Kolosenses 2:1-23
2 Iꞌkweꞌsxaꞌ mjiyuwe: Adxaꞌ iꞌkweꞌsx paꞌgate vxiteꞌ Laodiceateweꞌsx vxiteꞌ adxna jiimeesa ũstxna txãaweꞌsx jxukaysa paꞌgate iiméh wala paꞌpçxuna Dxus yakh puutx weꞌwena ũsthu.
2 Iꞌkweꞌsx jxukaysa Kristo maꞌwẽsatewa kĩhte yuhwa peejxmée jxuka ew jiyukahn txãꞌwẽ paꞌpçxuna ũsthu. Txãa Kristok iꞌkweꞌsx ũuste khẽewaꞌjsa yuꞌ txãꞌsnak txãniitey kim yuhtxwa kaajiyuꞌjnimée ũsuꞌ. Açaꞌ txãꞌsna ew jiyuçxaꞌ jxpubamée iꞌkweꞌsx pweꞌsx puutx yaꞌpeeygãhna fxiꞌzeneꞌkwe.
3 Txãa paꞌgatey maꞌwẽçxah jiyuwaꞌj peejxtewa, Kristo yuuçxáak ũsuꞌ.
4 Iꞌkweꞌsxtxiꞌ txãꞌwẽth ew ãate ptaꞌsxiꞌ, vxitesa ĩsxiina zhiçxkwe weꞌwena kaypubaꞌjweꞌsxte.
5 Adxaꞌ iꞌkweꞌsx yakh ih ũsmeeth, nawa iꞌkweꞌsx yakh ih ũs naꞌwẽ yajkxna ũsthu ũuste yuꞌ, txãasath wala weçxáꞌ, Kristo yakh yuuçxáa jxpubamée fxiꞌzepaꞌga.
6 Txãasa Jesukristoꞌs maꞌwẽkwe nyafxíi weçxana jxpaꞌga txãꞌwẽesa mfxiꞌzewe txãa yakh txutemée.
7 Bagaçxtewa Kristoçxáꞌs yajkxna txãa yuuçxáꞌs nwẽeseꞌjna Dxusaꞌs weçxana fxiꞌzewaꞌjaꞌs iꞌkwe kaapiyaꞌjni yuu, txajũ txutenuwe.
Kristo ĩtxĩ yuupaꞌga kweꞌsxwa pkaluh ĩtxĩ yuuni
8 Txãasa iꞌkweꞌsxaꞌ wala mpaꞌyajkxwe, naa kiwete nasaa pweꞌsx yajkxçxa kaapiyaꞌjniçxáꞌs ptaꞌsxna kaypubaꞌjweꞌsxte. Txãaweꞌsxaꞌ Kristo kaapiyaꞌjniꞌs kaapiyaꞌjsamée, ewmeesa jxkaahniçxáꞌs kxtey yuusataꞌ.
9 Iꞌkweꞌsxaꞌ txãꞌwẽ kaapiyaꞌjniꞌs nwẽeseꞌjwaꞌjsa meeiꞌkwe, txãa paꞌgatey Kristoꞌ Dxus maꞌwẽsatewa txãawa txãꞌwẽysaíiçxáꞌ.
10 Açaꞌ iꞌkweꞌsxaꞌ txãꞌsna ũuste jxpaꞌganijũꞌ Kristo yakh teeçxçxáa iꞌkwe yuuna paꞌjaꞌ. Txãa paꞌga jwee yuꞌ vxite yuꞌ kĩhwa peejxmée yãꞌjiꞌkwe, txãa paꞌgatey Kristoçxaçxáa jxuka jxkaahsaꞌ naa kiweteweꞌsx vxiteꞌ ẽe walasu ewmeesa ũstxna txãa yãꞌjçxa.
11 Kristoꞌs ũuste jxpaꞌganijũyãꞌjaꞌ, cirkuncidãyni naꞌwẽ yãꞌjiꞌkwe neeyũꞌ. Nawa peekx kakweteweꞌsxna cirkuncidaĩꞌtx txãamée, iꞌkweꞌsx ewmée yũuna fxiꞌzenijũ Kristo nweꞌwenisa cirkuncidãyni yaaseꞌ. Kristoꞌ txãꞌwẽçxáak yuꞌ.
12 Txãꞌwẽ yũunijũꞌ iꞌkweꞌsxaꞌ yuꞌte yaꞌbautisãyçxaꞌ Kristo yakh jaꞌda pedani naꞌwẽsa iꞌkwe yuu, saꞌ Kristo yakh jaꞌda kiꞌ ĩtxi yuusáa naꞌwẽ iꞌkwe yuu, txãꞌwẽ Kristo uutewa Dxusaꞌ kiꞌ ĩtxi vxitku sũhwaꞌjaꞌs jiꞌphuiꞌkwe naa paꞌga.
13 Nawa nyafxíi yuꞌ iꞌkweꞌsxaꞌ pkalpaꞌga Dxus dxiꞌpte uuníi naꞌwẽiꞌkwe ũsuꞌ, pkaluh txudenimée. Txãꞌwẽtewa ãçxhaꞌ Dxusaꞌ pkaltxi jxuka peltunãypaꞌga iꞌkweꞌsxaꞌ Kristo naꞌwẽy ĩtxi yuusáa naꞌwẽ iꞌkwe yuu.
14 Kweꞌsxaꞌ Dxus jxkaahniꞌs nwẽeseꞌphaꞌgamée yuuwesaneꞌtkaꞌw yuꞌ. Nawa Kristo kluuste uupaꞌga Dxusaꞌ jxuka peltunãyku.
15 Saꞌ txãꞌwẽçxáa yuumée, eçxthẽꞌj txãa yakh ũssa yãꞌjçxa jxuka knayçxa Kristoçxaçxáꞌs bagaçxtewa nwẽeseꞌjwaꞌjaꞌs vxitçxak nvxiht Dxusaꞌ.
Naa kiweteweꞌsxaꞌs nwẽeseꞌjmée cieluteweꞌsxaꞌsçxáa mpaakwewe
16 Txãꞌwẽ Kristo nweꞌwenisa yãꞌjaꞌ ãçxhaꞌ kim yuhwa leyaꞌs nwẽeseꞌjwaꞌjaꞌs jxkaahwaꞌj jiꞌphmeetaꞌ, iꞌkweꞌsx ũꞌniꞌs weꞌwena meeçxaꞌ kiꞌswaꞌj en txãꞌwẽsatx.
17 Txãꞌwẽ yũunisaꞌ naasáa teeçx paꞌjwaꞌjsa ũsuꞌk txãꞌsna jxpaꞌgawaꞌjaꞌs kaapiyaꞌjsaçxáatx yuꞌ. Açaꞌ ew jiyute yuꞌ, txãa paꞌjwaꞌjsaꞌ Kristok yuꞌ.
18 Iꞌkweꞌsxaꞌ ĩsxiisaweꞌsxtxi mpaꞌyajkxwe. Txãꞌwẽmeꞌ, txãaweꞌsxaꞌ wala ewsathaꞌw jĩna angelesweꞌsxtxi neeweꞌwena, kĩhwa uysameeçxawa txãꞌwẽ ewsaçxáꞌs ĩꞌkhsathaꞌw jĩna iiwejçx weꞌwena iꞌkweꞌsxtxi kaypubaꞌjatxna.
19 Txãaweꞌsxaꞌ Kristo yakh fxiꞌzesameetaꞌ. Kristo yakh fxiꞌzewaç yuꞌ, wala yuh ewna, txãa paꞌgatey Kristo kĩhtewa jxuka kçxhãaçxhaꞌjna txajx nasa yuutxiꞌ jxpeꞌjsaꞌ, Dxus jxkaahniꞌs kxtey yuuna.
20 Iꞌkweꞌsxaꞌ naa kiwete piçthẽꞌjweꞌsx weꞌweniꞌs nwẽeseꞌjyaꞌmée, Kristo yakh jaꞌda uusáa naꞌwẽ yuusáa iꞌkwe. Saꞌ ¿kĩjxaꞌçxáa piçthẽꞌjweꞌsx weꞌweniꞌs nwẽeseꞌjwaꞌjsamée yãꞌjçxaꞌ, txãaweꞌsx txãꞌjĩna jxkaahnitxiꞌ nwẽeseꞌjna ũsukiꞌkwe?
21 Txãaweꞌsxaꞌ naꞌwẽtx jxkaajaꞌ: Txãꞌsaꞌ jxaꞌdxnu, txãꞌsaꞌ ũꞌnu, txãꞌsaꞌ jxpaꞌganu jĩna kĩjkĩhwa wala jxkaajaꞌtx.
22 Txãꞌwẽ jxkaahnisaꞌ naa kiwete piçthẽꞌjweꞌsx kaapiyaꞌjnisaçxáataꞌ, jxuka skhẽwwaꞌjsa.
23 Txãatx jxpaꞌyakxmeeteꞌ, ewsa naꞌwẽ yuh theguna, txãa paꞌgatey iiwejçx yajkxmée peekx kakweꞌs ew kaafxiꞌzeꞌjwaꞌjaꞌsku jxkaajaꞌ. Nawa naa kiwete ewmée yajkxna fxiꞌzeniꞌs yuꞌ neeweyaꞌ ãjaꞌçmeꞌ.
