Juan 12:1-50
12 Paskua fxiesta ãjxaꞌ seis en peejiyna, Jesusaꞌ Betania çxhabna uꞌkh, Lasaro uuniitewa ĩtxi vxitku kxtee.
2 Kxteeaꞌ ũꞌwaꞌj pheuꞌjtx Jesusna weçxana, naapkaçxhaꞌ Marta yuꞌ puuçuçsak yuꞌ. Açaꞌ Lasaroꞌ Jesus yakh kaçxku ũꞌyaꞌ.
3 Txajũꞌ Mariaꞌ teeçx libra ãjk wẽt putasáa wala paꞌgasaꞌs jxũna paꞌjçxaꞌ, Jesus çxidakhẽ sxũsxçxaꞌ, txajx dxkhasjuk adxiꞌ. Açaꞌ yat dxiite txãa wẽt putasaçxáa jxuka utak.
4 Txajũꞌ Jesus yakh uꞌjusa Simon nçxiꞌk Judas Iskariote yaasesaꞌ Jesusaꞌs ikhkahn dukhwaꞌjsaꞌ naꞌwẽk weꞌwe:
5 —¿Maꞌwẽtekiꞌk naa uꞌyaꞌ wẽt putasaꞌs tres cientos pesote txweyçxa nasa puuplesatx peesuꞌçmée? jĩk.
6 Nawa Judasaꞌ puuplesatx pees jxthãasçxa txãꞌjĩçmeꞌ. Txãꞌ vxyuu jxaawsak yuꞌ, nawa vxyuu pkhakhnitx kim yuhwa jiyunimée paaçte nkuutxiꞌjiꞌuꞌga, txãasak txãꞌwẽ weꞌweꞌ.
7 Txajũꞌ Jesusaꞌ naꞌwẽk weꞌwe:
—Naa uꞌyaꞌs txãꞌwẽ yujaꞌ weꞌwewaꞌj jiꞌphmeeg. Naa wẽt putasaꞌs adx kakweꞌs pedaaçteweꞌsxku jxaawni jiꞌphuꞌ.
8 Puuplesaꞌ bagaçxtewa iꞌkweꞌsx yakh nes yuutxna. Nawa adxaꞌ jwee yuꞌ iꞌkweꞌsx yakh nes yuuwaꞌjsameeth jĩnak ptaꞌsx.
Lasaroꞌs ikh wẽeni
9 Jesusaꞌ Betaniate ũsaꞌ jĩniꞌs jiyuçxaꞌ, judiuweꞌsx wala kuhsa pkhaakheçxa Jesusaꞌs thegyaꞌ txãa çxhabna uꞌjtx. Nawa Jesusçxáꞌs thegyaꞌ uꞌjmée, Lasaroꞌs jaꞌdatx thegyaꞌ uꞌj, txãꞌsaꞌ uuniitewa Jesusaꞌ kiꞌ ĩtxi vxitku txãa paꞌga.
10 Txajũꞌ sacerdote npiiçthẽꞌjweꞌsxaꞌ puutx weꞌwetx Lasaroꞌswa ikhyaꞌ,
11 txãꞌs Jesus ĩtxi vxitpaꞌgaçxáa judiuweꞌsx wala yãꞌj txuteeçxa Jesus yakhtxi uꞌjweç yuꞌ naa paꞌga.
Jerusalente Jesus uꞌkani
(Mt 21.1-11; Mr 11.1-11; Lk 19.28-40)
12 Jerusalente Paskua fxiestate nasa wala paꞌtha. Saꞌ kuskus enkhẽꞌ Jesuswa Jerusalente fxiestate paꞌjana jĩniꞌs jiyuçxaꞌ,
13 lamus eç spẽꞌthçxa Jesusaꞌs puꞌthegyaꞌ kasehtx. Saꞌ naꞌjĩnatx sus weꞌweꞌ:
—¡Dxus txakwe ewte, teeçx yujaꞌ Dxus kaahni, Israelweꞌsxtxi Jxkaahsa wala ewsaꞌ! jĩnatx weçxáꞌ.
14 Txajũꞌ Jesusaꞌ teeçx buçxu ũste uyçxaꞌ, txãatek aꞌjçxa uꞌj, Dxus librute naꞌwẽ fxiꞌjniꞌ txãa kxtey yuukahn:
15 Ũukhnuwe, Sion çxhabteweꞌsx.
Mthegwe, iꞌkweꞌsxtxi Jxkaahsa yujaꞌ, teeçx buçxute aꞌjçxa jĩnak fxiꞌjni yuꞌ.
16 Txãapkaçxhíi yuꞌ, Jesus yakh uꞌjusaweꞌsxaꞌ jiyumeetaꞌ txãꞌwẽ yũuniꞌs. Nawa Jesus cielun uꞌjniteꞌ, jiyutx txãꞌwẽ fxiꞌjniꞌ kxtey yuutewa.
17 12:17-18 Txãꞌwẽ uusáꞌs Jesus ĩtxi vxitpaꞌgatx nasa jiyuwẽesaꞌ txakwe wala puꞌthegyaꞌ kaseh, Lasaroꞌs ĩtxi vxituçteꞌ kxtee ih thegna ũssaꞌ jiimeesatxwa ptaꞌsxneꞌta txãa paꞌga.
18 —
19 Txajũꞌ txãꞌwẽ nasa puꞌthegyaꞌ kasehpaꞌgaçxáa fxariseoweꞌsxaꞌ naꞌjĩnatx ũusçxa weꞌweꞌ txãaweꞌsx pweꞌsx:
—Mthegwe wakx, kĩh yuhwa yũuyaꞌ ãjaçmeethaꞌw, naapkaçxçxáa nasaꞌ jxukay Jesus yakhçxaçxáa uꞌjweçtaꞌ jĩꞌtx.
Greciajũweꞌsx Jesusaꞌs pakwení
20 Jerusalente fxiesta ente jxuꞌj kiwe Greciajũweꞌsx paꞌjçxa ũsuꞌtx.
21 Txajũꞌ Greciajũweꞌsxaꞌ Galilea kiwesu Beçaidateweꞌsx Fxelipeꞌs utxaana kũhçxaꞌ, naꞌwẽtx pxthaa weꞌwe:
—Jesusaꞌsthaꞌw puutx uy wẽjeꞌ jĩteꞌ,
22 Fxelipeꞌ uꞌjçxa Adresaꞌs ptaꞌsxku, saꞌ txajũꞌ eꞌzsay Jesusaꞌs ptaꞌsxyaꞌ uꞌjtx.
23 Açaꞌ Jesus weꞌweçxaꞌ:
—Dxus Nçxiꞌk Nasa Yuusaꞌ uuçxa kiꞌ ĩtxi yuuwaꞌj en ãjaçaꞌ.
24 Naꞌjĩꞌth naꞌ: Teeçx skuutxh nxinxaꞌ kiwete weteçxa uumeeçxa yuꞌ, pehnamée teeçxçxáa nes yuuna. Nawa uuçxa buçxaçxaꞌ, jweeíiçxáa penana.
25 Maawa naa kiwete ĩtxĩ fxiꞌzewaꞌjçxáꞌs yaakxsaꞌ pçuwaꞌjmée ĩtxĩ fxiꞌzewaꞌjaꞌs ivxiitutxna. Nawa naa kiwete ĩtxĩ fxiꞌzeniꞌs yaakxsameꞌ, pçuwaꞌjmée ĩtxĩ fxiꞌzewaꞌjaꞌs jiꞌphutxna.
26 Maawa adxaꞌs selpíi wẽeçxaꞌ, adx yakh yuweena, saꞌ adx mtee ũsteꞌ txãawa kxtey ũsyaꞌ ãjana adxna selpiisaꞌ. Açaꞌ maawa adxna selpisaatxiꞌs adx Tataꞌ tuutheꞌjena.
Jesusaꞌ txajx uuwaꞌjaꞌs ptaꞌsxni
27 Ãçxhaꞌ wala nxusna ũsthu, saꞌ ¿maꞌjĩtka? Meeçxaꞌ Tata, adxaꞌs meen nweꞌwe pxthaa yuukahmen jĩte, ewwáanakx. Nawa txãꞌwẽ pxthaa yuuyaꞌíiçxáath yuwéꞌ naꞌ txãꞌjĩmeꞌnja.
28 Tata, maawa idxna jiyuwaꞌjçxáꞌs mkaavxyaꞌjaꞌj.
Txajũꞌ cielujũ weꞌweni naꞌwẽk pthũuse:
—Adxna jiyuwaꞌjaꞌs kaavxyaꞌjaꞌjyãꞌth. Nawa maawa adxaꞌs jiyukahn kiꞌ kaavxyaꞌjaꞌjyaꞌwath jĩnik pthũuse.
29 Açaꞌ nasaꞌ txãꞌwẽ cielujũ weꞌweniꞌs wẽseꞌjçxaꞌ:
—Kpiꞌsxneꞌ txãꞌjĩ jĩꞌtx, naapkaçxhaꞌ vxite yuꞌ:
—Teeçx angelneꞌ txãꞌwẽ weꞌwe jĩꞌtx.
30 Txajũꞌ Jesusaꞌ naꞌjĩk:
—Txãꞌwẽ weꞌweniꞌ adxna ptaꞌsxna weꞌwemeꞌ, iꞌkweꞌsxtxi ptaꞌsxnak txãꞌwẽ weꞌwe jiyukahn.
31 Ãçxhaꞌ naa kiwete jxukaysa yuuwesa yuuwaꞌj en ãjk, naapkaçxhaꞌ naa kiwete jxkaahna ũssa eçxthẽꞌj yuꞌ peena yuꞌ jxkaajxaꞌ ãjãwaꞌjmeete neeyũuna.
32 Txãꞌwẽ adxaꞌs ẽekhẽ kiꞌpnijũꞌ, jxukaytxi nweꞌweyaꞌ ãjãꞌnja.
33 Txãꞌwẽ weꞌweçxak kaajiyuꞌj maꞌwẽ uuyaꞌwaçxawa.
34 Txajũꞌ nasaꞌ naꞌwẽtx weꞌwe:
—Kweꞌsxaꞌ Dxus librute leyaꞌs iiwẽseꞌthaꞌw, açaꞌ Kristoꞌ bagaçxte yuhwa uuwaꞌjmée ĩtxi uꞌjuwaꞌjsaꞌ jĩꞌk. Açaꞌ idxaꞌ ¿maꞌwẽga Dxus Nçxiꞌk Nasa Yuusaꞌs ẽekhẽ kiꞌpni yuuna jĩna weꞌweꞌ? Dxus Nçxiꞌk Nasa Yuusaꞌ ¿kimna? jĩteꞌ,
35 Jesusaꞌ naꞌjĩnak pas:
—Eenaꞌsaꞌ iꞌkweꞌsx yakh nee ũsuna, nawa maz ençxáa ũsuna. Txãꞌwẽteꞌ eenaꞌte fxiꞌzewaꞌjaꞌs mpaꞌgawe, eenaꞌsa nee ũsiyna, kxah çxhiꞌdxsaꞌ iꞌkweꞌsxtxi kpajkxmeena. Txãꞌwẽmeꞌ, çxhiꞌdxte uꞌjusaꞌ maa dxiꞌj ewsatewa jiyuyaꞌ ãjãꞌçmeꞌ.
36 Nee iꞌkweꞌsx yakh ũsiyna, eenaꞌsaꞌs mjiyuwe, kxah eenaꞌte fxiꞌzesa yuuneꞌkwe.
Txãꞌwẽ weꞌwena jxãꞌjçxaꞌ, Jesusaꞌ uꞌjçxa vxyaameꞌ.
Judiuweꞌsxaꞌ Jesusaꞌs jxpaꞌgameetaꞌ
37 Kim yuhwa ãjanimeesaꞌs txakwe wala kaavxyaꞌjaꞌthewa, nasaꞌ jiyuyaꞌ ãjaꞌçmeetaꞌ Jesus kimtewa.
38 Nawa Dxus yuwe ptaꞌsxsa Isaías fxiꞌjçxa nvxiitniꞌ kxtey yuukahntxi txãꞌwẽ yuu: Kxteꞌ naꞌjĩꞌk:
Kweꞌsx ptaꞌsxniꞌs ¿kimçxáꞌ jxpaꞌgataꞌ?
Dxusaꞌ txajx ãjaniꞌs ¿kimtxiga kaavxyaꞌjaꞌj? jĩꞌk.
Kristoꞌs jiyuyaꞌ ãjawaꞌjsameeneꞌta yuꞌ, txãa paꞌgak Dxus yuwe ptaꞌsxsa Isaiasaꞌ txãꞌwẽ fxiꞌjçxa nvxiht.
39 Saꞌ Isaiasaꞌ kiꞌ weꞌweçxaꞌ:
40 Dxusaꞌ txãaweꞌsx yafxtxi aphku uyyaꞌ ãjãkahmén.
Saꞌ txãaweꞌsx ũustxiwa nuywejik jiyukahmen,
Saꞌ Dxus tasxte sxawedçxa katxhiwaꞌjaꞌswa nvxihtmeꞌ jĩꞌk.
41 Jesus maꞌwẽ yuuwaꞌjsatewa jiyuçxak Isaiasaꞌ txãꞌwẽ weꞌwena fxiꞌj.
42 Txãꞌwẽtewa, judiuweꞌsx wala kuhsa Jesus kimtewa jiyutx, maaíi yuꞌ npiiçthẽꞌjweꞌsx yãꞌjçxa. Nawa fxariseoweꞌsx ahçeçxa txãaweꞌsx pkhaakhenijũ kutxiꞌjçxa peena yuꞌ paꞌjwaꞌjmée vxitkahmen, ãate yuꞌ ptaꞌsxiꞌçmeetaꞌ ũukhçxa.
43 Txãaweꞌsxaꞌ nasaa tuutheꞌjniçxáꞌs wejx jiꞌphu wẽeçxatx txãꞌwẽ yuꞌ.
Ney ptaꞌsxkaahniꞌs Jesus ptaꞌsxni
44 Txajũꞌ Jesusaꞌ naꞌjĩnak weꞌwe:
—Maawa adxna ũuste jxpaꞌgasaꞌ, adxçxáana jxpaꞌgamée, adxna kaahsa Tatanawa jxpaꞌgana.
45 Txãꞌwẽy maawa adxna uysaꞌ, adx Tataꞌswa uysáa yuuna.
46 Adxaꞌ nasatx eenaꞌte kaafxiꞌzeꞌjyaꞌth kĩh, kxah adxna ũuste jxpaꞌgasaꞌ çxhiꞌdxte neeyũumeetxna.
47 Nawa maawa adx ptaꞌsxniꞌs wẽseꞌjçxawa kxtey nwẽeseꞌjmeeteꞌ, txãꞌwẽ yũusaꞌs ewmeete nvxiitwaꞌjsaꞌ adxmeeth. Adx yuꞌ naa kiweteweꞌsxtxi ewmeete nvxihtxaꞌ yuweꞌçmeeth, wejxwa nweꞌweyaꞌth yuwéꞌ.
48 Adxaꞌs waꞌlçxa adx ptaꞌsxnitxiꞌ kxtey yuumeeteꞌ, txãꞌwẽ yũusatx ewmeete nvxiitwaꞌjsa ũsaꞌ: ãçxh naꞌwẽ adx ptaꞌsxna weꞌweꞌth txãa ptaꞌsxnisa íiçxáa ewmeete nvxiitwaꞌjsataꞌ nmeh enteꞌ.
49 Txãa paꞌgatey adxçxáa weꞌwena ptaꞌsxiçmeeth. Adxna kaahsa Tataíik txãꞌwẽ ptaꞌsxkajaꞌ,
50 kxah adxaꞌ jiith adx Tata weꞌweniꞌ bagaçxte yuhwa pçumée ĩtxi kaafxiꞌzeꞌjwaꞌjsatewa. Açaꞌ adx Tata maꞌwẽ ptaꞌsxkaatheꞌ, txãꞌsna íiçxáath adxwa ptaꞌsxiꞌ jĩnak weꞌwe Jesusaꞌ.
