Juan 7:1-53
7 Txajũꞌ Jesusaꞌ Galilea kiwesuk uꞌjuꞌ. Judea kiwesu yuꞌ uꞌju wẽemeꞌ, kxteeaꞌ judiuweꞌsx ikhyaꞌ pakwenatx ũsuꞌ naa paꞌga.
2 Judiuweꞌsx fxiesta waꞌ vxitni en ãjaçku yuꞌ,
3 açaꞌ Jesus nyakhweꞌsxaꞌ naꞌwẽtx weꞌwe:
—Ayte ũsmée Judea kiwen meꞌj, kxah nasa iidx juꞌguh ũssaweꞌsx uyuutxna idx naꞌwẽ yũꞌg txãꞌsaꞌs.
4 Maawa ãate tuutheꞌj jxthãasuççxaꞌ, paaçsu uꞌjumeena. Naꞌwẽ kimwa ãjanimeesaꞌs kaavxyaꞌjaꞌg naꞌ txãatxiꞌ ãate mkaavxyaꞌj maawa uykahn jĩnatx weꞌweꞌ.
5 Nyakhweꞌsxíi yuhwa Dxus Nçxiꞌkna sũjuꞌçmeeneꞌta, txãasatx ũuste jxpaꞌgameeçxaꞌ txãꞌwẽ weꞌwe.
6 Txajũꞌ Jesusaꞌ naꞌjĩnak ptaꞌsx:
—Adx uꞌjwaꞌj enaꞌ ãhmeyaꞌ, nawa iꞌkweꞌsx yuꞌ kĩh entewa uꞌjyaꞌ ewuçxáaneꞌkwe.
7 Naa kiweteweꞌsxaꞌ iꞌkweꞌsxtxiꞌ açeꞌçmeetaꞌ, nawa adxaꞌs açeꞌtx, txãꞌwẽ txãaweꞌsx ewmée yũuniꞌs ãateth ptaꞌsxiꞌ txãa paꞌga.
8 Iꞌkweꞌsxaꞌ fxiestan meꞌjçxáawe. Adxaꞌ yuhmeꞌnja, adx uꞌjwaꞌj en ãhmeyaꞌ açaꞌ.
9 Txãꞌ weꞌweçxaꞌ, Jesusaꞌ Galileatee neeyũuk.
Jesus fxiestan uꞌjni
10 Nawa txajx nyakhweꞌsx uꞌjni eꞌsuꞌ, Jesuswa fxiestan uꞌkh, kimwa jiyunimeete.
11 Açaꞌ judiuweꞌsxaꞌ naꞌjĩnatx txãa fxiestate Jesusaꞌs pakwena ũsuꞌ:
—¿Mtee ũski txãa piçthẽꞌjaꞌ? jĩna.
12 Txãa fxiestateꞌ Jesusaꞌs nuyweꞌwesa yuuçxáatx susna ũsuꞌ. Vxiteíi yuꞌ: Jesusaꞌ ewsa yujaꞌ jĩçpkaçxhaꞌ, vxite yuꞌ: Ewmeesaꞌ, nasatx ĩsxiina uꞌjusaçxáꞌ jĩnatx nuyweꞌweꞌ.
13 Nawa Jesusaꞌs ew weꞌwesa yuꞌ maa yuhwa ãate yuꞌ weꞌweçmeetaꞌ, judiuweꞌsxtxi ũukhçxa.
Fxiesta ente Jesus kaapiyaꞌjni
14 Fxiesta pçuuna uꞌjweçpkaçxhaꞌ, Jesusaꞌ dxuus yatte uꞌkaçxa kaapiyaꞌjyaꞌ takhku.
15 Açaꞌ judiuweꞌsxaꞌ kuh yajkxnatx ũsuꞌ txãaweꞌsx pweꞌsxçxáa naꞌjĩna:
—Naa piçthẽꞌjaꞌ ¿maꞌwẽçxa txakwe wala jiina, maa kaapiyaꞌjsa yakh yuhwa uꞌjusameeçxawa?
16 Açaꞌ txãꞌ weꞌweniꞌs jiyuçxaꞌ, Jesusaꞌ naꞌjĩnak ptaꞌsx:
—Naꞌwẽth kaapiyaꞌjaꞌ txãꞌ adx peekx yajkxçxa kaapiyaꞌjnisameꞌ. Adxna jxkaakh txajx weꞌweniꞌsthu kaapiyaꞌjaꞌ.
17 Maawa Dxus jxthãasniꞌs kxtey yuuwaꞌjsa ũsçxaꞌ, naa kaapiyaꞌjniꞌs jiyuna Dxus weꞌwenitewa, meeçxaꞌ adx peekxçxáa yajkxçxa kaapiyaꞌjnitewa.
18 Peekíiçxáa yajkxçxa weꞌwesaꞌ, jxtuhthesa yuuwaꞌjçxáꞌsku jxthãasuꞌ. Nawa Dxusçxáana tuutheꞌjsaꞌ, Dxus jxkaahniçxáꞌsku isa weꞌwena ptaꞌsxiꞌ.
19 Moisesaꞌ leyaꞌs fxiꞌjçxa ¿iꞌkweꞌsxtxi ũsyuhmeenaꞌ wakx? Txãꞌwẽtewa iꞌkweꞌsxaꞌ maa yuhwa ley jxkaahniꞌs kxtey yuꞌçmeeiꞌkwe. Txãasa iꞌkwe adxaꞌs ikhyaꞌçxáa yaakiꞌ jĩteꞌ,
20 nasaꞌ naꞌwẽtx pas:
—Eçxthẽꞌj yakh ũsneꞌga. ¿Kimga idxaꞌs ikh wẽjeꞌ?
21 Txajũꞌ Jesusaꞌ naꞌjĩnak weꞌwe:
—Kiꞌswaꞌj ente teeçx nasa ãçaꞌsaꞌs nuykatxhith txãa paꞌgaçxáa iꞌkwe txakwe susyaꞌ kiite.
22 Nawa iꞌkweꞌsx yuꞌ kiꞌswaꞌj entewa luuçx pihçtxi cirkuncidaĩꞌiꞌkwe, Moises jxkaahniꞌs nwẽeseꞌjçxa. Naa kxah iꞌkwe ãçaꞌsaꞌs adx nuykatxhini yuꞌsaꞌ txakwe susuꞌ. (Nawa ew jiyute yuꞌ, Moises txãꞌwẽ cirkuncidãywaꞌjaꞌs jxkaahna takhmeꞌ, jwee yaçgaweꞌsxtxi txãꞌwẽ jxkaah.)
23 Iꞌkweꞌsxaꞌ Moises leyaꞌs kxtey yuuyaꞌ sũhçxa iꞌkwe kiꞌswaꞌj entewa cirkuncidaĩꞌ luuçx pihçtxiꞌ. Saꞌ ¿kĩjxaꞌkwe txakwe ũusçxaꞌ adx teeçx piçthẽꞌj ãçaꞌsaꞌs kiꞌswaꞌj ente nuykatxhiçxa nvxiitpaꞌgaçxáa?
24 Iꞌkweꞌsxaꞌ ew jiyumey yuꞌ fxiyfxiyçxáa yajkxna weꞌwenuwe, naasáa ew jiyuçxa yuuçxáa txãꞌwẽ dxih yuꞌga sũhna weꞌwewaꞌjaꞌ jĩnak ptaꞌsx.
Dxus tasxu yuusa
25 Txajũꞌ Jerusalente nasa maaíi yuꞌ naꞌwẽtx puutx paapẽyiꞌ:
—¿Naa piçthẽꞌjaꞌsíi ikhyaꞌ pakweꞌçmeetxnaꞌ?
26 Txãꞌwẽ pakweeçtewa, nasaa ksxavxyte yajkxyajkxmée weꞌwena ũsaꞌ, kim yuhwa maꞌjĩnimeete. Meeçxaꞌ ¿kweꞌsx npiiçthẽꞌjweꞌsxaꞌ ew yuh jiyuwáꞌntakx naa piçthẽꞌjaꞌ Dxus tasxu yuusa Kristotewa?
27 Naa piçthẽꞌjaꞌ majuweꞌsxtewa jiithaꞌw, açaꞌ isa Dxus kaahni Kristo dxihwaçaꞌ, txãꞌsaꞌ txãa kiwejuweꞌsxaꞌ jĩni yuumeena jĩnatx weꞌweꞌ.
28 Açaꞌ Jesusaꞌ dxuus yatte kaapiyaꞌjna ũsíi, sus weꞌweçxa naꞌjĩk:
—Adxaꞌsaꞌ jiiyujiꞌkwe majũweꞌsxtewa. Nawa adxaꞌ peekx yuu wẽeçxaçxáa yuweꞌçmeeth, Dxus kaahni ayte ũsthu. Txãa yuuçxáa isa weꞌwesaꞌ txãa kaahsaꞌs yuꞌ iꞌkweꞌsxaꞌ jiyuꞌçmeeiꞌkwe.
29 Txãꞌsaꞌ adx yuuçxáa jiith, txajx tasxu kaahni ayte ũsthu naa paꞌga jĩk.
30 Txãꞌjĩteꞌ, tudçxa preesu jxũna uꞌj wẽetx, nawa kim yuhwa tud yuꞌ meetaꞌ, txãꞌwẽ yũuwaꞌj en ãhmeyneꞌ yuꞌ naa paꞌga.
31 Txãꞌwẽtewa, wala kuh jiyutx Jesusaꞌ kimtewa saꞌ naꞌjĩꞌtx:
—Dxus tasxu yuusa Kristo kĩhçxaꞌ, ¿naa piçthẽꞌthe jxthaakwe kĩjkĩhwa kaavxyaꞌjaꞌjyaꞌ ãjãmaꞌk? jĩnatx weꞌweꞌ.
Jesusaꞌs preesuꞌjyaꞌ kaahni
32 Nasa txãꞌwẽ Jesusaꞌs tuutheꞌjna ũste fxariseoweꞌsxaꞌ wẽseꞌjçxaꞌ, sacerdote npiiçthẽꞌjweꞌsx yakh puutx weꞌweçxaꞌ, dxuus yat thegsaweꞌsxtxi kaahtx Jesusaꞌs tudçxa jxũna yuukahn.
33 Açaꞌ preesuꞌjyaꞌ kaahniꞌs jiyuçxaꞌ, Jesusaꞌ naꞌjĩnak weꞌwe:
—Adxna kaahsa tasxna sxawedna uꞌjyaꞌwath naꞌ iꞌkweꞌsx yakh txaçxmeeçxáa piꞌkxna ũsyaꞌwath.
34 Açaꞌ adxaꞌs pakweçxawa uymeeneꞌkwe, txãa paꞌgatey adx uꞌjweçthu kxteꞌ paꞌjyaꞌ ãjãmeeneꞌkwe naa paꞌga.
35 Txajũꞌ judiuweꞌsxaꞌ naꞌwẽtx puutx yaꞌpaapẽjxyaꞌ takh:
—Naa piçthẽꞌjaꞌ ¿mtee uꞌthe txãꞌwẽ kweꞌsxaꞌ uymée yuukxthaꞌw? Meeçxaꞌ ¿judiuweꞌsx ũstaꞌ vxite kiwesu griegoweꞌsx ksxavxysu açaꞌ txãa griegoweꞌsxtxi wáa ptaꞌsxyaꞌ uꞌjweçnakx?
36 Adxaꞌs pakweçxawa uymeeneꞌkwe, txãa paꞌgatey adx uꞌjweçthu kxteꞌ paꞌjyaꞌ ãjãmeeneꞌkwe naa paꞌga jĩnak weꞌweꞌ saꞌ ¿maꞌjĩçxakiꞌk txãꞌwẽ weꞌweꞌ? jĩꞌtx.
Yuꞌ pçuwaꞌjmeesa
37 Fxiesta pçuuyaꞌ nmeh en yuuçteꞌ, Jesusaꞌ yujuçxa naꞌjĩnak sus weꞌweꞌ:
—Maawa yũꞌwẽesa ũsçxaꞌ, adx tasxte myuhwe tudxyaꞌ.
38 Adxaꞌs ũuste jxpaꞌgasatxiꞌs txãaweꞌsx ũuste yuꞌ pçuwaꞌjmeesa kasehna nes yuuna, Dxus librute weꞌweꞌk txãꞌwẽ.
39 Jesusaꞌ txãꞌjĩna weꞌweçxaꞌ, txãꞌsna yaakxsaꞌ Dxus Espirituꞌs jxpaꞌgawaꞌjaꞌsku ptaꞌsxna txãꞌjĩꞌ. Txãa ensuꞌ txãa Dxus Espirituꞌ paꞌjmeyku yuꞌ, Jesus yuu cielun tejkameyku yuꞌ naa paꞌga.
Jesus kimtewa jiyumeeçxa nasa fxiyfxiy yaakxni
40 Nasa wala kuh pkhaakhena ũsnite maaíi yuꞌ Jesus ptaꞌsxniꞌs wẽseꞌjçxaꞌ, naꞌwẽtx weꞌwe:
—Naa piçthẽꞌjaꞌ isa Dxus yuwe ptaꞌsxsa yuhna jĩꞌtx.
41 Açaꞌ vxite yuꞌ naꞌjĩꞌtx:
—Naꞌ Dxus tasxu yuusa Kristona jĩꞌtx. Nawa vxite weꞌweçxaꞌ:
—Galileajũ yujaꞌ, ¿Kristoꞌ kasehmaꞌk?
42 Txãꞌwẽmeeteíik Dxus librute weꞌweçxaꞌ: Kristoꞌ jxkaahsa Davxid nweꞌsxçxaꞌ, Davxid upxni çxhab Belentey kasejena jĩꞌk jĩnatx weꞌweꞌ.
43 Txajũꞌ maaíi yuꞌ Jesus juꞌgu weꞌwenatx neeyũu, açaꞌ vxite yuꞌ Jesusaꞌs ahçenatx neeyũu.
44 Açaꞌ maaíi yuꞌ preesuꞌjçxa jxũna uꞌj wẽeçxawa, maa yuhwa txãꞌwẽ yuꞌ yũumeetaꞌ.
Judiu npiiçthẽꞌjweꞌsxaꞌ Jesusaꞌs jxpaꞌgameetaꞌ
45 Dxuus yat thegsaweꞌsxaꞌ kiꞌkin sxawedna paꞌtheꞌ, sacerdote npiiçthẽꞌjweꞌsx vxiteꞌ fxariseoweꞌsxaꞌ naꞌjĩnatx pẽjx:
—¿Mjĩitekwe txãa Jesusaꞌs preesuꞌjçxa jxũna yuweꞌçmée? jĩteꞌ,
46 txãaweꞌsx pasçxaꞌ:
—Bagaçxte yuhwa naa piçthẽꞌj naꞌwẽ zhiçxkwe ptaꞌsxiꞌk txãꞌwẽsa yuꞌ iiwẽseꞌjmeethaꞌw. Txãasathaꞌw preesuꞌjmée.
47 Txajũꞌ fxariseoweꞌsxaꞌ wẽesxũ weꞌweçxaꞌ, naꞌjĩtx:
—¿Iꞌkweꞌsxwa vxitesa naꞌwẽy yaꞌĩsxiijaçwáꞌkwe?
48 ¿Kweꞌsx npiiçthẽꞌjweꞌsx meeçxawa fxariseoweꞌsx maaçxáꞌ txãa piçthẽꞌj kaapiyaꞌjniꞌs jxpaꞌgaçxa ũste iꞌkweꞌsxaꞌ jiikweꞌ?
49 Nawa txãa piçthẽꞌjaꞌs nwẽeseꞌjsaꞌ leyaꞌs jiimeesataꞌ naꞌ iiméh seenaꞌ ewmeesa nweꞌwewaꞌjmeesa yãꞌthaꞌ.
50 Txãꞌjĩteꞌ, kxtee ũssa teeçx fxariseo Nikodemo yaasesa Jesus tasxte kus paꞌjyaꞌ uꞌjuꞌga txãa weꞌweçxa naꞌjĩk:
51 —Yuuwesaꞌs paꞌyaçxa pẽjxmey yuꞌ, kastigãyyaꞌ ãjameꞌnjaꞌw, kweꞌsx leyaꞌ txãꞌwẽ jxkaajaꞌçmeꞌ jĩteꞌ,
52 txãaweꞌsx pasçxaꞌ:
—¿Idxwa Galileajũweꞌsxwáꞌga? Dxus libruꞌs mtheg wakx, saꞌ jiyuneꞌga: Galileajũ yuꞌ, bagaçxte yuhwa Dxus yuwe ptaꞌsxsa iikasehmeetaꞌ jĩnatx açeweꞌwe.
53 Txãꞌjĩçxaꞌ, puutx txuteena uꞌjtx txãaweꞌsx yatna.
