Lukas 16:1-31
16 Txajũꞌ Jesusaꞌ naꞌjĩnak kwentuꞌj txãa yakh uꞌjusaweꞌsxtxi:
—Teeçx patron wala jiꞌphsaꞌ teeçx yultumu jiꞌphuꞌk. Açaꞌ txãa yultumu ewmée yũuniꞌs ptaꞌsxtxi: Iidx yultumuꞌ iidx jiꞌphuniꞌs wala psuwna ũsaꞌ jĩteꞌ,
2 txãa patronaꞌ txajx yultumuꞌs paꞌyaçxa naꞌjĩk: Adx jiꞌphunitxiꞌ wala psuwna ũsaꞌ jĩꞌtx saꞌ idxaꞌ ¿kĩh yũuna ũsga? Txãꞌwẽ yãꞌjçxaꞌ, idxna neeweꞌweni adx jiꞌphuniꞌs jxuka kiꞌ mdukh adxna. Idxaꞌ peena yuꞌ adx yultumu selpiiyaꞌ ãjãmeeneꞌga jĩteꞌ,
3 yultumuꞌ ũus yajkxyaꞌ kaçxku: Ãçxhaꞌ ¿kĩh yũukiꞌth adx mjĩiaꞌs patron kusaꞌtheꞌ? Adxaꞌ uuthasxte mjĩiyaꞌ yuꞌ jiimeeth saꞌ lmusxnu thãasna uꞌjute yuꞌ thaameyuhna.
4 Açaꞌ patron tasxu kasehnijũ maawa txãaweꞌsx yat-su peꞌjna sãꞌjĩkahn naꞌwẽ yũuyaꞌk yajkx:
5 Patronaꞌs yuulsatx teeçx teeçxçxah paꞌyaçxa, nyafxte utxaasaꞌs pẽjxku: Idxaꞌ ¿maz yuulga adx patronaꞌs? jĩteꞌ,
6 Cien taçxo aceite yuulthu jĩk. Açaꞌ yultumuꞌ naꞌjĩk: Iidx yuuluni eçaꞌ ayga ũsaꞌ txãꞌsaꞌ dud yuh khũkhçxa, yuulaꞌs cinkwentaçxáa mkiꞌp jĩk.
7 Txajũꞌ vxiteꞌsku pẽjx: Idxaꞌ ¿makwe yuulga? jĩteꞌ, cien açxoba skuutxh yuulthu jĩk. Açaꞌ yultumuꞌ naꞌjĩk: Iidx yuuluní eçaꞌ ayga ũsaꞌ txãꞌsaꞌ dud yuh khũkhçxa, yuulaꞌs oçxentaçxáa mkiꞌp jĩk.
8 Txajũꞌ txãa yultumu ewmeesaꞌ txãꞌwẽ dudtey yũuniꞌs patronaꞌ jiyuçxaꞌ: Maꞌwẽ fxiꞌzewaꞌjaꞌswa dud yuh ũus yaakiꞌk jĩk. Açaꞌ naa kiwete nasa pkalsaꞌ Dxus luuçxte jxthaakwetx dud ũus yaakiꞌ txãaweꞌsx maꞌwẽ puutx weꞌwewaꞌjaꞌswa.
9 Açaꞌ adxaꞌ iꞌkweꞌsxtxiꞌ yuꞌkxpejeꞌth txãꞌwẽy yũukahn, naa kiwete jiꞌphuniꞌs psuwmée jxpaꞌyakx mkseelpiꞌjwe namiku vxitna. Kxah naa kiwete jiꞌphunisa pçuutewa, vxite kiwe pçuwaꞌjmeete iꞌkweꞌsxtxi jxpaꞌgawaꞌjsa jiꞌphuneꞌkwe.
10 Maawa leꞌçxkuẽçxáa jiꞌphçxawa jxpaꞌyakx jxpeꞌjsaꞌ, walasaꞌswa txãꞌwẽy jxpaꞌyakx jxpeꞌjena. Açaꞌ maawa leꞌçxkuẽçxáatewa jxpaꞌyakxmée psuwna jxpeꞌjsaꞌ, walasaꞌswa txãꞌwẽyçxáa jxpaꞌyakxmée psuwuuna.
11 Txãꞌwẽ naa kiwete jiꞌphuniꞌsçxáa yuhwa jxpaꞌyakxmée psuwna fxiꞌzeçteꞌ, iꞌkweꞌsxtxiꞌ ¿kim neeweꞌweçxa nvxiitukx pçuwaꞌjmée jiꞌphuwaꞌjaꞌs?
12 Peekx jĩimée vxite jĩi yuhtxwa jxpaꞌyakxmée psuwna fxiꞌzeçteꞌ, ¿kim ũsukx iꞌkweꞌsx jĩi yuuwaꞌjaꞌs?
13 Maa selpisáa yuhwa eꞌz patrontxi selpiiyaꞌ ãjãmeena. Txãꞌwẽ vxiteçxáꞌs wedxna fxiꞌzeçxaꞌ, vxite patron yuꞌsaꞌ açena. Saꞌ teeçxsa jxkaahniçxáꞌs kxtey yuuçxaꞌ, vxite patron jxkaahni yuꞌsaꞌ kxtey yuuyaꞌ ãjãmeena. Txãꞌwẽy Dxusna selpiina naa kiwete jiꞌphuniꞌswa paꞌpçxuna eꞌz ahtey yajkxna fxiꞌzeyaꞌ ãjãmeena jĩteꞌ,
14 fxariseoweꞌsxaꞌ naa kiwete jiꞌphuniçxáꞌs wejx paꞌpçxuna fxiꞌzesa wẽsẽꞌjçxaꞌ, Jesusaꞌs weeçx weꞌwetx.
15 Açaꞌ Jesusaꞌ naꞌjĩk fxariseoweꞌsxtxiꞌ:
—Iꞌkweꞌsxaꞌ naa kiwete nasaa dxiꞌpte yuꞌ wala ewsa naꞌwẽ fxiꞌzeꞌiꞌkwe. Nawa Dxusaꞌ iꞌkweꞌsx ũus yaakxnitxiꞌ jxuka jiiaꞌ. Naa kiwete nasaçxáa iꞌkweꞌsxtxiꞌ ewsataꞌ jĩteꞌ, Dxus yuꞌ txãꞌjĩmeena.
Dxus jxkaahni ley skhẽwwaꞌjsamée
16 Moises ley vxiteꞌ Dxus yuwe ptaꞌsxsaweꞌsx kaapiyaꞌjniꞌ Juan Bautista entepkaçxtxi ũsuꞌ. Kxajuk yuwe uꞌsesaꞌ Dxus jxkaahwaꞌj enaꞌs ptaꞌsxni yuu, açaꞌ maawa Dxus jxkaahniteweꞌsx yuuyaꞌ wala paꞌpçxuꞌtx.
17 Makwe cielu pçuuna, kiwewa pçuuna, nawa Dxus jxkaahni ley yuꞌ weh yuhwa yuꞌpthehwaꞌjsameꞌ bagaçxte yuhwa jĩk.
Ptamsa txuteewaꞌjmeꞌs Jesus kaapiyaꞌjni
(Mt 19.1-12; Mr 10.1-12)
18 Maa piçthẽꞌjwa peekx nyuꞌs wãatãhçxa vxite yakh ptamuuçxaꞌ, txãꞌ pkal yuuna. Açaꞌ maa piçthẽꞌjwa txãa uꞌy wãatãanisa yakh ptamuuçxaꞌ, txãawa pkal íiçxáa yuuna.
Teeçx jiꞌphsa vxiteꞌ puuple Lasaro
19 Txajũꞌ Jesusaꞌ vxite kwentu naꞌwẽsak ptaꞌsx:
—Teeçx piçthẽꞌj wala jiꞌphsa uꞌpuꞌk. Saꞌ ropa ewsa yuuçxáa athçxa een isak wala weçxana fxiesta vxituꞌ.
20 Txãa jiꞌphsa yat vxitxte teeçx puuple wãꞌjyçxáa uta jiꞌphsa Lasaro yaasesak kiwete kaçxçxa uꞌpuꞌ.
21 Txãa puuple yuꞌ wẽeçxa jiꞌphsa mesa tasxsu kĩh ũꞌ peꞌlaçxáawa ũsxisatx ũꞌwẽn ũythasna uꞌpteꞌ, alkuꞌ kũhçxa txãa wãꞌjytxi teçxiꞌtx.
22 Nawa teeçx enteꞌ txãa puupleꞌ uuk. Açaꞌ angelesweꞌsxaꞌ jxũna uꞌjtx wẽt ũsnite Abrahan yakh ũskahn. Txãa eꞌsuꞌ jiꞌphsawa uuk, açaꞌ txãꞌsaꞌ pedaatx.
23 Açaꞌ jiꞌphsaꞌ uusaaweꞌsx ũsni ksxavxyte pxthaa yaaçxana ũsçxaꞌ, pesayçxa jxuꞌthe uyku Lasaro yuꞌ Abrahan yakh wẽt weçxana uꞌpte.
24 Txajũꞌ naꞌjĩnak sus weꞌwe: Tata Abrahan, adxaꞌs meen peeygãh. Seenaꞌ yuh wala paꞌga yuuna ũsthu naa ipx wala açxate. Açaꞌ Lasaroꞌs mkaah txajx kuse vxiççxáanawa yuꞌte tuuphaꞌjçxa adx thunete tuuphaꞌjyaꞌ yuukahn jĩteꞌ,
25 Abrahan pasçxaꞌ: Nçxiꞌk, miiyajkx. Idxaꞌ nee ĩtxĩ uꞌjuy yuꞌ, wala yuh wẽt weçxana fxiꞌzesa yuꞌg. Naapkaçxhaꞌ Lasaro yuꞌ wala pxthaa yuuna nxuste fxiꞌzek. Nawa ãçxhaꞌ ayte wẽt weçxana ũsaꞌ, naapkaçxhaꞌ idxaꞌ wala yuh pxthaa yuuna ũsgu.
26 Pxthaag weꞌweꞌ nawa penxa thkafx wala txuhdena ũsaꞌ, açaꞌ ayjxuweꞌsx kxtee pesah wẽeçxawa ãjãmeetxna, saꞌ txajuweꞌsxwa ayte pesajxaꞌ ãjãmeetxna jĩteꞌ,
27 çxhavxysáa pasçxaꞌ: Txãꞌwẽyãꞌtheꞌ, Tata Abrahan, idxaꞌsthu pxthaa weꞌweꞌ, açaꞌ Lasaroꞌs meen kaah adx tata yatna,
28 kxteꞌ tahç nyakh jiꞌpthu txãaweꞌsxtxi ptaꞌsxyaꞌ adx ayte nakwe wala pxthaa yuuna ũsthu kxtee yuukahmén jĩteꞌ,
29 Abrahan pasçxaꞌ: Txãaweꞌsxaꞌ Moises vxiteꞌ Dxus yuwe ptaꞌsxsaweꞌsx fxiꞌjnitx jiꞌphtaꞌ naꞌ txãatx wẽsẽꞌjetxna jĩteꞌ,
30 çxhavxysáa pasçxaꞌ: Tata Abrahan, txãꞌwẽ yuhtaꞌ. Nawa maaçxáawa uusaaweꞌsx ksxavxyu ĩtxĩ yuuçxa txãaweꞌsxtxiꞌ ptaꞌsxyaꞌ uꞌjwaçaꞌ, pkaltxi nvxihtçxa Dxus tasxte kiꞌ sxaweduutxna jĩk.
31 Açaꞌ Abrahan pasçxaꞌ: Moises vxiteꞌ Dxus yuwe ptaꞌsxsa txãaweꞌsxtxi nwẽesẽꞌjmeeyãꞌjçxaꞌ, makwe uusaaweꞌsx ksxavxyu kiꞌ ĩtxĩ yuuçxa ptaꞌsxtewa, kxul yuhna jĩk.
