Kolosenses 3:1-25
3 Iꞌkweꞌsxaꞌ Kristo yakh jaꞌda ĩtxi yuusáa naꞌwẽ yuusáa yãꞌjçxaꞌ, cielute iiméh zhiçxkwesa bagaçxtewa wẽt fxiꞌzewaꞌjaꞌsçxáa mpaakwewe, Dxus pukate Kristo ũsniteweꞌsxna.
2 Naa kiweteweꞌsxaꞌs yajkxmée, cieluteweꞌsxçxáꞌs myajkxwe,
3 txãa paꞌgatey iꞌkweꞌsxaꞌ Kristo yakh jaꞌda uusáa naꞌwẽ yuupaꞌga, Kristo yakh fxiꞌzeçiꞌkwe Dxus tasxte.
4 Saꞌ iꞌkweꞌsxtxi ĩtxi kaafxiꞌzeꞌjsa Kristo vxyaateꞌ, iꞌkweꞌsxwa txãa maꞌwẽsateꞌ txãꞌwẽysa yuuçxa txãa yakh ih ũsyaꞌ uꞌjweneꞌkwe.
Ewmeesatxiꞌ nvxihtçxa ew yũuna fxiꞌzenitx jxpaꞌgani
5 Txãa paꞌga iꞌkweꞌsx ũus yaakxni ewmeesa naataꞌ txãatxiꞌ jxuka manvxihtwe: ptamumey pkalte fxiꞌzeni, ptamsaçxawa vxitesa yakh pkal yũuna fxiꞌzeni, kĩhwa ewmée yũuwaꞌjçxáꞌs yaakxni, Dxus yuꞌs yajkxmée jweeíiçxáa jiꞌphu wẽena fxiꞌzeni, (txãꞌwẽ jiꞌphu wẽeniçxáꞌs yajkxteꞌ, txãꞌsçxáanak Dxus naꞌwẽ yaakxwaꞌj kasejeꞌ.)
6 Txãꞌwẽ ewmée yũupaꞌga íiçxáa Dxus kastigo seenaꞌsa yujaꞌ Dxusaꞌs nwẽeseꞌjsameeweꞌsxtxi.
7 Iꞌkweꞌsxwa txãꞌwẽ yũuna fxiꞌzesaiꞌkwe yuꞌ.
8 Nawa ãçxhaꞌ naꞌwẽsatx jxuka manvxihtwe: pxũuskwe yaakxni, ũusçxani, vxitetx ewmée nuyweꞌweni, wẽesxuni, kazx weꞌweni txãꞌwẽsatx.
9 Txãa paꞌgatey jxuka nvxiht yãꞌjiꞌkwe naꞌ puutx yaꞌĩsxiina fxiꞌzemée,
10 ewçxáa yũuna fxiꞌzewaꞌjaꞌs jxpaꞌgaçxa ũsiꞌkwe. Txãꞌwẽ yũuçxaꞌ iꞌkweꞌsxaꞌ jweeíiçxáa yaꞌyuꞌpthehna uꞌjweneꞌkwe, Dxusaꞌs ew jiyuna paꞌjçxa txãa naꞌwẽy yuuna paꞌjyaꞌ.
11 Açaꞌ txãꞌwẽ yaꞌyuꞌpthehnisaꞌ maawa jxuka kxteeçxah teeçxçxáa yuuna paꞌjsataꞌ. Judiuweꞌsx maꞌtx yuu, judiuweꞌsxmée maꞌtx yuu, cirkuncidãynisaweꞌsx maꞌtx yuu, cirkuncidãynimeesaweꞌsx maꞌtx yuu, wala jiisa maꞌtx yuu, jiimeesa maꞌtx yuu, patron jiꞌphsa maꞌtx yuu, patron jiꞌphmeesa maꞌtx yuu nawa maawa jxuka kxteeçxah teeçxçxáa yuuna paꞌjsataꞌ. Txãa paꞌgatey Kristoꞌs jxpaꞌganiçxáa txãꞌwẽꞌ, Kristo jxukaysaweꞌsx jĩꞌ.
12 Iꞌkweꞌsxaꞌ Dxus peeygãhçxa txhitxnisaiꞌkwe, txãa paꞌga iꞌkweꞌsx ũuste naꞌwẽsatx jxpaꞌgaçxa mfxiꞌzewe: vxitetx peeygãawaꞌjaꞌs, puꞌçxna fxiꞌzewaꞌjaꞌs, iiwejçx yajkxmée maa yakhwa jxuka ewçxáa fxiꞌzewaꞌjaꞌs, puutx ũusçxa yajkxmée fxiꞌzewaꞌjaꞌs.
13 Makwe ewmée nuyweꞌwetewa puutx yaꞌpeltunãyna mfxiꞌzewe. Kristowa maꞌwẽga iꞌkweꞌsxtxi peltunãy txãꞌwẽy myũuwe iꞌkweꞌsx pweꞌsx.
14 Saꞌ peeygãhna fxiꞌzewaꞌj yuuçxáꞌs kĩhtewa thaakwe wala mjiꞌphuwe. Txãa maatewa thaakwe peejxsaꞌ.
15 Txãꞌwẽ yũunijũꞌ Dxusaꞌ ũsuna jxukaysa kxteeçxah ũuste wẽt weçxana fxiꞌzewaꞌjaꞌs. Txãꞌwẽ jxukaysatx kxteeçxah teeçxçxáa vxit-yaꞌíiçxáak Dxusaꞌ iꞌkweꞌsxtxi txhitxh, txãa paꞌga mweeçxawe.
16 Ãçxhaꞌ Kristo kaapiyaꞌjniꞌs iꞌkweꞌsx ũuste jxuka mpiyawe. Txãꞌwẽ yũuçxa puutx kaapiyaꞌjna, wala jxpaꞌyakx puutx yuꞌkxpehna, Dxusaꞌs ũuste weçxana memna mfxiꞌzewe.
17 Iꞌkweꞌsxaꞌ kĩh yũuna ũsçxawa, Kristo Jesusaꞌs tuutheꞌjwaꞌjaꞌs yuuçxáa myajkxwe, Dxusaꞌs yuuçxáa weçxana.
Yatteweꞌsx maa yakhwa jxuka yaꞌnwẽeseꞌjna fxiꞌzeni
18 Nyuuweꞌsxaꞌ iꞌkweꞌsx nmiꞌtx nwẽeseꞌjwaꞌj jiꞌphiꞌkwe. Kristoꞌs jiiyãꞌjçxaꞌ, zhiçxkwe fxiꞌzewaꞌjaꞌ.
19 Açaꞌ nmiꞌweꞌsxwa peekx nyuu yakh puiina yahçemée peeygãhna mfxiꞌzewe.
20 Txãꞌwẽy luuçxweꞌsxwa iꞌkweꞌsx neyweꞌsxtxi kĩhtewa jxuka mwẽeseꞌjwe. Txãꞌwẽ yũuniꞌs Dxusaꞌ weçxaꞌk.
21 Neyweꞌsxaꞌ peekx luuçxtxi zhiçxkwe yuꞌkxpehna miipeꞌjwe pkxuumée, iꞌkweꞌsx yakh kuçxkahmen.
22 Selpisaaweꞌsxaꞌ naa kiwete iꞌkweꞌsx patronweꞌsx jxkaahnitx waꞌlmée mwẽeseꞌjwe kĩhtewa jxuka. Patronweꞌsx thegna ũste ãajuçxáa nwẽeseꞌjmée, ũusuh jxuka waꞌlmée mwẽeseꞌjwe, Dxusaꞌ jiina sũhna.
23 Kĩh mjĩiççxawa waꞌlmée Kristoꞌs selpiiçthu sũhnaçxáa kxtey myuuwe, nasatx selpiiçthu sũhmée.
24 Txãꞌwẽ yajkxna selpiipaꞌga, Kristoꞌ iꞌkweꞌsxtxiꞌ cielute deweena, txãa paꞌgatey Kristo jĩi sũhçxaneꞌkwe mjĩi naa paꞌga.
25 Nawa maawa waꞌl yajkxna mjĩisaꞌ açxamée ewsaçxáꞌs jxpaꞌgatxna, txãa paꞌgatey Dxusaꞌ jxuka jiiaꞌ maꞌwẽ yũuna fxiꞌzesatewa.
