Kolosenses 1:1-29
1 Adxaꞌ Jesukristo jxkaahnisa Pablo yaaseth, txãꞌwẽte selpiwaꞌjsa Dxus nvxiitnisa.
2 Txãa paꞌga Dxus luuçx Kolosas çxhabteweꞌsx jĩi naa kartaꞌs fxiꞌjçxa kajaçthu, Kristoꞌs nwẽeseꞌjsaweꞌsxtxi weçxana yakhthẽꞌj Timoteo yakh. Iꞌkweꞌsxtxiꞌ Dxus kweꞌsx Tataꞌ puꞌçxhina, ewçxáa kaafxiꞌzeꞌjna.
Dxus yakh fxiꞌzesaweꞌsx paꞌgate Pablo Dxus yakh puutx weꞌweni
3 Iꞌkweꞌsx paꞌgate Dxus yakh puutx weꞌweççxaꞌ, kweꞌsxtxi nweꞌwesa Jesukristo Tataꞌs wala weçxaꞌthaꞌw bagaçxtewa.
4 Iꞌkweꞌsxaꞌ Kristo Jesus yakh jxpubamée Dxus luuçx jxukaysa yakh puutx yaꞌpeeygãhna ũstaꞌ jĩniꞌsthaꞌw jiyu.
5 Txãꞌwẽ iꞌkweꞌsx jĩi cielute jxaawni ũsaꞌ txãꞌsna jxpaꞌgayaꞌ sũhçxaneꞌkwe txãꞌwẽ ew fxiꞌzeꞌ, saꞌ Dxus yuwe ewte nvxiitwaꞌjsa isasaꞌs ptaꞌsxte wẽseꞌjçxaneꞌkwe cieluteweꞌsxaꞌsçxáa ũythasyaꞌ yajkx.
6 Dxus yuwe ewte nvxiit-saꞌs ptaꞌsxnisa ãçxhaꞌ txakwe walaana uꞌjweçaꞌ naa kiwete mtee mteewa jxuka. Iꞌkweꞌsxwa Dxus peeygãani isasaꞌs ptaꞌsxteꞌ, isasa yuhna sũhna jxpaꞌganijũjx, maꞌwẽga pehnana uꞌj txãꞌwẽy yuuçaꞌ.
7 Kweꞌsx yakhthẽꞌj Epafxras Kristoꞌs selpisáa txãꞌwẽk Dxus yuwe ewte nvxiit-saꞌs iꞌkweꞌsxtxi kaapiyaꞌj txãꞌsna iipeꞌjiꞌkwe. Txãꞌ nyafxíi yuꞌ kweꞌsx yakhku mjĩi puꞌçxsa yuꞌ.
8 Txãak Dxus Espiritu yuuçxáꞌs nwẽeseꞌjna peeygãhna ũstaꞌ jĩna ptaꞌsx.
9 Iꞌkweꞌsx txãꞌwẽ ew fxiꞌzeniꞌs ptaꞌsxiyna, Dxus yakh puutx weꞌwena nesthaꞌw yuꞌ iꞌkweꞌsx paꞌgate, txãꞌwẽ Dxus yakh fxiꞌzewaꞌjaꞌs kĩhte yuhwa jxpubamée wala ew jiyuçxa txãajũ maꞌwẽ yuhwa txutemée fxiꞌzekahn.
10 Txãa paꞌga iꞌkweꞌsxaꞌ Kristo jĩiyãꞌjçxaꞌ, txajx jxkaahni yuuçxáꞌs jxuka kxtey yuuna ewçxáa fxiꞌzeçxa Dxus yakh fxiꞌzewaꞌjaꞌs jweeíiçxáa ew piyaaneꞌkwe.
11 Saꞌ txajũꞌ kĩhte yuhwa jxpubana nxusmée weçxana çxhãçxha fxiꞌzeneꞌkwe.
12 Txãꞌwẽ yũuçxa Dxusaꞌs ũusuh jxuka weçxawaꞌjaꞌs jiꞌphuneꞌkwe. Txãꞌ kweꞌsxtxi jxpaꞌgawaꞌj pheuꞌjçxa jiꞌphaꞌ txãꞌsaꞌ ũsuna txãꞌsna nwẽeseꞌjsa yuutxiꞌ jxukaysatx.
13 Txãak çxhiꞌdxte fxiꞌzena ũstewa, txajũ kutxiꞌjçxa txajx Nçxiꞌk wedxnisa tasxte nvxiht,
14 txajx Nçxiꞌk peltunãyçxa nweꞌwenisathaꞌw naa paꞌga.
Kweꞌsx paꞌgate Kristo uupaꞌga Dxus yakh yuuwemée neeyũuni
15 Dxusaꞌ kweꞌsx yafxte vxyaasameꞌ, nawa vxyaayaꞌ kĩjk txajx Nçxiꞌk Jesukristo kakwete. Txãasa Kristoꞌ Dxus íiçxáꞌ, naa kiwete kĩjkĩhtewa thaakwe yaçteweꞌsx.
16 Dxusaꞌ txajx Nçxiꞌk Jesukristoꞌsku neeweꞌweçxa nvxiht naa kiwe, cielu, kĩjkĩhçxah ũstxna, kweꞌsx yafxte vxyaasáa vxiteꞌ kweꞌsx yafxte vxyaasamée txãatx jxuka txãaçxaçxáa vxitkahn. Txãa paꞌga kĩjkĩhwa jxuka Kristo jĩitaꞌ txajx vxitnisa, saꞌ txãꞌsçxaçxáa nwẽeseꞌjwaꞌjsataꞌ, eçxthẽꞌj maꞌtx yuu angelesweꞌsx maꞌtx yuu nawa jxuka.
17 Naa kiwe meetey Kristoꞌ ũsyãꞌkh yuꞌ, saꞌ ãçxwa txãa íiçxáa ũsaꞌ, txajx paꞌga yuuçxáa kĩjkĩhwa jxuka ewçxáa ũstaꞌ.
18 Saꞌ Kristoꞌs jxpaꞌgaçxa txãa yakh fxiꞌzesa maazkuẽesatxwa jxuka Kristo íiçxáa jxkaahsaꞌ. Txãak nyafxteweꞌsx yuꞌ, saꞌ txãa íiçxáak uuçxawa nyafxte kiꞌ ĩtxi yuu, txãaçxaçxáa bagaçxtewa jxkaahwaꞌjsa.
19 Dxusaꞌ Kristoꞌs kaakh, nawa leꞌçxkweçxáa yuhwa vxitemée, Dxus íiçxáak yuꞌ.
20 Saꞌ Dxusaꞌ maa yuhtxwa nvxihtmée, naa kiweteweꞌsx kĩjkĩhwa jxuka Kristoꞌs ahçemée yuwe ewuuna paꞌjwaꞌjaꞌsku vxit, Kristoꞌs kluuste uuwaꞌj vxitçxa.
21 Iꞌkweꞌsxwa nyafxiiaꞌ Dxus luuçxmée iꞌkwe yuꞌ, Dxusaꞌs açewaꞌjçxáꞌs yajkxna fxiꞌzesa, ewmeeçxáa yũuna. Nawa ewmeesaçxawa ãçxhaꞌ Dxus tasxte paꞌjyaꞌ ãjawaꞌjaꞌs Dxusíi pheuꞌkh,
22 txãꞌwẽ Kristoꞌs pxthaa yuuçxa uuwaꞌj vxitçxa. Naasáa kweꞌsx kĩh pkal yuhwa jiꞌphmée txajx tasxte yuuçxáa selpiina fxiꞌzekahnku txãꞌwẽ yũu.
23 Açaꞌ txãꞌwẽ ew fxiꞌzeyaꞌ ãjayaꞌ, Kristo yuuçxáꞌs iiméh ew ũusuh jxuka yajkxna txajx yuwe ewsa nweꞌwewaꞌjsa ptaꞌsxniꞌs jii iꞌkwe txajũ txutenuwe. Txãa Dxus yuwe ewsa nweꞌwewaꞌjsaꞌs txãꞌwẽ mtee mteewa jxuka ptaꞌsxni yuuçaꞌ, açaꞌ txãꞌsna ptaꞌsxkahnku Dxusaꞌ nvxiht adxaꞌs.
Dxus luuçxtxi selpiikahn Dxusaꞌ Pabloꞌs neeweꞌweçxa nvxiitnisa
24 Txãa paꞌga Dxus yuweꞌs iꞌkweꞌsxtxi ptaꞌsxpaꞌga pxthaa yuuna ũsçxawa, wala weçxaꞌth. Nawa adx pxthaa yuuwaꞌj yuutxiꞌs waꞌluꞌçmeeth. Kristowa maꞌwẽga txajx nasaa paꞌgate pxthaa yuuçxa uu txãa paꞌga adxwa pxthaa yuuwaꞌjsath.
25 Dxus luuçxtxi selpiwaꞌjsak Dxusaꞌ adxaꞌs neeweꞌweçxa nvxiht, Dxus yuweꞌs iꞌkweꞌsxtxiwa ptaꞌsxkahn kĩhte yuhwa peejxmée jxuka.
26 Txãniitey bagaçxte yuhwa kaajiyuꞌjnimeesa ũsuꞌneꞌ txãꞌsnak Dxusaꞌ ãçxhaꞌ kaajiyuꞌj txajx nasatx, açaꞌ txãꞌsna ptaꞌsxwaꞌjsath.
27 Dxusaꞌ txajx yuwe kaajiyuꞌjnimeesa iiméh wala selpiwaꞌjsa yuꞌk judiu jiꞌjmée vxite nasatxwa txãꞌsnak kaajiyuꞌj txajx nasatx. Txãꞌ naak yuꞌ: Kristoꞌ iꞌkweꞌsx ũuste uꞌkak, txãa paꞌga iꞌkweꞌsxaꞌ Dxus tasxte paꞌjwaꞌjaꞌs jiꞌphiꞌkwe jĩna ptaꞌsxniꞌs iꞌkwe jiimée yuꞌ.
28 Açaꞌ Kristo iꞌkweꞌsx ũuste khẽeniꞌsthaꞌw kweꞌsxaꞌ ptaꞌsxiꞌ, yuꞌkxpehna, kaapiyaꞌjna, jxukaysa wala ew jiyuçxa teeçxsa naꞌwẽçxah Kristo yakh yuuçxáa jxpubamée fxiꞌzewaꞌjaꞌs ew piyakahn.
29 Txãꞌwẽ yũuwaꞌjaꞌs kaapiyaꞌjnath txakwe wala çxhãçxha mjĩꞌ, Kristo kĩhtewa jxuka puꞌçxte.
