Lukas 14:1-35
14 Teeçx sapatu jxkaase enteꞌ Jesusaꞌ fxariseo npiiçthẽꞌj yattek ũꞌyaꞌ uꞌj. Açaꞌ vxite fxariseoweꞌsx yuꞌ peetheguꞌnatx ũsuꞌ.
2 Txãa yatteꞌ teeçx piçthẽꞌj çuꞌvxy weete ãçãꞌsak ũsuꞌ.
3 Açaꞌ Jesusaꞌ naꞌjĩnak pẽjx ley kaapiyaꞌjsaweꞌsx vxiteꞌ fxariseoweꞌsxtxi:
—Sapatu jxkaase entewa ãçãꞌsaꞌs nuykatxhite ¿ewmanx? jĩteꞌ,
4 txãaweꞌsxaꞌ pasmée sxuunaꞌtx neeyũu. Açaꞌ Jesusaꞌ txãa ãçãꞌsaꞌs paꞌyaçxa nuykatxhiçxak kaah.
5 Saꞌ fxariseoweꞌsxtxiꞌ naꞌjĩk:
—Iꞌkweꞌsx jiba meeçxawa iꞌkweꞌsx kla kafxte khẽeçxa uꞌpteꞌ, ¿dudtey kutxiꞌjmeemaꞌkwe jxkaase entewa?
6 Txãꞌjĩteꞌ, weh yuhwa pasyaꞌ ãjãmeetaꞌ.
Boda fxiestate piꞌkxte walasath sũhna paꞌjsa
7 Fxiestate piꞌkxnisaꞌ kaçxni ewsaçxáatx txhitxhiçte uyçxaꞌ, Jesusaꞌ naꞌwẽk yuꞌkxpeh:
8 —Boda fxiestate iꞌkweꞌsxtxi piꞌkxteꞌ, kaçxní ewsu yuꞌ kaçxnuwe. Txãꞌwẽmeꞌ vxite iꞌkweꞌsxte jxthaakwe jxtuhthesa wáa paꞌjana,
9 açaꞌ fxiesta namuꞌ iꞌkweꞌsxtxi kiisuna: Ayteꞌ naajx kaçxwaꞌjçxáꞌ jĩçxa. Açaꞌ wala thaamena uꞌjweneꞌkwe kaçxní açxamée ewkhẽ kaçxyaꞌ.
10 Fxiestate iꞌkweꞌsxtxi piꞌkxteꞌ, wejxwa nmeh puzakhẽ mkaaçxwe, kxah iꞌkweꞌsxtxi piꞌkxsa uyçxaꞌ: Namiku, ay yaçkhẽ wejx ewkhẽ myuh kaçxyaꞌ jĩteꞌ, wala weçxana yaçkhẽ kaçxyaꞌ uꞌjweneꞌkwe.
11 Maawa walasath sũhna iiwejçx iiwejçx yaakxsaꞌ thaamewaꞌjçxáa jiꞌphuna. Nawa ãhmeekwesa naꞌwẽçxáa yajkxna fxiꞌzesaꞌ jxtuhthe wálasa yuuna.
12 Saꞌ fxiesta namu piꞌkxsaꞌswa naꞌjĩk Jesusaꞌ:
—Idxaꞌ sãꞌjĩyaꞌ piꞌkiççxaꞌ, iidx namikuweꞌsxtxi yakhthẽꞌjweꞌsxtxi pukakhẽ npeꞌsxtxi meeçxawa utxasuweꞌsx vxyu jiꞌphsatx piꞌkxnu. Txãꞌwẽmeꞌ txãaweꞌsxwa kaasxweduꞌjuꞌthaꞌw jĩna idxaꞌs txãꞌwẽy sãꞌjĩyaꞌ piꞌkitxna.
13 Açaꞌ sãꞌjĩyaꞌ fxiesta vxituççxaꞌ, wejxwa puuple ãhmeekwesa legsa uysamée txãꞌwẽsaçxáatx mpiꞌkx sãꞌjĩyaꞌ.
14 Açaꞌ txãaweꞌsxaꞌ kaꞌtuꞌ txãꞌwẽy kaasxweduꞌjyaꞌ ãjãmeetxna idxaꞌs. Nawa weçxana mneeyũu, txãa paꞌgatey Dxusaꞌ idxaꞌs deweena Dxus luuçx kiꞌ ĩtxĩ yuu enteꞌ jĩk.
Fxiestate piꞌkxte waꞌlsa
15 Txãꞌwẽ ptaꞌsxniꞌs wẽsẽꞌjçxaꞌ, mesate uꞌpsa teeçxsaꞌ naꞌwẽk weꞌwe Jesusaꞌs:
—Dxus jxkaahna ũsnite uꞌkaçxa ũꞌsa yakhaꞌ wala yuh weçxa yuhna jĩteꞌ,
16 Jesusaꞌ naꞌwẽk kwentuꞌj:
—Teeçx piçthẽꞌj fxiesta wala vxituççxaꞌ, nasa seenaꞌ wala kuh piꞌkxku sãꞌjĩyaꞌ.
17 Saꞌ ũꞌwaꞌj ora ãjãçteꞌ, teeçx selpisaꞌs paꞌyayaꞌ kaakh: Ũꞌyaꞌ myuhwe, jxuka pheuꞌjniyãꞌj ũsaꞌ jĩna paꞌyakahn.
18 Nawa jxukaysa waꞌlçxa naꞌwẽçxáatx pas: Nyafxteweꞌsx pasçxaꞌ: Kiweth wey, saꞌ thegyaꞌ uꞌjwe jiꞌphthu. Açaꞌ tee peltunaĩ jĩk.
19 Açaꞌ vxite weꞌweçxaꞌ: Diez novxilxoth wey, saꞌ thegyaꞌ uꞌjweçthu. Naa paꞌga tee peltunaĩ jĩk.
20 Açaꞌ tekhteweꞌsxaꞌ naꞌwẽk pas: Ãçxçxáathaꞌw ptamúu, saꞌ yujxaꞌ tuduumeꞌnja jĩk.
21 Txajũꞌ selpisáꞌ sxawedna uꞌjçxa txajx patronaꞌs jxuka ptaꞌsxku. Açaꞌ patronaꞌ wala ũusaçxaçxa txãꞌs selpisaꞌs naꞌjĩnak jxkaah: Dudtey plaasasu klxiikhunsu kiꞌ uꞌjçxa puuple ãhmeekwesa legsa yafx puuple uysamée txãꞌwẽsatx piꞌkxçxa ayte peꞌjna yuweeneꞌga jĩk.
22 Açaꞌ selpisáꞌ uꞌjçxa kiꞌ sxawedna paꞌjçxaꞌ: Iidx jxkaahniꞌs kxtey yuuth, açaꞌ paꞌjtx. Nawa kaçxwaꞌj yuꞌ nee ũsiyçxáataꞌ jĩteꞌ,
23 patronaꞌ selpisáꞌs naꞌjĩk: Ãçxhaꞌ çxhab ekaju jxuꞌjuweꞌsx vxiteꞌ dxiꞌj uꞌjsatxwa piꞌkxçxa ayte kaꞌgaꞌjaneꞌkwe makwe waꞌluçtewa ãadxijimée, adx yatte utapkaçx.
24 Nawa nyafxte piꞌkxnisa waꞌltxi txãaweꞌsx yuutxiꞌ kaapaꞌjaꞌjmeꞌnja adx yatte puuçyaꞌ jĩk. Txãꞌjĩnak kwentuꞌj Jesusaꞌ.
Jesus yakh fxiꞌzewaꞌj thẽyaꞌ
25 Txajũꞌ Jesus eꞌste nasa wala uꞌjweç yuꞌtx, açaꞌ txãaweꞌsxtxi yuꞌthegçxa naꞌjĩk:
26 —Maawa adx yakh yuusáꞌ txajx ney, njĩꞌj, nyu, luuçx, nyakhweꞌsx, npeꞌsxweꞌsxtxi nvxihtçxa txãꞌwẽy iiwejçx yajkxna fxiꞌzeniꞌs uu entepkaçx nvxihtmeeçxa yuꞌ, adx yakh fxiꞌzeyaꞌ ãjãmeena.
27 Saꞌ makwe thẽyte uupçxãhtewa txãatxiꞌ yajkxmée, adx yakh yuhmeeçxa yuꞌ adx yakh fxiꞌzeyaꞌ ãjãmeena.
28 Iꞌkweꞌsxaꞌ yat wálasa txajxaꞌwaçxaꞌ, jxuka jxãꞌjwaꞌj kĩjkĩhwa ãh ũstxmanx sũhna kaçxçxa ¿yajkxmeemaꞌkwe?
29 Txãꞌwẽ yũumeeteꞌ, kiwete pxãhn paꞌj mjĩiçxaçxáa nvxihtteꞌ, maawa uysaꞌ npeevxysxikatxna:
30 Jxãꞌjyaꞌ ãjãmeꞌ jĩna.
31 Txãꞌwẽy maa npiiçthẽꞌjwa vxite npiiçthẽꞌj yakh puiiyaꞌwaçxaꞌ, kaçxçxa ũus yajkxmeemaꞌk: Naa diez mil soldau yakhçxáa weinte mil soldautx ¿knaymaꞌth? sũhna.
32 Saꞌ ewupçxãhmeeteꞌ, vxite npiiçthẽꞌj utxameyna, yuwe kajana kuçx puiimée ewteçxah neeyũuyaꞌ.
33 Açaꞌ txãꞌwẽy iꞌkweꞌsxwa dxiikhẽy jxuka ũus yajkxçxa iꞌkweꞌsx jiꞌphuniꞌs nvxihtmeeçxa yuꞌ, adx yakh fxiꞌzeyaꞌ ãjãmeeneꞌkwe.
Nega seelpimeesa
(Mt 5.13; Mr 9.50)
34 Negaꞌ selpiꞌk, nawa jxuka sxũukãhçxaꞌ ¿maꞌwẽ selpiikx?
35 Kiwete sxaakweꞌjwaꞌjçxáa yuhwa selpiꞌçmeꞌ, pubwaꞌjçxáak yuꞌ. Jiyuwaꞌjsa ũsçxaꞌ, jiyuneꞌkwe jĩk.
