Juan 21:1-25
21 Jesusaꞌ Tiberias ĩkh wala pukate kiꞌkin naꞌwẽk vxyaa txãa yakh uꞌjusaweꞌsxtxi.
2 Kxtee pkhaakheçxatx ũs yuꞌ Simon Pedro, vxiteꞌ Tomas melxisu jĩꞌtx txãa, vxiteꞌ Natanael Galilea kiwesu Kaná çxhabteweꞌsx, vxiteꞌ Zebedeo nçxiꞌkweꞌsx, vxiteꞌ eꞌzsa.
3 Kxtee pkhaakheçxa ũsçxaꞌ, Simon Pedroꞌ naꞌjĩnak weꞌwe:
—Wedx uweyaꞌ uꞌjweçthu jĩteꞌ:
—Kweꞌsxwa idx yakh yuhthaꞌw jĩnatx pas txãaweꞌsxwa.
Saꞌ teeçx barkote khẽeçxa uꞌjtx. Nawa txãa kusteꞌ teeçx wedx yuhwa uwemeetaꞌ.
4 Khikhyna sẽjeçteꞌ, Jesusaꞌ ĩkh pukate vxyaak. Nawa txãaweꞌsxaꞌ jiyumeetaꞌ kimtewa.
5 Txajũꞌ Jesusaꞌ naꞌjĩnak pẽjx:
—¿Teeçx wedxçxáꞌ uwekweꞌ? jĩteꞌ:
—Uwemeethaꞌw jĩna pasteꞌ,
6 Jesusaꞌ naꞌjĩnak jxkaah:
—Wedx ukheꞌs paçu juꞌgkhẽ makhwe, saꞌ uweeneꞌkwe jĩteꞌ, txãꞌwẽy ukheꞌs akhçxaꞌ, yuꞌju wezxçxawa kutxiꞌjyaꞌ çxhãçxhameetaꞌ, wedx iiméh kuh khẽepaꞌga.
7 Txãꞌwẽ yũuniꞌs uyçxaꞌ, Jesus yakh uꞌjusa wedxnisaꞌ Pedroꞌs naꞌjĩnak ptaꞌsx:
—¡Naate ũsaꞌ txãꞌ kweꞌsxtxi jxpeꞌjsaꞌ!
Txãꞌjĩna weꞌweçpkaçxhaꞌ, Pedroꞌ txãꞌwẽ wẽseꞌjnaꞌ ropaꞌs jathnaꞌwa yuꞌkhẽ khẽek Jesus tasxna uꞌjyaꞌ. (Ropaꞌs pahdeçxak ũs yuꞌ, txãasak txãꞌwẽ yũu.)
8 Barkote neeyũusáa vxite yuꞌ wedx ukheꞌs wezxna kũhtx, cien metroçxáak ũhdxte kũuwaꞌj peejx yuꞌ naa paꞌga.
9 Txajũꞌ barkoju jxsaꞌjçxaꞌ, ipx yuthni çxhãꞌçxha kajkwega teeçx wedx petx pan khikhni ũstetx uy.
10 Txajũꞌ Jesus weꞌweçxaꞌ:
—Ãçxh uwenisa wedxtxi mneejxũhwe jĩteꞌ,
11 Simon Pedroꞌ barkote khẽenaꞌwa wedx ukheꞌs wedx walasaçxaçxáa jiꞌphsaꞌs wezxna kũjk ũhdxte paꞌj. Ciento cinkwenta y tres wedxku jiꞌphuꞌ. Kxaazkuẽe wedx jiꞌphçxawa, ukheꞌ sutemeꞌ.
12 Txajũꞌ Jesus paꞌyaçxaꞌ:
—Ũꞌyaꞌ myuhwe jĩk.
Txãꞌwẽ paꞌyateꞌ, txãa yakh uꞌjusaweꞌsxaꞌ jxpeꞌjsatewa jiyuçxaꞌ, maa yuhwa: Idxaꞌ ¿kimga? jĩna pẽyiꞌçmeetaꞌ.
13 Açaꞌ Jesusaꞌ utxaana kũhçxaꞌ, panaꞌs uwenaꞌwa txãaweꞌsxtxi ũsuꞌsku, wedxnawa txãꞌwẽy.
14 Jesus uuçxa kiꞌ ĩtxi yuunijũ naa yakhaꞌ tekh us vxyaak txãa yakh uꞌjusaweꞌsxtxi.
Jesus Pedroꞌs neeweꞌweni
15 Txajũꞌ ũꞌna jxãꞌjçxaꞌ, Jesusaꞌ Simon Pedroꞌs pẽjxku:
—Jonas nçxiꞌk Simon, ¿ayte ũstaꞌ txãaweꞌsxte jxthaakwegaꞌ adxaꞌs wedxiꞌáꞌ? jĩteꞌ, Pedro pasçxaꞌ:
—Idxaꞌ peekx jiig adx idxaꞌs wedxiçtewa jĩteꞌ, Jesusaꞌ naꞌwẽk neeweꞌwe:
—Txãꞌwẽçxaꞌ, adx piisxakuẽtx wedxna miipeꞌj jĩk.
16 Txajũꞌ Jesusaꞌ Pedroꞌs kiꞌ pẽjxku:
—Jonas nçxiꞌk Simon ¿adxaꞌs wedxiꞌgáꞌ? jĩteꞌ, Pedro pasçxaꞌ:
—Idxaꞌ jiig adx idxaꞌs wedxiçtewa. Txãꞌjĩteꞌ, Jesusaꞌ naꞌwẽk neeweꞌwe:
—Txãꞌwẽçxaꞌ, adx piisxaatx sãꞌjĩna miipeꞌj jĩk.
17 Tekh uswa kiꞌ pẽjxku Jesusaꞌ:
—Jonas nçxiꞌk Simon, ¿adxaꞌs wedxiꞌgáꞌ? Açaꞌ Pedroꞌ wala nxusku txãꞌwẽ tekh us ¿adxaꞌs wedxiꞌgáꞌ? jĩna pẽjxteꞌ. Saꞌ naꞌjĩk:
—Idxaꞌ jxuka jiig adx idxaꞌs wedxiçtewa jĩteꞌ, Jesusaꞌ naꞌjĩnak neeweꞌwe:
—Txãꞌwẽçxaꞌ adx piisxaatx jxpaꞌyakx miipeꞌj.
18 Isath weꞌweꞌ, nyafxíi piçtakxteyaꞌ ropaꞌs peekíi jatheꞌg, saꞌ mtee uꞌj wẽeçxawa uꞌjweꞌg. Nawa ĩisx yãꞌtheꞌ, vxitesaꞌ idxaꞌs tudçxa jxũna uꞌjwetxna idx uꞌj wẽemeetewa.
19 Jesusaꞌ txãꞌwẽ weꞌweçxaꞌ, Pedro maꞌwẽ yũuni uuçxa Dxusaꞌs ãate kaavxyaꞌjaꞌjwaꞌjaꞌs ptaꞌsxnak txãꞌjĩ.
Txajũꞌ Jesus weꞌweçxaꞌ:
—Adx yakh myuhçxáa jĩnak piꞌkx.
Jesus yakh uꞌjusa wedxnisa
20 Pedroꞌ yuꞌthegçxaꞌ uyku Jesus wedxnisaꞌs. Txãa wedxnisaíi nmeh kus ũꞌweçteꞌ, Jesus pukate kaçxçxa uꞌpçxaꞌ naꞌjĩnak pẽysa yuꞌ: Jxpeꞌjsa ¿kim idxaꞌs dukhwaꞌjsana? jĩna.
21 Txãꞌsna Pedro uyçxaꞌ, naꞌjĩnak Jesusaꞌs pẽjx:
—Jxpeꞌjsa, naa piçthẽꞌjaꞌs ¿kĩh yuukx? jĩteꞌ,
22 Jesusaꞌ naꞌwẽk pas:
—Adx jxthãasteꞌ naa piçthẽꞌjaꞌ uumée uꞌjumaꞌk adx sxawedna kĩhpkaçx, nawa txãꞌsaꞌ idxaꞌ yaakxwaꞌj jiꞌphmeeg. Idxaꞌ adx yakh fxiꞌzewaꞌjçxáꞌs miiyajkx.
23 Jesus txãꞌwẽ weꞌwepaꞌga, txãa piçthẽꞌjaꞌ uuwaꞌjsamée wáana sũhnatx ũsuꞌ Jesus yakh uꞌjusaweꞌsx vxite yuꞌ. Nawa uumeena jĩçxa Jesusaꞌ txãꞌwẽ weꞌwemeꞌ, naasáa adx jxthãasteꞌ, uumée uꞌjumaꞌk adx sxawedna kĩhpkaçx, nawa idxaꞌ txãꞌsaꞌ yaakxwaꞌj jiꞌphmeeg jĩnaçxáak weꞌwe.
24 Jesus weꞌweçxaꞌ txãꞌwẽ uumeena jĩna weꞌwenisa piçthẽꞌjíiçxáak ptaꞌsxna fxiꞌj, açaꞌ isasa yujaꞌs weꞌweꞌk sũjuꞌthaꞌw.
25 Txãꞌwẽ Jesus kĩjkĩhwa kaavxyaꞌjaꞌjnitx jxuka ptaꞌsxna fxiꞌjwaçaꞌ, naa kiwete libru yuuwa khẽemeetxna sũjuꞌth.
