Juan 10:1-42
10 Isath weꞌweꞌ, maawa piisxáa kaꞌgaꞌjni vxitxtey uꞌkamée, vxite ahte vxitxtemée uꞌkasaꞌ txãꞌ pesweetaꞌ.
2 Nawa vxitxte uꞌkasaꞌ piisxáa-thegsaçxa txãꞌwẽ yuuna.
3 Açaꞌ kxte vxitxte thegsaꞌ vxitxaꞌs phaadeꞌk uꞌkakahn. Açaꞌ piisxáꞌ jiyuꞌtx jxpeꞌjsa weꞌweniꞌs, txajũꞌ teeçxteeçxçxah kxsusna paꞌyaçxa kxuuphnijũ kutxiꞌjiꞌk.
4 Saꞌ jxuka kasxisxçxaꞌ, piisxáa-thegsaꞌ yaçtek uꞌjweꞌ, açaꞌ piisxaꞌ txajx eꞌste waꞌlmeetx uꞌjweꞌ, jxpeꞌjsa paꞌyaniꞌs jiyuꞌneꞌta naa paꞌga.
5 Nawa nasa fxiysa paꞌyate yuꞌ, uꞌjmée wejxwa ũphna uꞌjweꞌtx, nasa fxiysa paꞌyate jiyuçxatx txãꞌwẽ ũphuꞌ.
6 Jesusaꞌ naa ejemploꞌs ptaꞌsxnak kaapiyaꞌj, nawa nasaꞌ jiyumeetaꞌ txãꞌwẽ ptaꞌsxniꞌs.
Jesusaꞌ ew jxpeꞌjsaꞌ
7 Nasa jiyumeeteꞌ, Jesusaꞌ naꞌjĩnak kiꞌkin ptaꞌsx:
—Isath weꞌweꞌ: Adxíi piisxáa uꞌkani vxitx naꞌwẽsath.
8 Adx paꞌjmeyna yaçte paꞌjsaꞌ jxukay ĩsxiisa pesweeçxáatx yuꞌ. Açaꞌ piisxáꞌ ũukhçxa utxaameetaꞌ.
9 Adxíi vxitx naꞌwẽsath, açaꞌ maawa adx tasxte uꞌkasaꞌ, nweꞌweni yuutxna. Txajũyãꞌjaꞌ kiꞌ kasehn kiꞌ uꞌkan txãꞌwẽ yuuna ũsçxawa, sãꞌjĩni nes yuutxna.
10 Ewmeesaꞌ pesweena ikhna jxuka pebayaꞌçxáatx paꞌjaꞌ, naapkaçxhaꞌ adxaꞌ bagaçxte yuhwa pçumée ĩtxi fxiꞌzekahnthu yuwéꞌ.
11 Adxaꞌ piisxaatx ew jxpeꞌjsath. Açaꞌ ew jxpeꞌjsaꞌ piisxaatx peeygãhçxa nweꞌwepaꞌgaçxáa txajx ĩtxi fxiꞌzeniꞌs ivxiituyaꞌ ũsaꞌ.
12 Nawa vxyuu paꞌgaçxáa piisxaatx thegna ũssaꞌ yuꞌkh eçx yuhte uynaꞌwa, piisxaatx thegmée ũphna uꞌjweꞌtx, piisxáa-thegsa meena saꞌ piisxaꞌ txãa jĩiwa meetxna, txãa paꞌgatx txãꞌwẽ yũꞌ. Açaꞌ txãꞌwẽ yũuteꞌ, yuꞌkh eçxaꞌ piisxaatx mazwa ikheꞌk, naapkaçxhaꞌ ĩtxisa yuꞌ maꞌwẽwa ũphuꞌtx.
13 Txãꞌwẽ vxyuu paꞌgaçxáa thegna ũsna, txãasaneꞌ ũphna uꞌjweꞌ piisxaatxiꞌ thegmée.
14 10:14-15 Adxaꞌ piisxaatx ew jxpeꞌjsath. Adx Tatawa maꞌwẽ adxaꞌs ew jiina açaꞌ adxwa ew jiith Tataꞌs, txãꞌwẽy adxwa piisxaatxiꞌ ew jiith, açaꞌ adx piisxaawa adxaꞌs jiitaꞌ. Adx piisxaatx wedxçxa nweꞌweyaꞌ adx ĩtxi fxiꞌzeniꞌs ivxiituyaꞌwath.
15 —
16 Txãꞌwẽy piisxáa vxite jiꞌpthu ayte kxuuphnimeesa txãatxwa nuypaꞌjaꞌnja. Açaꞌ txãaweꞌsxwa adx paꞌyaniꞌs nwẽeseꞌjetxna. Txãꞌwẽ yũuteꞌ, teeçx ahteçxaçxáa jxuka pkhakhni neeyũutxna teeçx jxpeꞌjsa yakhçxáa.
17 Txãꞌwẽ adx ĩtxi fxiꞌzeniꞌs yaꞌivxiituyaꞌwath, nawa ĩtxi yuuwaꞌjaꞌs kiꞌ jxpaꞌgayaꞌwath, txãa paꞌgak Tataꞌ adxaꞌs wedxiꞌ.
18 Adx ĩtxi fxiꞌzeniꞌs kim yuhwa kusaꞌjyaꞌ ãjameena. Adx yuuth peekíi yaꞌdukheꞌ. Saꞌ adx ĩtxi fxiꞌzeniꞌs yaꞌdukhçxa uuyaꞌwa ãjaꞌnja saꞌ kiꞌ ĩtxi yuuwaꞌjaꞌswa kiꞌ jxpaꞌgayaꞌ ãjaꞌnja. Txãꞌwẽ yũukahnku adx Tataꞌ adxaꞌs kaah.
19 Txãꞌwẽ weꞌweniꞌs judiuweꞌsx wẽseꞌjçxa, kuh jwedtxi yajkxna neeyũu.
20 Maaíi yuꞌ naꞌwẽtx ũusçxaweꞌweꞌ:
—¿Kĩjxaꞌkwe nwẽeseꞌjeꞌ eçxthẽꞌj yakh ũsçxa luuku weꞌweniꞌs? jĩꞌtx.
21 Naapkaçxhaꞌ vxiteꞌ naꞌjĩꞌtx:
—Eçxthẽꞌj yakh ũsçxaꞌ, kim yuhwa naꞌwẽ zhiçxkwe kaapiyaꞌjyaꞌ ãjãmeena. Eçxthẽꞌjçxaꞌ, txãꞌwẽ uyyaꞌ ãjasameetx kaauyuꞌjyaꞌ ¿ãjãmaꞌk?
Judiuweꞌsx Jesusaꞌs açeni
22 Dxuus yataꞌs txahna jxãꞌjniꞌs anxu iisatx fxiestaꞌjaꞌ Jerusalen çxhabte. Saꞌ txãa fxiestatetx ũsuꞌ nus ente.
23 Naapkaçxhaꞌ Jesusaꞌ dxuus yat pwaꞌ Salomon jĩi jĩnisuk pekũhna uꞌjuꞌ.
24 Açaꞌ judiuweꞌsxaꞌ txajx tasxte pkhaakheçxa naꞌwẽtx pẽjx:
—¿Bagaçxpkaçx kweꞌsxtxi kaypubaꞌjna ũsyaꞌwaga? Idxaꞌ Dxus tasxu yuusa Kristoçxaꞌ, teehwed mpeetaꞌsx jĩteꞌ,
25 Jesusaꞌ naꞌjĩnak pas:
—Ptaꞌsxyãꞌth, nawa adx weꞌweniꞌs jxpaꞌgaꞌçmeeiꞌkwe. Adx Tata jxkaatheꞌ, naꞌwẽ kĩhwa mjĩꞌth, açaꞌ adx mjĩiniꞌ ãate kaajiyuꞌjuꞌtx adx kimtewa.
26 Adx piisxáa meeiꞌkwe jĩꞌth naꞌ, isa iꞌkweꞌsxaꞌ txãꞌwẽsa yujiꞌkwe. Txãasa iꞌkwe adxaꞌs jxpaꞌgayaꞌ waꞌluꞌ.
27 Adx piisxaatx jiith, açaꞌ txãaweꞌsxaꞌ adx paꞌyaniꞌswa waꞌlmée nwẽeseꞌjeꞌtx, saꞌ adx yakh uꞌjweꞌtx.
28 Txãasath txãaweꞌsxtxiꞌ pçumée ĩtxi fxiꞌzewaꞌjaꞌs peesuꞌ. Açaꞌ kim yuhwa adx kusejũꞌ kusaꞌjmeena, saꞌ bagaçxte yuhwa vxitumeetxna.
29 Adx Tata maatewa jxthaakwesak adx kusete dukh, açaꞌ kim yuhwa kusaꞌjyaꞌ ãjameena adx Tata kusejũꞌ.
30 Tata adx yakhaꞌ txãa naꞌwẽçxaçxáathaꞌw.
31 Txãꞌjĩteꞌ, judiuweꞌsxaꞌ Jesusaꞌs kiꞌ kwet wãatatajxaꞌwatx yuꞌ.
32 Açaꞌ Jesusaꞌ weꞌwek:
—Adx Tata puꞌçxte iꞌkweꞌsx dxiꞌpte mjĩi ewsaçxaçxáa wala kuh kaavxyaꞌjaꞌth. Açaꞌ adx mjĩi ewsa ¿maaga iꞌkweꞌsxtxi ewmeenaꞌ theguꞌ açkwe adxaꞌs kwet wãatatah wẽjeꞌ? jĩteꞌ,
33 judiuweꞌsx pasçxaꞌ naꞌjĩtx:
—Ew yũupaꞌga txãꞌwẽ kwet wãatatajxaꞌwameethaꞌw. Nasaçxáag, naa kxahg Dxusthu jĩna Dxusaꞌs weeçx weꞌweꞌ, txãa paꞌga txãꞌwẽ yũuyaꞌwathaꞌw.
34 Txajũꞌ Jesusaꞌ naꞌwẽk weꞌwe:
—Iꞌkweꞌsx leyte iꞌkweꞌsxtxi weꞌweçxaꞌ: Dxus iꞌkwe ¿jĩꞌçmeenaꞌ?
35 Jiithaꞌw Dxus librute fxiꞌjniꞌs maawa weeçx weꞌwewaꞌjmeꞌ. Maawa Dxus yuweꞌs jxpaꞌgasayãꞌjaꞌ, Dxus iꞌkwe jĩnak weꞌwe Dxusaꞌ.
36 Nawa adxaꞌ txãꞌwẽsaçxáameeth. Adxaꞌ Dxus yuu txhitxhçxa naa kiwete kaahnisath, açaꞌ adxaꞌs ¿maꞌwẽ Dxusaꞌs weeçx weꞌweꞌk Dxus Nçxiꞌkthu jĩna jĩyaꞌ ãjakiꞌkwe?
37 Meeçxaꞌ adx Tata mjĩi kaahnimeesaçxáatx wáa mjĩina ũsneꞌtka açaꞌ adx weꞌwenitxiꞌ jxpaꞌganuwe.
38 Nawa adx Tata mjĩi kaahnisatx yuh mjĩiteꞌ, adx yuꞌs jxpaꞌgameeçxawa, adx weꞌweniçxáatxwa miipaꞌgawe. Txãꞌwẽ yũuçxaçxáa jiyuneꞌkwe, adx Tataꞌ adx yakh ũsaꞌ, açaꞌ adxaꞌ Tata yakh ũstewa.
39 Txãꞌjĩteꞌ, Jesusaꞌs preesuꞌjçxa jxũna uꞌj wẽetx. Nawa preesuꞌjmeyna, kasehna uꞌkh.
40 Txajũꞌ Jesusaꞌ Jordan yuꞌwala kuten uꞌjçxaꞌ, Juan nyafxíi bautisãyna ũsuꞌk kxteek ũsuꞌ.
41 Açaꞌ nasa wala kuh thegyaꞌ paꞌjçxaꞌ, naꞌwẽtx weꞌwe:
—Juanaꞌ kim yuhwa ãjanimeesatx kaavxyaꞌjaꞌjmeeçxawa, ptaꞌsxku naa piçthẽꞌj paꞌjçxa maꞌwẽ yũuwaꞌjaꞌswa, açaꞌ txãꞌ ĩsxiinimée jxuka kxtey yuuk jĩꞌtx.
42 Txajũꞌ kxtee ũssa nasaꞌ wala kuhsa Jesus kimtewa jiyutx.
