Juan 16:1-33
16 Iꞌkweꞌsxtxi pkxuuteꞌ, nxusna wala kuh yaakxkahmen naꞌwẽ ptaꞌsxiçthu:
2 ahçeçxa judiuweꞌsx pkhaakhenijũ kutxiꞌjçxa peena yuꞌ jxpaꞌgameetxna iꞌkweꞌsxtxi. Saꞌ txãꞌwẽçxáa yũumée iꞌkweꞌsx maaíitxiꞌ ikhetxna, nawa txãaweꞌsx yuꞌ Dxusaꞌs selpiina ũsthaꞌw sũhna txãꞌwẽ yũutxna.
3 Txãa açesaweꞌsxaꞌ adx Tataꞌs jiimeetaꞌ, saꞌ adxnawa jiimeetaꞌ, txãasa txãꞌwẽ pkxuutxna.
4 Açaꞌ kxahth yaçkhẽy txãꞌwẽ ptaꞌsxiꞌ naꞌ txãꞌwẽ yũuwaꞌj en ãhteꞌ, adx ptaꞌsxniꞌs yaakineꞌkwe.
Dxus Espiritu kaajiyuꞌjni
Txãꞌwẽ pkxuuwaꞌjaꞌs nyafxíi yuꞌ ptaꞌsxmeeth, txãa paꞌgatey kĩhwa meek yuꞌ adx iꞌkweꞌsx yakh ũsteꞌ.
5 Nawa ãçxhaꞌ adxna kaahsa tasxte uꞌjweçthu. Nawa iꞌkweꞌsxaꞌ maa yuhwa pẽyiꞌçmeeiꞌkwe ¿mtee uꞌjweçga? jĩna.
6 Txãꞌwẽ pẽjxmeeçxa ĩꞌneeçxáa iꞌkwe wala nxusuꞌ, adx uꞌjweçthu jĩna ptaꞌsxteꞌ.
7 Nawa isath ptaꞌsxiꞌ: adx uꞌjmeeteꞌ, iꞌkweꞌsxtxi puꞌçxwaꞌjsaꞌ kĩhmeena. Nawa adx uꞌjçxaꞌ, txãꞌs kajaꞌnja. Txãa paꞌga pejka uꞌjwaꞌj yuh jiꞌpthu, iꞌkweꞌsxtxi puꞌçxwaꞌjsaꞌs kaajxaꞌ.
8 Açaꞌ txãꞌ naa kiwete kĩhçxaꞌ, nasatx Dxus dxiꞌpte yuuwe pkalsa yuhthaꞌw sũhwaꞌjaꞌs kaaũusutheꞌjena. Saꞌ Jesusaꞌ kĩhte yuhwa yuuwemée ewsa maatxwa jxuka nweꞌwewaꞌjsa yuh yuꞌga sũhwaꞌjaꞌswa ew kaajiyuꞌjuna. Txãꞌwẽy yuuwesatxiꞌ Dxusaꞌ ewmeete yuh nvxiituna sũhwaꞌjaꞌswa kaaũusutheꞌjena.
9 Maawa adxaꞌs jxpaꞌgayaꞌ waꞌlpaꞌga txãꞌwẽ pkal yuuwesataꞌ.
10 Adxaꞌ maatxwa jxuka nweꞌwewaꞌjsaçxaíi nweꞌwewaꞌjaꞌs vxitna uuçxa adx Tata tasxna uꞌtheꞌ, peena yuꞌ uymeeneꞌkwe.
11 Saꞌ yuuwesaꞌ ewmeete neeyũuwaꞌjsaneꞌtkaꞌw sũjkahníi naa kiwete jxkaahna ũssa eçxthẽꞌj yujaꞌswa ewmeete yãꞌkh nvxiitni yuu.
12 Iꞌkweꞌsxtxi wala ptaꞌsxwaꞌj jiꞌphíiçxáath, nawa ãçxhíi yuꞌ ew jiyuyaꞌ ãjameeneꞌkwe.
13 Nawa Dxus Espiritu kĩhçxaꞌ, txãa ente iꞌkweꞌsxtxiꞌ jxuka ew kaajiyuꞌjuna, txãꞌ isa weꞌwenisaçxáꞌs kaajiyuꞌjsaꞌ. Txãꞌ peekxçxáa weꞌwemée, Dxus kweꞌweꞌjniçxáꞌs ptaꞌsxina, saꞌ kĩh yuuyaꞌwatewa dxiikhẽy kaajiyuꞌjuna.
14 Adx maꞌwẽsatewa ew jiiaꞌ naꞌ txãasa iꞌkweꞌsxtxiwa kaajiyuꞌjuna, adxaꞌs tuutheꞌjsaꞌ naa paꞌga.
15 Adx Tata maꞌwẽsateꞌ, adxwa txãꞌwẽysa íiçxáath. Txãa paꞌga Espirituꞌ adx maꞌwẽsatewa wejx ew kaajiyuꞌjuna jĩnath ptaꞌsxiꞌ.
Nxuswaꞌj en skhẽwteꞌ, weçxa en paꞌjni
16 Ãçxhaꞌ adx Tata tasxna uꞌjwaꞌj ãjãçaꞌ, açaꞌ adxaꞌs uymeeneꞌkwe. Nawa vxite enkhẽꞌ adxaꞌs kiꞌ uyuuneꞌkwe.
17 Txãꞌjĩteꞌ, txãa yakh uꞌjusaweꞌsxaꞌ naꞌwẽtx puutx yaꞌpaapẽyiꞌ:
—¿Maꞌjĩçxakiꞌk txãꞌwẽ weꞌweꞌ? Ãçxhaꞌ adx Tata tasxna uꞌjwaꞌj ãjaçaꞌ, açaꞌ adxaꞌs uymeeneꞌkwe. Nawa vxite enkhẽꞌ kiꞌ uyuuneꞌkwe jĩꞌk saꞌ,
18 ¿kĩh weꞌweçxakiꞌk adx uꞌjwaꞌj ãjaçaꞌ jĩna weꞌweꞌ? nawa kweꞌsxaꞌ jiyuꞌçmeethaꞌw.
19 Txãꞌwẽ jiyuwẽena ũsniꞌs Jesusaꞌ jiyuçxaꞌ ptaꞌsxku:
—Adx Tata tasxna uꞌjwaꞌj ãjaçaꞌ, açaꞌ adxaꞌs uymeeneꞌkwe. Nawa vxite enkhẽꞌ kiꞌ uyuuneꞌkwe jĩnath weꞌwe açaꞌ ¿txãꞌsna wáꞌkwe iꞌkweꞌsx pweꞌsx jiyu wẽena puutx paapẽyiꞌ?
20 Isath weꞌweꞌ: Iꞌkweꞌsxaꞌ nxusna ũꞌneneꞌkwe, açaꞌ naa kiwete nasa yuꞌ wala weçxaatxna. Nawa iꞌkweꞌsxaꞌ makwe nxusna ũsçxawa, nxusu en skhẽwteꞌ, weçxweçxa neeyũuneꞌkwe.
21 Naꞌs mjiyuwe: Uꞌywa nasa upxyaꞌwate ãçaꞌaççxaꞌ, wala pxthaa yuꞌk akate. Nawa luuçx upxteꞌ, weçxaweete txãa aka yuuniꞌs peçxkanaꞌk.
22 Txãꞌwẽy iꞌkweꞌsxwa ãçxhíi yuꞌ nxusuꞌiꞌkwe. Nawa adxaꞌs kiꞌ uyçxaꞌ, weçxweçxa yajkxna neeyũuneꞌkwe. Açaꞌ iꞌkweꞌsx weçxweçxa yaakxniꞌs kim yuhwa kusaꞌjyaꞌ ãjameena.
23 Txãꞌwẽ adxaꞌs kiꞌ uyniijũꞌ, txajũyãꞌjaꞌ jxuka jiisa adxaꞌs paapẽywaꞌj jiꞌphumeeneꞌkwe. Nawa adx Tata yuꞌsaꞌ kĩhwa jxuka pẽjxyaꞌ ãjãneꞌkwe adxaꞌs piꞌkxçxa, açaꞌ txãꞌ jxuka ũsuna.
24 Nawa iꞌkweꞌsxaꞌ ãçxh paꞌjwa adx Tataꞌs kĩh yuhwa pẽynimée iꞌkwe adxaꞌs piꞌkxçxa. Mpẽjxwe wakx, saꞌ jxpaꞌgaçxaꞌ wala weçxaaneꞌkwe.
Kristoꞌ kĩhnawa jxuka knayni
25 Ejemplo yakhçxáath kaajaꞌdaꞌjna ptaꞌsx iꞌkweꞌsx jiyukahn. Nawa ãate ptaꞌsxwaꞌj en ãhteꞌ, peena yuꞌ ejemplo yakh kaajaꞌdaꞌjna ptaꞌsxmeꞌnja, wejxwa teehwed ãateçxaçxáa ptaꞌsxiꞌnja adx Tata maꞌwẽsatewa.
26 Txãꞌwẽ ãate ptaꞌsxwaꞌj en ãhteꞌ, iꞌkweꞌsx yuu adx Tataꞌs pẽjxyaꞌ ãjaneꞌkwe, makwe adx yuꞌ iꞌkweꞌsx paꞌgate weꞌwe puꞌçxmeetewa.
27 Iꞌkweꞌsxaꞌ adxaꞌs wedxçxa jxpaꞌgaiꞌkwe, Dxus tasxu yuusana sũhna. Txãa paꞌgak adx Tataꞌ iꞌkweꞌsxtxi peeygãjaꞌ.
28 Adxaꞌ Tata tasxu kasehçxa, naa kiwete yuweꞌth, saꞌ ãçxhaꞌ naa kiweꞌs nvxihtçxa kiꞌ uꞌjweçthu adx Tata tasxna jĩteꞌ,
29 txãa yakh uꞌjusaweꞌsxaꞌ naꞌjĩtx:
—Ãçxh yuuçxaꞌ ejemplo yakh kaajaꞌdaꞌjmée, teehwed ãate ptaꞌsxna ũsgu.
30 Ãçxhaꞌ jiyuthaꞌw, idxaꞌ kĩhnawa jxuka jiig. Txãa paꞌgathaꞌw ew jiyu Dxus tasxu yuusatewa. Txãasa kim yuhwa idxaꞌs paapẽywaꞌj jiꞌphmeetaꞌ jĩteꞌ,
31 Jesusaꞌ:
—¿Ãçxhaꞌ jiyuꞌkweꞌ? jĩnak weꞌwe.
32 Ãçxhaꞌ enaꞌ ãjk, açaꞌ ãçxhíi iꞌkweꞌsxaꞌ teeçxsa naꞌwẽçxah fxiifxii txuteeneꞌkwe, saꞌ adxçxáana nvxiituneꞌkwe. Nawa adxçxáa yuꞌ neeyũumeꞌnja, Tataꞌ adx yakh ũsaꞌ naa paꞌga.
33 Txãꞌwẽth adx yakh fxiꞌzewaꞌjaꞌs jxuka ptaꞌsxiꞌ, kxah adxaꞌs neeweꞌweçxaꞌ, ũukhmée wẽtwẽt yaakineꞌkwe. Naa kiweteꞌ thẽyte nxuste fxiꞌzewaꞌjaꞌs jiꞌphuneꞌkwe. Nawa adxaꞌs çxhãçxha miiyajkxwe, txãa paꞌgatey naa kiwete ewmeesaꞌs adxaꞌ knayyãꞌth naa paꞌga jĩk.
