Lukas 1:1-80
1 1:1-4 Adx namiku Teófxilo, idxaꞌs khiyuꞌjna fxiꞌjaçthu kweꞌsx ensu naꞌwẽ yuuk txãꞌsna. Txãꞌsaꞌ txãꞌwẽ yũuyaꞌ takheçíyna, Kristo yakh uꞌjusaweꞌsxaꞌ maꞌwẽçxahneꞌta ew uy txãꞌwẽytxi txãaweꞌsxaꞌ kweꞌsxtxi ptaꞌsx, açaꞌ txãꞌsaꞌ maawa txãꞌwẽyta ew ptaꞌsxna fxiꞌjçxa nvxiit wẽe. Txãa paꞌga adxwa maꞌwẽçxahneꞌ yũu txãꞌsaꞌ wala ew jxpaꞌyakx paapẽjxçxa idxna ptaꞌsxna fxiꞌjaçthu, kxah isa yuh ptaꞌsxiꞌneꞌta sũjũneꞌga.
2 —
3 —
4 —
Juan Bautista upxwaꞌjaꞌs ptaꞌsxni
5 Judea kiwete neꞌjweꞌsx Herodes ensuꞌ, teeçx sacerdote Zakarias yaasesak uꞌpuꞌ. Txãa yuꞌ, sacerdote neꞌjweꞌsx Abias jiꞌkh yuꞌ. Açaꞌ txajx nyu Elisabet yuꞌ, Aarón jiꞌkh yuꞌ.
6 Ptamíi Dxus jxkaahnitxiꞌ nwẽesẽꞌjsatx yuꞌ, txãa paꞌga Dxus dxiꞌpte ew fxiꞌzesatx yuꞌ.
7 Nawa txãaweꞌsxaꞌ luuçx jiꞌphmeetx yuꞌ, Elisabethaꞌ luuçx jiꞌphuwaꞌjsameeneꞌ yuꞌ naa paꞌga. Khĩçxawa wala thẽꞌkhwe yãꞌj yuꞌtx.
8 Zakarias yakh ũssaweꞌsxtxi dxuus yatte selpiwaꞌj en ãhteꞌ, naꞌwẽk yuu:
9 Dxuus yat altalte wẽt putasá inciensoꞌs kabxaꞌ uꞌkawaꞌjsa kimtewa jiyuyaꞌ, sacerdoteweꞌsxaꞌ swerte naꞌwẽsa kutxiꞌjtx. Açaꞌ kxteeaꞌ Zakariasku kaseh.
10 Txajũꞌ Zakariasaꞌ Dxus altalte wẽt putasaꞌs kabuçteꞌ, nasa paꞌjsaꞌ jxukaysa ekajuçxáatx Dxus yakh puutx weꞌwena ũsuꞌ.
11 Naapkaçxhaꞌ Zakariasaꞌs vxyaak Dxus jxkaahni teeçx angel altal pukate paçu juꞌgte.
12 Açaꞌ Zakariasaꞌ txãꞌs uyçxaꞌ, kuh yajkxna wala ũukhku.
13 Nawa txãa angel yuꞌ naꞌjĩk:
—Zakarias, ũukhnu. Iidx pxthaa weꞌweniꞌs Dxus pasçxa kxtey yuuçaꞌ, açaꞌ iidx nyu Elisabethaꞌ luuçx jiꞌphuna. Txãa luuçxaꞌs Juan yaseneꞌga.
14 Txãꞌwẽ yuuteꞌ, idxaꞌ wala weçxana neeyũuneꞌga, açaꞌ maawa txãꞌwẽçxaçxáa weçxaatxna txajx upxniꞌs jiyuçxaꞌ,
15 txãa paꞌgatey txãa luuçxaꞌ Dxus dxiꞌpte walasa yuuwaꞌjsaꞌ. Txãasa kĩhwa ktũꞌjuꞌjwaꞌjsa yuꞌsaꞌ tudxmeena, naasáa Dxus Espiritu yuuçxáana ũuste jxuka jiꞌphuna njĩꞌj tutxhu yuu kasehmey.
16 Saꞌ Israel kiwesuweꞌsxtxi maazkuẽesatxwa takiꞌsa Dxus tasxtey kiꞌ kuutxaꞌjana.
17 Txãa Juanaꞌ Dxus Nçxiꞌk yaçte pekũjuna, saꞌ Dxus yuwe ptaꞌsxsa Elias Espiritu kĩhtewa ãjawaꞌjsaꞌs jiꞌphuꞌk txãꞌsna íiçxáa jiꞌphuna. Txãasa neyweꞌsxtxi luuçx yakh kaapuiꞌjmée kaafxiꞌzeꞌjena, saꞌ nwẽesẽꞌjsameetxwa nwẽesẽꞌjyaꞌ kaapiyaꞌjana. Txãꞌwẽ yũuna nasatx pheuꞌjuna Dxus Nçxiꞌkaꞌs jxpaꞌgakahn jĩteꞌ,
18 Zakariasaꞌ naꞌjĩnak pẽjx:
—Kweꞌsxaꞌ ptamíi wala thẽꞌjyãꞌthaꞌw, açaꞌ ¿maꞌwẽ yũuçxa iidx txãꞌjĩniꞌ kxtey yuuneꞌthewa ew jii neeyũukiꞌth? jĩk.
19 Açaꞌ Dxus angelaꞌ ptaꞌsxku:
—Adxaꞌ Dxusna selpiina fxiꞌzesa Gabrielthu. Txãa paꞌgak adxaꞌs jxkaah, idxaꞌs naa yuwe ewsaꞌs ptaꞌsxkahn.
20 Nawa adx ptaꞌsxniꞌs txãꞌwẽ dxih yuuna sũhmeeg naa paꞌga ãçxhíi weꞌweyaꞌ ewumée neeyũuneꞌga iidx nçxiꞌk upxpkaçx jĩk.
21 Dxuus yat dxiite txãꞌwẽ jxthẽeyũuteꞌ, ekaju nasa yuꞌ Zakariasaꞌs ũythasnatx ũsuꞌ, ¿kĩh yuuçxakiꞌk txakwe jxthẽeyũu? sũhna.
22 Txajũꞌ Zakariasaꞌ kasehçxaꞌ, weꞌweyaꞌ ãjãmeeçxaꞌ, kuseju vxijxaçxaçxáak khiyuꞌjuꞌ. Açaꞌ txãꞌwẽ yũuteꞌ, dxuus yat dxiite kĩjaꞌ uyyuhneꞌ sũjũꞌtx nasa yuꞌ. Saꞌ Zakariasaꞌ txãꞌwẽesa neeyũuk.
23 Dxuus yatte selpiina jxãꞌjçxaꞌ, Zakariasaꞌ txajx yatna uꞌkh.
24 Txãa ensuꞌ Zakarias nyu Elisabethaꞌ nasa jiꞌph neeyũuçxaꞌ, txajx yatu kasehmeek uꞌpuꞌ tahç aꞌtepkaçx, naa sũhna:
25 Ãçxhaꞌ ũꞌkwe Dxusaꞌ naꞌwẽk yũu, açaꞌ nasaꞌ ũꞌkweꞌs peena yuꞌ açeweꞌwemeetxna sũhna.
Jesus upxwaꞌjaꞌs ptaꞌsxni
26 Elisabethaꞌ nasa jiꞌph neeyũuni seis aꞌtejuꞌ, Dxusaꞌ angel Gabrielaꞌs Galileasu teeçx çxhab Nasaret yaasesatek kaah,
27 teeçx knaꞌsa Maria yaasesa yatte paꞌjçxaꞌ yuwe ptaꞌsxkahn. Txãa knaꞌsa yuꞌ, teeçx piçthẽꞌj Jose yaasesa yakh iimiꞌyaꞌ puutx weꞌweçxak uꞌp yuꞌ. Txãa Joseꞌ jxkaahsa Davxid jiꞌkh yuꞌ.
28 Açaꞌ Dxus angelaꞌ Maria uꞌpnite paꞌjçxaꞌ naꞌjĩk:
—Dxusaꞌ ijçxa yakh ũsaꞌ, naa paꞌga Dxus bedicionaꞌs maa maa uꞌytewa jxthaakwe jxpaꞌgaçxa uꞌpiꞌçxa. Txãasa weçxana meꞌpçxi ewçxáa jĩteꞌ,
29 Mariaꞌ Dxus angel weꞌweniꞌs wẽsẽꞌjçxa thegçxaꞌ, kujk yajkx ¿maꞌwẽtekiꞌk txãꞌjĩꞌ? sũhna.
30 Açaꞌ Dxus angelaꞌ naꞌjĩk:
—Maria, ũukhnuçx, Dxus peeygãanisa iꞌçxa.
31 Txãa paꞌga ãçxhíi teeçx luuçx pihç jiꞌph neeyũuçxa txãꞌsaꞌ Jesus yaseneꞌçxka.
32 Txãa luuçxaꞌ jxtuhthe walasa yuuwaꞌjsaꞌ. Txãasa cielute Dxus Nçxiꞌk yaꞌkxsusuna. Açaꞌ txãꞌsaꞌ Dxusaꞌ jxkaahwaꞌjsa vxituna, yaçgathẽꞌj Davxid naꞌwẽysa.
33 Kxah Israelweꞌsxtxi kiiwey jxkaajana, nawa txajx jxkaahniꞌ bagaçxte yuhwa pçumeena jĩk.
34 Txajũꞌ Mariaꞌ txãa angelaꞌs pẽjxku:
—¿Maꞌwẽ txãꞌwẽ yujaꞌ yũukx? Ũꞌkweꞌ knaꞌsa nmiꞌ jiꞌphmeeth açyujaꞌ jĩteꞌ,
35 angelaꞌ naꞌwẽk ptaꞌsx:
—Dxus Espirituꞌ içxa kakweꞌs txãaçxaçxáa jxuka iiyamuna. Txãꞌwẽ yuuniteçxáa nasa vxyaana. Txãa paꞌga luuçx upxsaꞌ Dxus jĩi yuuna, saꞌ Dxus Nçxiꞌk yaꞌkxsusuna.
36 Txãꞌwẽy içxa pukakhẽ nyakh Elisabethwa luuçx pihç jiꞌphuyaꞌwaꞌ, thẽꞌkhuẽ yãꞌjçxawa. Bagaçx yuhwa nasa jiꞌphusameeçxawa, ãçxhaꞌ seis aꞌte yãꞌj yuuçaꞌ nasa jiꞌphuni.
37 Dxus yakhaꞌ kĩh yuhwa thẽysa yuꞌ meeaꞌ jĩna ptaꞌsxteꞌ,
38 Maria pasçxaꞌ:
—Txãꞌwẽꞌ, ũꞌkweꞌ Dxusna selpisáa neꞌtka, açaꞌ ũꞌkweꞌs Dxusaꞌ kxtey yuuna naꞌwẽg ptaꞌsx txãꞌsaꞌ jĩk.
Txajũꞌ Dxus angelaꞌ Maria tasxu txuteena uꞌkh.
Elisabet tasxna Maria uꞌjni
39 Txãa ensuy Mariaꞌ jxthẽeyũumée uꞌkh Judea thãꞌjsu teeçx çxhab ũsuꞌk kxtee paꞌjyaꞌ.
40 Saꞌ Zakarias yatte paꞌjçxaꞌ, Mariaꞌ Elisabethaꞌs weçxak.
41 Maria weçxana weꞌweniꞌs wẽsẽꞌjeçpkaçxhaꞌ, Elisabet nasa tutxhteweꞌsxaꞌ ẽsẽk. Naapkaçxhaꞌ Dxus Espirituꞌ Elisabet ũuste jxuka kaajiyuꞌkh.
42 Açaꞌ Elisabethaꞌ Mariaꞌs naꞌjĩnak sus weꞌwe:
—Dxusaꞌ ijçxaꞌs maa maa uꞌytewa jxthaakwek bedekĩy, saꞌ txãꞌwẽyku içxa nçxiꞌkaꞌswa bedekĩy.
43 Açaꞌ ũꞌkweꞌ ¿kĩhte seelpitka açga ũꞌkweꞌs Nweꞌwesa njĩꞌjaꞌ thegyaꞌ paꞌjáꞌ?
44 Içxa weçxana weꞌweniꞌs wẽsẽꞌjeçpkaçxhaꞌ, ũꞌkwe luuçx tutxhteweꞌsxaꞌ ẽsẽk weçxana.
45 Dxus weꞌweniꞌ kxtey yuuna sũhpaꞌga, kxtey yuuyaꞌwaꞌ açaꞌ weçxana mfxiꞌzeçx jĩk.
46 Açaꞌ Maria weꞌweçxaꞌ:
Ũꞌkweꞌ ũusuh jxukath Dxusaꞌs weçxáꞌ.
47 Saꞌ ũꞌkwe Dxus nweꞌwesaꞌs ũuste peçxkanameeth weçxana fxiꞌzeꞌ.
48 Txãꞌwẽ makwe pxthaa ãhmeekuẽtewa, Dxusaꞌ peeygãhçxa txãꞌsna selpiwaꞌjsa vxitku.
Açaꞌ ãçxhũyãꞌjaꞌ ũꞌkweꞌs Dxus txhitxhnisak yuꞌ jĩna nes yuutxna maa nasawa jxuka.
49 Txãꞌwẽ yaakxkahníiçxáak Dxus txakwe walasa ũꞌkweꞌs txakwe ew yũu.
Txãꞌ wala peeygãasaꞌ.
50 Txãasa maawa txãꞌsna nwẽesẽꞌjsatxiꞌ bagaçxtewa peeygãhna nes yuuna.
51 Dxusaꞌ kĩjkĩhnawa jxukak vxit, saꞌ ũuste iiwejçx yaakxsatxwa kpaasuꞌjmeꞌ.
52 Jxkaahsatxwa txãaweꞌsx jxkaahnijũ kutxiꞌkh,
Saꞌ kĩhtewa ãhmée pxthaakuẽsatxiꞌ walasak vxit.
53 Kĩhwa jiꞌphmée peejiina fxiꞌzesatxiꞌ txãaweꞌsx peejiniꞌs jxukak ũs.
Saꞌ wala jiꞌphsa yuutxiꞌsaꞌ kĩhwa jiꞌphmeek nvxiht.
54 Txãꞌs selpisáa Israel nasatxiꞌ puꞌçxku,
Saꞌ peeygãhna fxiꞌzewaꞌjaꞌs peçxkanameꞌ.
55 Maꞌwẽneꞌ kweꞌsx yaçgaweꞌsx Abrahanweꞌsxtxi bagaçxtewa ew yũuyaꞌ neeyũu, txãꞌsaꞌ kxteyku yuu jĩk.
56 Txajũꞌ Mariaꞌ Elisabet yakh tekh aꞌte uꞌpçxak txajx yatnay kiꞌ sxawedna uꞌj.
Juan Bautista upxni
57 Txãa ensuꞌ Elisabet ãçãꞌwaꞌj ãhteꞌ, luuçx pihç jiꞌphuk.
58 Açaꞌ Elisabet nweꞌsx vxiteꞌ namikuweꞌsxwa jiyuçxaꞌ, weçxayaꞌ uꞌjtx Dxusaꞌ Elisabethaꞌs txãꞌwẽ ew yũupaꞌga.
59 Txajũꞌ teeçx kiꞌsuteꞌ, luuçxaꞌs cirkuncidãyyaꞌ uꞌjtx. Saꞌ ney yase Zakariastxi kiꞌp wẽe.
60 Nawa njĩꞌj weꞌweçxaꞌ:
—Txãꞌwẽmée wejxwa Juan yasewaꞌjaꞌ jĩteꞌ, piꞌkxna uꞌjsaweꞌsx pasçxaꞌ:
61 —Iꞌkwe nweꞌsxaꞌ maa yuhwa Juan yaasesa meetx yuꞌ açaꞌ ¿maꞌwẽtekwe Juan yase kiꞌp wẽjẽꞌ? jĩꞌtx.
62 Txajũꞌ neyaꞌs pẽjxtxi maꞌwẽ yasewaꞌthewa.
63 Açaꞌ neyaꞌ Juan yasewaꞌjaꞌ jĩnak fxiꞌjçxa ũs. Txãꞌwẽ yũuteꞌ, jxukaysa kuhtx yajkxna neeyũu.
64 Txãa dudtey Zakarias kiꞌ weꞌweyaꞌ ewuuçxaꞌ, Dxusaꞌs seenaꞌ wala weçxak.
65 Txãꞌwẽ yũuteꞌ, kxsũ utxasũ uꞌpsaꞌ wala ũukh weꞌwena neeyũutx. Açaꞌ Judea thãꞌjsuweꞌsxwa txãꞌwẽ yũuniꞌs jxuka jiyutx puutx yaꞌptaꞌsxna.
66 Txãꞌwẽ jiyuçxaꞌ, naꞌwẽtx yajkxna puutx paapẽyĩꞌ:
—Isa, txãa luuçxaꞌ Dxus bedekĩynisaneꞌ yuꞌ saꞌ ¿maꞌwẽ yũuwaꞌjsakx? jĩꞌtx.
Zakariasaꞌs Dxus Espiritu kweꞌweꞌjni
67 Txajũꞌ Juan ney Zakariasaꞌs Dxus Espiritu txajx ũuste kweꞌweꞌtheꞌ, naꞌjĩnak ãate ptaꞌsx:
68 Israelweꞌsxtxi jxpeꞌjsa Dxusaꞌ kĩhtewa jxuka ewsaꞌ.
Kweꞌsxaꞌ txajx nasathaꞌw, açaꞌ nweꞌweyaꞌ kĩhçxaꞌ, ewte nvxihtku.
69 Dxusna selpisáa Davxid jiꞌtheweꞌsx teeçx kaakh kĩhtewa jxuka nweꞌweyaꞌ ãjãwaꞌjsa.
70 Nyafxiitey Dxus yuwe ptaꞌsxsaweꞌsx yakhwa naꞌwẽk puutx weꞌwe nweꞌweyaꞌ kaahwaꞌjaꞌs:
71 Kweꞌsxtxi açesaweꞌsx kuseju nweꞌweçxa ewte nvxiituꞌnja,
72 Saꞌ kweꞌsx yaçgaweꞌsxtxiwa peeygãhna, txãꞌwẽ adx puutx weꞌweni yuutxiꞌ leꞌçxkuẽçxáa yuhwa peçxkanameꞌnja jĩꞌk.
73 Saꞌ kweꞌsx yaçgaweꞌsx Abrahan yakhwa txãꞌwẽyku naꞌwẽ puutx weꞌwena jurãy:
74 Kweꞌsxtxi açesaweꞌsx kuseju nweꞌweçxa ewte nvxiituꞌnja, açaꞌ ũukhmée mselpiiwe,
75 Adx yuuçxáana nwẽesẽꞌjna uu entepkaçx jĩꞌk.
76 Açaꞌ adx nçxiꞌkkuẽ idxaꞌ Dxus ĩtxĩsa yuwee ptaꞌsxsa yuuçxa, kweꞌsxtxi Nweꞌwesa paꞌjwaꞌjaꞌs pheuꞌjna pekũjuneꞌga yaçte.
77 Kxah nasaꞌ pkalpaꞌga peltunãywaꞌjaꞌs maawa jiyuçxa, ewte neeyũuwaꞌjaꞌs jiꞌphutxna.
78 Kweꞌsx Dxusaꞌ peeygãhçxa, cielujuy sek naꞌwẽ kaakweetheꞌkh,
79 Çxhiꞌdxte uu ente naꞌwẽ yãꞌj ũstewa, wẽt eenaꞌte nvxiht-yaꞌ.
Saꞌ kweꞌsxtxiwa jxpubamée ewte kaafxiꞌzeꞌjyaꞌk txãꞌwẽ yũu jĩnak weꞌwe Zakariasaꞌ.
80 Txajũꞌ Juanaꞌ walaana uꞌkh Dxus yuweꞌs jiyuna, saꞌ nasa uꞌpnimée kiwesuk uꞌp-yaꞌ uꞌj, Israelweꞌsxtxi ptaꞌsxyaꞌ kasehwaꞌj en ãhpkaçx.
