Juan 3:1-36
3 Teeçx fxariseo Nikodemo yaasesa uꞌpuꞌk. Txãꞌ judiu npiiçthẽꞌjsateweꞌsxku yuꞌ.
2 Txãa piçthẽꞌjaꞌ Jesus tasxte kus paꞌjçxaꞌ, naꞌjĩk: Jiithaꞌw idxaꞌs Dxusneꞌ txãꞌwẽ kaah, kweꞌsxtxi kaapiyaꞌkhan. Dxus puꞌçxmeewaçaꞌ, kim yuhwa ãjawaꞌjsameꞌs kaavxyaꞌjaꞌjmeena, idx naꞌwẽg yuꞌ txãꞌs jĩteꞌ,
3 Jesusaꞌ naꞌwẽk pas:
—Isath weꞌweꞌ, maawa kiꞌ upxmeeçxa yuꞌ, Dxus jxkaahna ũsnite uꞌkayaꞌ ãjameena.
4 Txãꞌjĩteꞌ, Nikodemoꞌ naꞌwẽk pẽjx:
—Nasa ĩisxyãꞌjsaꞌ maꞌwẽ kiꞌ upxyaꞌ ãjakx? Njĩꞌj tutxhte kiꞌ uꞌkaçxa upxyaꞌ ãjamaꞌk? jĩteꞌ,
5 Jesusaꞌ ptaꞌsxku:
—Adxaꞌ naa kakwe upxwaꞌjaꞌs weꞌweꞌçmeeth. Maawa Dxus jxkaanite uꞌka wẽeçxaꞌ, yuꞌte vxiteꞌ Dxus Espiritute upxwaꞌjaꞌsthu txãꞌjĩꞌ.
6 Nasaa kakweꞌ nasaa kakweteyçxáak upxhiꞌ, naapkaçxhaꞌ Dxus luuçxaꞌ Dxus Espiritutek upxhiꞌ.
7 Maawa kiꞌ upxwaꞌjaꞌ jĩꞌth açaꞌ fxiy yuh txãꞌwẽ weꞌweꞌk sũhna yaakxnu.
8 Wejxaꞌswa maꞌwẽga susniꞌs wẽseꞌjçxawa, majũ yuhte kiꞌ maa dxiꞌj uꞌjweçtewa yaꞌjiyuꞌçmée, txãꞌwẽyku Dxus Espiritute upxniꞌs yaꞌjiyuꞌçmée jĩteꞌ,
9 Nikodemoꞌ jiyuyaꞌ ãjameeçxaꞌ kiꞌ pẽjxku:
—¿Maꞌwẽ txãꞌwẽ yujaꞌ kiꞌ yaꞌupxhikx? jĩteꞌ,
10 Jesus pasçxaꞌ:
—Idxaꞌ Israelweꞌsxtxi kaapiyaꞌjsaçxawa, naꞌwẽsa yuutxiꞌ ¿jiimeewáꞌga?
11 Isath weꞌweꞌ: Dxus Espiritute upxnisaꞌ wejxa naꞌwẽsaçxáꞌ txãꞌ maꞌwẽsatewa iiuythu saꞌ jiiçxath txãꞌjĩꞌ. Nawa iꞌkweꞌsxaꞌ jiyuꞌçmeeiꞌkwe.
12 Naa kiweteweꞌsxtxi weꞌwena ptaꞌsxte jiyumeeçxaꞌ, ¿maꞌwẽ jiyukiꞌkwe cieluteweꞌsxna ptaꞌsxteꞌ?
13 Maa yuhwa cielute uꞌkasa yuꞌ meetaꞌ, naasáa cielujũ kĩisa yuuçxáa cielute uꞌkasaꞌ, Dxus Nçxiꞌk Nasa Yuusáa txãꞌ cieluteweꞌsxaꞌ naa paꞌga.
14 Dxus Nçxiꞌk Nasa Yuusaꞌs ẽekhẽ aꞌkxçxa kiꞌpni yuuna, Moiseswa maꞌwẽga nasa uꞌpnimée kiwete ũsçxaꞌ ul weesweꞌs fxtũukhẽ aꞌkxçxa kiꞌp txãꞌwẽy,
15 kxah maawa jxukay txãꞌsna uyçxa ũuste jxpaꞌgasaꞌ, bagaçxte yuhwa pçuwaꞌjmée ĩtxi fxiꞌzewaꞌjaꞌs jiꞌphutxna vxitumée.
Dxusaꞌ nasatx iiméh wala peeygãani
16 Dxusaꞌ naa kiwete nasatx iiméh wala peeygãhçxa yuuçxáak txajx Nçxiꞌk teeçxçxáasanawa naa kiwete kaah, kxah maawa txãꞌsna ũuste jxpaꞌgaçxaꞌ bagaçxte yuhwa pçumée ĩtxi fxiꞌzewaꞌjaꞌs jiꞌphukahn vxitumée.
17 Dxusaꞌ naa kiwete txajx Nçxiꞌkaꞌs kaahçxawa, nasatx ewmeete nvxihtxaꞌ kaahmeꞌ, wejxwa nweꞌweyaꞌk kaah.
18 Maawa Dxus Nçxiꞌkaꞌs ũuste jxpaꞌgasaꞌ, ewteyãꞌj neeyũutxna. Nawa txãꞌwẽ Dxus Nçxiꞌk teeçxçxáasana ũuste jxpaꞌgasameꞌ, ewmeeteyãꞌj neeyũuwaꞌjsataꞌ.
19 Maawa ũuste jxpaꞌgasameꞌ, ewmeeteyãꞌjtx nvxiitni yuꞌ, txãꞌwẽ eenaꞌsa naa kiwete kĩhtewa, ewmeeçxáa yũuna ũsçxaꞌ, çxhiꞌdxteçxáa wejx fxiꞌze wẽepaꞌga.
20 Saꞌ maawa jxukay ewmeeçxáa yũuna ũssaꞌ, eenaꞌsaꞌs ahçeçxa utxaꞌçmeetaꞌ eenaꞌte, txãaweꞌsx ewmée yũuni ãate vxyaakahmen.
21 Nawa ew yũuna fxiꞌzesa yuꞌ eenaꞌsaꞌs utxaꞌtx, txãaweꞌsx ew yũuniꞌ Dxus jxkaahnisatewa ãate vxyaakahn.
Jesusaꞌs tuutheꞌjniꞌs wẽseꞌjçxaꞌ Juan weçxaníi
22 Txãa eꞌsuꞌ Jesusaꞌ Judea kiwen uꞌkh txãa yakh uꞌjusaweꞌsx yãꞌjçxa. Saꞌ kxteꞌ maz en ũsuꞌk nasatx yuꞌte bautisãyna.
23 Juanwa bautisãynak ũsuꞌ teeçx ahte Enon yaasesate Salim utxate, txãa jaꞌdasu yuꞌ ũsuꞌk naa paꞌga. Açaꞌ Juanaꞌ nasa wala kuh yuꞌte bautisãyku.
24 Karcelte kxupmeynaçxáak txãꞌwẽ bautisãy.
25 Txajũꞌ judiuweꞌsxaꞌ Juan yakh uꞌjusaweꞌsxtxi paapẽjxtxi txãꞌwẽ bautisãyniꞌs.
26 Açaꞌ txãaweꞌsxaꞌ Juanaꞌs ptaꞌsxtxi naꞌjĩna:
—Kaapiyaꞌjsa, mwẽeseꞌj. Sek kãani juꞌgu Jordan yuꞌwala kutete ũste ptaꞌsxgu txãa piçthẽꞌjwa ãçxhaꞌ bautisãyna ũsaꞌ, açaꞌ nasa jxukay txãa yakhçxaçxáa uꞌjweçtaꞌ jĩteꞌ,
27 Juanaꞌ naꞌwẽk pas:
—Kim yuhwa txãꞌwẽ tuutheꞌjni yuumeena, Dxus jxkaahnimeesa yuꞌ.
28 Iꞌkweꞌsxaꞌ yaçtey adx ptaꞌsxniꞌs jiiyãꞌjiꞌkwe: Adxaꞌ Kristomeeth, naasáa txajx yaçte kaahnisaçxáath jĩniꞌs.
29 Naa ejemploꞌs mjiyuwe: Ptamu enteꞌ novxioꞌ novxia yakhku uꞌpuꞌ. Açaꞌ novxio namikuꞌ pukate uꞌpçxaꞌ wala weçxweçxa yaakiꞌk novxio weꞌweniꞌs wẽseꞌjçxa. Adxwa txãꞌwẽythu wala weçxweçxa yaakiꞌ, Jesusaꞌs tuutheꞌjniꞌs wẽseꞌjçxa.
30 Txãꞌ jweeíiçxáa tuhthesa yuuna uꞌjwena, naapkaçxhaꞌ adxaꞌ jweeíiçxáa ãhmeekwesa yuuwaꞌth.
Jesusaꞌ cielujũ kĩisaꞌ
31 Cielujũ kĩisaꞌ maatewa jxthaakwe tuhthesaꞌ. Kiwete ũssaꞌ naa kiweteweꞌsxtaꞌ, saꞌ naa kiweteweꞌsxçxáꞌstxi ptaꞌsxiꞌ. Nawa cielujũ kĩisaꞌ maatewa jxthaakwe tuhthesaꞌ.
32 Txãꞌwẽçxaíik txajx wẽseꞌjçxa uyniꞌs ptaꞌsxiꞌ, nawa kim yuhwa nwẽeseꞌjeꞌçmeetaꞌ txajx weꞌweniꞌs.
33 Nawa txajx ptaꞌsxniꞌs maaçxáawa nwẽeseꞌjwaçaꞌ, Dxusaꞌ isak ptaꞌsxiꞌ sũhna jiyuna paꞌjatxna.
34 Txãꞌwẽ Dxus jxkaahnisaꞌ Dxus kweꞌweꞌjniꞌsku weꞌweꞌ, txãꞌsaꞌ Dxusaꞌ txajx Espirituꞌs makwewa ũsuꞌk txãa paꞌga.
35 Neyaꞌ Nçxiꞌkaꞌs wedxçxa kĩhnawa jxuka txajx kusete nvxihtku.
36 Açaꞌ maawa Dxus Nçxiꞌkaꞌs ũuste jxpaꞌgasaꞌ pçumée ĩtxi fxiꞌzewaꞌjaꞌs jiꞌphutxna. Nawa Dxus Nçxiꞌkaꞌs nwẽeseꞌjsameꞌ pçumée ĩtxi fxiꞌzewaꞌjaꞌs jiꞌphumeetxna, naasáa Dxus kastigo seenaꞌsaçxáꞌs jxpaꞌgawaꞌjsataꞌ.
