Juan 1:1-51
1 Nyafxiitey naa kiwe meeíin, Kristoꞌ ũsyãꞌkh yuꞌ. Txãꞌ Dxus yakhku ũsuꞌ, saꞌ Dxus íiçxáak yuꞌ.
2 Nyafxiiteyaꞌ txãꞌwẽk Dxus yakh ũssa yuꞌ.
3 Dxusaꞌ txãꞌsna neeweꞌweçxak kĩjkĩhnawa jxuka kvxiituꞌj. Txãa paꞌga naa kiwete kĩjkĩhwa ũssaꞌ jxuka txajx vxitniçxaçxáataꞌ. Dxus yakh ũssa kĩjkĩhnawa vxitmeewaçaꞌ, kĩh yuhwa mee yuutxna.
4 Uuçxa kiꞌ ĩtxi yuuwaꞌjaꞌs txãak jiꞌphuꞌ, saꞌ txãa íiçxáak nasatx eenaꞌte kaafxiꞌzeꞌjwaꞌjsa yuꞌ.
5 Txãa eenaꞌsaꞌ çxhiꞌdxte kweethku, açaꞌ çxhiꞌdxsaꞌ fxĩçxhayaꞌ ãjameꞌ.
6 Txãa eenaꞌsaꞌs tuutheꞌjsaꞌ teeçx piçthẽꞌj Juan yaasesak yuꞌ Dxus kaahni.
7 Txãꞌ txãa eenaꞌte kaafxiꞌzeꞌjwaꞌjsaꞌs tuutheꞌjsak yuꞌ, maawa txajx tuutheꞌjniꞌs wẽseꞌjçxa Kristoꞌs ũuste jxpaꞌgakahn.
8 Juan yuꞌ eenaꞌte kaafxiꞌzeꞌjwaꞌjsa meek yuꞌ, naasáa eenaꞌte kaafxiꞌzeꞌjwaꞌjsaꞌs tuutheꞌjsaçxáak yuꞌ.
9 Naapkaçxhaꞌ nasatx eenaꞌte kaafxiꞌzeꞌjwaꞌjsa Kristoꞌ naa kiwete vxyaaççxáak yuꞌ.
10 Saꞌ vxyaaçxaꞌ naa kiwete fxiꞌzena ũsuꞌk. Txãꞌwẽtewa, naa kiweteweꞌsxaꞌ jiyumeetaꞌ, makwe txajx vxitnisaçxawa.
11 Txajx vxitni kiwete vxyaatewa, txajx jiꞌj jĩnisaꞌ jxpaꞌgameetaꞌ.
12 Makwe txajx jiꞌj jĩnisa jxpaꞌgameetewa, maaíi yuꞌ txãꞌs nwẽeseꞌjçxa ũuste jxpaꞌgatx. Açaꞌ txãꞌsna jxpaꞌgasatxiꞌs Dxusaꞌ txajx luuçx yuuwaꞌjaꞌs ũsku.
13 Txãa paꞌga txãaweꞌsxaꞌ naa kiwete neyweꞌsx kakweju kakwe yakh upxhiꞌtx neyweꞌsx jxthãasni txãꞌwẽsameetaꞌ, txãaweꞌsxaꞌ Dxus luuçx yuuna paꞌjsataꞌ.
14 Nyafxiitey Dxus yakh ũssaꞌ nasaa kakweꞌs jxpaꞌgaçxa kweꞌsx yakh ũsuꞌk, isasaçxáꞌs ptaꞌsxna peeygãhna. Txãa paꞌga kweꞌsxaꞌ txajx fxiꞌzeni wala zhiçxkwesaꞌs uythaꞌw, txãasa jiithaꞌw Dxus Nçxiꞌk teeçxçxáasatewa.
15 Txãꞌsnak Juanaꞌ tuutheꞌjna naꞌjĩna weꞌwe:
—Adxaꞌ naꞌsnath ptaꞌsxiꞌ iꞌkweꞌsxtxi: Adx eꞌste yujaꞌ txãꞌ adx naa kiwete upxmeyna weꞌsxku yuꞌ, txãa paꞌga adxte jxthaakwesaꞌ jĩnak ptaꞌsx.
16 Açaꞌ kweꞌsxaꞌ txajx peeygãani makwe neꞌ yuꞌ txãꞌsaꞌ jxukathaꞌw jxpaꞌga jxukaysa.
17 Nyafxíꞌ juunaꞌ jxkaahnisa ley Moises nvxihtku txãꞌsçxáanathaꞌw jxpaꞌga, naapkaçxhaꞌ Jesukristoꞌ isa Dxus peeygãaniꞌsku nuypaꞌj txãꞌsnathaꞌw jxpaꞌga.
18 Nawa maa yuhwa Dxusaꞌs iiuymeetaꞌ. Txãꞌwẽtewa Dxus Nçxiꞌk teeçxçxáasa Ney yakh ih ũssaꞌ kweꞌsxtxiꞌ kaajiyuꞌkh Dxus maꞌwẽsatewa.
Jesus kimtewa Juan ptaꞌsxni
(Mt 3.11-12; Mr 1.7-8; Lk 3.15-17)
19 Jerusalente judiuweꞌsxaꞌ pẽjxyaꞌ kaahtx sacerdote vxiteꞌ levxitaweꞌsxtxi Juan kimtewa jiyuyaꞌ.
20 Açaꞌ Juanaꞌ ãatek ptaꞌsx:
—Adxaꞌ Kristomeeth jĩna.
21 Txajũꞌ kiꞌkin pẽjxtxi:
—Txãꞌwẽçxaꞌ ¿kimga? ¿Txãniitey Dxus yuwe ptaꞌsxsa Elias wáꞌga? jĩteꞌ, Juan pasçxaꞌ:
—Txãꞌwẽmeeth jĩk.
Açaꞌ kiꞌkin pẽjxtxi:
—Dxus yuwe ptaꞌsxsaꞌ paꞌjana jĩꞌtx txãa wáꞌga jĩteꞌ:
—Txãameeth jĩnak pas.
22 Txajũꞌ kiꞌ pẽjxtxi:
—Txãꞌwẽçxaꞌ idxaꞌ ¿kimga? Idxaꞌ kĩh yũuna fxiꞌzesaçxawa mpeetaꞌsx. Txãꞌwẽmeꞌ, kweꞌsxtxi jxkaahsatx ptaꞌsxyaꞌ uꞌjwaꞌj jiꞌpthaꞌw jĩteꞌ,
23 Juan pasçxaꞌ:
—Dxus yuwe ptaꞌsxsa Isaiasaꞌ naꞌjĩnak weꞌwe: Nasa uꞌpnimée kiwesu sus weꞌweni pthũusena: Dxus paꞌjwaꞌjaꞌs mpheuꞌjwe jĩna, nawa adx tuutheꞌjna pekũhwaꞌjaꞌs ptaꞌsxnak txãꞌjĩ.
24 Juanaꞌs paapẽjxyaꞌ paꞌjsaꞌ fxariseoweꞌsx kaahnisatx yuꞌ,
25 saꞌ kiꞌkin paapẽjxtxi:
—Txãꞌwẽ Kristomeeth, saꞌ Eliaswa meeth, saꞌ Dxus yuwe ptaꞌsxsa paꞌjana jĩꞌtx txãameeth jĩꞌg saꞌ ¿kĩjxaꞌçxáaga nasatx yuꞌte bautisaĩꞌ? jĩteꞌ,
26 Juan pasçxaꞌ:
—Adxaꞌ yuꞌteçxáath bautisaĩꞌ. Nawa iꞌkweꞌsx ksxavxyte teeçx ũsaꞌ txãꞌsaꞌ jiimeeneꞌkwe.
27 Txãꞌ adx eꞌsu vxyaana, nawa txãꞌ adxte jxthaakwesaꞌ. Açaꞌ adxaꞌ txajx pelgatxi tudni wesçxáa yuhtxwa khihbxaꞌ ãhmeekwesath jĩnak pas.
28 Juanaꞌ Jordan yuꞌwala kuteju sek kãani juꞌgu Betábara yaasesatek txãꞌwẽ bautisãyna ũsuꞌ, açaꞌ kxteetx txãꞌwẽ paapẽjxyaꞌ paꞌjna ũsuꞌ.
Kristo Dxus kaahni piisxakuẽ
29 Kuskuskhẽꞌ Juanaꞌ Jesus yuhte uyçxaꞌ, naꞌwẽk weꞌwe:
—Mthegwe, naaíi Dxus kaahni piisxakuẽꞌ, jxukaysa pkaltxi txudewaꞌjsa.
30 Açaꞌ adxaꞌ txãꞌsna weꞌweçxath txãꞌwẽ ptaꞌsx: Adx eꞌsu teeçx piçthẽꞌj vxyaana, txãꞌ adxte jxthaakwesaꞌ, txãꞌ naa kiwete adx upxmeyna weꞌsxku yuꞌ txãa paꞌga.
31 Txãꞌsaꞌ adxíi yuuwa jiimeeth yuꞌ kimtewa. Nawa Israelweꞌsx txãꞌs jiyukahn yuꞌteçxáawa bautisãyna ũsuꞌth.
32 Juanaꞌ kiꞌkin weꞌwek naꞌjĩna:
—Dxus Espirituꞌs uythu cieluju tub çxihme naꞌwẽsa Jesus kajkwekhẽ kĩijaçte.
33 Txãꞌwẽtewa, adxaꞌ nee jiimée íiçxáath yuꞌ kimtewa. Nawa adxaꞌs bautisãyyaꞌ kaahsaꞌ ptaꞌsxku: Espirituꞌs uyuuneꞌga teeçx piçthẽꞌj kajkwete kĩijaçteꞌ, açaꞌ txãa piçthẽꞌjaꞌ isa Dxus Espirituꞌs nasaa ũuste kxuꞌakheꞌjsa yuuna jĩnak ptaꞌsx.
34 Açaꞌ ãçxhaꞌ uyçxaꞌ, jiyuth Dxus Nçxiꞌktewa, saꞌ txãꞌsnath tuutheꞌjeꞌ.
Kristo yakh uꞌjusa nyafxteweꞌsx
35 Vxite kuskuskhẽꞌ Juanaꞌ kiꞌ kxtey ũsuꞌk txãa yakh uꞌjusa eꞌzsa yãꞌjçxa.
36 Saꞌ Jesus jxkhẽuuçte uyçxaꞌ, Juanaꞌ naꞌjĩk:
—Mthegwe, naaíi Dxus kaahni piisxakuẽꞌ.
37 Txãꞌjĩniꞌs wẽseꞌjçxaꞌ, txãa eꞌzsaꞌ Jesus eꞌstey uꞌjtx.
38 Açaꞌ Jesusaꞌ yuꞌthegçxaꞌ, txajx eꞌste yuusatx uyku, saꞌ naꞌwẽk pẽjx:
—¿Kĩjkwe pakwéꞌ? jĩteꞌ, txãaweꞌsx pasçxaꞌ:
—Kaapiyaꞌjsa, ¿mteega uꞌpuꞌ? jĩteꞌ,
39 Jesus pasçxaꞌ:
—Mejkawe thegyaꞌ jĩk. Açaꞌ txãaweꞌsxaꞌ uꞌjçxaꞌ jiyutx mtee uꞌpsatewa. Saꞌ txãa yakh kxtee neeyũutx, kusuçyãꞌkh yuꞌ naa paꞌga.
40 Juan weꞌweniꞌs wẽseꞌjçxa Jesus eꞌstey uꞌjsa teeçxsaꞌ Adresku yaase yuꞌ, Simon Pedro nyakh.
41 Açaꞌ Adresaꞌ txajx nyakh Simon khuẽꞌyna nyafxte ptaꞌsxyaꞌ uꞌkh:
—Dxus tasxu yuusa Kristo jĩniꞌs yuuthaꞌw uy jĩna.
42 Txajũꞌ Adresaꞌ txajx nyakh Simonaꞌs peꞌjna kũjk Jesus ũsnite. Açaꞌ Jesus uyçxaꞌ naꞌjĩk:
—Idxaꞌ Jonas nçxiꞌk Simon yaaseg, nawa ãçxhaꞌ Cefxas yaseni neeyũuneꞌga. Cefxas yuꞌ, Pedro jĩniꞌ.
Fxelipe, Natanaelweꞌsxtxi Jesus paꞌyani
43 Vxite kuskuskhẽꞌ Jesusaꞌ Galilea kiwen uꞌjweççxaꞌ, Fxelipeꞌs uyçxaꞌ:
—Adx yakh myuh jĩnak piꞌkx.
44 Fxelipe yuꞌ, Beçaida çxhabte uꞌpsak yuꞌ, Adres Pedroweꞌsxwa txãa çxhabteyweꞌsxtxi yuꞌ.
45 Açaꞌ Fxelipeꞌ Natanaelaꞌs ptaꞌsxyaꞌ uꞌjçxaꞌ naꞌjĩk:
—Moisesaꞌ teeçx piçthẽꞌjaꞌ vxyaana jĩnak fxiꞌj ley librute, açaꞌ Dxus yuwe ptaꞌsxsa txãniiteyweꞌsxwa txãꞌsnaíiçxáatx tuutheꞌjna fxiꞌj txãꞌsthaꞌw kweꞌsxaꞌ puutx uy. Txãa piçthẽꞌjaꞌ Jose nçxiꞌk Jesusaꞌ, Nasaret çxhabteweꞌsxaꞌ jĩteꞌ,
46 Natanael pasçxaꞌ:
—Nasaretteꞌ, ¿maaçxáꞌ nasa ewsa kasejxaꞌ ãjamaꞌk? jĩteꞌ, Fxelipe pasçxaꞌ:
—Mejka wakx thegyaꞌ jĩk.
47 Txajũꞌ Natanael utxaana kũjuçte Jesusaꞌ uyçxaꞌ, naꞌjĩk:
—Naa piçthẽꞌj yuuçxaꞌ Israel nweꞌsx jxpubasamée nasa ewsa yuh yuꞌga.
48 Txãꞌjĩteꞌ, Natanaelaꞌ pẽjxku:
—¿Maꞌwẽ yuuçxaga adxaꞌs jiyu? jĩteꞌ, Jesus pasçxaꞌ:
—Fxelipe paꞌyameyna, idxaꞌs uythu higwera fxtũu tasxte uꞌpte jĩteꞌ,
49 Natanaelaꞌ naꞌwẽk pas:
—Idxaꞌ Dxus Nçxiꞌkgu, Israelweꞌsxtxi jxkaahsa jĩteꞌ,
50 Jesusaꞌ naꞌjĩk:
—Txãꞌwẽ higwera fxtũu tasxte uꞌpte idxaꞌs uythu jĩteçxáa ¿adx kimtewa jiyuwáꞌga? Txãꞌwẽyãꞌjçxaꞌ, naajũyãꞌjaꞌ Dxus kaavxyaꞌjaꞌjnitx wejx walasatx uyuuneꞌga jĩk.
51 Saꞌ kiꞌ weꞌweçxaꞌ:
—Adxaꞌ isath weꞌweꞌ: cielu phaateçxa ũsteꞌ, Dxus angelesweꞌsxaꞌ kĩhna tejkana ũste uyuuneꞌkwe Dxus Nçxiꞌk Nasa Yuusáa kajkwekhẽ jĩk.
