Juan 15:1-27
15 Adxíi ũꞌtasx naꞌwẽsath, açaꞌ adx Tataꞌ txãa tasxaꞌs pheuꞌjsa naꞌwẽsaꞌ.
2 Kuꞌta yũnsameetxiꞌ spẽꞌtheꞌk, nawa kuꞌta yũnsatxiꞌ sũupiꞌjna pheuꞌjuꞌk jxthaakwe yũnkahn.
3 Iꞌkweꞌsxaꞌ pheuꞌjniyãꞌj ũsiꞌkwe adx kaapiyaꞌjniꞌs nwẽeseꞌphaꞌga.
4 Adx yakh txutemée meswe, adxwa maꞌwẽ iꞌkweꞌsx yakh txutemée ũstka txãꞌwẽy. Iꞌkweꞌsxaꞌ peekx jii iꞌkwe: kuꞌta çxpiteçxa ũssaꞌ yũnuꞌçmeꞌ. Txãꞌwẽy iꞌkweꞌsxwa adx yakh txuteeçxa ũsçxaꞌ, Dxus dxiꞌpte selpiiyaꞌ ãjameeneꞌkwe.
5 Adxaꞌ ũꞌtasx naꞌwẽsath açaꞌ iꞌkweꞌsxaꞌ ũꞌtasx kuꞌta naꞌwẽsa iꞌkwe. Adx yakh txutemée ũsçxaꞌ, wala selpiineꞌkwe. Açaꞌ adxwa iꞌkweꞌsx yakh txutemée fxiꞌzeꞌnja. Adx yakhmée yuꞌ, iꞌkweꞌsxaꞌ kĩh yuhwa yũuyaꞌ ãjameeneꞌkwe.
6 Açaꞌ ũꞌtasx kuꞌta yũnsameetxiꞌ maꞌwẽga spẽetheꞌthçxa yaꞌkabuꞌ, txãꞌwẽy yaꞌyuuna adx tasxu txutesatxiꞌ.
7 Iꞌkweꞌsxaꞌ adx yakh txutemée fxiꞌzeçxa adx kaapiyaꞌjniꞌs peçxkanameeçxaꞌ, kĩhwa pẽyineꞌkwe, açaꞌ yaꞌũsuna.
8 Adx kaapiyaꞌjniꞌs nwẽeseꞌjçxaꞌ Dxus dxiꞌpte wala selpiiyaꞌ ãjaneꞌkwe. Açaꞌ txãꞌwẽ yũuteꞌ, adx Tataꞌs wala tuutheꞌjni yuuna.
9 Adx Tataꞌ adxaꞌs wala peeygãjaꞌk, açaꞌ adxaꞌ txãꞌwẽythu iꞌkweꞌsxtxi peeygãjaꞌ. Açaꞌ adx peeygãanijũ txutemée meswe.
10 Adx jxkaahnitx nwẽeseꞌjçxaꞌ, adx peeygãaniteçxáa fxiꞌzeneꞌkwe, adxwa maꞌwẽtka Tata jxkaahnitx nwẽeseꞌjçxaꞌ txajx peeygãaniteçxáa fxiꞌzeꞌ txãꞌwẽy.
11 Naꞌwẽth ptaꞌsx kxah adx maꞌwẽtka weçxweçxa yajkxna fxiꞌzeꞌ, iꞌkweꞌsxwa txãꞌwẽy bagaçxwa weçxweçxa yajkxna fxiꞌzeneꞌkwe.
12 Adxaꞌ naꞌwẽth jxkaajaꞌ: adx maꞌwẽtka iꞌkweꞌsxtxi peeygãjaꞌ, iꞌkweꞌsxwa txãꞌwẽy puutx yaꞌpeeygãhna mfxiꞌzewe.
13 Namikuꞌs nweꞌweyaꞌ sũhçxa peekx ĩtxi fxiꞌzeniꞌs ivxiitunisaçxáa peeygãani yaaseꞌ.
14 Iꞌkweꞌsxaꞌ isa adx namiku dxihçxaꞌ, adx jxkaahniꞌs kxtey yuuneꞌkwe.
15 Açaꞌ txãꞌwẽ yũusatxiꞌ peena yuꞌ selpisáa jĩna kxsusmeꞌnja. Selpisáꞌ txajx patron kĩh yuuyaꞌwatewa jiiméek fxiꞌzeꞌ. Nawa iꞌkweꞌsxaꞌ adx Tata weꞌwenitxiꞌ jxuka jii iꞌkwe, txãa paꞌga adxna selpisáa iꞌkwe jĩna kxsusmée, adx namiku iꞌkwe jĩnaçxáa kxsuusuꞌnja.
16 Iꞌkweꞌsx khuẽꞌy adxaꞌs txhitxhmeeiꞌkwe, wejxwa adxthu iꞌkweꞌsxtxi txhitxh. Saꞌ iꞌkweꞌsx mteewa uꞌjçxa Dxus dxiꞌpte selpiina fxiꞌzekahnthu neeweꞌweꞌ, açaꞌ iꞌkweꞌsx txãꞌwẽ Dxus dxiꞌpte selpiina uꞌjuniꞌ kxul yuumeena. Txãꞌwẽ yũusatxiꞌ adx Tataꞌ jxuka ũsuna kĩh pẽjxtewa, adxaꞌs piꞌkxçxa pẽjxteꞌ.
17 Naꞌwẽ yũuwaꞌjaꞌsthu iꞌkweꞌsxtxi jxkaajaꞌ: Puutx yaꞌpeeygãhna mfxiꞌzewe.
Jesus txhitxnisatxiꞌ naa kiweteweꞌsx açeni
18 Naa kiweteweꞌsxaꞌ adxaꞌs nyafxkhẽytxi ahçe naꞌ iꞌkweꞌsxtxiwa txãꞌwẽyçxáa açetxna, nawa nxusmée meswe.
19 Iꞌkweꞌsxaꞌ naa kiweteweꞌsxwaçaꞌ, nasaꞌ wedxitxna, txãaweꞌsx pweꞌsx maꞌwẽta wedxiꞌ txãꞌwẽy. Nawa adxaꞌ iꞌkweꞌsxtxi txhitxthu naa kiwejũ, txãa paꞌgatx naa kiweteweꞌsxaꞌ iꞌkweꞌsxtxi açeꞌ, naa kiweteweꞌsxmée yãꞌjiꞌkwe naa paꞌga.
20 Miiyajkxwe adx naꞌjĩna weꞌweniꞌs: Maawa selpisáꞌ txajx patronte jxthaakwesameꞌ jĩniꞌs. Adxaꞌ iꞌkweꞌsxtxi jxpeꞌjsath naꞌs yuhwa ikhyaꞌ pakweꞌtx naꞌ iꞌkweꞌsxtxiwa txãꞌwẽyçxáa ikhyaꞌ pakweetxna. Saꞌ adx kaapiyaꞌjniꞌs nwẽeseꞌjsaꞌ, iꞌkweꞌsx kaapiyaꞌjniꞌswa nwẽeseꞌjetxna.
21 Adx paꞌgaçxáa iꞌkweꞌsxtxi pkxuutxna, adxna kaahsaꞌs jiyumeeçxa.
22 Dxus jxkaahniꞌs adx ptaꞌsxyaꞌ kĩhmeewaçaꞌ, txãaweꞌsxaꞌ yuuwemeesa yuutxna. Nawa ãçxhaꞌ adx ptaꞌsxniꞌs jiyutx naꞌ yuuwemeethaꞌw jĩyaꞌ ãjameetxna.
23 Adxna açesaꞌ adx Tatanawa açesataꞌ.
24 Txãaweꞌsx ksxavxysu kim yuhwa vxit-yaꞌ ãjanimeesaꞌs adx kaavxyaꞌjaꞌjmeewaçaꞌ, yuuwemeesa yuutxna. Nawa makwe txãꞌwẽ adx ãjaniꞌs kaavxyaꞌjaꞌthe uyçxawa, adxna açeꞌtx. Açaꞌ adxna açesayãꞌj yuꞌ adx Tatanawa açesataꞌ.
25 Nawa txãaweꞌsx leyte naꞌwẽ fxiꞌjni ũsaꞌ: adxna ahçetx kĩhwa yuuwemeetewa jĩꞌk txãꞌ kxtey yuukahntxi txãꞌwẽ yũꞌ.
26 Nawa iꞌkweꞌsxtxi puꞌçxwaꞌjsa Dxus Espiritu isa ew kaajiyuꞌjwaꞌjsaꞌs adx Tata tasxu kajaꞌnja txãꞌ adx kimtewa ew kaajiyuꞌjuna.
27 Açaꞌ iꞌkweꞌsxwa txãꞌwẽy adx kimtewa ptaꞌsxineꞌkwe, iꞌkweꞌsxaꞌ nyafxíi iꞌkwe adx yakh ũssa yuꞌ naa paꞌga.
