Juan 19:1-42
19 Txajũꞌ Pilatoꞌ Jesusaꞌs jxũna uꞌjçxa peçxuukwekaakh.
2 Açaꞌ soldauweꞌsxaꞌ çhũçhna tadx vxitçxa Jesus dxikthete kaafxĩkheꞌjtx, saꞌ atxh behsaꞌs kaapãꞌçxiꞌjçxatx naꞌjĩꞌ:
3 —¡Vxiwa, judiuweꞌsxtxi jxkaahsa! Txãꞌjĩçxatx dxiꞌpga petxaatxa.
4 Txajũꞌ Pilatoꞌ kiꞌ eka kasehçxaꞌ naꞌwẽk weꞌwe:
—Mthegwe, naa piçthẽꞌjaꞌ ayte ũsaꞌ, nawa txãꞌsaꞌ makwe paapẽjxçxawa txajx ewmée yũuniꞌs uymeeth.
5 Txãꞌjĩ yãꞌtheꞌ, Jesusaꞌ kasejk dxikthete çhũçhaꞌs tadxçxa kaafxĩkheꞌjni, saꞌ atxh behsaꞌs kaapãꞌçxiꞌjni. Açaꞌ Pilatoꞌ naꞌjĩnak weꞌwe:
—Ãçxhaꞌ ayte ũsaꞌ txãa piçthẽꞌjaꞌs mthegwe.
6 Txãꞌjĩteꞌ, sacerdote npiiçthẽꞌjweꞌsx vxiteꞌ dxuus yat thegsaweꞌsx Jesusaꞌs thegçxaꞌ naꞌjĩnatx sus weyyaꞌ kiite:
—Kluuste mkaafxuçuꞌj, kluuste mkaafxuçuꞌj jĩteꞌ, Pilatoꞌ naꞌjĩk:
—Iꞌkweꞌsx jxpaꞌgaçxa kluuste mfxuçwe. Adxaꞌ kĩh yuhwa ewmée yũuniꞌs jiyuyaꞌ ãjameeth jĩteꞌ,
7 judiuweꞌsxaꞌ naꞌjĩnatx weꞌwe:
—Kweꞌsxaꞌ ley jiꞌpthaꞌw txãa leyaꞌ ikhkajaꞌk, Dxus Nçxiꞌkthu jĩna uꞌjupaꞌga.
8 Txãꞌjĩniꞌs wẽseꞌjçxaꞌ, Pilatoꞌ jweeíiçxáak wala ũukhwaꞌj jiꞌphu.
9 Saꞌ txajx uꞌpnite uꞌkaçxaꞌ, naꞌjĩnak Jesusaꞌs paapẽjx:
—Idxaꞌ ¿majũweꞌsxga? jĩtewa, Jesusaꞌ pasmeꞌ.
10 Açaꞌ Pilatoꞌ naꞌjĩk:
—¿Adxaꞌs kĩh yuuçxaga pasuꞌçmée? ¿Jiimeewáꞌga? adxaꞌ kluuste fxuçkahn jxkaajxaꞌwa ãjawaꞌjsath, saꞌ txãꞌwẽy kaatxhweeteꞌjyaꞌwa ãjawaꞌjsath jĩteꞌ,
11 Jesusaꞌ pasku:
—Dxuspaꞌgameewaçaꞌ, idxaꞌ kĩjxaꞌyuhwa ãjawaꞌjsameeg adxaꞌs. Nawa iidx kusete adxaꞌs dukhsaꞌ idxte jxthaakwe yuuwesaꞌ.
12 Txãꞌjĩna weꞌwenijũꞌ Pilatoꞌ wala paꞌpçxuk Jesusaꞌs txhweetewẽeçxa. Nawa judiuweꞌsxaꞌ naꞌjĩnatx sus weꞌwe:
—Naa piçthẽꞌjaꞌs txhweteçxaꞌ, jxkaahsa Cesar namikumée yuuneꞌga. Maawa fxiy jxkaahsaꞌ txãꞌ Cesar juꞌgusameꞌ.
13 Txãꞌjĩniꞌs wẽseꞌjçxaꞌ, Pilatoꞌ Jesusaꞌs ekate peꞌjna uꞌjçxaꞌ, jxkaahna uꞌpnite kaçxku. Txãa jxkaahna uꞌpniꞌ Gabata yaasek yuꞌ hebreo yuwete. Txãꞌ Kwet Fxuçni jĩniꞌ.
14 Paskua fxiesta ãjaçtek txãꞌwẽ yũuna ũsuꞌ. Txajũꞌ Pilatoꞌ naꞌwẽk weꞌwe judiuweꞌsxtxi:
—Iꞌkweꞌsxtxi jxkaahsaꞌ ayte ũsaꞌ jĩteꞌ,
15 txãaweꞌsxaꞌ naꞌwẽtx sus weꞌwe:
—¡Peekx uuna, kluuste mfxuç! jĩteꞌ, Pilatoꞌ naꞌwẽk weꞌwe:
—Iꞌkweꞌsxtxi jxkaahsa yujaꞌs, ¿maꞌwẽ kluuste fxuç kajakiꞌth? jĩteꞌ, sacerdote npiiçthẽꞌjweꞌsxaꞌ naꞌwẽtx weꞌwe:
—Kweꞌsxtxi jxkaahsaꞌ Cesar yuuçxáꞌ. Vxite jxkaahsa yuꞌ jiꞌphmeethaꞌw.
16 Txãꞌwẽ weꞌwe yãꞌtheꞌ, Pilatoꞌ Jesusaꞌs txãaweꞌsx kusete kluuste fxuçkahn dukhteꞌ, jxũna uꞌjtx.
Jesusaꞌs kluuskhẽ fxuççxa ikhni
(Mt 27.32-44; Mr 15.21-32; Lk 23.26-43)
17 Jesusaꞌ txãꞌsna fxuçwaꞌj kluusaꞌs yakhçxa çxhabu kasehna uꞌkh, teeçx ahte Gólgota yaaseꞌ kxtee paꞌj. Txãa Gólgota yuꞌ, Uusáa Jxkwet Dxiꞌth jĩniꞌ hebreo yuweteꞌ.
18 Kxtee paꞌjçxaꞌ Jesusaꞌs kluuste fxuçtxi, vxite eꞌz piçthẽꞌjtx txãꞌwẽy, Jesusaꞌs pxãhte txahçxa.
19 Txajũꞌ Pilatoꞌ kluus kajkwete naꞌwẽk kiꞌp kaah: Jesus Nasarethuweꞌsx, judiuweꞌsxtxi jxkaahsa jĩna fxiꞌjniꞌs.
20 Açaꞌ kluuste fxuçniꞌ çxhab utxatek yuꞌ, naa paꞌga maazkuẽe judiuwa txãa fxiꞌjniꞌs theguꞌtx. Txãa fxiꞌjniꞌ, hebreo, griego, latin yuwejuk fxiꞌjni yuꞌ.
21 Açaꞌ sacerdote npiiçthẽꞌjweꞌsx vxiteꞌ judiu npiiçthẽꞌjweꞌsxaꞌ naꞌjĩnatx Pilatoꞌs paatxhĩꞌkh:
—Judiuweꞌsxtxi Jxkaahsa jĩna fxiꞌj naꞌwẽ, Adxaꞌ Judiuweꞌsxtxi Jxkaahsath jĩꞌk jĩna fxiꞌjwaçaꞌ, wejx ewna.
22 Nawa Pilato pasçxaꞌ naꞌjĩk:
—Adx txãꞌwẽ fxiꞌjniꞌs kim yuhwa yuꞌpthehmeena.
23 Txajũꞌ soldauweꞌsxaꞌ Jesusaꞌs kluuste fxuç yãꞌjçxaꞌ, Jesus athniꞌs pahzsa txuꞌdedetx soldau iisa teeçxteeçx. Saꞌ atxhaꞌswa txãꞌwẽytxi yũu wẽe, nawa txãꞌ teehwedsaçxáak yuꞌ kaçnimeesa.
24 Açaꞌ soldauweꞌsxaꞌ naꞌwẽtx puutx weꞌwe:
—Txãꞌs sudeyaꞌmée swerte kajaꞌnjaꞌw kim jĩi neeyũutewa jiyuyaꞌ.
Soldauweꞌsx txãꞌwẽ yũuniꞌ Dxus librute naꞌwẽ fxiꞌjni kxtey yuuk: Adx athniꞌs txãaweꞌsx pweꞌsx txuꞌdedetx swerte kaahçxa jĩna fxiꞌjniꞌ.
25 Txãꞌwẽ yũuçpkaçxhaꞌ, Jesusaꞌs fxuçni kluus pukate njĩꞌjwa ũsuꞌk vxiteꞌ Jesus njĩꞌj yũkwe, vxiteꞌ Kleofxas nyu Maria, vxiteꞌ Maria Magdalena.
26 Açaꞌ Jesus njĩꞌj pukate Jesus wedxnisa ih ũste Jesus uyçxaꞌ, njĩꞌjaꞌs naꞌjĩk:
—Naa piçthẽꞌjaꞌ iꞌkweꞌs jxpeꞌjena nçxiꞌk naꞌwẽ jĩçxaꞌ,
27 txãa piçthẽꞌjaꞌswa naꞌjĩnak neeweꞌwe:
—Naꞌsaꞌ iidx mama naꞌwẽ jxpeꞌjeneꞌga.
Txãꞌjĩteꞌ, txãa piçthẽꞌjaꞌ txãa oratey Jesus njĩꞌjaꞌs txajx yatna peꞌjna uꞌkh.
Jesus uuníi
(Mt 27.45-56; Mr 15.33-41; Lk 23.44-49)
28 Txãa skhẽuaꞌ, Jesusaꞌ jiik yuꞌ jxuka kxtey yuuna uꞌjweçtewa. Saꞌ Dxus librute maꞌwẽ fxiꞌjni kxtey yuukahnku naꞌjĩna weꞌwe:
—Yũꞌwẽeth jĩna.
29 Teeçx tasa vxino utak ũsuꞌ. Açaꞌ txãa vxinote esponjaꞌs tuuphaꞌjçxa fxtũte açhçxa Jesus yuwete utxatx çxazxakahn.
30 Açaꞌ Jesusaꞌ esponjaꞌs çxazxaçxaꞌ, naꞌwẽk weꞌwe:
—Jxuka jxãꞌjnik neeyũu jĩnaꞌwa, kĩiçhunaꞌ uuk.
Teeçx soldau Jesus tabxte yãjani
31 Açaꞌ Paskua fxiesta en ãjaç yãꞌkh yuꞌ. Txãa enaꞌ wala kiꞌsnisa yuꞌk. Açaꞌ judiuweꞌsxaꞌ fxiesta ente uusaaweꞌsx kakwetx kluuskhẽ nvxiit wẽemeeçxaꞌ, Pilatoꞌs pẽjxtxi kluuskhẽ kiꞌpnisa çxidatx çxkadedeyaꞌ kaakhan, dud uuteꞌ kakwetx txajũ kiisyaꞌ.
32 Txajũꞌ soldauweꞌsx uꞌjçxa çxidatx çxkadedetx teeçxsa khuẽꞌyna, saꞌ vxitenawa txãꞌwẽytxi yũu Jesus pukakhẽ kluuskhẽ uꞌpsaꞌs.
33 Nawa Jesusnawa txãꞌwẽy yũuyaꞌ utxaana kũhçxaꞌ, uunii yãꞌj uꞌptetx uy. Txãa paꞌgatx Jesus çxidatx çxkadedemée.
34 Txãꞌwẽtewa, teeçx soldau yuꞌ Jesus tabxte weꞌthuk yãjaꞌ. Açaꞌ txãꞌwẽ yãjateꞌ, ee yuꞌ yakhku uwu.
35 Txãꞌwẽ yũunisaꞌs ptaꞌsxsaꞌ txajx yafxju yuuk uy, saꞌ isak weꞌweꞌ. Saꞌ jiiaꞌ isa weꞌweççxawa, kxah iꞌkweꞌsxwa txãꞌwẽ yuh yũuneꞌ sũhwaꞌjaꞌs jiꞌphuneꞌkwe.
36 Nawa Dxus libruteꞌ naꞌwẽ fxiꞌjniꞌ: Iidx dxiꞌthtxiꞌ teeçxçxáa yuhwa çxkahdemeetxna jĩni kxtey yuukahntxi txãꞌwẽ yũu.
37 Dxus librutey vxite ajkhẽ naꞌwẽ fxiꞌjni ũsaꞌ: Weꞌthu yãjaçxaꞌ, thegutxna jĩꞌk.
Jesusaꞌs pedaní
(Mt 27.57-61; Mr 15.42-47; Lk 23.50-56)
38 Txãꞌwẽ yũuniijũꞌ Jose yaasesa Arimatea çxhabuweꞌsxaꞌ Pilato tasxte utxaak Jesus kakweꞌs pẽjxçxa jxũna uꞌjyaꞌ. Açaꞌ Pilatoꞌ ewna jĩteꞌ, Joseaꞌ Jesus kakweꞌs pedaayaꞌ jxũna uꞌkh. Naa Jose yuꞌ Jesus juꞌgsak yuꞌ, nawa judiuweꞌsxtxi ũukhçxa kimwa jiyunimeeneꞌ uꞌjusa yuꞌ.
39 Txajũꞌ Nikodemowa paꞌkh, Jesus yakh kus puutx weꞌwesa. Txãa yuꞌ treinta kilo ãjk yuꞌçe tũꞌsçxa paꞌj, miçxa aloe yakh kaꞌdnisa.
40 Txajũꞌ Joseꞌ Nikodemo yakh Jesus kakweꞌs jxũna uꞌjçxaꞌ, yaptxi txãa yuꞌçe kaꞌdnisa yakh, judiuweꞌsx maꞌwẽneꞌta uusáa kakwetx pedáꞌ txãꞌwẽytxi yũu.
41 Jesusna kluuste fxuçni utxasu walta ũsuꞌk. Açaꞌ txãa waltateꞌ uusáa pedawaꞌj kafx uꞌsesa uꞌpuꞌk, kim yuhtxwa pedanimeesa.
42 Txkaatx Jesus kakweꞌs khikh, kafxaꞌ utxatek uꞌpuꞌ açaꞌ kiꞌswaꞌj enwa ãjaçku yuꞌ naa paꞌga.
