Juan 13:1-38
13 Paskua fxiesta ãjxaꞌ teeçx ençxáa pejiiçku yuꞌ. Açaꞌ Jesusaꞌ jiik yuꞌ naa kiweꞌs nvxihtçxa Ney tasxna uꞌjwaꞌj en ãaniꞌs. Saꞌ naa kiwete txãa yakh uꞌjusaweꞌsxtxiꞌ nyafxiitey maꞌwẽneꞌ peeygãh naꞌ, nmeh entepkaçxku peeygãh.
2 Jesusaꞌ txãa yakh uꞌjusaweꞌsx yakh ũꞌna uꞌppkaçxhaꞌ, eçxthẽꞌjaꞌ Simon nçxiꞌk Judas Iskarioteꞌs kaaũusutheꞌjeçyãꞌkh yuꞌ Jesusaꞌs ewmeesa kusete dukhkahn.
3 Açaꞌ Jesusaꞌ jiik yuꞌ Dxus tasxuneꞌ yuusa yuꞌ saꞌ kiꞌ Dxus tasxnay uꞌjwaꞌjaꞌs. Saꞌ txãꞌwẽy jiik yuꞌ Dxus maꞌwẽçxah jxkaahwaꞌjaꞌswa txãaçxaçxáꞌs dukhniꞌswa.
4 Txajũꞌ Jesusaꞌ ũꞌna uꞌpíi kiitenaꞌwa, atxhna kiꞌpçxa, toalxaꞌs jxtuhdku.
5 Saꞌ kuse khweeçxaniite yuꞌ awnaꞌ, mesate ih ũꞌna uꞌpsa çxidatx pkhiꞌkxnaꞌ, toalxaju adxiꞌk.
6 Saꞌ Simon Pedro çxidatx pkhiꞌkxyaꞌwateꞌ, txãꞌ naꞌwẽk weꞌwe:
—Kweꞌsxtxi jxpeꞌjsa yujaꞌ, ¿adx çxidatx pkhiꞌkxmaꞌg? jĩteꞌ,
7 Jesusaꞌ naꞌwẽk pas:
—Ãçxhíi yuꞌ jiyumeeneꞌga naꞌwẽ yũuniꞌs. Nawa eꞌsuꞌ jiyuneꞌga.
8 Txãꞌjĩtewa, Pedroꞌ kiꞌ naꞌjĩk:
—Idxaꞌ adx çxidatx pkhiꞌkxwaꞌjsameeg jĩteꞌ, Jesusaꞌ naꞌjĩnak ptaꞌsx:
—Idxaꞌs pkhiꞌkxmeeteꞌ, adx yakh ũsyaꞌ ãjameeneꞌga jĩteꞌ,
9 Simonaꞌ naꞌwẽk pxthaa weꞌwe:
—Txãꞌwẽyãꞌtheꞌ, çxidaçxáatx pkhiꞌkxmée, kuse petx dxikthé yãꞌjçxa meen pkhiꞌkx jĩk.
10 Nawa Jesusaꞌ naꞌjĩk:
—Uꞌse pẽwçxa ũssaꞌ, jxuka ateyãꞌthaꞌ, kxah çxidaçxáatx pkhiꞌkxwaꞌj peejxtaꞌ. Iꞌkweꞌsxaꞌ ateyãꞌjiꞌkwe, nawa jxukasa yuꞌ ate ũsmeeiꞌkwe.
11 Jxukaysa yuꞌ ate ũsmeeiꞌkwe jĩnak weꞌwe, txãꞌs ikhkahn dukhwaꞌjsaꞌs weꞌweçxak txãꞌjĩ.
12 Txajũꞌ Jesusaꞌ txãaweꞌsx çxidatx pkhiꞌkxna jxãꞌjçxaꞌ, atxhaꞌs jxkahçnaꞌ mesate kiꞌ kaçxçxa naꞌjĩnak paapẽjx:
—¿Iꞌkweꞌsxaꞌ jiyuꞌkweꞌ adx txãꞌwẽ iꞌkweꞌsx çxidatx pkhiꞌkxteꞌ?
13 Iꞌkweꞌsxaꞌ adxaꞌsaꞌ kaapiyaꞌjsa, jxpeꞌjsa, jĩçxaꞌ, isa yuh weꞌweꞌiꞌkwe, adxaꞌ txãꞌwẽsa yuhth naa paꞌga.
14 Adxaꞌ kaapiyaꞌjsa, jxpeꞌjsaçxawa iꞌkweꞌsx çxidatx pkhiꞌkxthu açaꞌ iꞌkweꞌsxwa txãꞌwẽy çxidatx puutx yaꞌpkhiꞌkxna mfxiꞌzewe teeçxsa naꞌwẽçxaçxáa.
15 Adx naꞌwẽy yũuna fxiꞌzekahnthu iꞌkweꞌsxtxi txãꞌwẽ selpíi.
16 Isath weꞌweꞌ, maawa selpisaꞌ txajx patronte jxthaakwesameꞌ, açaꞌ txãꞌwẽy kaahnisawa txãꞌs kaahsate jxthaakwesameꞌ.
17 Naꞌwẽ selpiwaꞌjaꞌs jiyuçxa kxtey yuuna fxiꞌzeçxaꞌ, weçx weçxa fxiꞌzeneꞌkwe.
18 Iꞌkweꞌsx jxukaysa yuutxiꞌ txãꞌjĩꞌçmeeth. Jiith kimçxah adx txhitxhnisatewa. Nawa Dxus librute naꞌwẽ fxiꞌjni ũsaꞌ: Adx yakh ih ũꞌsaçxawa, adxaꞌs ahçeçxa kiikheꞌjyaꞌwaꞌ jĩna fxiꞌjniꞌ kxtey yuukahnthu txãꞌjĩꞌ.
19 Ãçxhíi ptaꞌsxiçthu, kxah kxtey yuuteꞌ, adxaꞌs ew jiyuneꞌkwe Dxus Nçxiꞌkdxihtewa.
20 Isath weꞌweꞌ: maawa adx kaahnisaꞌs jxpaꞌgaçxaꞌ, adxaꞌswa jxpaꞌgasa yuuna. Saꞌ adxçxáana jxpaꞌgamée, adxaꞌs kaahsanawa jxpaꞌgasa yuuna.
Judasaꞌ Jesusaꞌs ewmée yũuyaꞌ yaakxni
(Mt 26.20-25; Mr 14.17-21; Lk 22.21-23)
21 Txãꞌjĩna jxãꞌjçxaꞌ, Jesusaꞌ nxusnxus yajkxçxa ãatek weꞌwe:
—Isath txãꞌjĩꞌ, iꞌkweꞌsx yakh uꞌjusa teeçxsaꞌ adxaꞌs ahçeçxa ewmeesa kusete dukhyaꞌwaꞌ jĩk.
22 Txajũꞌ kimna txãꞌjĩtewa jiyumeeçxaꞌ, dxiꞌp iisaçxáatx puutx theguꞌ txãaweꞌsx pweꞌsx.
23 Teeçxsaꞌ Jesus pukate ih uꞌpsaꞌ Jesus wedxnisak yuꞌ.
24 Açaꞌ Simon Pedroꞌ kimna txãꞌjĩtewa jiyu wẽeçxaꞌ, txãa ih uꞌpsaꞌs kuseju ptaꞌsxku paapẽykahn.
25 Açaꞌ Jesus pukate ih uꞌpsaꞌ tuphiçxa naꞌjĩnak paapẽjx:
—Jxpeꞌjsa, mpeetaꞌsx ¿kim idxaꞌs txãꞌwẽ ahçeçxa dukhwaꞌjsana? jĩteꞌ,
26 Jesusaꞌ naꞌjĩnak ptaꞌsx:
—Panaꞌs tuuphaꞌjçxa maana ũsuꞌnja txãa adxaꞌs dukhwaꞌjsaꞌ jĩçxaꞌ, panaꞌs tuuphaꞌjnaꞌwa Simon nçxiꞌk Judas Iskarioteꞌsku ũs.
27 Açaꞌ Judasaꞌ panaꞌs jxpaꞌgaçpkaçxhaꞌ, eçxthẽꞌjaꞌ txajx ũuste uꞌkak.
Açaꞌ Jesusaꞌ Judasaꞌs naꞌjĩnak weꞌwe:
—Kĩh yũuyaꞌwaçxawa, dud kxtey myuu jĩteꞌ,
28 mesate ũꞌna uꞌpsaꞌ maa yuhwa jiyumeetaꞌ txãꞌwẽ weꞌweniꞌs.
29 Maaíi yuꞌ naꞌwẽtx yaakiꞌ: Judasaꞌ vxyu jxaawsateꞌ, kxah wáꞌ Jesusaꞌ fxiestate peejiwaꞌjaꞌs weykajaꞌ, meeçxawa puuplesatx wáꞌ kĩhçxáawa peeskajaꞌ sũjuꞌtx.
30 Naapkaçxhaꞌ Judasaꞌ panaꞌs ũꞌnaꞌwa kasehna uꞌkh. Txãꞌwẽ yuuçteꞌ, çxhiꞌdxni yãꞌkh yuꞌ.
Uꞌse jxkaahnisa
31 Judas uꞌjni eꞌsuꞌ, Jesusaꞌ naꞌwẽk ptaꞌsx:
—Dxus Nçxiꞌk Nasa Yuusáꞌs ãçxhaꞌ tuutheꞌjnik yuu, açaꞌ Nçxiꞌkwa Neyaꞌs tuutheꞌkh.
32 Dxus Nçxiꞌk Nasa Yuusaꞌ Neyaꞌs tuutheꞌjeçpkaçxhaꞌ, Neywa Nçxiꞌkaꞌs tuutheꞌjena, nawa ãçxhíi txãꞌwẽ yuuyaꞌwaꞌ.
33 Adx nçxiꞌkkuẽweꞌsx, jwee yuꞌ txaçx ũsmeꞌnja iꞌkweꞌsx yakh. Adxaꞌ judiuweꞌsxtxi nyafxíi weꞌweçxaꞌ: Iꞌkweꞌsxaꞌ adxaꞌs pakweeneꞌkwe. Nawa adx uꞌjweçthu kxteꞌ yujxaꞌ ãjameeneꞌkwe jĩnath weꞌwe, saꞌ iꞌkweꞌsxtxiwa txãꞌwẽyçxáath weꞌweꞌ.
34 Iꞌkweꞌsx yakh nvxiituçthu uꞌse jxkaahnisaꞌs, puutx yaꞌpeeygãhna fxiꞌzewaꞌjaꞌs. Adx maꞌwẽtka iꞌkweꞌsxtxi peeygãhna fxiꞌzeꞌ, txãꞌwẽy iꞌkweꞌsxwa puutx yaꞌpeeygãhna mfxiꞌzewe.
35 Txãꞌwẽ puutx yaꞌpeeygãhna fxiꞌzeteꞌ, maa nasawa jiyutxna iꞌkweꞌsx adxaꞌs nwẽeseꞌjsatewa.
Pedroꞌ ĩsxiiwaꞌjsatewa Jesus ptaꞌsxni
(Mt 26.31-35; Mr 14.27-31; Lk 22.31-34)
36 Txajũꞌ Simon Pedroꞌ naꞌjĩnak Jesusaꞌs paapẽjx:
—Jxpeꞌjsa, ¿mtee uꞌjweçga? jĩteꞌ, Jesusaꞌ naꞌjĩnak ptaꞌsx:
—Adx uꞌjweçthu kxteꞌ yujxaꞌ ãjameeneꞌga ãçxhíi yuꞌ. Nawa eꞌs yuꞌ yuweeneꞌga jĩtewa,
37 Pedroꞌ kiꞌkin paapẽjxku:
—Jxpeꞌjsa ¿kĩh yuuçxa ãçxhíi yuꞌ yujxaꞌ ãjamée yuukiꞌth? Adx uuwaꞌjaꞌs yuhwa ũukhyaꞌmée ũsthu, idxaꞌs peeygãaweete jĩteꞌ,
38 Jesus weꞌweçxaꞌ:
—¿Isaga txãꞌjĩꞌáꞌ? Nawa adxaꞌ naꞌjĩꞌth naꞌ: atalx weꞌwemeyna, adxaꞌs jiimeeth jĩna tekh us ĩsxiijaçyãꞌj yuuneꞌga jĩk.
