Lukas 13:1-35
13 Txãa ensuy nasa maaíi yuꞌ Jesusaꞌs naꞌwẽtx ptaꞌsxna utxáa:
—Galileajuweꞌsxaꞌ Dxusna weçxana neeweꞌweyaꞌ altalte kabwaꞌj tajkx ikheçpkaçxhaꞌ, Pilatoꞌ txãaweꞌsxtxiꞌ ikhkaakh, açaꞌ txãaweꞌsx eeaꞌ takx ee yakh jxuka kaꞌduk jĩteꞌ,
2 Jesusaꞌ naꞌjĩk:
—Galileaju nasatx txãꞌwẽ yũuteꞌ, txãa uusaaweꞌsxaꞌ Galileasu nasate jxthaakwe pkalsaneꞌta yuꞌ, txãa paꞌgatx txãꞌwẽ uu enaꞌs jiꞌphu ¿sũjũkwéꞌ?
3 Naꞌjĩꞌth naꞌ: Txãaweꞌsxçxáa thaakwe pkalsa yuꞌçmeetaꞌ. Açaꞌ iꞌkweꞌsxwa pkaltxi nvxihtçxa Dxus tasxte sxawedmeeçxaꞌ, txãaweꞌsx naꞌwẽyçxáa uuwaꞌjsaiꞌkwe.
4 Txãꞌwẽy diecioçxo nasa Siloete toçxe kajkwekhẽ weteteꞌ uutx txãa uusaaweꞌsxaꞌ Jerusalen çxhabte uꞌpsaweꞌsxte jxthaakwe yuuwesaneꞌta yuꞌ, txãa paꞌgatx txãꞌwẽ uu enaꞌs jiꞌphu ¿sũjũkwéꞌ?
5 Naꞌjĩꞌth naꞌ: txãaweꞌsxçxáa thaakwe yuuwesa yuꞌçmeetaꞌ. Açaꞌ iꞌkweꞌsxwa pkaltxi nvxihtçxa Dxus tasxte sxawedmeeçxaꞌ, txãaweꞌsx naꞌwẽyçxáa uuwaꞌjsaiꞌkwe.
Higwera tasxaꞌs spẽꞌth kaahni
6 Jesusaꞌ naa ejemploꞌsku ptaꞌsx:
—Teeçx piçthẽꞌjaꞌ higwera fxtũu tasxku txajx kiwete uhni jiꞌphuꞌ. Saꞌ thegyaꞌ uꞌkh, yũnwáana sũhçxa. Nawa uymeꞌ.
7 Txajũꞌ naꞌjĩk kxtee uuthasx thegsaꞌs: Naa fxtũu tasx yũnuuçwáana sũhçxa adx thegyaꞌ paꞌjna ũsni tekh anxuyãꞌjaꞌ, nawa teeçx yũn yuhwa uynimeeth. Açaꞌ mespẽꞌth, ¿mjĩyaꞌçxáa kxul ũsyaꞌwana? jĩteꞌ,
8 uuthasx thegsa pasçxaꞌ: Menvxiht naa anxuçxáawa, açaꞌ kiweꞌs luupeꞌjçxa sxaakweꞌjeꞌnja.
9 Açaꞌ yũnneꞌjwáana. Txãꞌwẽ yũute yũnmeete, kaaspẽꞌtheꞌjeneꞌga jĩk.
Teeçx uꞌy kuꞌle uꞌjuyaꞌ ãjasameꞌs sapatu ente nuykatxhini
10 Teeçx sapatu jxkaase enteꞌ, Jesusaꞌ judiuweꞌsx pkhaakhenitek kaapiyaꞌjna ũsuꞌ.
11 Açaꞌ kxteꞌ teeçx uꞌy diecioçxo anxuyãꞌj ãçãꞌna uꞌjusak ũsuꞌ, eçx luuku vxit-sa pkxuute kuꞌle uꞌjuyaꞌ ãjasamée.
12 Açaꞌ Jesus uyçxaꞌ, paꞌyak:
—Iꞌkweꞌ naa weeju katxhiyãꞌjiꞌkwe jĩçxaꞌ,
13 Jesusaꞌ ãçãꞌsa kakwete jxaꞌdxku. Naapkaçxhaꞌ txãa uꞌyaꞌ dudtey kuꞌleꞌyaꞌ ãjãçxaꞌ, seenaꞌ wala Dxusaꞌs weçxana weꞌwek.
14 Jesusaꞌ txãꞌwẽ sapatu jxkaase entewa ãçãꞌaꞌs nuykatxhiteꞌ, judiuweꞌsx pkhaakhenite npiiçthẽꞌjsaꞌ ũusaçxaçxa nasatx naꞌjĩk:
—Kiꞌsuꞌ seis en jiꞌphaꞌ mjĩiwaꞌj. Açaꞌ katxhi wẽeçxaꞌ vxite ensu myuhwe. Nawa sapatu jxkaase ente yuꞌ, katxhiyaꞌçxáa yuꞌ paꞌjnuwe jĩnak jxkaah.
15 Açaꞌ Jesus pasçxaꞌ:
—Ãateçxáa ew weꞌweçxaꞌ ũuste yuꞌ ewmeeçxáa yaakxsaweꞌsx mpaaswe: Iꞌkweꞌsx kla meeçxawa iꞌkweꞌsx jiba tudni ũsteꞌ, makwe jxkaase entewa jxũkhwedeçxa yuꞌ yusyaꞌ ¿jxũna uꞌjmeemaꞌkwe?
16 Naa uꞌyaꞌ Abrahan jiꞌjaꞌ nawa eçxthẽꞌjaꞌ diecioçxo anxuk kaãçãꞌjna jiꞌphuꞌ. Açaꞌ makwe jxkaase entewa eçxthẽꞌj kuseju kusaꞌthe ¿ewmeemanx? jĩteꞌ,
17 Jesusaꞌs açeyaakxsaweꞌsxaꞌ wẽsẽꞌjçxaꞌ, thaametx. Nawa nasa jwee kuhsa yuꞌ weçxaꞌtx, Jesus txakwe wala ew yũupaꞌga.
Mostasa fxiwaꞌs kaajaꞌdaꞌjni
(Mt 13.31-32; Mr 4.30-32)
18 Txajũꞌ Jesusaꞌ naꞌjĩk:
—Dxus jxkaahwaꞌj enaꞌ ¿maꞌwẽkx sũjũꞌkwe? Txãꞌsaꞌ ¿kĩh yakh kaajaꞌdaꞌjakiꞌth?
19 Nawa naꞌwẽꞌ: teeçx piçthẽꞌj txajx kiwete mostasa fxiwaꞌs uhteꞌ, maꞌwẽ seenaꞌ walaakx. Açaꞌ vxiçxakuẽ yuhwa txãa mostasa kuꞌtasu yaatutxki txãꞌwẽsaꞌ.
Lewaduraꞌs kaajaꞌdaꞌjnisa
(Mt 13.33)
20 Kiꞌkin vxite ejemplo naꞌwẽsa yakhku kaajaꞌdaꞌjna ptaꞌsx Dxus jxkaahwaꞌj enaꞌs:
21 —Teeçx uꞌyaꞌ tekh libra skuutxh ũꞌwete leꞌçxkwe lewaduraꞌs kaꞌdteꞌ, maꞌwẽ jxuka pẽethẽjekx txãꞌwẽy yuuna jĩk.
Vxitx pteezsa
(Mt 7.13-14, 21-23)
22 Jesusaꞌ Jerusalenna uꞌjweççxaꞌ, çxhabsu msuuwa iikaapiyaꞌkh uꞌjweꞌ.
23 Açaꞌ teeçxsaꞌ naꞌwẽk pejx:
—Dxus tasxte ewte neeyũuwaꞌjsaꞌ ¿kuhmeewáatxna? jĩteꞌ, Jesus pasçxaꞌ:
24 —Iꞌkweꞌsxaꞌ wala yuh mpaꞌpçxuwe vxitx pteezte uꞌkayaꞌ. Naꞌjĩꞌth naꞌ: Maawa wala yuh uꞌka wẽjẽtxna, nawa thẽytewa paꞌpçxumeeçxa yuꞌ uꞌkayaꞌ ãjãmeetxna.
25 Yat namuꞌ vxitxaꞌs aphyãꞌtheꞌ, iꞌkweꞌsxaꞌ ekaju neeyũuçxaꞌ vxitxte tuꞌkakana naꞌjĩneꞌkwe: Vxitxaꞌs meen phaade, kweꞌsx uꞌkayaꞌwathaꞌw jĩneꞌkwe. Nawa txãa pasçxaꞌ: Adxaꞌ jiimeeth iꞌkweꞌsxaꞌ majũweꞌsxneꞌkwe nawa jĩteꞌ,
26 iꞌkweꞌsxaꞌ naꞌjĩneꞌkwe: Kweꞌsxaꞌ idx yakh txutemée mteewa uꞌjusathaꞌw. Açaꞌ idxaꞌ kweꞌsx çxhabsuwa kaapiyaꞌjg jĩwáꞌkwe.
27 Nawa txãꞌ naꞌwẽ pasuna: Naꞌjĩyãꞌth naꞌ, iꞌkweꞌsxtxiꞌ jiimeeth majũweꞌsxneꞌkwe nawa. Adx tasxu meꞌjwe, iꞌkweꞌsxaꞌ jxukay ewmée yũusaçxáa iꞌkwe jĩna.
28 Açaꞌ iꞌkweꞌsx yuꞌ eka kutxiꞌjni neeyũuçpkaçxhaꞌ, Abrahan, Isaak, Jakob vxiteꞌ Dxus yuwe ptaꞌsxsa txãaweꞌsx yuꞌ Dxus jxkaahna ũsnite ũste uyçxaꞌ, seenaꞌ wala ũꞌneneꞌkwe kiꞌth yuhtxwa ksuusuꞌjna.
29 Ekaju neeyũusáa txãꞌwẽ nxuskahníi sek kãanijũweꞌsx, sek khẽenijũweꞌsx, majũ majũweꞌsxwa jxuka paꞌjyaꞌwataꞌ, Dxus jxkaahna ũsnite uꞌkayaꞌ.
30 Açaꞌ kxtee uꞌkawaꞌjsa ãçxh maaíi yuꞌ eꞌsteweꞌsx ũstaꞌ txãa yuꞌ yaçte yuutxna, naapkaçxhaꞌ yaçteweꞌsx yuꞌ eꞌste yuutxna jĩk.
Jesusaꞌ Jerusalenaꞌs thegçxa ũꞌneni
(Mt 23.37-39)
31 Txãa entey maz fxariseoweꞌsx paꞌjçxaꞌ, Jesusaꞌs naꞌjĩtx:
—Meꞌj ayjxu. Txãꞌwẽmeꞌ, Herodesaꞌ idxaꞌs ikhyaꞌwaꞌ jĩna ptaꞌsxteꞌ,
32 Jesus pasçxaꞌ:
—Uꞌjçxa naꞌjĩneꞌkwe txãa thẽꞌjaꞌs: Ãçxh yakh kuskus yakh nee mjĩiwaꞌj jiꞌphthu eçx luuku vxit-satx nasa ũusu kutxiꞌjna ãçãꞌsatxwa nuykatxhina. Saꞌ tekh enteꞌ mjĩina jxãꞌjaꞌnja jĩꞌk jĩneꞌkwe.
33 Adxaꞌ nee uꞌjuwaꞌj en jiꞌphíiçxáath tekh en ãhpkaçx, txãa paꞌgatey Dxus yuwe ptaꞌsxsaꞌ Jerusalen ekaju yuꞌ uuwaꞌj jiꞌphmeꞌ.
34 Jerusalenteweꞌsxaꞌ Dxus yuwe ptaꞌsxsatx ikhna Dxus kaahnisatxwa pãpana pkxuuiꞌkwe. Nawa adxaꞌ iꞌkweꞌsxtxiꞌ maazkuẽe uswa paꞌyath nweꞌweyaꞌ, atalxwa maꞌwẽga luuçxkuẽtx fxuu kuꞌta dxiite yuꞌãsxiꞌ txãꞌwẽy yũuyaꞌ, nawa nwẽesẽꞌjmeeiꞌkwe.
35 Txãa paꞌga mpaꞌyajkxwe. Iꞌkweꞌsx çxhabaꞌ jxuka pçuuna saꞌ ãçxhũyãꞌjaꞌ adxaꞌs peena yuꞌ uymeeneꞌkwe, Dxus kaahni jxtuhthe kiꞌ kĩiwaꞌj en ãhpkaçx jĩ k.
