Lukas 12:1-59
12 Txajũꞌ nasa iiméh seenaꞌ wala pkhaakheçxa jxuka utateꞌ, Jesusaꞌ txãa yakh uꞌjusaweꞌsx khuẽꞌytxi naꞌwẽk weꞌwe:
—Fxariseoweꞌsx ewmée yũuna fxiꞌzeniꞌs mpaꞌyajkxwe. Txãꞌwẽmeꞌ txãaweꞌsxaꞌ ãajuçxáa ew weꞌweçxaꞌ, ũus dxiite yuꞌ, ewmeeçxáatx yaakiꞌ.
2 Nawa makwe paaçte sũthnisaçxawa kĩh yuhwa ãate vxyaamée yuꞌ neeyũumeena, saꞌ makwe ũusteçxáa yaakxnisawa kĩh yuhwa jiyunimée yuꞌ neeyũumeena.
3 Txãa paꞌga iꞌkweꞌsxaꞌ kim yuhwa wẽsẽꞌjnimeete wáꞌkwe weꞌweꞌ nawa jxuka pthũusena. Meeçxaꞌ iꞌkweꞌsx ũusteçxáa wáꞌkwe ewmée yajkx, nawa maazkuẽe yat-suwa jxuka kaajiyuꞌjni yuuna.
Kimna wejx ũukhwaꞌjkx
(Mt 10.28-31)
4 Ãçxhaꞌ, adx namiku iꞌkweꞌsxtxi naꞌjĩꞌth: Kakweçxáꞌs ikhsatxiꞌ ũukhnuwe. Txãaweꞌsxaꞌ kakweçxáꞌs ikhçxaꞌ, jwee yuꞌ kĩhwa yũuyaꞌ ãjãmeetxna.
5 Nawa ptaꞌsxiçthu kimna ũukhwaꞌthewa: Naa kiwete ĩtxĩ uꞌjuniꞌs kusaꞌjçxaꞌ, ũusaꞌs infxiernote kaahwaꞌjsaçxáꞌs ũukhna mfxiꞌzewe. Txãꞌsçxáa ũukhwaꞌjaꞌ.
6 Tahç vxiçxakuẽtx eꞌz centawoteçxáak yaꞌtxweyúꞌ. Nawa makwe paꞌgameesatewa Dxusaꞌ teeçxçxáa yuhnawa peçxkanaméek thegna fxiꞌzeꞌ.
7 Iꞌkweꞌsx jxkwette dxkhas yuhwa jxuka isani ũstaꞌ. Açaꞌ iꞌkweꞌsx yuꞌ maazkuẽe vxiçxakuẽtewa jxthaakwe paꞌgasaiꞌkwe. Txãasa ũukhmée mfxiꞌzewe.
Jesus kimtewa thaamemée ptaꞌsxni
(Mt 10.32-33; 12.32; 10.19-20)
8 Iꞌkweꞌsxtxi naꞌjĩçthu: maawa naa kiwete nasaa dxiꞌpte thaamemée Kristo jĩith jĩna ãate ptaꞌsxsatxiꞌ, adxwa Dxus Nçxiꞌk Nasa Yuusaꞌ txãꞌwẽy Dxus angelesweꞌsx dxiꞌpte thaamemée: Naꞌ adx nasataꞌ jĩna ptaꞌsxiꞌnja.
9 Nawa maawa naa kiwete nasaa dxiꞌpte thaameçxa Kristoꞌs jiimeeth jĩna ĩsxĩijana açaꞌ adxwa Dxus angelesweꞌsx dxiꞌpte txãꞌsaꞌ jiimeeth jĩꞌnja.
10 Maawa Dxus Nçxiꞌk Nasa Yuusaꞌs makwe açeweꞌwetewa, yaꞌpeltunaĩna. Nawa Dxus Espirituꞌs açeweꞌweteꞌ, bagaçxte yuhwa peltunãynimée yuuna.
11 Naꞌjĩꞌth naꞌ: iꞌkweꞌsxtxi judiuweꞌsx pkhaakhenisu meeçxaꞌ khuẽsweꞌsx tasxte kuutxaꞌthewa, ũukhnuwe kuh yajkxna kĩh weꞌwekiꞌth sũhna.
12 Txãa paꞌgatey Dxus Espirituꞌ maꞌwẽ weꞌwewaꞌjaꞌswa kaaũusutheꞌjena txãa dudte jĩk.
Teeçx jiꞌphsa ũꞌaꞌs jxaawyaꞌ yaakxni
13 Txajũꞌ teeçx piçthẽꞌj nasaa ksxavxyte ũssaꞌ Jesusaꞌs naꞌjĩk:
—Adx yakhthẽꞌjaꞌs meen weꞌwe, tataweꞌsx jiꞌphuniꞌs pxãhn adx jĩi txudeekahn jĩteꞌ,
14 Jesus pasçxaꞌ:
—¿Kimga adxaꞌsaꞌ txudeedewaꞌjsa meeçxawa khuẽs naꞌwẽsa kiꞌp? jĩçxaꞌ,
15 naꞌwẽk weꞌwe:
—Mpaꞌyajkxwe, naa kiwete jiꞌphuniçxáꞌs yaakxnisaꞌs. Txãꞌwẽmeꞌ naa kiwete kĩjkĩhwa jiꞌphuçxaçxáa txãꞌwẽ ĩtxĩ yaꞌfxiꞌzeꞌçmeꞌ.
16 Txajũꞌ Jesusaꞌ naꞌwẽk ejemplo ptaꞌsx:
—Teeçx piçthẽꞌj wala jiꞌphsa uꞌpuꞌk. Txajx kiwete uuthasx wala yũnku.
17 Açaꞌ txãa jiꞌphsaꞌ yajkxyaꞌ kaçxku: ¿Maꞌwẽ yũukiꞌth? Mtee yuhwa adx ũꞌaꞌs jxuka jxaawyaꞌ ãjãnimeeth sũjũꞌk.
18 Saꞌ yajkxku: Jiiyãꞌth maꞌwẽ yũuwaꞌjaꞌswa. Ũꞌ jxaaw yattxi pẽtxyaꞌwath, vxite wejx walasa txajxaꞌ. Saꞌ kĩjkĩh ũꞌwa thẽꞌtheꞌ vxiteꞌ kĩh jiꞌphunitxwa kxtee jxaawuꞌnja.
19 Txajũꞌ adx ũuste naꞌjĩꞌnja: Wala kĩhwa jxaawni jiꞌphgu, wala kuh anxu selpiwaꞌj. Ãçxhaꞌ mjĩimée kaasena kĩhwa ũꞌna weçxweçxa miyajkx sũjũꞌk.
20 Nawa Dxusaꞌ naꞌjĩk: Ãhmeeg yaakiꞌ. Naa kuste uuyaꞌwag. Açaꞌ iidx jiꞌphuni jxaawniꞌ ¿kiim jĩi yuuwaꞌjtxna? jĩk.
21 Jesus weꞌweçxaꞌ: Txãꞌwẽk yaꞌyuꞌ naa kiwete jiꞌphuniçxáꞌs nuywalaana ũsçxaꞌ, Dxus dxiꞌpte yuꞌ puuplek neeyũꞌ jĩk.
Kweꞌsx peejiniꞌs Dxusaꞌ jxuka puꞌçxhina
(Mt 6.25-34)
22 Jesusaꞌ txãa yakh uꞌjusaweꞌsxtxiꞌ naꞌwẽk yuꞌkxpeh:
—Iꞌkweꞌsxaꞌ ¿kĩhte ũꞌwaꞌj uyuukxthaꞌw? Saꞌ ropawa ¿kĩhte uyuukxthaꞌw? sũhna paꞌpçxunuwe.
23 Txãꞌwẽ yuukahmeníi ĩtxĩ fxiꞌzenisaꞌ ũꞌnite jxthaakwe ewsaꞌ, açaꞌ txãꞌwẽy kakwewa ropate jxthaakwe ewsaꞌ.
24 Vxiçxakuẽtx mthegwe wakx. Txãaweꞌsxaꞌ ujaꞌçwameetaꞌ, saꞌ ũꞌ jxaaw yatwa txahçxa ũꞌ pkhakheꞌçwameetaꞌ. Nawa Dxusaꞌ txãaweꞌsxtxiꞌ sãꞌjĩꞌk naꞌ iꞌkweꞌsx yuutxiꞌs wejx txãꞌwẽ sãꞌjĩna vxiçxakuẽte jxthaakwesaiꞌkwe naa paꞌga.
25 Iꞌkweꞌsxaꞌ ¿maaçxáꞌ iiméh wala paꞌpçxuçxa peena medio metro thaakwe walaayaꞌ ãjamaꞌkwe?
26 Txãꞌwẽ ãjameeçxaꞌ, ¿kĩjxaꞌçxáakwe naa kiweteweꞌsxçxáatx txakwe wala paꞌpçxuꞌ?
27 Kitetx mthegwe, ropa uyyaꞌ mjĩimeeçxawa maꞌwẽta zhiçxkwe waláꞌ. Isath weꞌweꞌ: Jxkaahsa Salomon txakwe jiꞌphsa yuhçxawa txãa kite naꞌwẽ yuꞌ zhiçxkwesa ropa athmeꞌ.
28 Kiteꞌ teeçx en fxiꞌzenaꞌ, kuskuuskhẽꞌ ipxte kabwaꞌjçxáa yãꞌthewa txãꞌwẽk zhiçxkwe pheuꞌj. Dxusaꞌ txãꞌwẽy iꞌkweꞌsx yuutxiꞌs wejx ropa ewsa ũsna nes yuuna naꞌs iꞌkwe Dxusaꞌ txãꞌwẽ yuuna sũjũꞌçmée.
29 Txãꞌwẽ yãꞌtheꞌ, ũꞌwaꞌj ¿kĩhte uyuukxthaꞌw? sũhna paꞌpçxuna fxiꞌzenuwe.
30 Naa kiwete nasaçxáatx kakwete peejiniçxáana yajkxna fxiꞌzeꞌ. Nawa iꞌkweꞌsxaꞌ cielute Tata jiꞌphiꞌkwe txãꞌ jxuka jiiyãꞌjaꞌ iꞌkweꞌsx kĩh peejiniꞌswa.
31 Txãa paꞌga wejxwa Dxus jxkaahniteweꞌsxaꞌs khuẽꞌyna wejx thaakwe mpaꞌpçxuwe. Naa kiweteweꞌsxtxiꞌ wejx paꞌpçxumeetewa, pejka yuh ũsni yuuna.
Cielute jiꞌphuwaꞌjçxáꞌs mpaꞌpçxuwe
(Mt 6.19-21)
32 Iꞌkweꞌsxaꞌ kuhmeekwe iꞌkwe nawa ũukhnuwe, txãa paꞌgatey iꞌkweꞌsx Tata cieluteweꞌsxaꞌ iꞌkweꞌsxtxi peeygãhçxa txajx jxkaahna ũsniꞌs iꞌkweꞌsxtxi ũsyaꞌwaꞌ.
33 Jiꞌphunisaꞌs txweyçxa jxpeejxsatx mpeeswe. Vxyu jxaawni suwewaꞌjmeesa mvxitwe. Iꞌkweꞌsx jiꞌphuni cieluteweꞌsxaꞌ pçumeena, kxteeaꞌ kĩh peswée yuhwa uꞌkameena, saꞌ çxikaçxáa yuhwa suwmeena.
34 Mtee jxaawni jiꞌphçxaꞌ, kxte yuuçxáak wejx jxthaakwe yajkxna yaꞌfxiꞌzeꞌ.
Jxpaꞌyakx ũythasna ũsni
35 Jxuka pheuꞌjçxa lamparatx pkiꞌtaçxa ũythasna meswe.
36 Patronaꞌ boda yatu sxawedna paꞌjçxaꞌ, vxitxte tuꞌkakaçpkaçxhaꞌ, selpisaaweꞌsxaꞌ dudtey vxitxaꞌs phaadeyaꞌ jxpaꞌyakx ũythasna ũssa naꞌwẽ myuuwe.
37 Jxpaꞌyakx ũste patron paꞌtheꞌ, selpisaaweꞌsx yakhaꞌ wala yuh weçxa yuhna. Isath weꞌweꞌ: Txãꞌwẽ jxpaꞌyakx ũssatxiꞌ patronaꞌ pheuꞌjçxa mesate kaaçxiꞌjina puuçyaꞌ.
38 Kuspxãh maꞌk yuu meeçxaꞌ khikhiiçte maꞌk yuu nawa jxpaꞌyakx ũste paꞌtheꞌ, selpisaaweꞌsx yakhaꞌ wala yuh weçxa yuhna.
39 Ũus miyajkxwe wakx: Maa yat namuwa peswée kĩh orate txajx yatte paꞌjwaꞌjaꞌs jiyuwaçaꞌ, dehmée jxpaꞌyakx ũsçxaꞌ kaꞌgaꞌjmeena txajx yatte pesweeweꞌsxte.
40 Iꞌkweꞌsxwa txãꞌwẽy pheuꞌjçxa jxpaꞌyakx meswe. Txãꞌwẽmeꞌ, yajkxmée ũsiyna, Dxus Nçxiꞌk Nasa Yuusáꞌ kĩhçxáa yuuna jĩk.
Selpisáa ewsa vxiteꞌ ewmeesa
(Mt 24.45-51)
41 Txajũꞌ Pedroꞌ naꞌwẽk pẽjx:
—Naa ejemploꞌ ¿kweꞌsx jĩiçxáa wáana meeçxaꞌ jxukaysatx wáꞌga ptaꞌsxiꞌ? jĩteꞌ,
42 Jesusaꞌ naꞌwẽk ptaꞌsx:
—Maa patronwa yultumu nwẽesẽꞌjsa ewsaꞌs neeweꞌweçxa nvxiituna, txajx yatte mjĩisatx sãꞌjĩna nes yuukahn.
43 Açaꞌ patron jxkaahniꞌs kxtey yuuna ũste patron paꞌtheꞌ, txãa selpisáa yakhaꞌ wala yuh weçxa yuhna.
44 Isath weꞌweꞌ: Txãꞌwẽ yũusaꞌs patronaꞌ txajx jiꞌphuniꞌs kĩjkĩhnawa jxuka txãa yultumuçxaçxáꞌs neeweꞌweçxa thegkahn nvxiituna.
45 Nawa txãa yultumuꞌ: Adx patron dud paꞌjmeena sũhçxa kxtee mjĩisatx pkxuuyaꞌ kiiteçxa, txãa yuꞌ tudxna tũuyaꞌ kiitena.
46 Naapkaçxhaꞌ txajx patronaꞌ sxaweduuna txãꞌwẽ yultumuꞌ patron paꞌjwaꞌjaꞌs jiimeeçxaꞌ ũythasmée ũsiyna. Saꞌ wala seenaꞌ kastigaĩna, nwẽesẽꞌjsameeweꞌsxtxi maꞌwẽ kastigaĩkx txãꞌwẽy.
47 Maa selpisaawa txajx patron jxthãasniꞌs jiiçxawa kxtey nwẽesẽꞌjsameꞌ, wala kujus kastigãyni yuuna.
48 Nawa maa selpisaawa patron jxkaahniꞌs jiimeeçxaꞌ ãhmée yũuna txãꞌsaꞌ kujusmée yaꞌkastigaĩna. Maanawa wala ũsçxaꞌ, wala yaꞌpẽyina. Açaꞌ maanawa jxthaakwe kĩhnawa neeweꞌweçxaꞌ, jxthaakwe ew jxpeꞌkhaníi yuuna.
Jesusaꞌ nasatx kaapuiꞌjsa naꞌwẽ yuuni
(Mt 10.34-36)
49 Naa kiwete ipx pkiꞌtayaꞌ kĩisa naꞌwẽth kĩh, behnayãꞌj ũswaç maꞌwẽ wala weçxaakiꞌth.
50 Adxaꞌ uuwaꞌjsath txãasa wala nxusna uꞌjuth uuwaꞌj en ãhpkaçx.
51 Naa kiwete puiimée wẽt kaafxiꞌzeꞌjyaꞌneꞌ kĩh ¿sũjũꞌwáꞌkwe adxaꞌsaꞌ? Nawa txãꞌwẽ yũuyaꞌ kĩhmeeth. Adx paꞌgateçxáa maa nasaíi yuꞌ puutx yahçena puiina fxiꞌzetxna.
52 Ãçxhũyãꞌjaꞌ teeçx yatteweꞌsx tahç nasaçxawa tekhsaꞌ eꞌzsatx ahçena puutx txãꞌwẽçxaçxáa puiina fxiꞌzetxna.
53 Neyaꞌ nçxiꞌkaꞌs açeyajkxna fxiꞌzena. Açaꞌ nçxiꞌkaꞌ neyaꞌs txãꞌwẽy yũuna fxiꞌzena. Njĩꞌjaꞌ niisaꞌs ahçena fxiꞌzena, açaꞌ niisaꞌ njĩꞌjaꞌs txãꞌwẽy yũuna fxiꞌzena. Swegraꞌ nkuẽmyuꞌs açena, naapkaçxhaꞌ nkuẽmyuꞌ, swegraꞌs açena.
Naa ensu kĩh yũuyaꞌwatewa txãa yuꞌsaꞌ jiimée fxiꞌzeni
(Mt 16.1-14; Mr 8.11-13)
54 Txajũꞌ Jesusaꞌ naꞌwẽk weꞌwe:
—Iꞌkweꞌsxaꞌ sek khẽenijũ tãaph kiitena yuhteꞌ, nus paꞌjyaꞌwaꞌ jĩꞌiꞌkwe, açaꞌ kxtey yuꞌk.
55 Saꞌ wejxaaçteꞌ, sek yaꞌwaꞌ jĩꞌiꞌkwe, açaꞌ kxtey yuꞌk.
56 ¿Maꞌwẽ yuuçxa nus paꞌjna kiꞌ sek yaꞌwatewa jiisathaꞌw jĩna ũuste yuꞌ iiwejçx iꞌkwe yajkxna fxiꞌzeꞌ? Saꞌ jiisaçxaꞌ ¿maꞌwẽtekwe naa ensuꞌ kĩh yũuçtewa txãꞌs yuꞌ jiyuꞌçmée?
Açesa yakh yuweꞌs puutx weꞌweni
(Mt 5.25-26)
57 Iꞌkweꞌsxaꞌ ¿mjĩitekwe ewteçxah puutx weꞌwena yuweꞌs pheuꞌjuꞌçmée?
58 Maawa idxaꞌs pãatxhĩꞌkhteꞌ, txãa yakh khuẽs tasxte utxaayaꞌ uꞌjweççxaꞌ, dxiꞌthe ewteçxah puutx weꞌwena yuweꞌs mpheuꞌjwe, kxah khuẽs tasxte kuutxaꞌjmeena. Txãꞌwẽmeꞌ, khuẽsaꞌ idxaꞌs policiaꞌs dukhena, açaꞌ policia yuꞌ, karcelte kxuuphana.
59 Naꞌjĩꞌth naꞌ: Txajũyãꞌjaꞌ vxyu nmeh jiꞌphuniꞌs dukhmeeçxa yuꞌ, karceluh kasehmeeneꞌga jĩk.
