Juan 17:1-26
17 Jesusaꞌ txãꞌwẽ ptaꞌsxna jxãꞌjçxaꞌ, cielute pagayçxa Dxus yakh puutx weꞌwek naꞌjĩna:
—Tata, enaꞌ ãjk. Iidx Nçxiꞌk kimtewa nasa jiyukahn ãate mkaavxyaꞌjaꞌ, kxah Nçxiꞌkwa idxaꞌs ãate kaajiyuꞌjuna nasatx.
2 Nasa jxukaysatx jxkaahwaꞌjaꞌs adxna ũsgu, iidx ũsni yuutxiꞌ jxukaysatx pçuwaꞌjmée ĩtxi fxiꞌzewaꞌjaꞌs ũskahn.
3 Açaꞌ pçuwaꞌjmée ĩtxi fxiꞌzewaꞌjaꞌs jiꞌphu wẽeçxaꞌ, teeçx Dxusçxáa ũsgu txãꞌsna jiyuwaꞌj jiꞌphtaꞌ, saꞌ txãꞌwẽy iidx kaahnisa Jesukristoꞌswa jiyuwaꞌj jiꞌphtaꞌ.
4 Adxaꞌ naa kiweteweꞌsxtxiꞌ ew kaajiyuꞌth idx maꞌwẽsatewa, saꞌ idx mjĩi kaahniꞌs jxãꞌjyãꞌth.
5 Tata, naa kiwe meetey maꞌwẽtkaꞌw cielute ih weçxana ũsuꞌ, ãçxhaꞌ txãꞌsaꞌ kiꞌ mah kxtey ih weçxana ũswaꞌjaꞌs.
6 Naa kiwejũ maaíitxiꞌ txhitxgu, açaꞌ txãaweꞌsxtxiꞌ kaajiyuꞌth idx maꞌwẽsatewa. Txãaweꞌsxaꞌ iidx jĩitx yuꞌ, nawa adx jxpeꞌkhangu ũs, açaꞌ txãaweꞌsxaꞌ nwẽeseꞌjtx iidx jxkaahniꞌs.
7 Saꞌ naꞌwẽ kĩjkĩhwa yũuyaꞌ ãjaꞌth txãa ãjanisaꞌ iidx jxkaahnitxna sũhwaꞌjaꞌs jiꞌphutx.
8 Idx yuwe ptaꞌsxkaahg txãꞌsaꞌ ptaꞌsxthu, açaꞌ txãaweꞌsxaꞌ jxpaꞌgaçxa ũuste yuꞌakhtxi. Saꞌ adxaꞌ Dxus kaahnisa iidx tasxuh yuusatewa jiitaꞌ.
9 Adxaꞌ txãaweꞌsxtxiꞌ iidx kuseteth nvxihtna neeweꞌweꞌ. Naa kiwete idxaꞌs jiimeesa ũstaꞌ txãaweꞌsx paꞌgate neeweꞌweꞌçmeeth. Adx jxpeꞌkhan ũsgu txãaweꞌsx paꞌgateçxáath neeweꞌweꞌ, txãaweꞌsxaꞌ iidx jĩitaꞌ naa paꞌga.
10 Jxuka adx jĩꞌ iidx jĩiçxaçxáataꞌ. Açaꞌ jxuka iidx jĩꞌ adx jĩiçxaçxáataꞌ. Txãaweꞌsxpaꞌga yuuçxáath txakwe wala weçxaawaꞌjaꞌs jiꞌphu.
11 Adxaꞌ naa kiwete txaçxmeeçxáa ũswaꞌj jiꞌphthu. Nawa txãaweꞌsxaꞌ naa kiwete neeyũutxna, naapkaçxhaꞌ adxaꞌ yuhth idx yakh ũsyaꞌ. Tata, adxna ũsgu txãaweꞌsxtxi meen jxpeꞌj jxpaꞌyakx, kxah teeçxsa naꞌwẽçxah idx yakh txutemée fxiꞌzetxna adxwa maꞌwẽtka idx yakh txutemée fxiꞌzeꞌ txãꞌwẽy.
12 Adxaꞌ naa kiwete txãaweꞌsx yakh ũsçxaꞌ, idx puꞌçxteꞌ jxpaꞌyakxthu jxpeꞌjna fxiꞌze adxaꞌs jxpeꞌkhan ũsgu txãaweꞌsxtxiꞌs. Açaꞌ jxukaysa yuꞌ vxitumeetaꞌ, naasáa teeçx vxituwaꞌjsaneꞌ yuꞌ txãa yuuçxáak vxitu, Dxus librute ptaꞌsxna fxiꞌjniꞌ kxtey yuukahn.
13 Ãçxhaꞌ yuhth idx ũsgu kxteey. Nawa naa kiwete nee ũsíi txãꞌwẽth idxaꞌs neeweꞌweꞌ, kxah txãaweꞌsxaꞌ ũukhmée weçxana fxiꞌzetxna, adxwa naꞌwẽth weçxana fxiꞌzeꞌ txãꞌwẽy.
14 Iidx ptaꞌsx kaahniꞌs ptaꞌsxthu adx jxpeꞌjnisatxiꞌ, nawa naa kiweteweꞌsxaꞌ txãaweꞌsxtxi açeꞌtx, adx jxpeꞌjnisaweꞌsxaꞌ adx naꞌwẽy naa kiweteweꞌsxmeetaꞌ naa paꞌga.
15 Adx jxpeꞌjnisatxiꞌ naa kiwejũ mkuutxiꞌj jĩꞌçmeeth, naasáa eçxthẽꞌj kaypubaꞌkhamen meen nweꞌwe jĩnaçxáath neeweꞌweꞌ.
16 Adxaꞌ naa kiweteweꞌsxmeeth, açaꞌ txãaweꞌsxwa naa kiweteweꞌsxmeetaꞌ.
17 Txãaweꞌsxaꞌ iidx jĩiçxáa yuukahn idxçxáa jxpeꞌjeneꞌga, isasaꞌs kaapiyaꞌjna. Iidx kaapiyaꞌjniꞌ kaypubaꞌjwaꞌjsameꞌ.
18 Idxwa maꞌwẽga adxaꞌsaꞌ naa kiwete kaah, txãꞌwẽy txãaweꞌsxtxiwa kajaçthu.
19 Saꞌ txãaweꞌsx paꞌgate adxwa iidx kusete neeyũuçthu, kxah txãaweꞌsxwa iidx jxpeꞌjwaꞌjyãꞌj neeyũutxna.
20 Txãaweꞌsx paꞌgateçxáa neeweꞌweçmeeth. Txãaweꞌsx iidx yuweꞌs ptaꞌsxteꞌ, maawa idxaꞌs jiyuwaꞌjsa ũstxna txãaweꞌsx paꞌgate jaꞌdath neeweꞌweꞌ.
21 Txãaweꞌsx jxukaysa teeçxsa naꞌwẽçxaçxáa yajkxna kweꞌsx yakh txutemée fxiꞌzekahnthu neeweꞌweꞌ, Tata, idxwa naꞌwẽ adx yakh fxiꞌzena ũsgu açaꞌ adxwa idx yakh fxiꞌzena ũsthu txãꞌwẽy yuukahn. Txãꞌwẽ yuuçxa teeçxsa naꞌwẽçxaçxáa ih fxiꞌzetxna, kxah naa kiweteweꞌsxaꞌ jiyutxna adxaꞌ iidx kaahnisatewa.
22 Idx yakh ih fxiꞌzewaꞌjaꞌs adxaꞌs ũsgu açaꞌ txãaweꞌsxtxiwa idx yakh ih fxiꞌzewaꞌjaꞌs adxaꞌ ũsthu, adxwa idx yakh maꞌwẽtkaꞌw teeçxçxáa naꞌwẽ fxiꞌzeꞌ txãꞌwẽy ih fxiꞌzekahn.
23 Adxaꞌ txãaweꞌsx yakh fxiꞌzeteꞌ, idxwa adx yakh fxiꞌzeneꞌga, kxah txãaweꞌsxaꞌ teeçxçxáa naꞌwẽsa yuutxna. Açaꞌ txãꞌwẽ yũuteꞌ, naa kiweteweꞌsxaꞌ jiyutxna adxaꞌ iidx kaahnisatewa. Saꞌ adxaꞌs maꞌwẽga peeygãjaꞌ, txãꞌwẽygu peeygãjaꞌ naaweꞌsxtxiwa.
24 Tata, adxaꞌs jxpeꞌkhan ũsgu açaꞌ txãaweꞌsxtxiꞌ adx ũsnitey ihth ũs jxthãasuꞌ, naa kiwe meetey adxaꞌs peeygãhçxa weçxana jxpeꞌjna ũsuꞌg txãꞌsaꞌ uykahn.
25 Tata, idxaꞌ wala yuh ewsatewa, naa kiweteweꞌsxaꞌ idxaꞌs jiimeetaꞌ. Nawa adx yuꞌ jiith, açaꞌ adx jxpeꞌjnisawa jiitaꞌ adxaꞌ iidx kaahnisatewa.
26 Adx jxpeꞌjnisatxiꞌ kaajiyuꞌth idx kimtewa, saꞌ kaajiyuꞌjna nes yuꞌnja, kxah idx adxaꞌs peeygãaniꞌ txãaweꞌsx ũuste nes yuuteꞌ, adxwa txãaweꞌsx ũuste nes yuꞌnja.
