Lukas 15:1-32
15 Gobierno jĩi vxyu pkhakhsaweꞌsx vxiteꞌ pkalsaweꞌsx jxukaysa Jesus ptaꞌsxniꞌs wẽsẽꞌjyaꞌ utxaatx.
2 Txãa paꞌgatx Dxus ley kaapiyaꞌjsaweꞌsx vxiteꞌ fxariseoweꞌsxaꞌ Jesusaꞌs naꞌjĩna nuyweꞌwe:
—Naa piçthẽꞌjaꞌ wala fxiy yuꞌk, pkalsaweꞌsxtxi jxpaꞌgaçxa txãaweꞌsx yakhku ũꞌweꞌ jĩteꞌ,
3 Jesusaꞌ naa ejemploꞌsku ptaꞌsx:
4 —Iꞌkweꞌsxaꞌ cien piisxáa jiꞌphçxaꞌ, teeçxsaꞌ vxyaameeteꞌ, vxite nowenta y nwewesatx kxsũu nvxihtçxa ¿piisxáa vxitusaꞌs pakweyaꞌ uꞌjmeemaꞌkwe uypkaçx?
5 Saꞌ piisxaꞌs uyçxaꞌ, yakhçxa wala weçxana
6 yatte paꞌjçxa, namikuweꞌsx vxiteꞌ kxsũu utxasuweꞌsxtxi paꞌyaçxa: Adx piisxáa vxitusaꞌs uyyãꞌth, açaꞌ adx yakh jaꞌda weçxa mpuꞌçxwe jĩna ¿ptaꞌsxmeemaꞌkwe?
7 Naꞌjĩꞌth naꞌ: Cielutewa txãꞌwẽy nowenta y nwewe nasa ewsate jxthaakwe wala weçxa yujaꞌ teeçx nasaçxáawa pkaltxi nvxihtçxa Dxus tasxte sxawedteꞌ.
Vxyu weteniꞌs kaajaꞌdaꞌjni
8 Txãꞌwẽy teeçx uꞌy diez vxyu musx jiꞌphçxaꞌ, teeçxsa weteteꞌ, ¿lamparaꞌs pkiꞌtaçxa yatte jxpaꞌyakx padna pakwemeemaꞌk uypkaçx?
9 Saꞌ txãa vxyuꞌs uyçxaꞌ txajx namikuweꞌsx vxiteꞌ kxsũu utxasuweꞌsxtxi paꞌyaçxa: Ũꞌkwe vxyu wetesaꞌs uythu, açaꞌ ũꞌkwe yakh jaꞌda weçxa mpuꞌçxwe jĩna ¿ptaꞌsxmeemaꞌk?
10 Naꞌjĩꞌth naꞌ: Dxus angelesweꞌsxtxiwa txãꞌwẽy weçxa yujaꞌ teeçx nasaçxáawa pkaltxi nvxihtçxa Dxus tasxte sxawedteꞌ.
Luuçx ney yatu kasehni
11 Txajũꞌ Jesusaꞌ vxite ejemplo naꞌwẽsak ptaꞌsx:
—Teeçx piçthẽꞌj eꞌz nçxiꞌkku jiꞌphuꞌ.
12 Açaꞌ nuuçxsaꞌ neyaꞌs naꞌjĩk: Tata, iidx jiꞌphuni adx jĩi yuuwaꞌjaꞌs txuhdeçxa mah jĩteꞌ, neyaꞌ txuhdeçxa dukhku.
13 Açaꞌ jxpaꞌgani maz enteçxáa txãa nçxiꞌk nuuçxsaꞌ ney dukhniꞌs jxuka pkhakhçxa jxuꞌj kiwen uꞌkh. Saꞌ kxteeaꞌ ewmée yũuna jxuka vxyuꞌs psuwna pebak.
14 Txãꞌwẽ vxyuꞌs psuwna pebaaçpkaçxhaꞌ, wẽjẽ en paꞌkh txãa kiwete. Açaꞌ txãa piçtakxaꞌ wẽeyaꞌ yajkxku.
15 Saꞌ kxsũ mjĩi pakweyaꞌ uꞌkh teeçx piçthẽꞌj tasxte. Açaꞌ txãa piçthẽꞌj yuꞌ kuçxi sãꞌjĩyaꞌk kaah txajx tulte.
16 Txajũꞌ txãa piçtakxaꞌ wẽeçxa kuçxi ũꞌpusnawa ũꞌ wẽek. Nawa txãꞌwẽsaçxáa yuhnawa puuçmeetaꞌ txãa piçtakxaꞌs.
17 Txajũꞌ ũus yajkxyaꞌ kaçxçxa naa sũjk: Adx yuꞌ ayte wẽeçxa uuyaꞌwath, naapkaçxhaꞌ adx tata yatte mjĩisa piunaꞌ kĩh yuhwa wẽemée ũstxna maazkuẽeçxawa.
18 Açaꞌ adx tata yatna kiꞌ sxawedna uꞌjçxa naꞌjĩꞌnja: Tata, Dxus dxiꞌpte wala ãhmée yũuth, saꞌ idxaꞌswa txãꞌwẽythu wala ãhmée yũu.
19 Saꞌ nçxiꞌkçxawa ãçxhaꞌ iidx peeygãawaꞌjmeeyãꞌth. Nawa iidx piun naꞌwẽçxáawa meen jxpaꞌga jĩꞌnja sũhnak yajkx.
20 Txajũꞌ kiiteçxa ney yatna sxawedna uꞌkh. Açaꞌ paꞌjaçteꞌ, neyaꞌ jiyuk jxuꞌthe yujíyna. Saꞌ nçxiꞌkaꞌs peeygãhçxa puꞌthegyaꞌ wuwuuna uꞌjçxa, psxaꞌdçxak weçxa.
21 Txajũꞌ nçxiꞌkaꞌ naꞌjĩk neyaꞌs: Tata, Dxus dxiꞌpte wala ãhmée yũuth. Saꞌ idxaꞌswa txãꞌwẽythu wala ãhmée yũu. Nçxiꞌkçxawa, ãçxhaꞌ iidx peeygãawaꞌjmeeyãꞌth jĩteꞌ,
22 neyaꞌ selpisaatx paꞌyaçxa naꞌjĩnak jxkaah: Ropa ewsa kutxiꞌjçxa dud mkaatheꞌjwe. Saꞌ sultxhikhawa kusete kiꞌpçxa spaatuwa mpaathwe.
23 Teeçx tulu piçtakx niisxsaꞌs nikxyaꞌ uꞌjçxa miikhwe, fxiesta vxitçxa ũꞌyaꞌ.
24 Adx nçxiꞌkaꞌ uuníi naꞌwẽ yãꞌjçxawa kiꞌkin ĩtxĩ yuuk, saꞌ vxituna uꞌjuçxawa kiꞌ vxyaak jĩçxaꞌ, wala weçxana fxiesta vxittxi.
25 Naapkaçxhaꞌ nçxiꞌk nthẽꞌjsa yuꞌ mjĩi ehsu uꞌjuçxaꞌ, sxawedna yatte paꞌjaççxaꞌ, wẽsẽꞌkh kuꞌjna tukani músika zhiçxkwesaꞌs.
26 Saꞌ teeçx selpisáꞌs paꞌyaçxa pẽjxku: Yatteꞌ ¿kĩh yũuna ũstxna? jĩteꞌ,
27 selpisáꞌ ptaꞌsxku: Iidx nyakh jxuꞌj kiwen uꞌjsa kiꞌ sxawedna paꞌkh. Txãa paꞌga iidx tataꞌ tulu niisxsaꞌs kiikheꞌjçxa fxiestaꞌjaçaꞌ jĩteꞌ,
28 nyakh nthẽꞌjsaꞌ wala ũusaçxaçxa yatte uꞌkayaꞌ waꞌlku. Açaꞌ neythẽꞌjaꞌ kasehçxa wala pxthaa weꞌwek uꞌkakahn.
29 Txajũꞌ txãa nçxiꞌk yuꞌ naꞌjĩk neyaꞌs: Adxaꞌ maazkuẽe anxu iidx tasxte bagaçx yuhwa waꞌlmée selpiina ũstewa jiig. Nawa idxaꞌ teeçx kaplakuẽçxáa yuhwa iiũsmeeg, adx namikuweꞌsx yakh fxiestaꞌkhan.
30 Nawa iidx nçxiꞌk txakwe wala uꞌy ewmeesa yakh vxyuꞌs psuwna pebasáa yuꞌsaꞌ tulu niisxsaꞌs ikhçxag fxiestaꞌjaꞌ jĩteꞌ,
31 neythẽꞌj pasçxaꞌ: Adx nçxiꞌk, isa yuh weꞌweꞌg. Idxaꞌ bagaçxtewa adx yakh txutemée nesgu yuꞌ, naa paꞌga adx jiꞌphuniꞌ kĩhwa jxuka iidx jĩiçxaçxáataꞌ.
32 Txãꞌwẽ iidx nyakh uuníi naꞌwẽyãꞌjçxawa kiꞌkin ĩtxĩ yuuk saꞌ vxituna uꞌjuçxawa kiꞌ vxyaak txãa paꞌga weçxana pejka fxiestaꞌjwaꞌj jiꞌpthaꞌw jĩk neyaꞌ.
