Juan 20:1-31
20 Kiꞌsen khikhiiçte wala kusíi çxhiꞌdxtey Maria Magdalenaꞌ pedaní kafxte kũhçxaꞌ, kxtee aphni kwetaꞌs kiisniyãꞌj ũstek uy.
2 Txajũꞌ wuwuuçxáak uꞌj Simon Pedro vxiteꞌ Jesus wedxnisa tasxte paꞌj. Saꞌ naꞌjĩnak ptaꞌsx:
—Kweꞌsxtxi jxpeꞌjsa kakweꞌs jxũna uꞌjneꞌta pedaniijũ, açaꞌ jiyumeethaꞌw mkaaneꞌta khikh nanwa jĩteꞌ,
3 Pedroweꞌsxaꞌ teehwed pedani kafxte thegyaꞌ uꞌjtx.
4 Eꞌzíi wuwuuçxáatx uꞌj, nawa teeçxsaꞌ thaakwe dud wuwuuçxa Pedroꞌs phyahççxaꞌ txãa khuẽꞌy yaçte kũjk pedani kafxte.
5 Saꞌ kuyçxaꞌ Jesus kakweꞌs yapnisaçxáa uꞌptek uy. Nawa txãꞌwẽ uyçxawa, dxiite yuꞌ uꞌkameꞌ.
6 Txajũꞌ Pedrowa eꞌste kũhçxa pedani kafxte uꞌkak, saꞌ txãawa uyku Jesus kakweꞌs yapnisaçxáa kiꞌpni uꞌpte.
7 Saꞌ Jesus dxikthé yapnisa yuꞌ tpehgçxa fxiite kiꞌpni uꞌptek uy.
8 Açaꞌ yaçte kũusawa kafx dxiite uꞌkaçxaꞌ, txãꞌwẽ tpehgçxa kiꞌpni uꞌpte uyçxaꞌ, Jesusaꞌ ĩtxi yuu yuhgakx sũhwaꞌjaꞌs jiꞌphuk.
9 Nawa Jesusaꞌ uuçxa kiꞌ ĩtxi yuuna jĩna Dxus librute fxiꞌjniꞌs jiyumeytxi yuꞌ.
10 Txajũꞌ Pedro Juanweꞌsxaꞌ txãꞌwẽ uyçxaꞌ, yatna kiꞌ sxawedna uꞌjtx.
Maria Magdalenaꞌs Jesus vxyaani
(Mr 16.9-11)
11 Pedroweꞌsx uꞌjweçpkaçxhaꞌ, Maria Magdalenaꞌ pedaní kafx pukate ũꞌnena neeyũuk. Txãꞌwẽ ũꞌnena uꞌpíi, kafx dxiiga kuyçxaꞌ uyku
12 eꞌz angelesweꞌsx çxihmeçxáa iikãh jxaathsatx Jesus kakweꞌs khikhnite pdxiꞌp kaçxçxa uꞌpuꞌ, teeçxsaꞌ dxikthé jaꞌdate vxiteꞌ çxida jaꞌdate.
13 Txajũꞌ angelesweꞌsxaꞌ naꞌwẽtx pẽjx:
—Iꞌkweꞌ ¿kĩh yũuçxa ũꞌnena ũskwe? jĩteꞌ, naꞌjĩnak pas:
—Ũꞌkweꞌs jxpeꞌjsaꞌs jxũna uꞌtha, açaꞌ jiimeeth mkaaneꞌta khikh nanwa.
14 Txãꞌwẽ weꞌwepuꞌnaꞌ yuꞌthegçxaꞌ, teeçx piçthẽꞌj yujuçxa ũstek uy. Nawa txãꞌ Jesusna sũhmeꞌ.
15 Açaꞌ Jesusaꞌ naꞌjĩk:
—Iꞌkweꞌ ¿kĩh yuutekwe ũꞌnéꞌ? saꞌ ¿kimnakwe pakwéꞌ? jĩteꞌ, Mariaꞌ kxtee walta thegsa wáꞌ txãꞌwẽ weꞌweꞌ sũhçxaꞌ, naꞌwẽk pas:
—Idx wáꞌga ũꞌkweꞌs jxpeꞌjsa kakweꞌs jxũna uꞌj naꞌ mpeetaꞌsx mkaa khikhçxawa, ũꞌkwe jxũna uꞌkhan.
16 Txãꞌjĩteꞌ Jesusaꞌ:
—¡Maria! jĩnak kxsus.
Açaꞌ Maria tuphiçxa naꞌwẽk weꞌwe hebreo yuweju:
—¡Raboni! jĩk, txãꞌ Kaapiyaꞌjsa jĩniꞌ.
17 Txajũꞌ Jesusaꞌ naꞌjĩk:
—Adxaꞌs jxaꞌdxnuwe, Tata tasxna uꞌjmeythu naa paꞌga. Wejxwa adx yakhthẽꞌjweꞌsxtxi ptaꞌsxyaꞌ meꞌjwe naꞌjĩna: Adx Tataꞌ iꞌkweꞌsx Tataíiçxáꞌ, saꞌ adx Dxusaꞌ iꞌkweꞌsx Dxusíiçxáꞌ txajx tasxna uꞌjweçthu jĩnak ptaꞌsxkaah jĩneꞌkwe.
18 Txãꞌwẽ ptaꞌsxkaatheꞌ, Maria Magdalenaꞌ ptaꞌsxyaꞌ uꞌkh: Jxpeꞌjsaꞌs uythu, açaꞌ txãak txãꞌjĩna ptaꞌsxkaah jĩk.
Jesus txãa yakh uꞌjusaweꞌsxtxi vxyaani
(Mt 28.16-20; Mr 16.14-18; Lk 24.36-49)
19 Txãa kiꞌsen entey kusaꞌ Jesus yakh uꞌjusaweꞌsxaꞌ yatte uꞌkaçxa vxitxtxi jxuka aphçxatx ũsuꞌ, judiuweꞌsxtxi ũukhçxa. Txãꞌwẽ ũspkaçxhaꞌ, Jesusaꞌ txãaweꞌsx pxãhte vxyaaçxa naꞌjĩnak weçxa:
—Ũukhmée wẽt wẽtçxáa yajkxna meswe.
20 Txãꞌjĩçxaꞌ, txajx kuse kpãꞌtx ptaꞌsxku, tabxte weꞌthu yãjaniꞌswa txãꞌwẽy. Açaꞌ txãaweꞌsxaꞌ Jesusaꞌs uyçxaꞌ wala weçxweçxa yajkxtxi.
21 Txajũꞌ Jesusaꞌ kiꞌ weꞌweçxa naꞌjĩk:
—Ũukhmée wẽtwẽtçxáa yajkxna meswe. Adx Tatawa maꞌwẽga adxaꞌs kaah txãꞌwẽy adxwa iꞌkweꞌsxtxi kajaçthu.
22 Txãꞌjĩçxaꞌ, txãaweꞌsx kajkwesu puthku naꞌjĩna:
—Miipaꞌgawe Dxus Espirituꞌs.
23 Iꞌkweꞌsxaꞌ maatxwa weꞌweçxaꞌ: Iꞌkweꞌsx pkaltxiꞌ Dxusaꞌ peltunaĩna jĩteꞌ, peltunãyni yuutxna. Nawa peltunaĩmeena jĩteꞌ, peltunãynimée neeyũutxna jĩk.
Jesus ĩtxi yuuniꞌs Tomas uyni
24 Jesus yakh uꞌjusaçxawa, Tomas melxisu jĩnisaꞌ meek yuꞌ Jesus txãꞌwẽ vxyaani ente yuꞌ.
25 Açaꞌ Tomas yuꞌ uymeetewa, Jesus yakh uꞌjusa vxite yuꞌ ptaꞌsxtxi:
—Kweꞌsxtxi jxpeꞌjsaꞌs uythaꞌw jĩna.
Txãꞌwẽ ptaꞌsxtewa, Tomasaꞌ naꞌjĩk:
—Kusete klaus kpãꞌvxitniꞌs uyçxa txajx tabxte weꞌthu yãjaniꞌswa uyçxa txkaa adx kuseꞌs kaahmeeçxa yuꞌ, txãꞌwẽ ĩtxi yuuneꞌ sũhmeꞌnja jĩk.
26 Txajũꞌ teeçx kiꞌsu skhẽwniiteꞌ, Jesus yakh uꞌjusaweꞌsxaꞌ kiꞌ pkhaakheçxa ũsuꞌtx teeçx yatte. Açaꞌ txãa enteꞌ Tomaswa txãaweꞌsx yakh pkhaakhena ũsuꞌk. Açaꞌ makwe vxitxtxi aphçxa ũstewa, Jesusaꞌ txãaweꞌsx pxãhte vxyaaçxáak yuu, saꞌ naꞌjĩk:
—Ũukhmée wẽtwẽtçxáa yajkxna meswe jĩk.
27 Txãꞌwẽ weꞌweçxaꞌ, Tomasaꞌswa naꞌjĩk:
—Adx kusete kpãꞌyuunitx thegçxa, txkaa iidx kuseꞌs mkuupath, saꞌ adx tabxte weꞌthu yãjanigawa mkuupath. Txãꞌwẽ yũuçxaꞌ, kuh jwed yajkxmée, ĩtxi yuu yuhga sũhwaꞌjçxáꞌs jiꞌphuneꞌga jĩteꞌ,
28 Tomasaꞌ naꞌjĩk:
—¡Adxna jxpeꞌjsa yuhg, saꞌ adx Dxus yuhg!
29 Txajũꞌ Jesusaꞌ naꞌjĩk:
—Tomas, ãçxhaꞌ adxaꞌs uyçxaꞌ, ĩtxi yuu yuhga sũhwaꞌjaꞌs jiꞌphug. Nawa adxaꞌs uymeeçxawa txãꞌwẽ ĩtxi yuu yuhneꞌ sũhna yaakxsawa weçxweçxa fxiꞌzewaꞌjsataꞌ jĩnak weꞌwe.
Jesukristoꞌ Dxus Nçxiꞌk yuh yuꞌk jĩna ptaꞌsxsaꞌ naa libruꞌ
30 Naa kiwete kim yuhwa ãjanimeesatx Jesusaꞌ wala kuh kaavxyaꞌjaꞌkh txãa yakh uꞌjusaweꞌsxtxi. Nawa jxuka yuꞌ naa librute fxiꞌjnimeetaꞌ.
31 Nawa Jesukristoꞌ Dxus kaahni txajx Nçxiꞌk yuh yuꞌga sũhna jiyuçxaꞌ txãꞌsna jxpaꞌgaçxaꞌ, pçumée ĩtxi fxiꞌzewaꞌjaꞌs jiꞌphukahn ptaꞌsxna fxiꞌjnisaçxáataꞌ.
