Juan 11:1-57
11 Betania çxhabte teeçx piçthẽꞌj Lasaro yaasesak ãçãꞌna ũs yuꞌ, npeꞌsxweꞌsx Maria Marta uꞌpni çxhabte.
2 Txãa ãçãꞌsa npeꞌsx Mariak txãꞌwẽ Jesus çxidakhẽ wẽt putasaꞌs awçxa txajx dxkhasju adxiꞌjwaꞌjsa yuꞌ.
3 Txãaweꞌsxaꞌ pxakhíitx dxiy ãçãꞌna ũsteꞌ, Jesusaꞌs ptaꞌsxkahn yuwe kaah:
—Iidx namiku wedxnisaꞌ wala ãçãꞌna ũsaꞌ jĩna.
4 Txajũꞌ Jesusaꞌ naa ptaꞌsxniꞌs wẽseꞌjçxaꞌ naꞌjĩk:
—Naꞌwẽ ãçãꞌna ũsçxawa, uuwaꞌjsa meeaꞌ. Naasáa Dxus ãjãniꞌs ãate kaavxyaꞌjaꞌjna, txãꞌwẽy Dxus Nçxiꞌk ãjaniꞌswa kaavxyaꞌjaꞌkhançxáa txãꞌwẽ ãçãꞌna ũsaꞌ.
5 Açaꞌ Marta Maria txãaweꞌsx dxiy Lasaro yakhaꞌ Jesus wedxnisatx yuꞌ.
6 Nawa Lasaroꞌ wala ãçãꞌna ũsaꞌ jĩna ptaꞌsxniꞌs wẽseꞌjçxawa, nee eꞌz eníik txajx uꞌjunisu jxthẽeyũu.
7 Txãa eꞌz en skhẽwniijũꞌ, Jesusaꞌ naꞌjĩnak weꞌwe txãa yakh uꞌjusaweꞌsxtxi:
—Judea kiwen kiꞌ uꞌjwega jĩteꞌ,
8 txãaweꞌsxaꞌ naꞌwẽtx pas:
—Kaapiyaꞌjsa, mwẽeseꞌj. Txãwãsuꞌ judiuweꞌsxaꞌ idxaꞌs ikh wẽeçxa kwet wãatatajxaꞌwatx yuꞌ, açaꞌ ¿maꞌwẽga kxtey kiꞌ uꞌj wẽjeꞌ? jĩteꞌ,
9 Jesusaꞌ naꞌwẽk pas:
—Isa enaꞌ doce ora ¿jiꞌphmeenaꞌ? Maawa en uꞌjuçxaꞌ yuꞌspẽꞌthemée fxiꞌzetxna, eenaꞌ kweethniiteneꞌta fxiꞌzeꞌ naa paꞌga.
10 Nawa kus uꞌjuçxaꞌ, yuꞌspẽꞌthetxna, eenaꞌ kweethnite uꞌjupaꞌgamée.
11 Txajũꞌ naꞌjĩk Jesusaꞌ:
—Kweꞌsx namiku Lasaroꞌ deeniꞌ, nawa adxaꞌ fxĩtxyaꞌ uꞌjweꞌnja jĩteꞌ,
12 txãa yakh uꞌjusaweꞌsxaꞌ naꞌjĩtx:
—Deeniçxáa ũsçxa yuꞌ, fxĩtxteꞌ kiiteena jĩtx.
13 Lasaroꞌ uuni ũstek Jesusaꞌ txãꞌwẽ weꞌwe. Nawa txãa yakh uꞌjusaweꞌsxaꞌ jiyumeeçxaꞌ, ĩꞌnée deenisaçxáꞌsneꞌ weꞌweꞌ sũjuꞌneꞌta.
14 Txajũꞌ Jesusaꞌ teehwedku ãate ptaꞌsx:
—Lasaroꞌ uuniꞌ jĩna.
15 Iꞌkweꞌsxaꞌ adx ãjaniꞌs uyçxaꞌ adx kimtewa jiyukahn, ewçxáꞌntka kxtee ũsuꞌçmée. Txãꞌwẽ uuniyãꞌj ũstewa, thegyaꞌ uꞌjwega jĩteꞌ,
16 Tomas melxisu jĩꞌtx txãꞌ naꞌwẽk weꞌwe vxite piꞌkxna uꞌjusaweꞌsxtxi:
—Kweꞌsxwa uꞌjwega Jesus yakh jaꞌda uuyaꞌ jĩk.
Jesus ĩtxi vxit-sa
17 Jesus kxtee paꞌjaçteꞌ, Lasaroꞌs pedaní pahz enyãꞌkh yuꞌ.
18 Açaꞌ Betania çxhabaꞌ Jerusalen çxhabuh eꞌz kilometro y medioçxáak jxuꞌkha ũsuꞌ.
19 Açaꞌ judiuweꞌsxaꞌ wala kuh paꞌkhuꞌta txãꞌwẽ dxiy uuteꞌ, npeꞌsxweꞌsxtxi kvxiisxaꞌjyaꞌ.
20 Açaꞌ txãa entey Jesusaꞌ paꞌjaçaꞌ jĩniꞌs jiyuçxaꞌ, Martaꞌ puutx uyyaꞌ kasejk. Nawa Mariaꞌ yatte neeyũuk.
21 Txajũꞌ Martaꞌ Jesus yakh puutx uyçxaꞌ naꞌjĩnak weꞌwe:
—Idx ayte ũssawaçaꞌ, uuwaꞌjmeeneꞌ yuꞌ ũꞌkwe dxiꞌsxaꞌ.
22 Nawa jiith Dxusaꞌ jxuka ũsuna idx kĩh pẽjxtewa jĩteꞌ,
23 Jesusaꞌ naꞌwẽk pas:
—Iꞌkwe dxiyaꞌ ĩtxi yuuna jĩteꞌ,
24 Martaꞌ naꞌwẽk pas:
—Ũꞌkweꞌ jiith, uusaaweꞌsx ĩtxi yuu enteꞌ ĩtxi yuuyujuna.
25 Nawa Jesusaꞌ naꞌjĩk:
—Adxíi uuniitewa ĩtxi vxit-sath, saꞌ pçumée ĩtxi fxiꞌzewaꞌjaꞌswa adxíi peessath. Maawa adxaꞌs ũuste jxpaꞌgasaꞌ makwe uuçxawa kiꞌ ĩtxi yuutxna.
26 Açaꞌ maawa nee ĩtxi ũssaꞌ adxna ũuste jxpaꞌgaçxaꞌ, bagaçxte yuhwa uuwaꞌjmée ĩtxi fxiꞌzetxna. Adx weꞌweniꞌ isa yuhtxna ¿sũjuꞌkweꞌ? jĩteꞌ,
27 Marta pasçxaꞌ:
—Txãꞌwẽ yuhna sũjuꞌth. Idxaꞌ Kristog, Dxus Nçxiꞌk naa kiwete kĩisa jĩk.
Jesus ũꞌneni
28 Txãꞌwẽ weꞌwena jxãꞌjçxaꞌ, Martaꞌ yatna sxawedna uꞌkh nyakhaꞌs paꞌyayaꞌ. Saꞌ naꞌjĩnak susmée weꞌwe:
—Kaapiyaꞌjsa ayte yãꞌj ũsaꞌ, saꞌ iꞌkweꞌs yuu kaakh.
29 Txãꞌjĩꞌçpkaçxhaꞌ, Mariaꞌ kiitenaꞌ wala dud uꞌkh Jesusaꞌs puutx uyyaꞌ.
30 Jesusaꞌ Betania çxhabte uꞌkameyku yuꞌ, Marta yakh mteeneꞌ puutx uy kxtee nee ũsiyçxáak yuꞌ.
31 Açaꞌ Mariaꞌ kiiteçxa wala dud skhẽwteꞌ, judiuweꞌsx txãa yatte kvxiisxaꞌjna ũssaꞌ eꞌstey uꞌjtx, pedaní kafxte wáa ũꞌneyaꞌ uꞌjweçna sũhçxa.
32 Txajũꞌ Mariaꞌ Jesus tasxte kũhnaꞌwa, peejxũkweçxa naꞌwẽk weꞌwe:
—Kweꞌsxtxi jxpeꞌjsa, idx ayte ũssawaçaꞌ, ũꞌkwe dxiꞌsxaꞌ uuwaꞌjmeeneꞌ yuꞌ jĩnak weꞌwe.
33 Txãꞌwẽ Maria vxiteꞌ judiuweꞌsx piꞌkxna yuusa ũꞌneçte Jesusaꞌ uyçxaꞌ, txãawa wala nxusçxaꞌ
34 pẽjxku:
—¿Mteekwe pedáa? jĩteꞌ:
—Myuh wakx thegyaꞌ jĩtx.
35 Açaꞌ Jesusaꞌ ũꞌnek.
36 Txãꞌwẽ Jesus ũꞌneçte uyçxaꞌ, judiuweꞌsxaꞌ naꞌjĩtx:
—Mthegwe maꞌwẽga wala peeygãjaꞌ.
37 Nawa maaíi yuꞌ naꞌwẽtx weꞌwe:
—Naa piçthẽꞌjaꞌ uyyaꞌ ãjasameetxwa kaauyuꞌjuꞌk naꞌ ¿kĩhçxáawa yũuyaꞌ ãjawaꞌjmée maꞌk yuꞌ Lasaro uukahmén?
Lasaroꞌs ĩtxi vxitni
38 Txajũꞌ Jesusaꞌ kiꞌkin wala nxusna utxaak Lasaroꞌs pedaní kafxte. Txãa kafxaꞌ dxiiga pwaꞌjaꞌnik yuꞌ, açaꞌ uꞌkani vxitxte yuꞌ kwetku aphni yuꞌ.
39 Jesusaꞌ naꞌwẽk jxkaah:
—Aphni kwetaꞌs mkiiswe jĩteꞌ, uusáa npeꞌsx Martaꞌ naꞌjĩk:
—Uuníi pahz enyãꞌjaꞌ, açaꞌ phadeteꞌ ¿kazx putameemaꞌk? jĩteꞌ,
40 Jesus weꞌweçxaꞌ:
—Adx ptaꞌsxnitxiꞌ txãꞌwẽ yuhna sũhna ũuste jxpaꞌgaçxaꞌ, Dxus maꞌwẽsatewa jiyuneꞌkwe ¿jĩçmeetkaꞌ?
41 Txãꞌjĩteꞌ, txãa aphni kwetaꞌs kiistxi. Açaꞌ Jesusaꞌ cielute pagayçxa naꞌwẽk weꞌwe:
—Tata, adx pẽyniꞌs pasuꞌg naa paꞌga weçxaꞌth.
42 Adxaꞌ jiith, idxaꞌ bagaçxtewa adxaꞌs pasuꞌg. Nawa txãꞌjĩna ãateth weçxáꞌ, ayte nasa ũstaꞌ txãaweꞌsx wẽseꞌjçxaꞌ, adxaꞌsaꞌ Dxus kaahni yuh yuꞌneꞌ sũjkahn.
43 Txãꞌjĩçxaꞌ, Jesusaꞌ susku weꞌwe:
—Lasaro, txãajũ mkaaseh jĩçpkaçxhaꞌ,
44 uusáꞌ ĩtxi yuuçxa kasejk, çxida, kuse petx dxiꞌp yãꞌjçxa yapni. Açaꞌ Jesusaꞌ khibkaakh uꞌjyaꞌ ãjãkahn.
Jesusaꞌs ikhyaꞌ puutx weꞌweni
(Mt 26.1-5; Mr 14.1-2; Lk 22.1-2)
45 Uusáꞌs ĩtxi vxitniꞌs uyçxaꞌ, Mariaꞌs piꞌkxna ũssa judiuweꞌsxaꞌ Jesusaꞌs ũuste jxpaꞌgaçxatx neeyũu.
46 Nawa vxite judiuweꞌsx açesa yuꞌ fxariseoweꞌsx tasxna uꞌjçxaꞌ, Jesus txãꞌwẽ uusáꞌs ĩtxĩ vxitniꞌs ptaꞌsxtxi.
47 Açaꞌ fxariseoweꞌsxaꞌ sacerdote npiiçthẽꞌjweꞌsx yakh pkhaakheçxaꞌ, naꞌjĩnatx puutx weꞌwe:
—Naa piçthẽꞌjaꞌ naa kiwete kim yuhwa ãjanimeesatx kaavxyaꞌjaꞌjna kĩjkĩhwa yũuna ũsaꞌ. Açaꞌ ¿kĩh yuukxthaꞌw?
48 Txãa piçthẽꞌjaꞌs kĩhçxáawa yũumeeteꞌ, nasaꞌ jxukay txãa yakhçxaçxáa uꞌjwetxna. Açaꞌ Romajũ nasa kweꞌsx dxuus yataꞌs ivxiituçxaꞌ, kweꞌsxtxiwa ivxiitutxna.
49 Txajũꞌ txãa anxute sacerdote npiiçthẽꞌj Kaifxasaꞌ naꞌwẽk weꞌwe:
—Iꞌkweꞌsxaꞌ ũus yajkxyaꞌçxáa yuhwa ãjãꞌçmeeiꞌkwe.
50 Kweꞌsx jiꞌj jxuka yuꞌ vxitukahmen wejxwa jxukasa paꞌgate teeçx yuuçxáa vxituwaççxáa wejx ewna. Txãꞌwẽ yũuwaꞌjaꞌs ũus yajkxyaꞌ iꞌkwe ãjaꞌçmée.
51 Kaifxasaꞌ txãa anxuteꞌ sacerdote npiiçthẽꞌkh yuꞌ, saꞌ peekxçxáa txãꞌwẽ yajkxçxa weꞌwemeeneꞌ. Jesusaꞌ judiuweꞌsx jxukaysa paꞌgate txãaçxáa uuwaꞌtheneꞌ Dxusaꞌ Kaifxasaꞌs txãꞌwẽ weꞌwewaꞌjaꞌs kaaũusutheꞌj.
52 Nawa judiuweꞌsxtxi nweꞌweyaꞌçxáameeneꞌ txãꞌwẽ uuyaꞌwa yuꞌ. Dxus luuçx mtee mteewa ũstxna txãaweꞌsxtxiwa pkhakhyaꞌk txãꞌwẽ uuyaꞌwa yuꞌ.
53 Açaꞌ txãajũjx judiu npiiçthẽꞌjweꞌsxaꞌ Jesusaꞌs ikhyaꞌ puutx weꞌwetx.
54 Txãa paꞌgak Jesusaꞌ Judiuweꞌsx ksxavxysu uꞌjuyaꞌ ãjãmeeçxaꞌ, Judea kiwejũ kasehna uꞌj txãa yakh uꞌjusaweꞌsx yãꞌjçxa teeçx çxhab nasa uꞌpnimée jaꞌdasu Efxrain yaasesa ũsuꞌk kxtee ũsyaꞌ.
55 Txajũꞌ Judiuweꞌsx fxiesta Paskua en ãjaçku yuꞌ. Açaꞌ wala kuh nasaꞌ uꞌjtx Jerusalenna, Paskua fxiesta ãhmeyna txãaweꞌsx kakwete pkaltxi yaateçxa ũsyaꞌ.
56 Kxteꞌ Jesusaꞌs pakwena yãꞌjtx ũs yuꞌ saꞌ dxuus yatte naꞌwẽtx puutx paapẽyiꞌ:
—¿Maꞌjĩkiꞌkwe? Jesusaꞌ fxiestate ũsyaꞌ ¿yuhmanx?
57 Txajũꞌ fxariseoweꞌsx vxiteꞌ sacerdote npiiçthẽꞌjweꞌsxaꞌ neeweꞌwetx maaçxáawa Jesusaꞌ fxiestate ũste jiyuçxaꞌ txãaweꞌsxtxi ptaꞌsxkahn tudxaꞌ kaajxaꞌ.
