Juan 2:1-25
2 2:1-3 Tekh en skhẽwniiteꞌ, Galilea kiwesu Kaná çxhabte ptamusáa ũsuꞌtx. Açaꞌ Jesuswa piꞌkxni paꞌjçxa ũsuꞌk, txãa yakh ih uꞌjusaweꞌsx yãꞌjçxa. Jesus njĩꞌjwa kxtee ũsuꞌk, naapkaçxhaꞌ vxino pçuuteꞌ, Jesusaꞌs naꞌjĩnak ptaꞌsx:
—Vxino pçuk jĩk.
2 —
3 —
4 Açaꞌ Jesusaꞌ naꞌwẽk pas:
—¿Kĩh yũukahnkwe adxaꞌs txãꞌwẽ ptaꞌsxiꞌ? adx en yuu ãhmeyaꞌ jĩteꞌ,
5 njĩꞌjaꞌ kxtee selpisaaweꞌsxtxi naꞌjĩk:
—Txãa maꞌwẽ jxkaatheꞌ, kxtey myũuwe jĩna.
6 Kxteꞌ seis kiwe mitxh walasatx ũsuꞌ. Txãa yuꞌ judiuweꞌsx khweeçxawaꞌj yuꞌ awnisatx yuꞌ. Mitxh iisa oçxenta meeçxawa cien litro yuꞌ khẽesatx yuꞌ.
7 Txajũꞌ Jesusaꞌ jxkaakh kxtee selpisaaweꞌsxtxiꞌ:
—Naa mitxhsu jxuka yuꞌ uta mawwe jĩteꞌ, kxtey yuutx.
8 Txajũꞌ Jesusaꞌ naꞌjĩnak weꞌwe txãaweꞌsxtxiꞌ: Naa mitxhte leꞌçxkuẽ paꞌkxçxa boda namuꞌs meꞌjwe yusyaꞌ jĩteꞌ, txãaweꞌsxaꞌ kxtey yuutx.
9 Txajũꞌ boda namuꞌ tudxçxawa, jiyumeꞌ yuꞌaꞌs txãꞌwẽ vxino vxitnitewa. Kxtee selpisaaweꞌsxçxáatx jii yuꞌ, yuꞌaꞌs txãꞌwẽ vxino vxitnisatewa. Txajũꞌ boda namuꞌ ptamusaꞌs paꞌyaçxa
10 naꞌjĩnak weꞌwe:
—Maawa vxino ewsaꞌs khuẽꞌytxi nyafxte yusuꞌ piꞌkxnisatx, txãa eꞌsutx vxino açxamée ewsaꞌs yusuꞌ. Nawa idxaꞌ txãꞌwẽ yũumée vxino wejx ewsaꞌsgu nmehte yus jĩk.
11 Jesusaꞌ Galilea kiwesu Kaná çxhabtek txãꞌwẽ kim yuhwa ãjãnimeesaꞌs kaavxyaꞌj. Txãꞌwẽ yũuçxak txajx ewuniꞌs khiyuꞌj, açaꞌ txãa yakh uꞌjusaweꞌsxaꞌ jiyutx Jesus kimtewa.
12 Txãa eꞌsuꞌ Jesusaꞌ Kapernaum çxhabnak uꞌj, txajx njĩꞌj vxiteꞌ txajx nyakhweꞌsx, txãa yakh uꞌjusaweꞌsx yãꞌjçxa.
Dxuus yatte txweyna ũssatx Jesus kasxisxni
(Mt 21.12-13; Mr 11.15-18; Lk 19.45-46)
13 Judiuweꞌsx fxiesta Paskua en ãjãçteꞌ, Jesusaꞌ Jerusalen çxhabna uꞌkh.
14 Saꞌ dxuus yatte uꞌkaçxaꞌ, bwey, piisxáa, tub çxihmetx txweyna ũstek uy, vxiteꞌ vxyuu yuꞌpthehna ũssatx.
15 Saꞌ Jesusaꞌ txãꞌwẽ yũuna ũste uyçxaꞌ, khaꞌtxa pheuꞌjçxa eka kasxisxku nasa vxiteꞌ niimaltxi jxuka. Saꞌ txãꞌwẽy vxyuu yuꞌpthehna ũsni mesatxwa jxuka pũsxku petx vxyu yãꞌjçxa.
16 Saꞌ kxtee tub çxihme txweysatxiꞌ naꞌjĩk:
—Naatxiꞌ ayjxu jxuka mkaasxisxwe. Adx Tata yatteꞌ txweyna vxyuu yuꞌpthehna ũswaꞌjmeꞌ.
17 Txãꞌjĩteꞌ, Jesus yakh uꞌjusaweꞌsxaꞌ yajkxtxi Dxus librute naꞌwẽ fxiꞌjniꞌs: Dxuus yatteꞌ ewmée yũuniꞌs weh yuhwa peejxmeeth jĩniꞌs.
18 Txajũꞌ judiuweꞌsxaꞌ ũusçxa weꞌwenatx pẽjx:
—Kim jxkaathe txãꞌwẽ yũuçxawa, kweꞌsxtxi mpeetaꞌsx jĩteꞌ,
19 Jesus pasçxaꞌ:
—Naa dxuus yataꞌs pẽtxtewa, adxaꞌ tekh enteꞌ kiꞌ kiisyaꞌ ãjãwaꞌjsath.
20 Txajũꞌ judiuweꞌsxaꞌ iiweeçx weꞌwena naꞌjĩtx:
—Naa dxuus yataꞌs kuarenta y seis anxutetx txahna jxãꞌj, açaꞌ idxaꞌ ¿tekh enteçxáa txajxaꞌ ewuudxijíimaꞌg?
21 Nawa Jesusaꞌ txajx kakweꞌsku dxuus yataꞌ jĩna weꞌweꞌ.
22 Açaꞌ uuçxa kiꞌ ĩtxi yuuteꞌ, txãa yakh uꞌjusaweꞌsxaꞌ yajkxtxi txãꞌwẽ weꞌweniꞌs. Saꞌ Dxus libruꞌ isaneꞌ weꞌweꞌ, açaꞌ Jesuswa isasaꞌs íiçxáaneꞌ weꞌweꞌ sũhna ewtxi jiyu.
Jesus nasaa ũus yaakxnitx jiyuni
23 Judiuweꞌsx fxiesta ente Jesus Jerusalente ũsteꞌ, nasa wala kuh jiyutx Jesusaꞌ Dxus tasxu yuusatewa, txãꞌwẽ kim yuhwa ãjãnimeesaꞌs kaavxyaꞌjaꞌphaꞌga.
24 Nawa Jesusaꞌ txãaweꞌsx maꞌwẽsatewa jxuka jiiyãꞌkh yuꞌ, txãasak txãꞌwẽ jiyutx sũjuꞌçmée.
25 Txãa nasaꞌ txãꞌwẽsataꞌ jĩna ptaꞌsxi peejx yuꞌçmeꞌ, txãa paꞌgatey nasaa ũus yaakxnitx jxuka jiiyãꞌkh yuꞌ naa paꞌga.
