Juan 6:1-71
6 Txãa ensuꞌ Jesusaꞌ Galilea ĩkh kuten uꞌkh, txãa ĩkhaꞌs Tiberias jĩꞌtx.
2 Txãꞌwẽ naa kiwete kim yuhwa vxit-yaꞌ ãjanimeesaꞌs kaavxyaꞌjaꞌjna ãçaꞌsatxwa nuyçxhãçxhapaꞌga, nasa wala kuh pkhaakhena Jesus eꞌstey uꞌjtx.
3 Açaꞌ Jesusaꞌ thãꞌj vxiçna uꞌjçxa kxtee kaçxku txãa yakh uꞌjusaweꞌsx yãꞌjçxa.
4 Txajũꞌ Judiuweꞌsx fxiesta Paskua en ãjaçku yuꞌ txãa ensuꞌ.
5 Açaꞌ nasa wala pkhaakhena yuhte uyçxaꞌ, Jesusaꞌ Fxelipeꞌs naꞌjĩnak pẽjx:
—¿Mtee ũꞌ weyuukxthaꞌw nasa jxukaysatx puuçwaꞌj?
6 Nawa Jesusaꞌ Fxelipe maꞌjĩtewa jiyuyaꞌçxáak txãꞌwẽ pẽjx, maꞌwẽ yũuwaꞌjaꞌswa jxuka jiiyãꞌjçxawa.
7 Açaꞌ Fxelipeꞌ naꞌwẽk pas:
—Dos cientos peso pan weyçxa jxukaysatx peꞌltedeçxa peesuꞌswaçwa, ãhmeena jĩteꞌ,
8 Jesus yakh uꞌjusa Simon Pedro nyakh Adresaꞌ naꞌwẽk ptaꞌsx:
9 —Ayte teeçx kuẽ eꞌz wedx tahç cebada pan jiꞌphsa ũsaꞌ. Nawa kxazçxáasa yujaꞌ ¿ãhmaꞌk? jĩteꞌ,
10 Jesusaꞌ txãa yakh uꞌjusaweꞌsxtxiꞌ: Mkaaçxiꞌjwe jxukaysatx jĩnak jxkaah. Açaꞌ cinko mil piçthẽꞌjsa kxaazkuẽesay txaksu kaçxna skhẽwtxi.
11 Açaꞌ Jesusaꞌ pantxiꞌ jxpaꞌgaçxaꞌ, Dxusna weçxanaꞌwa txãa yakh uꞌjusaweꞌsxtxi ũsuꞌsku. Açaꞌ txãaweꞌsxaꞌ kxaazkuẽesaytxi puuçna skhẽwtxi subapkaçx. Wedxnawa txãꞌwẽytxi yũu, makwe ũꞌçxawa txikpkaçx.
12 Txajũꞌ jxukaysa txikna skhẽwteꞌ, Jesusaꞌ jxkaakh txãa yakh uꞌjusaweꞌsxtxiꞌ:
—Jxuka mepkhakhwe peꞌla kijxasaatxiꞌ kĩhwa vxitukahmen jĩteꞌ,
13 doce kanastate utatx pkhakh txãa tahç cebada pan kijxasaatxiꞌ.
14 Txãꞌwẽ Jesus yuuçxáa maa yuhwa ãjanimeesaꞌs vxitte uyçxaꞌ, nasaꞌ naꞌwẽtx weçxana weꞌwe:
—Naa yuuçxáꞌ isa Dxus yuwe ptaꞌsxsa yuh yuꞌga, naa kiwete paꞌjana jĩꞌtx txãaga yuꞌ jĩna weçxaçxaꞌ, ãadxijimée jxkaahwaꞌjsa kiꞌpxaꞌwatx yuꞌ. Açaꞌ Jesus jiyuçxaꞌ,
15 txãaçxáa txuteena uꞌkh thãꞌj vxiçte paꞌj.
Ĩkh kajkwega Jesus uꞌjuni
(Mt 14.22-27; Mr 6.45-52)
16 Çxhiꞌdxna kĩiniteꞌ, Jesus yakh uꞌjusaweꞌsxaꞌ ĩkh pukate kĩhçxa,
17 barkote khẽenaꞌwa ĩkhuy ktejkana uꞌjtx Kapernaumte paꞌjyaꞌ. Txãꞌwẽ jxuka çxhiꞌdxni yãꞌthewa Jesusaꞌ sxawedna kĩhmeyna,
18 barko ĩkhuy uꞌjweçpkaçxhaꞌ, wejxaa wala kiiteçxa ĩkhaꞌs seenaꞌ wala kẽeseꞌkh.
19 Txãꞌwẽ seenaꞌ yuuçtewa ĩkh pxãhsu jxuꞌj uꞌjweççxaꞌ, Jesusaꞌs ĩkh kajkwesu yuhte uytxi, saꞌ wala ũukhtxi.
20 Açaꞌ Jesusaꞌ naꞌwẽk weꞌwe:
—Ũukhnuwe, adxthu jĩteꞌ,
21 wala weçxana jxpaꞌgatx barkote. Saꞌ yaakxnimeete naa dudtey ĩkh kutete paꞌjtx.
Nasaꞌ Jesusaꞌs pakwení
22 6:22-24 Kuskuskhẽꞌ Jesusaꞌ kxtee meeyãꞌtheꞌ, txãa yakh uꞌjusaweꞌsxwa meeteꞌ, nasaꞌ barkote khẽenaꞌ uꞌjtx Kapernaum çxhabna Jesusaꞌs pakweyaꞌ. Txãꞌwẽ Jesus yakh uꞌjusaweꞌsx teeçx barkote khẽeçxa uꞌtheꞌ, Jesus yuꞌ txãaweꞌsx yakh uꞌjmeetewa jiyuçxaneꞌta pakweyaꞌ uꞌjna ũsuꞌ ĩkh kuteju nasa neeyũusaꞌ. Jesusaꞌ Dxusna weçxaçxa pan puuçku txãa jaꞌdate barko paꞌjneꞌta Tiberias çxhabuh yuusa, açaꞌ txãatetx khẽeçxa pakweyaꞌ uꞌj.
23 —
24 —
Ũꞌ cielujũ kĩisa
25 Saꞌ ĩkh kutete paꞌjçxa Jesusaꞌs uyçxa pẽjxtxi:
—Idxaꞌ ¿maꞌwẽnga ayte paꞌj? jĩteꞌ,
26 Jesusaꞌ naꞌwẽk pas:
—Isath weꞌweꞌ, iꞌkweꞌsxaꞌ panaꞌs txikpkaçx ũꞌçxaçxáa iꞌkwe txãꞌwẽ adxaꞌs pakwéꞌ. Nawa adx txãꞌwẽ maa yuhwa ãjanimeesaꞌs vxitthu txãꞌs yuꞌ jiyuçxa txãꞌwẽ yuꞌçmeeiꞌkwe.
27 Txik ũꞌçxa fxiꞌzewaꞌjçxáꞌs pakwewaꞌjmeꞌ, wejxwa ũꞌ bagaçxte yuhwa pçumée ĩtxi kaafxiꞌzeꞌjwaꞌjsaꞌs pakweewaꞌjaꞌ. Açaꞌ Dxus Nçxiꞌk Nasa Yuusaꞌ txãꞌwẽ pçumée ĩtxi fxiꞌzewaꞌjaꞌs ũsuꞌnja, txãꞌwẽ yũuwaꞌjaꞌs adx Tataꞌ ũsku naa paꞌga jĩk.
28 Txãꞌjĩteꞌ, naꞌwẽtx pẽjx:
—¿Maꞌwẽ yũukxthaꞌw Dxus jxkaahnitxiꞌ kxtey yuuna fxiꞌzeyaꞌ? jĩteꞌ,
29 Jesusaꞌ ptaꞌsxku:
—Dxus jxkaahnitxiꞌ kxtey yuu wẽeçxaꞌ, adxaꞌs mpaꞌgawe, adxaꞌ Dxus kaahnisath naa paꞌga jĩk.
30 Açaꞌ kiꞌkin pẽjxtxi:
—Idxaꞌ Dxus kaahnisaneꞌga sũhna kweꞌsx ew jiyukahn ãçxhaꞌ ¿kĩh kaavxyaꞌjaꞌjyaꞌwaga?
31 Kweꞌsx yaçgaweꞌsx manteyweꞌsxaꞌ nasa uꞌpnimée kiwesu uꞌjuçxaꞌ, ũꞌ maná yaasesaꞌs ũꞌtx. Açaꞌ txãꞌwẽ yũuniꞌs Dxus librute naꞌwẽk weꞌweꞌ: Dxusaꞌ cielujũ ũꞌaꞌs puuçku jĩꞌk.
32 Açaꞌ txãꞌjĩteꞌ, Jesusaꞌ naꞌwẽk pas:
—Isath weꞌweꞌ, cielujũ ũꞌaꞌs Moises puuçmeꞌ. Cielujũ ũꞌaꞌs adx Tatak puuç.
33 Açaꞌ Dxus puuçni ũꞌ cielujũ kĩisaꞌ naa kiweteweꞌsxtxi pçumée ĩtxi kaafxiꞌzeꞌjwaꞌjsaꞌ.
34 Txãꞌjĩteꞌ, naꞌwẽtx pẽjx:
—Kweꞌsxtxi jxpeꞌjsa, cielujũ kĩisa ũꞌaꞌs pejka puuçuneꞌga kweꞌsxtxiwa jĩteꞌ,
35 Jesusaꞌ ptaꞌsxku:
—Ũꞌ ĩtxi kaafxiꞌzeꞌjwaꞌjsaꞌ adxthu. Açaꞌ maazkuẽesawa adx tasxte paꞌjsaꞌ bagaçxte yuhwa wẽemeetxna. Saꞌ txãꞌwẽy adxna ũuste jxpaꞌgasaꞌ peena yuꞌ yũꞌwẽemeetxna.
36 Adxaꞌ kimçxawa iꞌkweꞌsxtxi ptaꞌsxyãꞌth, nawa iꞌkweꞌsxaꞌ makwe uyçxawa, adxaꞌs cielujũ kĩisana sũjuꞌçmée iꞌkwe.
37 Makwe iꞌkweꞌsx yuꞌ adxaꞌs jxpaꞌgameetewa, adx jxpeꞌkhan Adx Tata dukhnisaweꞌsx yuꞌ jxukaysa adx tasxteçxaçxáa paꞌjatxna. Açaꞌ maawa adx tasxte paꞌjsatxiꞌ ahçemée weçxana jxpaꞌgaꞌnja.
38 Txãꞌwẽ cielujũ kĩhçxawa peekx adx ũus yaakxniçxáꞌs kxtey yuuyaꞌ yuweꞌçmeeth. Adx Tata maꞌwẽ yũukaatheꞌ txãꞌsçxáanath kxtey yuuyaꞌ yuwéꞌ.
39 Adx Tataꞌ adx jxpeꞌkhan dukhnisatxiꞌ teeçxçxáa yuhwa ivxiitu jxthãasuꞌçmeꞌ, kxajíi adxaꞌ nmeh enteꞌ kiꞌ ĩtxi vxituꞌnja.
40 Adxna kaahsa jxthãasniꞌ naꞌwẽꞌ: maawa jxukay Dxus Nçxiꞌkaꞌs ũuste jxpaꞌgasaꞌ pçumée ĩtxi fxiꞌzewaꞌjaꞌs jiꞌphu jxthãasuꞌk. Txãa paꞌga txãꞌwẽ ũuste jxpaꞌgasatxiꞌ adxaꞌ nmeh enteꞌ kiꞌ ĩtxi vxituꞌnja.
41 Txãꞌwẽ adxíi ũꞌ cielujũ kĩisath jĩpaꞌga judiuweꞌsxaꞌ Jesusaꞌs açeweꞌweyaꞌ takhtxi:
42 —¿Naa pihçíi Jose nçxiꞌkmeenáꞌ? Saꞌ ¿maꞌwẽga cielujũ kĩisath jĩna weꞌweꞌ? Txãꞌjĩkahmeníi kweꞌsxaꞌ txajx neyweꞌsxtxi ew jiithaꞌw.
43 Txajũꞌ Jesusaꞌ txãꞌjĩniꞌs jiyuçxaꞌ, naꞌwẽk weꞌwe:
—Maa yuhwa txãꞌwẽ açeweꞌwen ũswaꞌj jiꞌphmeeiꞌkwe.
44 Adxaꞌ Tata jxkaahnisath açaꞌ txãaíi adx tasxte kuutxaꞌthe yuuçxáa txãatxiꞌ jxukaysatx nmeh enteꞌ ĩtxi vxituꞌnja.
45 Txãꞌwẽ yũuwaꞌjaꞌs Dxus yuwe ptaꞌsxsa librute naꞌwẽ fxiꞌjni ũsaꞌ: Dxusaꞌ kaapiyaꞌjana jxukaysatx ¿jĩꞌçmeenáꞌ? Kxajíi maawa adx Tata kaapiyaꞌjniꞌs wẽseꞌjçxa txajx jxkaahnitx kxtey yuusa yuuçxáa adx tasxte paꞌjatxna.
46 Maa yuhwa Dxusaꞌs iiuymeetaꞌ. Adx yuuçxáa Dxus tasxu yuusath naꞌ txãꞌsna iiuythu.
47 Adxaꞌ isath weꞌweꞌ: Adxaꞌs jxpaꞌgasaꞌ pçumée ĩtxĩ fxiꞌzewaꞌjaꞌs jiꞌphutxna,
48 txãasa pçumée ĩtxĩ kaafxiꞌzeꞌjwaꞌjsa ũꞌaꞌ, adxthu.
49 Kweꞌsx yaçga manteyweꞌsx nasa uꞌpnimée kiwesu uꞌjuçxaꞌ maná yaasesaꞌs ũꞌçxawa, pejka uu enaꞌs jiꞌphutx.
50 Nawa adxaꞌ cielujũ kĩisa ũꞌaꞌsthu ptaꞌsxiꞌ, txãꞌsna ũꞌçxaꞌ uukahmen.
51 Adxíi cielujũ kĩisa ũꞌ ĩtxisath. Maawa txãa ũꞌaꞌs ũꞌsaꞌ, bagaçxte yuhwa uumée ĩtxi fxiꞌzewaꞌjaꞌs jiꞌphutxna. Açaꞌ ũꞌ adx ũsuꞌnja txãꞌ adx kakweꞌ, kxah maa nasawa pçumée ĩtxi fxiꞌzewaꞌjaꞌs jiꞌphukahn txãꞌwẽ adx kakweꞌs ũsuꞌnja.
52 Txãꞌjĩteꞌ, judiuweꞌsxaꞌ naꞌwẽtx puutx yaꞌpaapẽyiꞌ:
—Naa piçthẽꞌjaꞌ ¿maꞌwẽ txajx kakweꞌs kweꞌsxtxi puuçyaꞌ ãjakx? jĩteꞌ,
53 Jesusaꞌ naꞌwẽk ptaꞌsx:
—Adxaꞌ isath weꞌweꞌ: Dxus Nçxiꞌk Nasa Yuusáa kakweꞌs ũꞌçxa txajx eenawa tudxmeeçxa yuꞌ, pçumée ĩtxi fxiꞌzewaꞌjaꞌs jiꞌphumeeneꞌkwe.
54 Açaꞌ maawa adx kakweꞌs ũꞌçxa adx eenawa tudxçxa yuuçxáa pçumée ĩtxi fxiꞌzewaꞌjaꞌs jiꞌphutxna, kxah txãꞌwẽ yũusatxiꞌ adxaꞌ nmeh enteꞌ ĩtxi vxituꞌnja.
55 Txãa paꞌgatey adx kakweꞌ peena yuꞌ kwẽejeꞌjmeena, açaꞌ adx eewa peena yuꞌ kxũꞌwẽꞌjmeena.
56 Maawa adx kakweꞌs ũꞌna txãꞌwẽy adx eenawa tudxsaꞌ, bagaçxtewa adx yakh ih ũsuna, açaꞌ adxwa txãa yakh ih ũsuꞌnja.
57 Tataꞌ adxna kaakh txãꞌ ĩtxĩsaꞌ. Txãa paꞌga adxwa ĩtxĩsath. Açaꞌ adxwa Tata yakh maꞌwẽ ĩtxĩsatkaꞌw, txãꞌwẽy ĩtxĩ fxiꞌzewaꞌjaꞌs jiꞌphutxna maawa adx kakweꞌs ũꞌsaꞌ.
58 Cielujũ kĩisa ũꞌaꞌsthu ptaꞌsxna weꞌweꞌ. Kweꞌsx yaçgaweꞌsx manteyweꞌsxaꞌ maná yaasesaꞌs ũꞌçxawa pejka uu enaꞌs jiꞌphutx. Nawa naa ũꞌaꞌ txãa maná naꞌwẽsameꞌ. Maawa naa ũꞌaꞌs ũꞌçxaꞌ, bagaçxte yuhwa pçumée ĩtxĩ fxiꞌzewaꞌjaꞌs jiꞌphutxna jĩnak ptaꞌsx.
Jesus weꞌweniꞌ pçumée ĩtxĩ kaafxiꞌzeꞌjwaꞌjsa
59 Jesusaꞌ txãꞌwẽk ptaꞌsx Kapernaumte judiuweꞌsx pkhaakhenite.
60 Açaꞌ txãꞌwẽ kaapiyaꞌjniꞌs wẽseꞌjçxaꞌ, txãa yakh uꞌjusaweꞌsx maaíi yuꞌ naꞌwẽtx weꞌwe txãaweꞌsx pweꞌsxçxáa:
—Naꞌwẽ ptaꞌsxniꞌ, wala thẽyaꞌ jiyuwaꞌj, açaꞌ maꞌwẽ yuhwa yaꞌjiyuꞌçmeꞌ.
61 Nasa jiyumeeçxa kuh jwed weꞌwena ũste Jesusaꞌ jiyuçxaꞌ, naꞌjĩk:
—Adx ptaꞌsxniꞌs jiyumeeçxa ũusçxa yaakiꞌwáꞌkwe.
62 Txãꞌwẽ jiyumée ũsçxawa, Dxus Nçxiꞌk Nasa Yuusaꞌ cielun teekaçte uyçxaꞌ, ¿maa sũjukiꞌkwe?
63 Naꞌjĩꞌth naꞌ: Dxus Espirituꞌ ĩtxi kaafxiꞌzeꞌjsaꞌ, açaꞌ txãaçxáꞌsthu weꞌwena ptaꞌsxiꞌ, naa kiwete ũꞌçxa ĩtxĩ fxiꞌzeniꞌs ptaꞌsxiꞌçmeeth. Adxaꞌ isath ptaꞌsxiꞌ Dxus yakh ĩtxĩ fxiꞌzewaꞌjaꞌs.
64 Nawa maaíi yuꞌ isaneꞌ ptaꞌsxiꞌ sũjuꞌçmeeiꞌkwe jĩk.
Jesusaꞌ dxiikhẽy jiiyãꞌkh yuꞌ maa txãꞌwẽ açeçtewa, saꞌ kim ikhkahn dukhwaꞌjsatewa, txãa paꞌgak dxiikhẽy txãꞌjĩna weꞌwe.
Saꞌ kiꞌ weꞌweçxaꞌ:
65 —Iꞌkweꞌsx maaíi yuꞌ açeçte jiiçxath adx Tata kuutxaꞌthe yuuçxáa txãaweꞌsxaꞌ adx tasxte paꞌjatxna jĩna weꞌwe.
66 Jesus txãꞌwẽ ptaꞌsxteçxáa, txãa yakh uꞌjusaweꞌsx maaíi yuꞌ txuteena uꞌjtx.
67 Txajũꞌ Jesusaꞌ pẽjxku docesatx:
—¿Iꞌkweꞌsxwa adxaꞌs txuteeçxa uꞌjyaꞌwakweꞌ? jĩteꞌ,
68 Simon Pedroꞌ naꞌwẽk pas:
—Kweꞌsxaꞌ ¿kim yakh uꞌjwekxthaꞌw? Idx yuuçxáa pçumée ĩtxĩ fxiꞌzewaꞌjaꞌs ptaꞌsxna ũsgu açaꞌ.
69 Txãa paꞌgatey kweꞌsxaꞌ idxaꞌs jiyuthaꞌw, txãasathaꞌw idxaꞌ Kristo, Dxus ĩtxisa Nçxiꞌkneꞌga sũjuꞌ.
70 Txãꞌjĩteꞌ, Jesus weꞌweçxaꞌ:
—Adxaꞌ iꞌkweꞌsx docesatx txhitxhçxa paꞌyatewa, teeçxsaꞌ eçxthẽꞌj jĩiaꞌ jĩnak ptaꞌsx.
71 Jesusaꞌ Simon nçxiꞌk Judas Iskarioteꞌs weꞌweçxak txãꞌjĩ, Judas txãꞌwẽ docesateweꞌsxçxawa Jesusaꞌs ikhkahn dukhyaꞌwak yuꞌ naa paꞌga.
