Lukas 10:1-42
10 Txãa eꞌsuꞌ vxite setenta txhitxhçxa, eꞌz eꞌzku yaçte kaah, txajx paꞌjwaꞌj çxhabsu mteewa jxuka.
2 Saꞌ naꞌjĩk:
—Isa mjĩiwaꞌjaꞌ wala yuh ũsaꞌ, nawa mjĩisa yuꞌ kuhmeetaꞌ. Açaꞌ mjĩi namuꞌs pxthaa weꞌwena mpẽjxwe nasa mjĩiwaꞌjsa txajx mjĩiteweꞌsx.
3 Iꞌkweꞌsxaꞌ jxpaꞌyakx meꞌjwe, piisxakuẽtx alum ksxavxysu naꞌwẽ kajaçthu naa paꞌga.
4 Yaꞌja, vxyu, pelgatxi txãꞌwẽsa jxũmée meꞌjwe. Saꞌ dxiꞌthe nasa puꞌjykhẽw yuhçxawa weçxana jxthẽeyuumeeneꞌkwe.
5 Kiim yatte paꞌjçxawa, ewçxáa weꞌwena weçxana paꞌjaneꞌkwe.
6 Açaꞌ txãa yatteweꞌsx açesameeçxaꞌ, txãꞌwẽ weçxana paꞌjniꞌs ewçxáa jxpaꞌgatxna. Nawa jxpaꞌgameeteꞌ, txajũ kiꞌ uꞌjweneꞌkwe.
7 Saꞌ mtee ew jxpaꞌgatxna, txãa yatte paadejeneꞌkwe, txãaweꞌsx kĩh sãꞌjĩniꞌswa ũꞌna, txãa paꞌgatey mjĩisaꞌ ũꞌwaꞌjaꞌs jxpaꞌgawaꞌj jiꞌphaꞌ. Açaꞌ iꞌkweꞌsxaꞌ yat iisa paadehna pekũhnuwe.
8 Maa çxhabteweꞌsx iꞌkweꞌsxtxi jxpaꞌgateꞌ, kxtee ũsuneꞌkwe kĩh puuçtewa waꞌlmée jxpaꞌgana.
9 Saꞌ kxtee ãçãꞌsatxwa nuykatxhiçxa naꞌwẽ ptaꞌsxineꞌkwe: Dxus jxkaahna paꞌjwaꞌj enaꞌ iꞌkweꞌsx yakh utxa ũsaꞌ.
10 Nawa maa çxhabtewa iꞌkweꞌsxtxi jxpaꞌgameeteꞌ, txãa çxhabte jxuka naꞌjĩneꞌkwe:
11 Iꞌkweꞌsxaꞌ jxpaꞌgameeçxawa yuuwesa yuukahn iꞌkweꞌsx çxhabte kxtãꞌtuhd yuhnawa sakweekweçxa uꞌjweçthaꞌw kweꞌsx çxidate uweniꞌs. Saꞌ makwe jxpaꞌgameeçxawa, jiyuçxa neeyũuçiꞌkwe: iꞌkweꞌsxtxi Dxus jxkaahna paꞌjwaꞌj enaꞌ utxa ũsaꞌ jĩneꞌkwe.
12 Naꞌjĩꞌth naꞌ: Dxus kastigãywaꞌj enteꞌ, txãa çxhabteweꞌsxaꞌ Sodoma çxhabteweꞌsxte jxthaakwe nxus yaꞌkastigaĩtxna.
Çxhab nwẽeseꞌjsamée yakh ũukhũukhsa
(Mt 11.20-24)
13 Korazín çxhabte nasa, Beçaidateweꞌsx yãꞌjçxa, seenaꞌ yuh nxuste neeyũuwaꞌjiꞌkwe. Ayte iꞌkweꞌsx dxiꞌpte naꞌwẽth ãçãꞌsatx nuykatxhina uusáatx fxĩtxna yũu naꞌ Tiro vxiteꞌ Sidon çxhabtewa txãꞌwẽy yũuwaçaꞌ, txãaweꞌsxaꞌ pkaltxi nvxihtçxa Dxus tasxte sxawedni txaçxyãꞌj yuuna.
14 Dxus kastigãywaꞌj enteꞌ, Tiro vxiteꞌ Sidon çxhabte nasate jxthaakwe iꞌkweꞌsxaꞌ nxus kastigoꞌs knayuuneꞌkwe.
15 Açaꞌ Kapernaum çxhabteweꞌsxaꞌ cielute uꞌjwaꞌjsath sũhna iꞌkwe yaakiꞌ, nawa infxiernote khẽeyaꞌ uꞌjwaꞌjsaiꞌkwe.
16 Txãa çxhabtxiꞌ txãꞌwẽ weꞌweçxaꞌ, setentasaweꞌsxtxiꞌ naꞌjĩk:
—Maa nasawa iꞌkweꞌsx ptaꞌsxniꞌs wẽsẽꞌjçxaꞌ, adxaꞌswa nwẽesẽꞌjsa yuutxna. Saꞌ maawa iꞌkweꞌsxtxi açesaꞌ, adxaꞌswa açesa yuutxna. Saꞌ adxaꞌs açesaꞌ adxçxáana ahçemée adxaꞌs kaahsanawa açesa yuutxna jĩnak jxkaah.
Setentasaweꞌsx kiꞌ sxawedni
17 Txajũꞌ setentasaweꞌsxaꞌ wala weçxana kiꞌ sxawedtxi naꞌjĩna:
—Eçx luuku vxit-sa yuhwa idx puꞌçxteꞌ, kweꞌsxtxiꞌ nwẽesẽꞌjeꞌtx jĩna ptaꞌsxteꞌ,
18 Jesusaꞌ naꞌjĩk:
—Isa yuh ptaꞌsxiꞌiꞌkwe adxaꞌ uythu eçxthẽꞌjaꞌ cieluju kpiꞌsx kwehneni naꞌwẽ wetena kĩjaçte.
19 Iꞌkweꞌsx txãꞌwẽ yũukahn íiçxáath adxaꞌ kĩhtewa jxuka ãjãwaꞌjaꞌs ũs, ul weeswée usmitx kĩjkĩh eçx seenaꞌsawa iꞌkweꞌsxtxi kpãꞌvxit-yaꞌ ãjãkahmén.
20 Nawa eçx luuku vxit-sa iꞌkweꞌsxtxi nwẽesẽꞌphaꞌgaçxáa yuꞌ, weçxweçxa yaakxnuwe. Naasáa cielute iꞌkweꞌsx yase fxiꞌjni ũsaꞌ txãa paꞌga yuuçxáa weçxweçxa myajkxwe jĩçxaꞌ,
21 Jesusaꞌ txajx ũuste wala weçxak txãꞌwẽ Dxus Espiritu puꞌçxpaꞌga. Saꞌ naꞌjĩk:
Jesus ũuste wala weçxweçxa yaakxni
(Mt 11.25-27; 13.16-17)
—Tata, idxaꞌs wala weçxaꞌth, idxaꞌ cielute vxiteꞌ naa kiwete jxuka Namug. Txãasag naa kiwete wala jxtuhtesa yuutxiꞌs kaajiyuꞌjmeeçxawa, ãhmeekwesa yuutxiꞌs jiyuwaꞌjaꞌs ũsgu. Iidx jxthãasniꞌ txãꞌwẽneꞌ yuꞌ açaꞌ txãꞌsaꞌ kxtey yuug.
22 Adx Tataꞌ kĩjkĩhtewa jiyuwaꞌjaꞌs adxçxaçxáꞌsku dukh. Txãa paꞌga kim yuhwa jiyuꞌçmeetaꞌ Dxus Nçxiꞌkaꞌs, naasáa Ney yuuçxáa jiiaꞌ. Txãꞌwẽy Tataꞌswa kim yuhwa jiyuꞌçmeetaꞌ, naasáa Nçxiꞌk yuuçxáa jiiaꞌ, saꞌ maatxwa Nçxiꞌk íi khiyuꞌtheçxáa jiyuyaꞌ ãjãtxna adx Tataꞌs.
23 Txãꞌjĩçxaꞌ txãa yakh uꞌjusaweꞌsxtxi thegçxaꞌ, naꞌjĩk txãaweꞌsxçxáatx:
—Ãçxh iꞌkweꞌsx uyna ũsiꞌkwe txãꞌsna txãaweꞌsx yafxju uysáꞌ wala yuh weçxawaꞌj jiꞌphtaꞌ. Txãa paꞌgatey ãçxh iꞌkweꞌsx uyna ũsiꞌkwe txãꞌsaꞌ
24 nyafxiitey Dxus yuwe ptaꞌsxsaweꞌsx vxiteꞌ jxkaahsaweꞌsxwa wala yuh uy wẽetx, nawa uyyaꞌ ãjãmeetaꞌ. Txãꞌwẽy zhiçxkwe ptaꞌsxniꞌs ãçxh iꞌkweꞌsx wẽsẽꞌjna ũsiꞌkwe txãꞌsnawa wala yuh wẽsẽꞌj wẽetx, nawa wẽsẽꞌjyaꞌ ãjãmeetaꞌ jĩk.
Teeçx Samaritano ew yũusa
25 Txajũꞌ ley kaapiyaꞌjsa teeçxsa Jesus tasxte utxaaçxaꞌ, ewmée vxit wẽeçxa naꞌwẽk paapẽjx:
—Adxaꞌ ¿maꞌwẽ yũuçxa pçumée ĩtxĩ fxiꞌzewaꞌjaꞌs jiꞌphukiꞌth? jĩteꞌ,
26 Jesus pasçxaꞌ:
—Dxus leyteꞌ ¿maꞌwẽ fxiꞌjni ũsna açga lẽeyçxa jiyuꞌçmée? jĩteꞌ,
27 ley kaapiyaꞌjsaꞌ naꞌwẽk pas:
—Idxna jxpeꞌjsa Dxusaꞌs ũusuh jxuka yajkxçxa bagaçxte yuhwa peena yuꞌ txuteeyaꞌmée utxaaçxa txãa yuuçxáꞌs selpiina mfxiꞌze. Saꞌ idx maꞌwẽga yaꞌpeeygãjaꞌ, txãꞌwẽy vxite nasatxwa mpeeygãh jĩꞌk jĩteꞌ,
28 Jesus weꞌweçxaꞌ:
—Ew yuh pasgu. Txãꞌsaꞌ kxtey yuuçxaꞌ, pçumée ĩtxĩ fxiꞌzewaꞌjaꞌs jiꞌphuneꞌga jĩk.
29 Nawa ley kaapiyaꞌjsa yuꞌ, txajx yuweteyçxáa ewmeete neeyũuyãꞌjçxaꞌ, naꞌwẽk pẽjx:
—Txãa vxite nasa jĩꞌk txãa yuꞌ ¿kimtxna? jĩteꞌ,
30 Jesus pasçxaꞌ naꞌwẽk kwentuꞌj:
—Teeçx piçthẽꞌj Jerusalenu kasehçxaꞌ Jerikon uꞌjni dxiꞌjkhẽ uꞌjweçteꞌ, peswée dxiꞌthe yupxaꞌ kasehtx. Saꞌ kĩjkĩhneꞌ jxũna uꞌjweç yuꞌ, txãꞌs jxuka peswéetx. Saꞌ kpãꞌvxitçxaꞌ, uuwaꞌjçxáa yãꞌjtx nvxiht.
31 Peswée uꞌjni txaçxmeyna, teeçx sacerdote kĩhçxaꞌ uyku txãa kpãꞌvxitnisaꞌs, nawa puꞌçxmée dxiꞌj skhẽwku.
32 Txãꞌwẽy Levxi jiꞌtheweꞌsxwa kĩhçxaꞌ uyku, nawa txãawa puꞌçxmée dxiꞌj skhẽwku.
33 Txajũꞌ teeçx piçthẽꞌj Samariateweꞌsx txãa dxiꞌkhẽy kĩhçxaꞌ, kpãꞌvxitnisaꞌs uyçxaꞌ, wala peeygãjk.
34 Saꞌ kpãꞌyũusa tasxte utxaaçxaꞌ, kpãꞌsu aceite vxino yakh awna yuꞌçeꞌkh. Txajũꞌ txajx aꞌjni jibate yakhçxa kaꞌjaꞌkh, saꞌ paadee yatna peꞌjna uꞌjçxa, kxteꞌ kĩjkĩhwa peejxmeek sãꞌjĩ.
35 Kuskuus enkhẽꞌ, txãa Samariateweꞌsxaꞌ uꞌjweççxaꞌ, eꞌz vxyu kutxiꞌjçxa, yat namuꞌs dewek. Saꞌ naꞌwẽk neeweꞌwe: Naa piçthẽꞌj kpãꞌvxitnisaꞌs meen sãꞌjĩ. Meeçxaꞌ vxyu nvxiituçthu txãa ãhmeewáana nawa kiꞌ sxawedna paꞌjçxa, dukheꞌnja txãa yuuluniꞌs jĩk.
36 Jesusaꞌ txãꞌwẽ ptaꞌsxçxa naꞌwẽk pẽjx:
—Idx ũus myajkx. Txãa tekhteweꞌsxaꞌ ¿maasaga ew yũusanaꞌ theguꞌ? jĩteꞌ,
37 ley kaapiyaꞌjsa pasçxaꞌ:
—Kpãꞌvxitnisaꞌs peeygãasa jĩteꞌ, Jesus pasçxaꞌ:
—Idxwa txãꞌwẽy puꞌçxna peeygãhna meꞌju jĩnak jxkaah.
Maria Martaweꞌsx yatte Jesus paꞌjni
38 Txajũꞌ Jesusaꞌ teeçx çxhab leꞌçxkuẽtek paꞌjyaꞌ uꞌj. Txãa çxhabte teeçx uꞌy Marta yaasesaꞌ txajx yatte jxpaꞌgak.
39 Saꞌ Martaꞌ teeçx nyakhku jiꞌphuꞌ Maria yaasesa. Açaꞌ Maria yuꞌ, Jesus ptaꞌsxniçxáꞌs wẽsẽꞌjyaꞌ txajx tasxte kaçxku.
40 Naapkaçxhaꞌ Marta yuꞌ, mjĩiniçxáꞌs wala paꞌpçxuna ũsçxaꞌ, Jesusaꞌs utxaaçxa naꞌjĩk:
—¿Uyuꞌçmeegáꞌ naꞌwẽ ũꞌkweçxáa wala mjĩina ũsteꞌ, ũꞌkwe nyakh yuꞌ puꞌçxhiçmeꞌ. Açaꞌ mpuꞌçxkaah jĩteꞌ,
41 Jesus pasçxaꞌ:
—Marta, iꞌkweꞌ wala yuh kuh jwed mjĩina tudumée ũsiꞌkwe.
42 Nawa jxthaakwe peejxsa yuꞌ teeçx jwed yuuçxáꞌ. Açaꞌ Mariaꞌ wejx jxthaakwe peejxsaꞌs wẽsẽꞌjeꞌçaꞌ txãꞌsaꞌ kim yuhwa kusaꞌjmeetxna jĩnak weꞌw e.
