Juan 4:1-54
4 Txãꞌwẽ Jesus tasxte nasa wejx wala utxaateꞌ, Jesusaꞌ Juante jxthaakwe bautisãyniꞌs fxariseoweꞌsxaꞌ jiyutx.
2 Isa yuꞌ Jesusaꞌ bautisaĩꞌçmeꞌ, naasáa txãa yakh uꞌjusaweꞌsxçxáatx bautisaĩꞌ.
3 Nawa txãꞌwẽ fxariseoweꞌsx jiyuniꞌs Jesus wẽseꞌjçxaꞌ, Judeajũ kasehna uꞌkh, Galilea kiwen.
4 Nawa Galilea kiwen uꞌjweççxaꞌ, Samaria kiwegak khẽwna uꞌjwaꞌj jiꞌphuꞌ.
5 Saꞌ Samaria kiwesuꞌ teeçx çxhab Sikar yaasesa ũsaꞌ txãa çxhab peekuꞌthek paꞌj txãa yakh uꞌjusaweꞌsx yãꞌjçxa. Txãa Sikar çxhabaꞌ Jakob kiwe ũsku txajx nçxiꞌk Joseꞌs txãa utxatek neeyũꞌ.
6 Txãa kiweteꞌ Jakobaꞌ txãniitey yuꞌ kutxiꞌjni kafx nvxihtna ũsuꞌneꞌ, açaꞌ Jesusaꞌ ẽepxãh wahtxna uꞌjweççxaꞌ, kxteek jxkaaseyaꞌ kaçx.
7 Naapkaçxhaꞌ teeçx uꞌy Samariasuweꞌsxaꞌ yuꞌ paꞌkxyaꞌ paꞌtheꞌ, Jesusaꞌ naꞌjĩk:
—Yuꞌ mpeeswe tudxwaꞌj.
8 Txãapkaçxhaꞌ txãa yakh uꞌjusaweꞌsxaꞌ çxhabna ũꞌ weyyaꞌ uꞌjnitx yuꞌ.
9 Açaꞌ txãa uꞌyaꞌ naꞌjĩnak pas:
—Idxaꞌ judiu nasag, saꞌ ¿maꞌwẽtega ũꞌkweꞌs yuꞌ thãasuꞌ? ũꞌkweꞌ Samariasuweꞌsxthu açyujaꞌ jĩk. (Judiuweꞌsxaꞌ Samariasuweꞌsxtxi ahçeçxa weꞌweꞌççxáa yuhwa meetaꞌ.)
10 Txajũꞌ Jesusaꞌ ptaꞌsxku:
—Dxusaꞌ kĩh ũsyaꞌwatewa jiyuçxa txãꞌwẽy yuꞌ thãassaꞌ kimtewa jiyuwaçaꞌ, adxaꞌs yuꞌ thãasuneꞌkwe, açaꞌ adxaꞌ yuꞌ pçuwaꞌjmeesaꞌs peesuꞌnja jĩteꞌ,
11 txãa uꞌyaꞌ naꞌwẽk pas:
—Naa kafxaꞌ wala dxiiaꞌ, açaꞌ idxaꞌ yuꞌ paꞌkxwaꞌj jiꞌphmeeg. Saꞌ ¿maꞌwẽga ũꞌkweꞌs yuꞌ pçuwaꞌjmeesaꞌs peesuꞌnja jĩꞌ?
12 Kweꞌsx yaçgaweꞌsx Jakobku naa kafxaꞌs phaade yuꞌ paꞌkxwaꞌj, açaꞌ txajx nçxiꞌkweꞌsxwa kxteetx paꞌkiꞌ tajkxtxi yuswaꞌj vxiteꞌ txãaweꞌsx tudxwaꞌj yãꞌjçxa. Açaꞌ idxaꞌ ¿kweꞌsx yaçgaweꞌsx Jakobte jxthaakwe wáa walasaneꞌga? jĩteꞌ,
13 Jesus pasçxaꞌ:
—Jxukay maawa ayte yuꞌaꞌs tudxsaꞌ yũꞌwẽena nes yuutxna.
14 Nawa adx peesni yuꞌaꞌs tudxçxaꞌ, bagaçxte yuhwa yũꞌwẽemeetxna. Txãa paꞌgatey adx peesni yuꞌaꞌ txãaweꞌsx ũuste yuꞌĩçh naꞌwẽ nes yuuna, pçuwaꞌjmée ĩtxi fxiꞌzewaꞌjaꞌs jiꞌphukahn.
15 Txãꞌjĩteꞌ txãa uꞌyaꞌ naꞌjĩnak pas:
—Txãꞌwẽteꞌ, txãa yuꞌaꞌs mpees, kxah yũꞌwẽewameꞌnja, saꞌ peena yuꞌ naa kafxte paꞌkxyaꞌ paꞌjmeꞌnja.
16 Açaꞌ Jesus weꞌweçxaꞌ:
—Iꞌkwe nmiꞌaꞌs meꞌjwe paꞌyayaꞌ, saꞌ txãa yakh yuweeneꞌkwe ayteꞌ jĩteꞌ,
17 txãa uꞌyaꞌ:
—Nmiꞌ jiꞌphmeeth jĩnak pas.
Txajũꞌ Jesusaꞌ naꞌjĩk:
—Nmiꞌ jiꞌphmeeth jĩçxaꞌ isa yuh weꞌweꞌiꞌkwe.
18 Txãꞌwẽ nyafxíi yuꞌ tahç nmiꞌiꞌkwe jiꞌphuꞌ, nawa ãçxweꞌsxaꞌ nmiꞌ meꞌ, açaꞌ isa yuh weꞌweiꞌkwe.
19 Txãꞌwẽ wẽseꞌjçxaꞌ, txãa uꞌyaꞌ naꞌjĩnak pas:
—Idxaꞌ Dxus yuwe ptaꞌsxsaíi neꞌga sũjuꞌth.
20 Kweꞌsx yaçgathẽꞌjweꞌsxaꞌ naa vxiçtetx Dxusaꞌs neeweꞌweyaꞌ pkhaakheꞌ. Nawa judiuweꞌsx yuꞌ, Jerusalenteçxáa Dxusaꞌs neeweꞌweyaꞌ pkhaakhewaꞌjaꞌ jĩꞌiꞌkwe jĩteꞌ,
21 Jesus pasçxaꞌ:
—Ew mjiyuwe: naa vxiçte meeçxawa Jerusalenteçxáa Dxusaꞌs neeweꞌwewaꞌjmeꞌ. Dxusaꞌs mteewa neeweꞌwewaꞌj en ãjana.
22 Samariateweꞌsxaꞌ Dxusaꞌs maꞌwẽ neeweꞌwewaꞌjaꞌswa jiimeeiꞌkwe. Nawa judiuweꞌsxaꞌ jiiçxathaꞌw Dxusaꞌs neeweꞌweꞌ, nweꞌwesaꞌ judiu nweꞌsxaꞌ naa paꞌga.
23 Dxusaꞌs neeweꞌwewaꞌj en ãjana jĩꞌth txãa enaꞌ ãjxãꞌkh. Açaꞌ maawa ĩsxiimée ũusuh jxuka yajkxçxa Dxusaꞌs ũusteçxáa neeweꞌwesaꞌ ew yuutxna, kweꞌsx Tataꞌ txãꞌwẽ yũuniꞌsku jxthãasuꞌ naa paꞌga.
24 Dxusaꞌ kweꞌsx naꞌwẽy kakwe jiꞌphmeꞌ naꞌ mtee mteewa ũsaꞌ, açaꞌ txãꞌsna neeweꞌwesaꞌ ũusuh jxuka yajkxçxa neeweꞌwewaꞌjaꞌ jĩteꞌ,
25 txãa uꞌyaꞌ naꞌwẽk pas:
—Ũꞌkweꞌ jiith Kristo Dxus tasxu yuhna, açaꞌ txãa paꞌjçxa jxuka ew ptaꞌsxina jĩteꞌ,
26 Jesus pasçxaꞌ:
—Iꞌkwe yakh puutx weꞌwena uꞌpsa adxíi Dxus tasxu yuusath jĩk.
27 Naapkaçxhaꞌ txãa yakh uꞌjusaweꞌsxaꞌ sxawedna paꞌjtx. Saꞌ Jesusaꞌ txãꞌwẽ txãa uꞌy yakh puutx weꞌwena ũste uyçxaꞌ, kuh yajkxnatx neeyũu. Nawa ¿kĩjxaꞌga txãa uꞌy yakh puutx weꞌweꞌ? jĩna maa yuhwa paapẽyiꞌçmeetaꞌ.
28 Txajũꞌ txãa uꞌyaꞌ mitxhaꞌs kxtee txahnaꞌ uꞌkh çxhabsu nasatx ptaꞌsxyaꞌ:
29 —Naa kiwete maꞌwẽ fxiꞌzeniꞌswa teeçx piçthẽꞌj jiyuk txãꞌsaꞌ myuhwe thegyaꞌ. Txãꞌ Kristo íina jĩna ptaꞌsxteꞌ,
30 çxhabteweꞌsxaꞌ thegyaꞌ uꞌjtx Jesus ũsnite paꞌj.
31 Naapkaçxhaꞌ txãa yakh uꞌjusaweꞌsxaꞌ Jesusaꞌs naꞌjĩnatx weꞌwe:
—Idxaꞌ, ¿wẽemeegáꞌ? Pan mẽꞌ jĩna.
32 Nawa Jesusaꞌ naꞌwẽk pas:
—Iꞌkweꞌsxaꞌ jiimeeiꞌkwe adx kĩh ũꞌwaꞌj jiꞌphtewa.
33 Txãꞌjĩteꞌ, puutx paapẽyiꞌtx txãaweꞌsx pweꞌsx:
—Meeçxaꞌ ¿maa nasa puuçyaꞌ kũhwáꞌntakx? jĩna.
34 Açaꞌ Jesusaꞌ naꞌwẽk ptaꞌsx:
—Adx Tata jxthãasçxa mjĩiyaꞌ kaahniꞌs kxtey yuuniçxáa, adx ũꞌni naꞌwẽsaꞌ.
35 Ũꞌ thẽꞌjwaꞌj pahz aꞌtey peejxaꞌ jĩꞌiꞌkwe iꞌkweꞌsxaꞌ. Nawa txãꞌwẽmeꞌ. Mjĩinisu mthegwe wakx, jxuka thẽꞌjniyãꞌj ũsaꞌ, açaꞌ pkhakhwaꞌjçxáa yãꞌj peejxaꞌ.
36 Pkhakhna mjĩisaꞌ deweniꞌs jxpaꞌgawaꞌj jiꞌphaꞌ, açaꞌ txãa pkhakhnisaꞌ pçuwaꞌjmée ĩtxi fxiꞌzewaꞌjsataꞌ, kxah uuhsaꞌ pkhakhsa yakh jaꞌdaçxah weçxweçxa yajkxna neeyũutxna eꞌzíi.
37 Teeçxsaꞌ ujaꞌk, naapkaçxhaꞌ vxiteꞌ pkhakheꞌk jĩniꞌ isa yujaꞌ.
38 Iꞌkweꞌsxaꞌ uuhsameeiꞌkwe, nawa adxaꞌ pkhakhyaꞌ kaath vxite nasa uuhnisu jĩk.
39 Txãꞌwẽ txãa uꞌy ũꞌkwe maꞌwẽ fxiꞌzeniꞌswa jxuka jiyuk jĩna ptaꞌsxpaꞌga, txãa çxhabte nasa kuhsaꞌ Jesusaꞌs ũuste jxpaꞌgatx.
40 Saꞌ Jesus ũsnite thegyaꞌ paꞌjçxaꞌ, Jesusaꞌs wala neevxisxatx txãaweꞌsx yakh kxtee ptaꞌsxna neeyũukahn. Açaꞌ eꞌz enku kxtee fxiꞌze, Dxus yuweꞌs ptaꞌsxna.
41 Açaꞌ txãꞌs wẽseꞌjçxaꞌ, Jesusaꞌs ũuste jxpaꞌgasaꞌ jweeíiçxáatx pehna.
42 Saꞌ txãa uꞌyaꞌs naꞌwẽtx weꞌwe:
—Iꞌkwe ptaꞌsxniçxáꞌs jiyumée, kweꞌsx yuuthaꞌw txajx weꞌweniꞌs wẽseꞌjçxa jiyu Dxus tasxu yuusa Kristotewa, maatxwa jxuka nweꞌwesa.
43 Txajũꞌ eꞌz en skhẽwniijũꞌ, Jesusaꞌ Samariajũ kasehna uꞌkh Galilea kiweníi.
44 Jesusíi weꞌweçxawa: Dxus yuwe ptaꞌsxsaꞌ maa yuhwa peekx kiwetey yuꞌ wedxni fxiꞌzeꞌçmeetaꞌ jĩk txãasak Galilean uꞌj.
45 Açaꞌ Galileate paꞌtheꞌ, kxteeweꞌsx yuꞌ wala weçxana jxpaꞌgatx, Jerusalen fxiestan uꞌjsaꞌ uyneꞌta Jesusaꞌ maꞌwẽ yũutewa txãasatx txãꞌwẽ yũu.
Teeçx ãçãꞌsaꞌs Jesus nuykatxhini
46 Jesusaꞌ Galilea kiwete paꞌkh Kaná çxhabte, yuꞌaꞌs vxino vxitku nyafxíi kxtee. Açaꞌ kxtey teeçx piçthẽꞌj ũsuꞌk neꞌjweꞌsxaꞌs jxkaah puꞌçxsa. Txãꞌ teeçx nçxiꞌk wala ãçaꞌsa jiꞌphuꞌk Kapernaum çxhabte.
47 Saꞌ Galileatey Jesus sxawedna paꞌjniꞌs jiyuçxaꞌ, txãa piçthẽꞌjaꞌ puutx uyna kũhçxaꞌ, naꞌjĩnak pxthaa weꞌwe:
—Adx yatna mejka, adx nçxiꞌkaꞌs nuykatxhiyaꞌ. Txãꞌwẽmeꞌ, uuçyãꞌjaꞌ jĩteꞌ,
48 Jesus pasçxaꞌ:
—Iꞌkweꞌsxaꞌ adx ãjaniꞌs kaavxyaꞌjaꞌjmeete yuꞌ, adxaꞌs jiyumeeneꞌkwe kimtewa.
49 Txãꞌjĩteꞌ, txãa piçthẽꞌj yuꞌ naꞌjĩk:
—Dud myuh, adx nçxiꞌk uumeyna.
50 Txajũꞌ Jesusaꞌ naꞌjĩk:
—Yatna sxawedna meꞌj. Iidx nçxiꞌkaꞌ katxhiyãꞌjçxa ũsaꞌ.
Txãꞌjĩteꞌ, txãa piçthẽꞌjaꞌ Jesusaꞌ isa yuh weꞌweneꞌ sũhna yatna sxawedna uꞌkh.
51 Saꞌ yatte paꞌjaçteꞌ, txãꞌsna selpisaaweꞌsx puꞌthegyaꞌ kasehçxaꞌ naꞌwẽtx ptaꞌsx:
—Iidx nçxiꞌkaꞌ katxhiyãꞌkh jĩna ptaꞌsxteꞌ,
52 txãa piçthẽꞌjaꞌ pẽjxku:
—Adx nçxiꞌk ãçãꞌsaꞌ ¿maꞌwẽga wẽtkuẽꞌ yajkx? jĩteꞌ:
—Jũꞌna la unatek kakwesek ũçxha jĩnatx ptaꞌsx.
53 Açaꞌ neyaꞌ yajkxku txãa oratey Jesusaꞌ: Iidx nçxiꞌkaꞌ katxhiyãꞌjçxa ũsaꞌ jĩniꞌs. Txajũꞌ txãa piçthẽꞌjaꞌ Jesus kimtewa jiyuçxaꞌ txajx ũuste jxpaꞌgak, yatteweꞌsxwa txãꞌwẽy.
54 Txãꞌwẽ Judeajũ sxawedna Galileate paꞌjçxa ãçaꞌsaꞌs nuykatxhini yakhaꞌ eꞌz usyãꞌjaꞌ Jesus ãjaniꞌs kaavxyaꞌjaꞌjniꞌ.
