Kolosenses 4:1-18
4 Patronweꞌsxaꞌ iꞌkweꞌsxtxi selpisaatx ewçxáa jxpeꞌjna meswe. Txãꞌwẽmeꞌ, iꞌkweꞌsxwa selpisáa íiçxáa iꞌkwe, iꞌkweꞌsxtxi jxkaahsaꞌ Kristo cielute ũsaꞌ.
2 Ãçxhaꞌ wala jxpaꞌyakx Dxus yakh yuuçxáa puutx weꞌwena meswe, peçxkanamée Dxusaꞌs weçxana.
3 Saꞌ kweꞌsx paꞌgatewa txãꞌwẽy Dxus yakh puutx weꞌwena meswe, Dxus yuwe ptaꞌsxwaꞌj en vxyaakahn, kxah Kristoꞌs maꞌwẽ ũuste jxpaꞌgawaꞌjaꞌswa jiyunimeesaꞌs ptaꞌsxiꞌnja. Txãꞌwẽ ptaꞌsxpaꞌgaíiçxáa adxaꞌ preesu ũsthu.
4 Nawa Dxus puꞌçxteꞌ, sxiigmée ew ãate kaajiyuꞌjuꞌnja.
5 Dxusna jiimeesaweꞌsx yakh wala jxpaꞌyakx ewçxáa mfxiꞌzewe, ewmée weꞌwekahmen. Saꞌ Dxus yuwe ptaꞌsxwaꞌj enaꞌs ivxiitnuwe.
6 Iꞌkweꞌsxaꞌ zhiçxkwe ewçxáa jxpaꞌyakx mweꞌwewe. Txãꞌwẽ yũuçxaꞌ, maꞌwẽsa yakhwa thẽymée pasyaꞌ ãjaneꞌkwe.
Yuwe weçxaa kaahnitx fxiꞌjni
7 Kweꞌsx yakhthẽꞌj Tíkiko Kristoꞌs selpiik adx yakh jaꞌda kĩhtewa puꞌvxitumée puꞌçxna txãꞌ iꞌkweꞌsxtxi ptaꞌsxina adx fxiꞌzeniꞌs.
8 Txãꞌwẽ ptaꞌsxna iꞌkweꞌsxtxi kçxhãaçxhaꞌkhan kajaçthu.
9 Txãa yakh teeçx piꞌkxna yujaꞌ, Kristoꞌs jxpaꞌgasa kweꞌsx yakhthẽꞌj Onésimo. Txãꞌ iꞌkweꞌsx çxhabteyweꞌsxaꞌ. Txãaweꞌsx paꞌjçxa jxuka ptaꞌsxitxna aysũ kĩhçxah yũuçtewa.
10 Karcelte adxna piꞌkxna ũssa Aristarkowa yuwe weçxa kajaꞌk, vxiteꞌ Bernabé pukakhẽ nyakh Markoswa. Iꞌkweꞌsxaꞌ jiiyãꞌjiꞌkwe Markos maꞌwẽsatewa, txãa paꞌga waꞌlmée mpaꞌgawe.
11 Jesus Justo jĩꞌtx txãawa yuwe weçxaa kajaꞌk. Judiuweꞌsx Kristoꞌs jxpaꞌgasa adxaꞌs puꞌçxsa yuꞌ txãaweꞌsx yuuçxáatx yuꞌ, Dxus jxkaahwaꞌjaꞌs ptaꞌsxsa. Txãa paꞌga adx yakhaꞌ wala weçxa yujaꞌ.
12 Kristoꞌs selpisáa Epafxraswa yuwe weçxaa kajaꞌk. Txãꞌ iꞌkweꞌsx yakh ũssak yuꞌ. Txãꞌ iꞌkweꞌsx paꞌgate bagaçxtewa Dxusaꞌs neeweꞌwena nesku yuꞌ, kĩhtewa jxpubamée Dxus jxthãasniçxáꞌs kxtey yuuna fxiꞌzekahn.
13 Adxaꞌ jiith Epafxrasaꞌ iꞌkweꞌsxtxi yajkxna wala paꞌpçxuꞌk, Dxusaꞌs neeweꞌwena. Saꞌ Laodicea çxhabteweꞌsx vxiteꞌ Hierapolis çxhabteweꞌsxtxiwa txãꞌwẽyku Dxusna neeweꞌweꞌ.
14 Médiko Lukas vxiteꞌ Demas txãaweꞌsxwa yuwe weçxaa kajaꞌtx.
15 Yuwe mweeçxawe yakhthẽꞌjweꞌsx Laodiceateweꞌsxtxi vxiteꞌ Ninfxasna, saꞌ txajx yatte pkhaakhesaweꞌsxtxiwa txãꞌwẽy.
16 Naa kartaꞌs iꞌkweꞌsx pweꞌsx lẽeyna jxãꞌjçxaꞌ, mkaahwe Laodicea çxhabte pkhaakhesaweꞌsx lẽeykahn, saꞌ Laodicea çxhabteweꞌsxtxi karta kaath txãa karta iꞌkweꞌsx tasxte paꞌtheꞌ, txãꞌsnawa mlẽeywe.
17 Arkiposaꞌs naꞌjĩna myuꞌkxpehwe: Kristo mjĩiaꞌs kxtey myuu jĩna.
18 Adx kuseju yuu naa kartaꞌs fxiꞌjçxa kajaçthu iꞌkweꞌsxtxi weçxana. Nawa adxaꞌs peçxkanamée yajkxna mfxiꞌzewe, preesu ũsthu naa paꞌga.
Iꞌkweꞌsxtxiꞌ Dxusaꞌ puꞌçxhina.
