Lukas 17:1-37
17 Jesusaꞌ naꞌwẽk kaapiyaꞌj txãa yakh uꞌjusaweꞌsxtxi:
—Nasatx pkalte kweeteꞌjsa yuꞌ bagaçxtewa nes yuutxna. Nawa pkalte kweeteꞌjsaꞌ wala yuh nxus kastigo knayuuna.
2 Açaꞌ txãa pkalte kweeteꞌjsaꞌs skuutxh ũꞌkhni kwetaꞌs txhikhte tudçxa ĩkh wala dxiikhẽ wãatãhwaç yuuçxáa wejx ewna, naa leꞌçxkwesatx pkalte kweeteꞌkhamen.
3 Txãꞌwẽ yũuyaꞌmée jxpaꞌyakx meꞌjuwe.
Meeçxawa idxaꞌs wáa ãhmée yũuna iidx yakhthẽꞌj açaꞌ txãꞌsaꞌ myuꞌkxpeh. Txajũꞌ ãhmée yũusaꞌ: Meen peltunaĩ jĩteꞌ, idxaꞌ peltunãywaꞌj jiꞌphgu.
4 Makwe teenteçxáa sietepkaçx ãhmée yũuçxawa, kxaz usíi idxaꞌs perdon pẽjxyaꞌ paꞌtheꞌ, idxaꞌ peltunãywaꞌj jiꞌphgu jĩk.
Dxusaꞌs jweeíiçxáa çxhãçxha yaakxwaꞌjaꞌs pẽyni
5 Txajũꞌ Jesus yakh uꞌjusaweꞌsxaꞌ naꞌwẽtx pẽjx:
—Dxusçxáana wejx çxhãçxha yajkxna fxiꞌzekahn kweꞌsxtxiꞌ meen puꞌçx jĩteꞌ,
6 Jesus pasçxaꞌ:
—Dxusaꞌ puꞌçxhina sũhwaꞌjaꞌs mostasa nxinx naꞌwẽkuẽçxáawa jiꞌphwaçaꞌ, naa fxtũu tasxaꞌs khubeteçxáa ĩkh walate meꞌj khẽeyaꞌ jĩteꞌ, txãa fxtũu tasxaꞌ kxtey yuuna jĩk.
Selpisaꞌ naꞌwẽ yuuwaꞌjsaꞌ
7 Iꞌkweꞌsxaꞌ teeçx selpisáa jiꞌphteꞌ, txãꞌ mjĩi ehsu uꞌjuçxa kusuçte paꞌtheꞌ: Myuh ayte kaçxçxa ũꞌyaꞌ ¿jĩmaꞌkwe?
8 Txãꞌjĩmée wejxwa naꞌwẽ kajaneꞌkwe: Adx ũꞌwaꞌj ĩiçeꞌjçxa mesate pheuꞌjçxa mtxah. Saꞌ adx ũꞌna jxãꞌthe, idxaꞌ ũꞌweneꞌga jĩneꞌkwe.
9 Patronaꞌ ¿selpisaꞌs weçxamaꞌk txãꞌwẽ kxtey yuupaꞌga? Weçxameena.
10 Txãꞌwẽy iꞌkweꞌsxaꞌ Dxusaꞌs selpiwaꞌjsaiꞌkwe naꞌ makwe txajx jxkaahniꞌs jxuka kxtey yuuçxawa, weçxaa jxthãaswaꞌjsameeiꞌkwe jĩk.
Diez piçthẽꞌj wãꞌjy weete ãçaꞌsatx nuykatxhini
11 Txajũꞌ Jesusaꞌ Jerusalenna uꞌjweççxaꞌ, Samaria vxiteꞌ Galilea kiwesuk skhẽwna uꞌj.
12 Açaꞌ teeçx çxhabteꞌ diez piçthẽꞌj wãꞌjy wee kazx jiꞌphsatx Jesusaꞌs puutx uyyaꞌ kaseh. Nawa jxuꞌtheçxáa yujuçxa,
13 naꞌjĩnatx sus weꞌwe:
—Kweꞌsxtxi meen peeygãh jĩteꞌ,
14 Jesusaꞌ txãaweꞌsxtxiꞌ naꞌwẽk jxkaah:
—Iꞌkweꞌsx kakwetx sacerdoteweꞌsxtxi txwesyaꞌ meꞌjwe jĩna jxkaatheꞌ, txãaweꞌsxaꞌ dxiꞌthe uꞌjweçtxi yuꞌ, naapkaçxhaꞌ txãa wãꞌjy weꞌ naa dudte jxuka wẽetku.
15 Açaꞌ teeçxsaꞌ katxhiyãꞌjçxaꞌ, dxiꞌjuu sxawedku Dxusaꞌs sus weꞌwena weçxana.
16 Saꞌ Jesus tasxte kũhçxaꞌ peejxũkwek: Weçx ew yũug jĩna. Txãa piçthẽꞌj yuꞌ Samariajũweꞌsxku yuꞌ.
17 Açaꞌ Jesusaꞌ naꞌjĩk:
—¿Diezsaíi jxuka katxhimeewáꞌnta? Vxite nwewesa yuꞌ ¿mteeta yuu?
18 ¿Naa piçthẽꞌj vxite ajũweꞌsxçxáa wáꞌ Dxusna weçxayaꞌ sxawed? jĩçxaꞌ,
19 txãa piçthẽꞌjaꞌs naꞌjĩk:
—Kiiteçxa meꞌj. Idxaꞌ katxhinig neeyũu, txãꞌwẽ Dxusaꞌ nuykatxhina sũhçxaneꞌga kxtey nwẽesẽꞌj naa paꞌga jĩk.
Dxus Nçxiꞌk Nasa Yuusáa paꞌjwaꞌj en
(Mt 24.23-28, 36-41)
20 Txajũꞌ fxariseoweꞌsxaꞌ Jesusaꞌs naꞌjĩnatx pẽjx:
—¿Bagaçx Dxusaꞌ isa naa kiwete jxkaajakx? jĩteꞌ, Jesus pasçxaꞌ:
—Dxus naa kiwete jxkaahniꞌs yafxju yuꞌ ãate yaꞌuymeena.
21 Dxusaꞌ jxkaajxaꞌ paꞌjçxa: Ãçxhaꞌ ayte ũsaꞌ meeçxawa kxtee ũsaꞌ jĩna yaꞌweꞌwemeena. Txãa paꞌgatey iꞌkweꞌsxaꞌ Dxus jxkaahni enteyãꞌj ũsiꞌkwe.
22 Txajũꞌ txãa yakh uꞌjusaweꞌsxtxi naꞌjĩnak yuꞌkxpeh:
—Iꞌkweꞌsxaꞌ Dxus Nçxiꞌk Nasa Yuusáa naa kiwete kĩiniꞌs dud uy wẽjẽneꞌkwe, nawa dud yuꞌ uymeeneꞌkwe.
23 Iꞌkweꞌsxtxiꞌ nasa yuꞌ naꞌjĩwáatxna: Ayte ũsaꞌ meeçxaꞌ kxtee ũsaꞌ jĩtewa, uꞌjmeeneꞌkwe saꞌ nwẽesẽꞌjwameeneꞌkwe.
24 Kpiꞌsx kwehnewaççxáa maꞌwẽ naa dudte majũwa jxuka vxyaakx, txãꞌwẽyçxáa yuuna Dxus Nçxiꞌk Nasa Yuusáa paꞌjwaꞌj en ãhteꞌ.
25 Nawa txãa en ãhmeyna, Dxus Nçxiꞌk Nasa Yuusaꞌ wala paꞌga yuuna naa ensu nasa yaaçeni.
26 Noé ensuwa maꞌwẽga yuu, txãꞌwẽyçxáa yuuna Dxus Nçxiꞌk Nasa Yuusáa paꞌjwaꞌj ensuwa.
27 Noé ensu nasaꞌ kĩh yuhwa peejxmée ũꞌna ptamuuna vxiteꞌ txãaweꞌsx niisatx kaaimiꞌaꞌjnatx ũsuꞌ. Nawa Noé barkote uꞌkaçpkaçxhaꞌ, nus wala paꞌjçxa ĩkh utateꞌ jxuka uutx.
28 Lot ensuwa txãꞌwẽytxi yũuna ũsuꞌ, kĩh yuhwa peejxmée ũꞌna, uuthasx vxitna, txweyna, yatwa txãꞌwẽytxi wala txahna ũsuꞌ.
29 Nawa Lot Sodomajũ kasejeçpkaçxhaꞌ, cielujũ asufxre behna kĩhçxa jxukaysatx kabku.
30 Txãꞌwẽyçxáa yuuna Dxus Nçxiꞌk Nasa Yuusáa vxyaa entewa.
31 Txãa enteꞌ ẽeyatte wáa uꞌpsa yuuna, nawa saꞌjçxa kĩhçxáanawa dxiiju kutxiꞌjwaꞌj ençxáa yuhwa jiꞌphumeena. Saꞌ maaíi yuꞌ çxhab ekaju wáa uꞌju yuuna, nawa yatna sxawedwaꞌj ençxáa yuhwa uymeena.
32 Lot nyuuwa maꞌwẽga yuu txãꞌsna miiyajkxwe.
33 Txãa enteꞌ maa nasawa naa kiwete ĩtxĩ fxiꞌzeniçxáꞌs yaakxsaꞌ, Dxus yakh ĩtxĩ fxiꞌzewaꞌj yuꞌsaꞌ ivxiituna. Nawa maawa naa kiwete ĩtxĩ fxiꞌzeniꞌs yaakxsameꞌ, Dxus yakh ĩtxĩ fxiꞌzewaꞌjaꞌs jiꞌphuna.
34 Naꞌjĩꞌth naꞌ: Txãa kusteꞌ teeçx kamaga eꞌz wáa dehna ũs yuutxna. Nawa teeçxsaꞌs pehna uꞌjni yuuna, naapkaçxhaꞌ vxite yuꞌ neeyũuna.
35 Txãꞌwẽy eꞌz uꞌy wáa kxteeçxah ũꞌkhna ũs yuutxna. Nawa teeçxsaꞌs jxũna uꞌjni yuuna, naapkaçxhaꞌ vxite yuꞌ neeyũuna.
36 Meeçxaꞌ eꞌz piçthẽꞌj wáa kxteeçxah mjĩina ũs yuutxna. Nawa teeçxsaꞌs jxũna uꞌjni yuuna, naapkaçxhaꞌ vxite yuꞌ neeyũuna jĩteꞌ,
37 Jesus yakh uꞌjusaweꞌsxaꞌ naꞌwẽtx pẽjx:
—¿Mtee txãꞌwẽ yuukx? jĩtx. Açaꞌ Jesus pasçxaꞌ:
—Kakwe khaꞌtx mkaa uuna ũstewa, mẽewẽjxaꞌ ãate pkhaakhetxna jĩk.
