Juan 18:1-40
18 Jesusaꞌ txãꞌwẽ neeweꞌwena jxãꞌjçxaꞌ, Cedron yuꞌkuten ktejkana uꞌkh, txãa yakh uꞌjusaweꞌsx yãꞌjçxa teeçx walta ũsaꞌ kxtee uꞌkayaꞌ.
2 Txãa waltateꞌ Jesus yakh uꞌjusaweꞌsxaꞌ maz uswa txãa yakh pkhaakheyaꞌ uꞌkasatx yuꞌ, naa paꞌgak Jesusaꞌs ikhkahn dukhwaꞌjsa Judasaꞌ jii yuꞌ.
3 Txãasak Judasaꞌ jiiyãꞌjçxaꞌ, soldauweꞌsxtxi peꞌjçxa kxtee paꞌj uꞌj dxuus yat thegsaweꞌsx yãꞌjçxa. Txãa dxuus yat thegsaweꞌsx yuꞌ, sacerdote npiiçthẽꞌj vxiteꞌ fxariseoweꞌsx jxkaahnitx yuꞌ. Vxiteꞌ fxtũ, vxiteꞌ kçxilx, vxiteꞌ lampara atçxatx paꞌj.
4 Nawa Jesusaꞌ txãꞌsna maꞌwẽwa pkxuuçxa ikhwaꞌj ãhte jiiyãꞌjçxaꞌ, puutx uyyaꞌ kasejk. Saꞌ naꞌjĩk:
—¿Kimnakwe pakwéꞌ? jĩteꞌ,
5 txãaweꞌsxaꞌ naꞌwẽtx pas:
—Jesus Nasarethuweꞌsxaꞌsthaꞌw pakwéꞌ jĩteꞌ, Jesusaꞌ naꞌjĩk:
—Adxíi txãath.
Açaꞌ Judaswa kxtee txãaweꞌsx yakh ũsuꞌk, Jesusna kuuweꞌjna.
6 Txajũꞌ adxíith jĩna Jesus weꞌweniteçxáa, Jesusaꞌs tudwaꞌjsaꞌ eꞌsu yaꞌskaçxa kiwegatx wete.
7 Açaꞌ Jesusaꞌ kiꞌ pẽjxku:
—¿Kimnakwe pakwéꞌ? jĩteꞌ, txãaweꞌsxaꞌ:
—Jesus Nasarethuweꞌsxaꞌsthaꞌw pakwéꞌ jĩnatx pas.
8 Açaꞌ Jesus pasçxaꞌ:
—Adxíith jĩna ptaꞌsxyãꞌth. Açaꞌ adxaꞌs pakweeççxaꞌ, adx yakh uꞌjusaweꞌsx ayte ũstaꞌ txãaweꞌsxtxiꞌ kuçx yuunuwe uꞌkhan jĩk.
9 Jesusaꞌ nyafxíi weꞌweçxaꞌ: Tata adxna jxpeꞌkhan ũsku txãꞌ jxukaysa yuꞌ vxitumeetaꞌ txãꞌjĩniꞌ kxtey yuukahnku txãꞌjĩ.
10 Naapkaçxhaꞌ Simon Pedroꞌ kçxilx yaꞌkxnisaꞌs jxkuutxiꞌjçxa teeçx piçthẽꞌj thũꞌwẽ paçuweꞌsxaꞌsku spẽꞌth. (Txãa piçthẽꞌjaꞌ sacerdote npiiçthẽꞌjaꞌs selpisáa Malko yaasek yuꞌ.)
11 Açaꞌ Jesusaꞌ Pedroꞌs naꞌjĩnak jxkaah:
—Kçxilxaꞌs wainutey myuꞌakh. Adx nxuste pxthaa yuuwaꞌjaꞌsku Tataꞌ jxthãasuꞌ açaꞌ txãꞌsaꞌ jxpaꞌgawaꞌjsameena sũjuꞌwáꞌga jĩk.
Jesusaꞌs Anas tasxna jxũna uꞌjni
(Mt 26.57-58; Mr 14.53-54; Lk 22.54)
12 Txajũꞌ soldau npiiçthẽꞌj txajx nasa yakh vxiteꞌ dxuus yat thegsaweꞌsx yãꞌjçxa Jesusaꞌs tudçxaꞌ,
13 Anas tasxna khuẽꞌy jxũna uꞌjtx. Txãa Anas duh Kaifxasaꞌ sacerdote npiiçthẽꞌkh yuꞌ txãa anxute.
14 Txãa Kaifxasíik judiuweꞌsxtxi naꞌjĩna weꞌwesa yuꞌ: Nasa jxukaysa paꞌgate teeçx piçthẽꞌjçxáa uuwaç wejx ewna jĩsak yuꞌ.
Pedro ĩsxiini
(Mt 26.69-70; Mr 14.66-68; Lk 22.55-57)
15 Jesusaꞌs tudçxa jxũna uꞌtheꞌ, Simon Pedroꞌ vxite piçthẽꞌjyãꞌjçxa Jesus eꞌstey uꞌkh. Txãa vxite piçthẽꞌj yuꞌ sacerdote npiiçthẽꞌj yakh jiisak yuꞌ, txãa paꞌga txãa npiiçthẽꞌjsa yat patxute uꞌkak Jesus uꞌkanitey.
16 Nawa Pedroꞌ uꞌkamée vxitx pukate neeyũuk. Txãasak sacerdote npiiçthẽꞌj yakh jiisaꞌ kxtee vxitxte thegsa yakh puutx weꞌweçxa Pedroꞌs dxiite kaꞌgaꞌj.
17 Açaꞌ vxitxte thegsaꞌ pẽjxku Pedroꞌs:
—Idxaꞌ ¿naa piçthẽꞌj yakh uꞌjusameegáꞌ? jĩteꞌ, Pedro pasçxaꞌ:
—Txãa yakh uꞌjusameeth jĩk.
18 Txajũꞌ kxtee selpisaaweꞌsx vxiteꞌ dxuus yat thegsaweꞌsx yãꞌjçxa kumaçxa ipx yuthçxatx bajçxna ũsuꞌ patxute. Açaꞌ Pedrowa kxtee txãaweꞌsx yakh ipx pukate bajçxna ũsuꞌk.
Anas Jesusaꞌs paapẽyni
(Mt 26.59-66; Mr 14.55-64; Lk 22.66-71)
19 Txajũꞌ Anasaꞌ paapẽjxyaꞌ takhku Jesusaꞌs:
—Idx yakh uꞌjusaweꞌsxaꞌ ¿kimtxna? açaꞌ idxaꞌ ¿kĩhga kaapiyaꞌjaꞌ? jĩteꞌ,
20 Jesusaꞌ naꞌjĩnak pas:
—Adxaꞌ ãateçxaçxáa iiweꞌweth nasa jxukaysa dxiꞌpte, judiuweꞌsx pkhaakhenisu vxiteꞌ dxuus yatte judiuweꞌsx jxukaysa ksxavxyte Dxus yuweꞌs kaapiyaꞌjna. Adxaꞌ paaçte yuꞌ kĩhwa iiptaꞌsxmeeth.
21 Açaꞌ adxaꞌs ¿kĩjxaꞌga paapẽyiꞌ? Adx ptaꞌsxniꞌs wẽseꞌjsatx mpaapẽjx, açaꞌ txãaweꞌsxaꞌ ptaꞌsxitxna adx kĩh weꞌweniꞌswa. Txãaweꞌsxaꞌ adx ptaꞌsxniꞌs jiitaꞌ naꞌ.
22 Txãꞌwẽ weꞌweteꞌ, dxuus yat thegsaweꞌsx teeçx kxtee ũssaꞌ kuseju Jesus dxiꞌpga pehtxaçxaꞌ, naꞌwẽk juunaꞌ weꞌwe:
—Anasaꞌ sacerdote npiiçthẽꞌjaꞌ aç yujaꞌ ¿txãꞌwẽ pasuꞌgáꞌ? jĩteꞌ,
23 Jesus pasçxaꞌ:
—Adx ewmée weꞌweteꞌ, mpeetaꞌsx kĩhsu ewmée weꞌweçtewa. Nawa ewsaçxáꞌs weꞌweçteꞌ, ¿maꞌwẽtega adxaꞌs txãꞌwẽ pkxúꞌ? jĩnak pas.
24 Txãꞌwẽ yũunijũꞌ Anasaꞌ Jesusaꞌs tudni ũsíin, jxũna uꞌkhaakh sacerdote npiiçthẽꞌj Kaifxas tasxna.
Pedro kiꞌ ĩsxiini
(Mt 26.71-75; Mr 14.69-72; Lk 22.58-62)
25 Naapkaçxhaꞌ Pedroꞌ ipx pukate bajçxna ũsíiçxáak yuꞌ. Açaꞌ kxtee ũssaweꞌsxaꞌ naꞌwẽtx pẽjx:
—Idxaꞌ ¿naa piçthẽꞌj yakh uꞌjusa yuh meega wakx? jĩteꞌ, Pedroꞌ:
—Adxaꞌ txãameeth jĩnak pas.
26 Açaꞌ sacerdote npiiçthẽꞌjaꞌs selpisáa teeçxsaꞌ naꞌjĩnak pẽjx:
—Idxaꞌs ¿uymeewáꞌntka waltate txãa yakh ũste? (Txãꞌjĩna pẽysaꞌ Pedro teeçx piçthẽꞌj thũꞌwẽꞌs spẽꞌthku txãa piçthẽꞌj nweꞌsxku yuꞌ.)
27 Txãꞌjĩna kiꞌ pẽjxteꞌ, Pedroꞌ kiꞌkin ĩsxiijaçpkaçxhaꞌ, atalxaꞌ weꞌwek.
Jesusaꞌs Pilato tasxna jxũna uꞌjni
(Mt 27.1-2, 11-14; Mr 15.1-5; Lk 23.1-5)
28 Txajũꞌ Kaifxas yatu Jesusaꞌs jxũna uꞌjtx neꞌjweꞌsx Pilato tasxte nuypaꞌjyaꞌ. Naapkaçxhaꞌ khikhiiçku yuꞌ. Txajũꞌ judiuweꞌsxaꞌ neꞌjweꞌsx uꞌpnite uꞌkameetaꞌ, pkal pẽetheejena sũhçxa. Txãꞌwẽ pkal pẽetheetheꞌ, Paskuateweꞌsxaꞌs ũꞌyaꞌ ãjameꞌnjaꞌw sũhçxatx uꞌkamée.
29 Txãa paꞌgak Pilatoꞌ eka kasehçxaꞌ naꞌjĩna paapẽjx:
—Naa piçthẽꞌjaꞌ ¿kĩhga yuu aç txãꞌwẽ pãatxhĩꞌkhna yujkwe? jĩteꞌ,
30 txãaweꞌsxaꞌ naꞌwẽtx pas:
—Kĩhwa yuuwemeewaçaꞌ, iidx tasxte nuypaꞌjwaꞌjmeeneꞌtkaꞌw yuꞌ jĩteꞌ,
31 Pilatoꞌ naꞌjĩnak jxkaah:
—Jxũna meꞌjwe, saꞌ iꞌkweꞌsx ley maꞌwẽ jxkaatheꞌ, kxtey yuuneꞌkwe jĩteꞌ, judiuweꞌsxaꞌ naꞌjĩnatx weꞌwe:
—Kweꞌsxaꞌ judiuweꞌsxthaꞌw naꞌ ¿maꞌwẽ ikh kaajxaꞌ ãjakxthaꞌw?
32 Jesusaꞌ maꞌwẽ uuwaꞌjsaçxawa ptaꞌsxku txãa ptaꞌsxniꞌ kxtey yuukahntxi txãꞌjĩna weꞌwe.
33 Txajũꞌ Pilatoꞌ txajx uꞌpnite kiꞌ kũhçxaꞌ, Jesusaꞌs paꞌyaçxa naꞌwẽk paapẽjx:
—¿Idxaꞌ judiuweꞌsxtxi jxkaahsawáꞌga? jĩteꞌ,
34 Jesusaꞌ naꞌjĩk:
—¿Iidx ũusuh yajkxçxaga txãꞌjĩꞌáꞌ? meeçxaꞌ ¿vxitesa txãꞌjĩna adxaꞌs kxsuusniꞌs wẽseꞌjçxawáꞌga txãꞌjĩꞌ? jĩteꞌ,
35 Pilatoꞌ naꞌwẽk pas:
—Adxaꞌ judiumeeth. Iidx nweꞌsx vxiteꞌ sacerdote npiiçthẽꞌjweꞌsxtxi adx tasxte idxaꞌs nuykũh, açaꞌ idxaꞌ ¿kĩhga ewmée yũu? jĩteꞌ,
36 Jesusaꞌ ptaꞌsxku:
—Adx jxkaahwaꞌjaꞌ naa kiwetemeꞌ. Txãꞌwẽ naa kiwete jxkaahwaꞌjsawaçaꞌ, adx juꞌgusaweꞌsxaꞌ puiiwaꞌjneꞌta yuꞌ, judiuweꞌsx kusete adxaꞌs dukhkahmen. Açaꞌ naa kiwete jxkaahsameeth.
37 Txãꞌjĩteꞌ, Pilatoꞌ kiꞌ pẽjxku:
—Txãꞌwẽçxaꞌ ¿idxaꞌ jxkaahsa dxihgáꞌ? jĩteꞌ, Jesusaꞌ naꞌjĩk:
—Idx kxsusuꞌg txãꞌwẽíith. Naa kiwete upxçxa isasaçxáana ptaꞌsxyaꞌth yuwéꞌ. Maawa isasaꞌs nwẽeseꞌjwaꞌjsaꞌ adx weꞌweniꞌs jxpaꞌyakxtxi wẽseꞌjeꞌ jĩteꞌ,
38 Pilatoꞌ naꞌwẽk paapẽjx:
—Naꞌwẽ isasaꞌ jĩna weꞌweꞌg txãꞌ ¿kĩhna?
Jesusaꞌ ikhwaꞌj yuuni
(Mt 27.15-31; Mr 15.6-20; Lk 23.13-25)
Txãꞌwẽ Jesusaꞌs paapẽjxçxaꞌ, Pilatoꞌ kiꞌ eka kasejk judiuweꞌsxtxi naꞌjĩna ptaꞌsxyaꞌ:
—Naa piçthẽꞌj ewmée yũuniꞌs kĩhte yuhwa uyuꞌçmeeth.
39 Nawa Paskua fxiesta iisa teeçx preesu kaatxhweeteꞌjeꞌiꞌkwe naꞌ ¿ãçxwa txãꞌwẽy txhweete jxthãasuꞌkweꞌ naa judiuweꞌsxtxi jxkaahsaꞌs? jĩteꞌ,
40 jxukaysa naꞌjĩtx:
—Txãꞌsaꞌ kaatxhweeteꞌjnu. Barabasçxáꞌs mkaatxhweeteꞌj jĩnatx weyiꞌ.
Txãa Barabasaꞌ iiméh jxthaakwe pesweesak yuꞌ.
