsxaꞌ Pedroꞌ Lida çxhabte ũsaꞌ jĩniꞌs jiyuçxaꞌ, eꞌz piçthẽꞌj kaahtx Pedroꞌs naꞌwẽ ptaꞌsxyaꞌ:
—Jxthẽeyuumée Jope çxhabna myuh jĩteꞌ,
39 Pedro txãaweꞌsx yakh uꞌjçxa kxte paꞌtheꞌ, peꞌjna uꞌjtx uusáa ũsniga. Açaꞌ vxiudaweꞌsx jxukaysa ũꞌnena pkhaakheçxa ptaꞌsxtxi Dorkas nee ĩtxiy kmiisa umçxa peesnitx.
40 Txajũꞌ Pedroꞌ jxukaysatx eka kutxiꞌjnaꞌwa, peejxũkweçxa Dxus yakh puutx weꞌwenaꞌwa uusáꞌs thegçxa naꞌjĩnak weꞌwe:
—Tabita, mkiitewe jĩçpkaçxhaꞌ, txãa uusáꞌ thegçxa Pedroꞌs uynaꞌwa kiiteçxa kaçxku.
41 Txajũꞌ Pedroꞌ puꞌkisçxa kxuujuꞌjnaꞌwa, Dxus yakh fxiꞌzesaweꞌsx vxiteꞌ vxiudaweꞌsxtxi paꞌyaçxa, ĩtxik dukh.
42 Txãꞌwẽ yũuniꞌs Jope çxhabteweꞌsx jxukaysa jiyuçxaꞌ, wala kuhsa Jesusaꞌs nwẽeseꞌjyaꞌ utxaatx.
43 Txajũꞌ Pedroꞌ Jope çxhabte kuh enku ũsuꞌ khaꞌtx weysáa Simon yatte.
