Juan 14:1-31
14 Jesusaꞌ naꞌjĩk:
—Iꞌkweꞌsx ũuste fxĩikãhna nxusmée meswe. Wejx yuuwa Dxusçxáꞌs yajkxna meswe, saꞌ adxnawa txãꞌwẽyçxáa yajkxna meswe.
2 Adx Tata ũsniteꞌ, jxkaasena ũswaꞌj wala ũsaꞌ. Txãꞌwẽ méewaçaꞌ, meeaꞌ jĩna ptaꞌsxni yãꞌj yuꞌnja iꞌkweꞌsxtxi. Txãa paꞌga iꞌkweꞌsx kxtee paꞌjwaꞌjaꞌs pheuꞌjyaꞌ uꞌjweçthu.
3 Saꞌ uꞌjçxa kxtee iꞌkweꞌsx paꞌjwaꞌjaꞌs pheuꞌjçxaꞌ, kiꞌ sxaweduꞌnja iꞌkweꞌsxtxi peꞌjna uꞌjyaꞌ, kxah iꞌkweꞌsxwa adx ũsnitey adx yakh ih ũsuneꞌkwe.
4 Iꞌkweꞌsxaꞌ jii iꞌkwe mtee uꞌjweçtewa, saꞌ dxiꞌjnawa jii iꞌkwe.
5 Txajũꞌ Tomasaꞌ naꞌjĩnak pẽjx:
—Jxpeꞌjsa, mtee uꞌjweçneꞌga nawa kweꞌsxaꞌ jiimeethaꞌw, saꞌ dxiꞌjaꞌswa jiimeethaꞌw jĩteꞌ,
6 Jesusaꞌ ptaꞌsxku dxiꞌjaꞌs:
—Adx yuuçxáa Dxus tasxte kaapaꞌjaꞌjwaꞌjsath, saꞌ adx yuuçxáa kaypubaꞌjwaꞌjsameeth, saꞌ adx yuuçxáa ĩtxi kaafxiꞌzeꞌjwaꞌjsath. Açaꞌ adxpaꞌga yuuçxáa maawa adx Tata tasxte paꞌjyaꞌ ãjatxna.
7 Iꞌkweꞌsxaꞌ adxaꞌs jiyuwaçaꞌ, adx Tata maꞌwẽsatewa jiyuneꞌkwe. Txãꞌwẽçxawa ãçxhaꞌ jiyu iꞌkwe, uyna ũsiꞌkwe txãa adx Tataꞌ.
8 Txãa adx Tataꞌ jĩteꞌ, Fxelipeꞌ naꞌwẽk pẽjx:
—Jxpeꞌjsa, iidx Tataꞌs ãate mkaavxyaꞌj kweꞌsx uykahn. Txãꞌwẽçxáa peejxthaꞌw jĩteꞌ,
9 Jesusaꞌ ptaꞌsxku:
—Adxaꞌ iꞌkweꞌsx yakh nakwe txaçx ũsthu açaꞌ ¿ãçxh paꞌjwa adxaꞌs jiyumey wáꞌga? Adxna uysaꞌ, adx Tatanak uyuꞌ. Açaꞌ ¿maꞌwẽga Tataꞌs mkaavxyaꞌj jĩna pẽyiꞌ?
10 Jiyuꞌçmée wáꞌga, adxaꞌ Tata yakh bagaçxtewa nesthu yuꞌ, açaꞌ txãꞌwẽy Tatawa adx yakh nesaꞌ. Naꞌwẽ weꞌweꞌth naꞌ peekx ũusuh yajkxçxa txãꞌwẽ weꞌweꞌçmeeth. Tata adx yakh ũssa txãa weꞌwekaatheçxáath weꞌweꞌ.
11 Jiyuçxa mneeyũuwe: Bagaçxtewa adxaꞌ Tata yakh eꞌzsay ih nesthaꞌw yuꞌ. Txãꞌwẽ eꞌzíi ihneꞌta fxiꞌzeꞌ sũhmeeçxawa, adx mjĩinisaçxáatxwa uyçxaꞌ, Tata yakh ũssaçxak txãꞌwẽ ewsatx mjĩꞌ sũhna mneeyũuwe.
12 Isath weꞌweꞌ, adxna ũuste jxpaꞌgasaꞌ adx naꞌwẽy mjĩiyaꞌ ãjatxna. Nawa txãꞌwẽçxáamée, adx mjĩinite jxthaakwe wala mjĩiyaꞌ ãjatxna, txãꞌwẽ ãjakahníiçxáa adxaꞌ uꞌjweçthu Tata tasxna.
13 Saꞌ iꞌkweꞌsxaꞌ Tataꞌs kĩh pẽywaꞌj jiꞌphçxawa, adxaꞌs pẽyineꞌkwe açaꞌ adxaꞌ iꞌkweꞌsx pẽyniꞌs jxuka kxtey yuꞌnja, kxah Nçxiꞌkpaꞌgate Tata weçxani yuuna.
14 Naꞌjĩꞌth naꞌ: adxaꞌs kĩh pẽjxtewa jxuka kxtey yuꞌnja.
Jesusaꞌ Dxus Espirituꞌs kaajxaꞌ neeyũuni
15 Iꞌkweꞌsxaꞌ adxaꞌs peeygãjaççxaꞌ, adx jxkaahnitxiꞌ nwẽeseꞌjna kxtey myuuwe.
16 Açaꞌ adx Tataꞌs iꞌkweꞌsx paꞌgate neeweꞌweꞌnja, iꞌkweꞌsxtxi puꞌçxwaꞌjsa teeçx adx naꞌwẽysaꞌs kaakhan. Txãꞌ Dxus Espiritu isasaçxáꞌs kaajiyuꞌjsaꞌ txãꞌ bagaçxtewa iꞌkweꞌsx yakh nes yuuna.
17 Naa kiweteweꞌsxaꞌ txãa Espirituꞌs uyyaꞌ ãjameeçxaꞌ jiyuyaꞌwa ãjameetxna, txãasa jxpaꞌgayaꞌwa ãjameetxna. Nawa iꞌkweꞌsxaꞌ jii yãꞌjiꞌkwe, txãa Espiritu iꞌkweꞌsx yakh ũstewa, saꞌ bagaçxtewa txutemée nes yuuna.
18 Iꞌkweꞌsxçxáatx nvxihtxaꞌwameeth. Kiꞌ sxaweduꞌnja iꞌkweꞌsx yakh ũsyaꞌ.
19 Naajũꞌ txaçxmeynaçxáa nasaꞌ adxaꞌs peena yuꞌ uymeetxna. Nawa adxaꞌ uuwaꞌjsameeth, txãa paꞌga iꞌkweꞌsxwa uuwaꞌjsameeiꞌkwe, txãasa iꞌkweꞌsx yuꞌ adxaꞌs uyuuneꞌkwe.
20 Txajũ txãa ente ew jiyuneꞌkwe adxaꞌ Tata yakh nes yuusatewa, naapkaçxhaꞌ iꞌkweꞌsxaꞌ adx yakhiꞌkwe nes yuꞌ açaꞌ adxaꞌ iꞌkweꞌsx yakhthu nes yuꞌ.
21 Adx jxkaahnitx nwẽeseꞌjna kxtey yuuna fxiꞌzesaꞌ adxaꞌs isa ũusuh jxuka yaakxsaçxa txãꞌwẽ yuutxna. Açaꞌ adx Tataꞌ txãꞌwẽ yũusatxiꞌ peeygãjana, açaꞌ adxwa txãꞌwẽ yũusatxiꞌ peeygãhçxa ãate vxyaana nes yuꞌnja.
22 Txãꞌjĩteꞌ, Judas Iskariotemée, vxite Judasaꞌ naꞌwẽk pẽjx:
—Jxpeꞌjsa, ¿kĩh yuuçxa kweꞌsxçxáatx ãate vxyaaçxaꞌ, vxite nasa naa kiweteweꞌsx yuutxiꞌ vxyaamée yuukiꞌg? jĩteꞌ,
23 Jesus pasçxaꞌ:
—Adxaꞌs ũusuh jxuka yaakxsaꞌ adx jxkaahnitx nwẽeseꞌjna kxteytxi yuꞌ. Açaꞌ txãꞌwẽ yũusatxiꞌ adx Tataꞌ peeygãjaꞌk. Açaꞌ txãꞌwẽ nwẽeseꞌjsa yakh yuꞌ nes yuꞌnjaꞌw Tata yakh.
24 Nawa adx jxkaahnitx nwẽeseꞌjsameꞌ, adxaꞌs yaakxsameeçxa txãꞌwẽ yuuna. Naꞌwẽ adx kaapiyaꞌjnitx wẽseꞌjiꞌkwe txãꞌ adxçxáa kaapiyaꞌjnimeetaꞌ. Adx Tata kaapiyaꞌjnitaꞌ.
25 Iꞌkweꞌsx yakh nee ũsíi naꞌwẽ ptaꞌsxiçthu.
26 Nawa Dxus Espirituꞌs Tataꞌ kajana adx naꞌwẽy iꞌkweꞌsxtxi puꞌçxna ũskahn txãꞌ jxuka kaapiyaꞌjana. Saꞌ naꞌwẽ kĩhwa ptaꞌsxthu txãatxiꞌsaꞌ jxuka kaayakiꞌjina.
27 Iꞌkweꞌsx ũuste wẽt yajkxna fxiꞌzewaꞌjaꞌs peesuçthu. Naa kiwete wẽt fxiꞌzewaꞌjaꞌs nasa ũsuꞌtx txãꞌwẽsaçxáꞌs peesuçmeeth. Adx maꞌwẽtka ũuste wẽtçxáa yajkxna fxiꞌzeꞌ txãꞌs iꞌkweꞌsxtxi peesuçthu. Txãa paꞌga fxĩikãhna ũukhmée meswe.
28 Uꞌjçxa kiꞌ sxaweduꞌnja iꞌkweꞌsx yakh ũsyaꞌ jĩniꞌs wẽseꞌjyãꞌjiꞌkwe naꞌ, adxna isa wedxdxihçxaꞌ, weçxweçxa yaakineꞌkwe, txãa paꞌgatey adxte jxthaakwesa adx Tata tasxna uꞌjweçthu naa paꞌga.
29 Dxiikhẽy ptaꞌsxiçthu, kxah adx ptaꞌsxni kxtey yuuna paꞌtheꞌ, isa yuh ptaꞌsxiꞌga sũjuneꞌkwe.
30 Iꞌkweꞌsx yakh jwee yuꞌ weꞌwena ũsyaꞌ ãjameꞌnja, txãa paꞌgatey naa kiwete jxkaahna ũssa eçxthẽꞌjaꞌ adxaꞌs kĩhwa yũuyaꞌ ãjaneꞌjmeeçxawa, yujaꞌ.
31 Makwe ãjaneꞌjmeeçxawa kxtey yuuna, kxah naa kiwete nasa jxukaysa jiyutxna, adx Tataꞌs nwẽeseꞌjçxa txajx jxkaahniꞌs kxtey yuusatewa.
Txãꞌjĩna jxãꞌjçxaꞌ, kiiteçxa ayjxu uꞌjwega jĩk.
