Juan 8:1-59
8 Naapkaçxhaꞌ Jesusaꞌ Jerusalenu kasehçxa Oliwos vxiçnak uꞌj.
2 Saꞌ kuskus kusíiçxáa dxuus yatte sxawedna paꞌkh. Txajũꞌ nasa jxukaysa utxaateꞌ, Jesusaꞌ kaapiyaꞌjyaꞌ kaçxku.
3 Txajũꞌ ley kaapiyaꞌjsaweꞌsx vxiteꞌ fxariseoweꞌsxaꞌ teeçx uꞌy kazx yũuna ũste kpajkxçxa Jesus tasxte nuypaꞌjtx saꞌ pxãhte txahçxaꞌ
4 naꞌjĩtx:
—Kaapiyaꞌjsa, naa uꞌyaꞌs kazx yũuna ũsíin kpajkxthaꞌw.
5 Txãꞌwẽ yũusatxiꞌ Moises leyaꞌ kwet wãatatahçxak ikhkajaꞌ. Açaꞌ idxaꞌ ¿maꞌwẽ jxkaajakiꞌg? jĩnatx pẽjx.
6 (Kxtee ãhmée weꞌweteꞌ, paatxhĩꞌkhyaꞌ sũhçxatx txãꞌwẽ paapẽyiꞌ.)
Nawa Jesusaꞌ kĩiçhuçxak kiwete kuseju fxiꞌjaꞌ.
7 Açaꞌ maz uswa jwee pẽjxteꞌ, Jesusaꞌ kaphuteçxa naꞌjĩk:
—Iꞌkweꞌsxaꞌ maaçxáawa pkal jiꞌphmeesa ũsçxaꞌ, txãa khuẽꞌy naa uꞌy kakwete kwet mwãatahwe jĩçxaꞌ,
8 kiꞌ kĩiçhuçxa kiwete fxiꞌkh.
9 Açaꞌ txãꞌjĩniꞌs wẽseꞌjçxaꞌ: Kweꞌsxwa pkalsaneꞌtkaꞌw sũhçxa, kasehna uꞌjtx teeçxteeçxçxah, nyafxteꞌ jwee ĩisxsa khuẽꞌytxi kaseh. Txãꞌwẽ jxuka kasehna uꞌtheꞌ, txãa uꞌyçxáak kxtee neeyũu Jesus ũsnite.
10 Açaꞌ Jesusaꞌ kaphuteçxa ley kaapiyaꞌjsaweꞌsx jxuka kasehna uꞌjniteꞌ txãa uꞌyçxáa ũste uyçxaꞌ, naꞌjĩk:
—Iꞌkwena paatxhĩꞌkhsaweꞌsxaꞌ ¿mteeta yuu? ¿Maawa iꞌkweꞌs ewmeete nvxiht-yaꞌ ãjãmeewáꞌnta? jĩteꞌ,
11 txãa uꞌyaꞌ naꞌjĩnak pas:
—Maa yuhwa ãjãmeetaꞌ jĩteꞌ, Jesusaꞌ naꞌjĩk:
—Adxwa iꞌkweꞌs ewmeete nvxihtmeꞌnja. Meꞌjwe, nawa peena yuꞌ ewmée yũuna uꞌjunuwe jĩk.
Jesusaꞌ eenaꞌte kaafxiꞌzeꞌjsa
12 Kiꞌkin nasa pkhaakheteꞌ, Jesusaꞌ naꞌjĩnak weꞌwe:
—Adxaꞌ eenaꞌte kaafxiꞌzeꞌjsath, açaꞌ maawa adx yakh yuusaꞌ eenaꞌte fxiꞌzewaꞌjaꞌs jiꞌphutxna, saꞌ bagaçxte yuhwa çxhiꞌdxte fxiꞌzemeetxna.
13 Txajũꞌ fxariseoweꞌsxaꞌ naꞌwẽtx weꞌwe:
—Idxaꞌ peekíiçxáa yaꞌtuutheꞌjna ũsgu açaꞌ txãꞌ kxul yuhna jĩteꞌ,
14 Jesus pasçxaꞌ:
—Makwe peekíiçxáꞌntka yaꞌtuutheꞌjeꞌ, nawa adx ptaꞌsxniꞌ ĩsxiinisameꞌ. Txãa paꞌgatey adxaꞌ jiith majũweꞌsxçxaꞌ kiꞌ maa dxiꞌj uꞌjweççxawa. Nawa iꞌkweꞌsxaꞌ jiimée iꞌkwe adx majũweꞌsxtewa saꞌ maa dxiꞌj uꞌjweçtewa.
15 Iꞌkweꞌsxaꞌ peekx ũus yaakxnijũçxáa iꞌkwe txãꞌwẽ weꞌweꞌ, adx isa weꞌweniꞌs jiyumey. Nawa adxaꞌ jiimeeçxa yuꞌ weꞌweꞌçmeeth.
16 Nasa maꞌwẽsatewa isa jiyuçxath weꞌweꞌ, Tataꞌ adxaꞌs kaakh txãak maꞌwẽ yũuwaꞌjaꞌswa adxaꞌs puꞌçxhiꞌ txãa paꞌga.
17 Iꞌkweꞌsx leyteꞌ naꞌjĩꞌk: Yuweꞌs jiisa eꞌzíi txãa naꞌwẽçxaçxáa weꞌwenisaçxáa selpiina jĩꞌk.
18 Açaꞌ isa weꞌwesa teeçxsaꞌ adxíiçxáath. Açaꞌ vxiteꞌ adxna kaahsa Tataíiçxáꞌ.
19 Txãꞌjĩteꞌ, fxariseoweꞌsxaꞌ naꞌjĩtx:
—Iidx Tataꞌ ¿mtee ũsna? jĩteꞌ, Jesus pasçxaꞌ:
—Iꞌkweꞌsxaꞌ adxaꞌs jiyuꞌçmeeiꞌkwe, saꞌ adx Tatanawa jiyuꞌçmeeiꞌkwe. Adx kimtewa jiyuwaçaꞌ, adx Tatanawa jiyuneꞌkwe jĩnak ptaꞌsx.
20 Dxuus yatte ofxreda ãsxni kaja pukate kaapiyaꞌjna ũsçxaꞌ, txãꞌjĩnak ptaꞌsx Jesusaꞌ. Nawa maa yuhwa preesuꞌjyaꞌ ãjãmeetaꞌ, preesuꞌjwaꞌj en ãhmeyneꞌ yuꞌ naa paꞌga.
Adx ũsniteꞌ paꞌjyaꞌ ãjameeneꞌkwe
21 Jesusaꞌ kiꞌkin weꞌweçxa naꞌjĩk:
—Adxaꞌ uꞌjweçthu, açaꞌ iꞌkweꞌsxaꞌ makwe pakweeneꞌkwe, nawa adxaꞌs uymey iꞌkweꞌsx pkalte uuneꞌkwe. Txãasa adx uꞌjweçthu kxteeaꞌ paꞌjyaꞌ ãjameeneꞌkwe jĩna weꞌweteꞌ,
22 judiuweꞌsxaꞌ naꞌjĩtx:
—Meeçxaꞌ ¿peekx kusetey uuyaꞌwawáanakx, txãasa wáꞌ adx uꞌjweçthu kxteeaꞌ paꞌjyaꞌ ãjameeneꞌkwe jĩna weꞌweꞌkx? jĩteꞌ,
23 Jesusaꞌ ptaꞌsxku:
—Iꞌkweꞌsxaꞌ ayteweꞌsxiꞌkwe, naapkaçxhaꞌ adxaꞌ ẽejũweꞌsxthu. Açaꞌ iꞌkweꞌsxaꞌ naa kiweteweꞌsxiꞌkwe, naapkaçxhaꞌ adxaꞌ naa kiweteweꞌsxmeeth.
24 Txãꞌwẽçxaíith iꞌkweꞌsx pkalte uuneꞌkwe jĩna ptaꞌsxiꞌ. Txãꞌwẽ Dxus kaahnisaꞌ adxçxáath jĩna ptaꞌsxtewa jiyumée yãꞌjçxaꞌ, iꞌkweꞌsx pkalte uuneꞌkwe jĩna ptaꞌsxteꞌ,
25 naꞌjĩnatx paapẽjx:
—Txãꞌwẽçxaꞌ ¿idxaꞌ kimga? jĩteꞌ, Jesus pasçxaꞌ naꞌjĩk:
—Adxaꞌ kimçxawa nyafxíi ptaꞌsxyãꞌth.
26 Txãasa wala ptaꞌsxwaꞌj jiꞌpthu iꞌkweꞌsx maꞌwẽsatewa ãate ptaꞌsxna, txãa paꞌgatey adxna kaahsaꞌ ĩsxiisameꞌ, açaꞌ adxaꞌ txajx weꞌweniꞌs wẽseꞌjçxa txãꞌwẽ íiçxáath ptaꞌsxiꞌ maawa jiyukahn jĩnak weꞌwe.
27 Txãꞌwẽ Dxusaꞌ adx Tataꞌ jĩna Jesus ptaꞌsxtewa jiyumeetaꞌ.
28 Txãa paꞌgak Jesusaꞌ naꞌjĩna weꞌwe:
—Iꞌkweꞌsxaꞌ Dxus Nçxiꞌk Nasa Yuusaꞌs ẽete txahçxa yuuçxáa jiyuneꞌkwe kimtewa, saꞌ peekxçxáa yuꞌ weꞌwemée, wejxwa Tata kweꞌweꞌjniçxáꞌsneꞌ kaapiyaꞌj sũjuneꞌkwe.
29 Txãa paꞌgatey adxna kaahsaꞌ, adx yakh ih ũsaꞌ, Tataꞌ adxçxáa yuꞌsaꞌ nvxiituꞌçmeꞌ, txajx jxthãasniçxáꞌsthu kxtey yuꞌ naa paꞌga jĩk.
30 Txãꞌjĩna weꞌweteꞌ, nasa kuhsa Jesus juꞌgu yuutx.
Ewmeete fxiꞌzesa vxiteꞌ ewmeejũ nweꞌwenisa
31 Txajũꞌ Jesusaꞌ txajx juꞌgu yuusaaweꞌsxtxiꞌ naꞌjĩnak ptaꞌsx:
—Adx kaapiyaꞌjniꞌs jxpubamée nwẽeseꞌjçxaꞌ, adx nasa yuuçxa
32 ewsaꞌs jiyuneꞌkwe, açaꞌ txãa ewsaꞌ ewmeesajũ nweꞌwena jĩteꞌ,
33 txãaweꞌsxaꞌ naꞌwẽtx pas:
—Kweꞌsxaꞌ Abrahan jiꞌthaꞌw, saꞌ bagaçxte yuhwa ewmeete yuꞌ fxiꞌzesameethaꞌw. Açaꞌ idxaꞌ ¿maꞌwẽga ewmeesajũ nweꞌweni yuuneꞌkwe jĩna weꞌweꞌ? jĩteꞌ,
34 Jesusaꞌ ptaꞌsxku:
—Isath weꞌweꞌ, maawa ewmée yũuna fxiꞌzesaꞌ, ewmeete fxiꞌzesataꞌ.
35 Iꞌkweꞌsxaꞌ peekx jii iꞌkwe: selpisaꞌ yat namu naꞌwẽsameꞌ, naasáa peekx nçxiꞌk yuuçxáa yat namu naꞌwẽsaꞌ.
36 Txãa paꞌga yat namu naꞌwẽsa Dxus Nçxiꞌk txãꞌwẽ ewmeesajũ nweꞌwete yuuçxáa, isa ewmeete fxiꞌzesamée yuh yuuneꞌkwe.
37 Iꞌkweꞌsxaꞌ Abrahan jiꞌthewa jiith, nawa adxaꞌs ikh wẽjeꞌiꞌkwe, adx kaapiyaꞌjniꞌs nwẽeseꞌj wẽemeeçxaçxáa.
38 Adx Tata kweꞌweꞌjniçxáꞌsthu ptaꞌsxiꞌ, naapkaçxhaꞌ iꞌkweꞌsxaꞌ iꞌkweꞌsx tata jxkaahniçxáꞌs iꞌkwe kxtey yuꞌ jĩteꞌ,
39 txãaweꞌsxaꞌ naꞌwẽtx pas:
—Kweꞌsx tataꞌ Abrahanaꞌ jĩteꞌ, Jesus pasçxaꞌ:
—Abrahan luuçxwaçaꞌ, Abrahan naꞌwẽy yũuneꞌkwe.
40 Txãꞌwẽtewa, adxna maꞌwẽ Dxus kaapiyaꞌtheꞌ, txãꞌsçxáath isa ptaꞌsxiꞌ. Nawa iꞌkweꞌsxaꞌ adxaꞌs ikhyaꞌ yuuçxáa iꞌkwe paꞌpçxuꞌ. Abrahanaꞌ bagaçxte yuhwa txãꞌwẽ yũumeꞌ.
41 Iꞌkweꞌsx tata maꞌwẽ yũuteꞌ, iꞌkweꞌsxwa txãꞌwẽy iꞌkwe yũꞌ jĩteꞌ, naꞌwẽtx pas:
—Txãꞌjĩkahnaꞌ, kweꞌsxaꞌ ¿ptamunimeesa luuçx wáꞌntkaꞌw? Kweꞌsxaꞌ teeçx tataçxáa jiꞌpthaꞌw, txãꞌ Dxusaꞌ jĩteꞌ,
42 Jesusaꞌ naꞌjĩnak weꞌwe:
—Isa Dxusaꞌ iꞌkweꞌsx tatawaçaꞌ, adxaꞌs ahçemeeneꞌkwe, adxaꞌ Dxus tasxu kaahnith yuwéꞌ txãasa ayte ũsthu. Adxaꞌ peekxçxáa yuꞌ yuweꞌçmeeth, adxaꞌsaꞌ Dxusku kaah.
43 Naꞌswa adx kaapiyaꞌjniꞌs jiyuꞌçmeeiꞌkwe, txãꞌwẽ adx weꞌweniꞌs nwẽeseꞌjeꞌçmeeiꞌkwe, txãasa iꞌkwe jiyuꞌçmée.
44 Iꞌkweꞌsx tataꞌ, eçxthẽꞌjaꞌ, açaꞌ iꞌkweꞌsxaꞌ txajx luuçxiꞌkwe. Txãꞌwẽçxaíi iꞌkwe txajx jxthãasniꞌs kxtey yuu wẽjeꞌ, eçxthẽꞌjaꞌ nyafxiitey nasaa kiikheꞌjsaꞌ naa paꞌga. Eçxthẽꞌjaꞌ bagaçxte yuhwa ewsaꞌs yũꞌçmeꞌ, saꞌ bagaçxte yuhwa isa weꞌweꞌçmeꞌ. Txãa yuu txãꞌwẽesana naꞌ ĩsxiinaçxáak weꞌweꞌ, saꞌ kaaĩsxiijaꞌjsaꞌ.
45 Nawa adx isa weꞌweni yuꞌs nwẽeseꞌjeꞌçmeeiꞌkwe.
46 Iꞌkweꞌsxaꞌ ¿maaçxaꞌ adxaꞌs pkalsaꞌ jĩna ukheꞌjyaꞌ ãjamaꞌkwe? adxaꞌ isasaçxáꞌsthu ptaꞌsxiꞌ açaꞌ. Adx isasaꞌs kaapiyaꞌjaçteꞌ, ¿maꞌwẽtekwe adx weꞌweniꞌs nwẽeseꞌjeꞌçmée?
47 Dxus luuçxaꞌ Dxus weꞌweniꞌs nwẽeseꞌjeꞌtx. Nawa iꞌkweꞌsxaꞌ nwẽeseꞌjeꞌçmeeiꞌkwe naꞌ Dxus luuçx meeiꞌkwe jĩk.
Abrahan meetey Kristo ũsyãꞌkh yuꞌ
48 Txajũꞌ judiuweꞌsxaꞌ Jesusaꞌs naꞌwẽtx açeweꞌwe:
—Idxaꞌ Samariajũweꞌsxgu, txãasa eçxthẽꞌj yakh ũsgu açaꞌ isathaꞌw txãꞌjĩꞌ jĩteꞌ,
49 Jesusaꞌ naꞌwẽk pas:
—Adxaꞌ eçxthẽꞌj yakh ũsmeeth, naasáa adx Tataꞌs tuutheꞌjsaçxáath. Nawa iꞌkweꞌsxaꞌ adxaꞌs açeꞌiꞌkwe.
50 Adxaꞌs weçxana tuutheꞌjniꞌs pakweꞌçmeeth. Nawa teeçx ũsaꞌ adxaꞌs tuutheꞌjsa txãꞌ adx maꞌwẽsatewa jiiaꞌ.
51 Isath weꞌweꞌ: Adx weꞌweniꞌs kxtey yuusaꞌ, bagaçxte yuhwa uu enaꞌs jiꞌphumeetxna.
52 Txãꞌjĩteꞌ, judiuweꞌsxaꞌ naꞌwẽtx weꞌwe:
—Ãçxhthaꞌw wejx ew jiyu, eçxthẽꞌj yakh ũstewa. Abrahanaꞌ uuk saꞌ Dxus yuwe ptaꞌsxsaweꞌsxwa uutx. Naapkaçxhaꞌ idxaꞌ naꞌjĩꞌg: Maawa adx weꞌweniꞌs kxtey yuuçxaꞌ, bagaçxte yuhwa uu enaꞌs jiꞌphumeetxna jĩꞌg.
53 Kweꞌsx yaçgaweꞌsx Abrahanaꞌ uuk saꞌ Dxus yuwe ptaꞌsxsaweꞌsxwa uutx, açaꞌ idxaꞌ ¿Abrahante jxthaakwesa wáꞌga? jĩteꞌ,
54 Jesusaꞌ naꞌwẽk pas:
—Adxíiçxáa yaꞌtuutheꞌjna ptaꞌsxiꞌnja naꞌ txãꞌ selpimeena. Nawa adxaꞌs tuutheꞌjsaꞌ adx Tataꞌ txãꞌs iꞌkwe kweꞌsx Dxusaꞌ jĩna weꞌweꞌ.
55 Nawa iꞌkweꞌsxaꞌ txãa Dxusaꞌs jii yuuwa meeiꞌkwe. Nawa adxaꞌ txãꞌsaꞌ ew jiith. Txãꞌwẽ txãꞌsaꞌ ew jiiçxa jiimeeth jĩꞌnja naꞌ, iꞌkweꞌsx naꞌwẽy ĩisxihsa yuꞌnja. Nawa adxaꞌ ĩsxiimée Dxusaꞌs jiith, saꞌ txajx jxkaahniꞌs kxteythu yuꞌ.
56 Iꞌkweꞌsx yaçgaweꞌsx Abrahanaꞌ adx naa kiwete paꞌjwaꞌjaꞌs jiyuçxaꞌ, wala weçxana yajkxku, saꞌ kxtey yuuniꞌs jiyuçxaꞌ wejxku wala weçxa.
57 Txãꞌjĩteꞌ, judiuweꞌsxaꞌ naꞌwẽtx weeçx weꞌwe:
—Idxaꞌ cinkwenta anxu yuhwa mée jiꞌphgu, saꞌ ¿maꞌwẽga txãꞌwẽ Abrahanaꞌs uy? jĩteꞌ,
58 Jesus pasçxaꞌ:
—Isath weꞌweꞌ, Abrahan meeíin, adxaꞌ ũsyãꞌth yuꞌ.
59 Txãꞌjĩteꞌ, judiuweꞌsxaꞌ ũusaçxaçxaꞌ, Jesusaꞌs kwet wãatatajxaꞌwatx yuꞌ. Nawa Jesusaꞌ txãaweꞌsx ksxavxysuy dxuus yatu kasehna uꞌkh, kim yuhwa jiyunimeete.
