Juan 9:1-41
9 Jesusaꞌ uꞌjweççxaꞌ, teeçx piçthẽꞌj naa kiwete upxhí uyyaꞌ ãjasameꞌsku puutx uy.
2 Açaꞌ txãa yakh uꞌjusaweꞌsxaꞌ Jesusaꞌs naꞌwẽtx paapẽjx:
—Naa piçthẽꞌjaꞌ ¿kĩh yuupaꞌgakiꞌk txãꞌwẽ yafx jiꞌphmée upxna ũsuꞌ? ¿Txajx pkalpaꞌga maꞌk txãꞌwẽ nxus jiꞌphu, meeçxaꞌ neyweꞌsx pkalpaꞌga wáꞌ txãꞌwẽ yuu? jĩteꞌ,
3 Jesus pasçxaꞌ naꞌjĩk:
—Txajx pkalpaꞌgawa meꞌ, saꞌ neyweꞌsx pkalpaꞌgawa meek txãꞌwẽ yuu, naasáa Dxus ewuniꞌs ãate kaavxyaꞌjaꞌkhançxáak txãꞌwẽ yuu.
4 Txãa paꞌga kaahsa mjĩiaꞌs ãate kaavxyaꞌjaꞌjna mjĩiwaꞌj jiꞌpthu nee en ũsiyna. Txãꞌwẽmeꞌ kus yãꞌtheꞌ, kim yuhwa mjĩiyaꞌ ãjameena.
5 Adxaꞌ naa kiwete nee ũsíiçxáawa, nasatx eenaꞌte kaafxiꞌzeꞌjwaꞌjsath.
6 Txãꞌjĩçxaꞌ, kiweꞌs fxneꞌsxju tuuphaꞌçxa txãa piçthẽꞌj yafxte sxũsxnaꞌwa,
7 naꞌjĩnak jxkaah:
—Meꞌj pkhiꞌkxyaꞌ Siloé yuꞌkafxte. (Txãa Siloeaꞌ Jxkaahnisa jĩniꞌ.)
Txajũꞌ txãa piçthẽꞌjaꞌ uꞌjçxaꞌ, yafxtxi pkhiꞌkxku, saꞌ uyna yãꞌkh sxawedna kũh.
8 Açaꞌ txajx yat utxasuweꞌsx vxiteꞌ nyafxíi txãꞌwẽ yafx jiꞌphmée upxsatewa ew jiisaꞌ naꞌwẽtx weꞌwe:
—Naa piçthẽꞌjí ¿nyafxíꞌ lmusxnu pẽjxna uꞌpsa meenáꞌ? jĩteꞌ,
9 maaíi yuꞌ:
—Txãaíik jĩꞌtx. Naapkaçxhaꞌ vxiteꞌ:
—Txãa naꞌwẽ yuh theguꞌk, nawa txãameꞌ jĩꞌtx. Nawa txãa piçthẽꞌj yuꞌ:
—Adxíith jĩk.
10 Txajũꞌ pẽjxtxi:
—Idx upxnijũjx uyyaꞌ ãjameeçxaꞌ, ãçxhaꞌ ¿maꞌwẽ yuuçxaga uyyaꞌ ãjaꞌ? jĩteꞌ,
11 ptaꞌsxku:
—Teeçx piçthẽꞌj Jesus yaasesaꞌ kiweꞌs fxneꞌsxju tuuphaꞌçxa adx yafxte sxũsxnaꞌwa naꞌjĩk: Meꞌj pkhiꞌkxyaꞌ Siloé yuꞌkafxte jĩteꞌ, uꞌjnaꞌwa pkhiꞌkxthu, açaꞌ adx yafxaꞌ phatetx açaꞌ uyuꞌth jĩteꞌ,
12 paapẽjxtxi:
—Idxaꞌs txãꞌwẽ kaahsaꞌ ¿mtee ũsna? jĩteꞌ:
—Jiimeeth jĩnak pas.
Fxariseoweꞌsx txãa piçthẽꞌjaꞌs paapẽyni
13 Txajũꞌ txãa piçthẽꞌjaꞌs peꞌjna uꞌjtx fxariseoweꞌsx tasxna.
14 Jesus txãꞌwẽ kiweꞌs fxneꞌsxju tuuphaꞌjçxa uyyaꞌ ãjasameꞌs yuꞌçeꞌjniꞌ kiꞌswaꞌj enneꞌ yuꞌ.
15 Açaꞌ fxariseoweꞌsxaꞌ kiꞌ paapẽjxtxi txãa piçthẽꞌjaꞌs:
—¿Maꞌwẽ yũuçxaga ãçxhaꞌ uyyaꞌ ãjaꞌ? jĩteꞌ, naꞌjĩnak ptaꞌsx:
—Kiweꞌs fxneꞌsxju tuuphaꞌçxa adx yafxte sxũsxku, açaꞌ pkhiꞌkxthu saꞌ uyyaꞌ ãjath jĩk.
16 Txajũꞌ fxariseoweꞌsx maaíi yuꞌ naꞌwẽtx weꞌwe:
—Txãꞌwẽ yũusaꞌ Dxus luuçx meena, kiꞌswaꞌj enaꞌs kiꞌsuꞌçmeꞌ naꞌ jĩteꞌ, vxiteꞌ naꞌwẽtx weꞌwe:
—Pkalsaçxaꞌ, ¿maꞌwẽ txãꞌwẽ kim yuhwa ãjãnimeesaꞌs kaavxyaꞌjaꞌjyaꞌ ãjãkx?
Txajũꞌ txãaweꞌsxíiçxáa txãꞌwẽ weꞌweçxaꞌ, puutx puiidxiꞌtx neeyũu.
17 Saꞌ txãa piçthẽꞌjaꞌs kiꞌ paapẽjxtxi:
—Iidx yafxaꞌs yuꞌçeꞌjsaꞌ ¿kimna sũjuꞌga? jĩteꞌ:
—Txãꞌ Dxus yuwe ptaꞌsxsana sũjuꞌth jĩnak pas.
18 Txãꞌwẽ upxnijũjx uyyaꞌ ãjasameeçxawa ãçxhaꞌ uyuꞌth jĩtewa, judiuweꞌsx yuꞌ txãꞌwẽneꞌ yuꞌ sũjuꞌçmeetaꞌ. Saꞌ txãa piçthẽꞌj neyweꞌsxtxi paꞌyaçxaꞌ,
19 paapẽjxtxi:
—¿Naa txãꞌwẽ iꞌkweꞌsx luuçx upxnijũjx uyyaꞌ ãjasameena wakx? Saꞌ ¿maꞌwẽ yũuçxaga ãçxhaꞌ uyyaꞌ ãjaꞌ? jĩteꞌ,
20 neyweꞌsx pasçxaꞌ:
—Naꞌ kweꞌsx luuçx yujaꞌ, txãꞌwẽ upxhíi uyyaꞌ ãjasameetewa txãꞌsaꞌ jiithaꞌw.
21 Nawa jiimeethaꞌw maꞌwẽ yũuçxaneꞌ ãçxhaꞌ uyyaꞌ ãjaꞌ. Saꞌ kim txãꞌwẽ yafxtxiꞌ yuꞌçeꞌthewa txãꞌsnawa jiimeethaꞌw. Txãꞌs yuu mpẽjxwe, txãꞌ thẽꞌjsayãꞌjaꞌ naꞌ txãa ptaꞌsxina.
22 Paapẽysatxiꞌ ũukhçxatx txãꞌwẽçxáa pas. Txãꞌwẽmeꞌ maa txãꞌwẽ Jesusaꞌ Dxus kaahni Kristoꞌ jĩna tuutheꞌjena txãꞌsaꞌ fxariseoweꞌsxaꞌ ahçeçxa peena yuꞌ txãaweꞌsx pkhaakhenite kaapaꞌjaꞌjyaꞌméetx ũsuꞌ.
23 Açaꞌ txãꞌwẽ yuuyaꞌwatetx ũukhçxa: Naꞌ thẽꞌjsayãꞌjaꞌ naꞌ txãa ptaꞌsxina jĩnaçxáa pasuꞌ.
24 Txajũꞌ fxariseoweꞌsxaꞌ txãa piçthẽꞌjaꞌs kiꞌ paꞌyaçxaꞌ naꞌwẽtx weꞌwe:
—Dxus dxiꞌpte ĩsxiimée mpeetaꞌsx. Kweꞌsxaꞌ jiithaꞌw iidx yafxtxi yuꞌçeꞌjsaꞌ pkalsatewa jĩteꞌ,
25 txãa piçthẽꞌj pasçxaꞌ naꞌjĩk:
—Pkalsa wáana nawa adxaꞌ jiimeeth. Adxaꞌ naꞌwẽçxáa jiith: nyafxíꞌ uyyaꞌ ãjaꞌçmeeth, nawa ãçxhaꞌ uyuꞌth jĩteꞌ,
26 kiꞌ paapẽjxtxi:
—¿Kĩhga yũu? saꞌ ¿maꞌwẽçxah yũuçxaga iidx yafxtxiꞌ yuꞌçeꞌj? jĩteꞌ,
27 txãꞌ naꞌwẽk pas:
—Ptaꞌsxyãꞌth, nawa ptaꞌsxtewa açeweꞌweꞌçxáa iꞌkwe. Saꞌ ¿kĩjxaꞌkwe peena ptaꞌsxkajaꞌ? ¿Iꞌkweꞌsxwa txãa yakh uꞌju wẽjeꞌwáꞌkwe? jĩteꞌ,
28 naꞌjĩnatx wẽesxũu:
—Idxaꞌ txãa yakh uꞌjusag. Nawa kweꞌsxaꞌ Moises jxkaahniꞌs nwẽeseꞌjsathaꞌw.
29 Kweꞌsxaꞌ jiithaꞌw Dxusaꞌ Moises yakh puutx weꞌwek. Nawa txãa thẽꞌjaꞌs majũweꞌsxtewa jiimeethaꞌw.
30 Txajũꞌ txãa piçthẽꞌjaꞌ naꞌwẽk weꞌwe:
—Wala yuh fxiyaꞌ, adx yafxtxi yuꞌçeꞌjsaꞌs majũweꞌsxtewa iꞌkweꞌsxaꞌ jiyumeeteꞌ.
31 Maawa jiithaꞌw Dxusaꞌ pkalsaweꞌsx weꞌweniꞌs pasuꞌçmeꞌ, naasáa Dxusna yajkxçxa txajx jxkaahniꞌs kxtey yuusaçxáatxku Dxusaꞌ pasuꞌ.
32 Bagaçxte yuhwa iiwẽseꞌjmeethaꞌw upxhíi uyyaꞌ ãjasameetx kiꞌ kaauyuꞌjni yuꞌsaꞌ.
33 Adx yafxtxi yuꞌçeꞌjsaꞌ Dxus kaahnisameewaçaꞌ, txãꞌwẽ kaauyuꞌjyaꞌ ãjawaꞌjmeeneꞌ yuꞌ jĩteꞌ,
34 naꞌwẽtx wẽesxũu weꞌwe:
—Idxaꞌ upxhí iidx ũuste pkalçxaçxáa uta jiꞌph upxsag naꞌ ¿maꞌwẽtega kweꞌsxtxi yuꞌkxpeh wẽjeꞌ? jĩna açeweꞌweçxaꞌ, neeutx peena yuꞌ jxpaꞌgayaꞌmée.
Uysaaçxawa Dxus yuꞌs jiimeesa
35 Txajũꞌ Jesusaꞌ txãa piçthẽꞌjaꞌs neeuniꞌs jiyuçxaꞌ, kiꞌ puutx uyçxaꞌ naꞌwẽk pẽjx:
—¿Dxus Nçxiꞌk kimtewa jiigáꞌ? jĩteꞌ,
36 txãa piçthẽꞌj pasçxaꞌ:
—Mpeetaꞌsx adx jiyukahn jĩna pẽjxteꞌ,
37 Jesusaꞌ ptaꞌsxku:
—Idxaꞌ Dxus Nçxiꞌkaꞌs iiuyyãꞌjg. Adxíith, açaꞌ idxaꞌ txãa yakhgu puutx weꞌweꞌ.
38 Txãꞌjĩteꞌ, txãa piçthẽꞌjaꞌ Jesus tasxte peejxũkweçxaꞌ:
—Idxaꞌ Dxus Nçxiꞌk yuh yuꞌga sũjuꞌth jĩteꞌ,
39 Jesusaꞌ naꞌjĩnak ptaꞌsx:
—Adxaꞌ naꞌwẽ yuuyaꞌíiçxáath naa kiwete kĩh, uyyaꞌ ãjasameeçxawa uyyaꞌ ãjãkahn, açaꞌ makwe uysaaçxawa uyyaꞌ ãjãkahmén.
40 Txajũꞌ fxariseoweꞌsx kxtee ũssaꞌ txãꞌwẽ wẽseꞌjçxaꞌ, naꞌwẽtx pẽjx:
—Kweꞌsxwa uyyaꞌ ãjasameewáꞌntkaꞌw jĩteꞌ,
41 Jesusaꞌ naꞌjĩnak ptaꞌsx:
—Iꞌkweꞌsxaꞌ uyyaꞌ ãjãsamée dxihwaçaꞌ, yuuwesamée yuuneꞌkwe. Nawa uyuꞌthaꞌw jĩꞌiꞌkwe naꞌ, txãa paꞌga Dxus dxiꞌpteꞌ yuuwesaiꞌkwe jĩk.
