Lukas 18:1-43
18 Dxusaꞌs peçxkanamée bagaçxtewa txãa yakh puutx weꞌwena nes yuukahn naa ejemploꞌsku ptaꞌsx Jesusaꞌ:
2 —Teeçx çxhabte teeçx khuẽs uꞌpuꞌk, Dxusaꞌs yaakxsamée saꞌ nasatxwa peeygãjaꞌçmeꞌ.
3 Txãa çxhabteꞌ teeçx uꞌy vxiudak uꞌpuꞌ, saꞌ khuẽs tasxte pãatxhĩꞌkhyaꞌ uꞌjna nesku yuꞌ: Ũꞌkweꞌs meen nweꞌwe, açesa wala pkxuꞌtx jĩna.
4 Maazkuẽe uswa paꞌthewa, txãa khuẽsaꞌ puꞌçxmeꞌ, nawa naꞌwẽk yajkx: Dxusnawa yaakiçmeeth saꞌ nasa maa yuhtxwa peeygãasameeth.
5 Nawa naa vxiudaꞌ wala kuçx tahtatey paꞌjaꞌk açaꞌ puꞌçxhiꞌnja peena yuꞌ paꞌkhamén jĩk.
6 —Khuẽs ewmeesa yuhwa txãꞌwẽk puꞌçxyaꞌ yajkx jĩk Jesusaꞌ.
7 Dxusaꞌ ¿txãꞌwẽyçxáa puꞌçxmeemaꞌk txajx txhitxhnisatxiꞌ? Txãꞌwẽ kus maꞌk yuu en maꞌk yuu nawa pxthaa weꞌwena nes yuuteꞌ puꞌçxyaꞌ jxthẽeyuumeena.
8 Naꞌjĩꞌth naꞌ: Dxus Nçxiꞌk Nasa Yuusáa naa kiwete sxawedna kĩi entewa ¿txãꞌwẽ Dxus yakh puꞌvxitumée neeweꞌwesa ũsmaꞌtx yuu? jĩk.
Eꞌzsa dxuus yatte Dxus yakh puutx weꞌweyaꞌ uꞌkani
9 Jesusaꞌ naꞌwẽk vxite ejemplo ptaꞌsx txãꞌwẽ maaíi yuꞌ wala ewsathaꞌw sũhna vxite yuutxiꞌ ahçena fxiꞌzesaweꞌsxtxi:
10 —Eꞌz piçthẽꞌjtx dxuus yatte Dxus yakh weçxana puutx weꞌweyaꞌ uꞌka. Teeçxsaꞌ fxariseoꞌ, açaꞌ vxiteꞌ gobierno jĩi vxyu pkhakhsak yuꞌ.
11 Fxariseo yuꞌ yujuçxa naꞌjĩnak Dxus yakh puutx weꞌweꞌ: Dxus, idxaꞌs wala weçxaꞌth, adxaꞌ vxite nasa naꞌwẽmeeth. Txãaweꞌsxaꞌ pesweetaꞌ, ewmée kazxsataꞌ. Saꞌ nyu jiꞌphçxawa vxite yakh pkal yuusataꞌ. Açaꞌ adxaꞌ txãꞌwẽsameeth. Naa piçthẽꞌj ayte ũsaꞌ gobierno jĩi vxyu pkhakhsa txãꞌwẽsaçxáa yuhwa meeth.
12 Saꞌ kiꞌsute eꞌz us yũunaꞌth. Adx knayni kĩjkĩhnawa diesmo dukheꞌth idxaꞌs jĩk.
13 Naapkaçxhaꞌ gobierno jĩi vxyu pkhakhsa yuꞌ jxuꞌtheçxáa yujuçxa cielute yuhwa pagaymée naasáa txajx peçxuteçxáak iikakana Dxusaꞌs naꞌjĩꞌ: Dxus, adxaꞌs meen peeygãh. Wala yuuwesath jĩnaçxáak weꞌweꞌ.
14 Naꞌjĩꞌth naꞌ: Gobierno jĩi vxyu pkhakhsa weꞌweniꞌs Dxusaꞌ pasneꞌ. Nawa fxariseo yuꞌ pasnimeeneꞌ yatna sxawedna uꞌj. Maawa iiwejçx iiwejçx yajkxçxa weꞌwesaꞌ, jxthaakwe ãhmeekwesa yuuna. Nawa maawa ãhmeekwesa naꞌwẽ yajkxna weꞌwesaꞌ iiwejçx yaakxsate jxthaakwe ewsa yuuna jĩk.
Luuçxkuẽtx Jesus bedekĩyni
(Mt 19.13-15; Mr 10.13-16)
15 Txajũꞌ nasaꞌ Jesus tasxte txãaweꞌsx luuçxkuẽtx nuypaꞌjtx Dxus kusete neeweꞌwekahn. Açaꞌ Jesus yakh uꞌjusaweꞌsxaꞌ ũusçxa weꞌwetx luuçxkuẽtx nuypaꞌjsatx.
16 Nawa Jesusaꞌ txãa yakh uꞌjusaweꞌsxtxi paꞌyaçxa naꞌjĩk:
—Luuçxkuẽ adx tasxte yuhteꞌ, kuçx yupnuwe, txãa paꞌgatey Dxus jxkaahna ũsnisaꞌ naa luuçxkuẽweꞌsx naꞌwẽsa jĩi íiçxáꞌ.
17 Isath weꞌweꞌ, maawa luuçxkuẽ naꞌwẽ Dxus jxkaahwaꞌj enaꞌs waꞌlmée jxpaꞌgameeçxa yuꞌ, bagaçxte yuhwa Dxus tasxte uꞌkameetxna jĩk.
Piçtakx wala jiꞌphsa Jesus yakh puutx weꞌweni
(Mt 19.16-30; Mr 10.17-31)
18 Txajũꞌ teeçx piçtakx npiiçthẽꞌjsa naꞌwẽk paapẽjx Jesusaꞌs:
—Idxaꞌ wala ewgu kĩhsuwa jxuka, txãa paꞌga naꞌwẽth paapẽyiꞌ: ¿Maꞌwẽ yũuçxa pçumée ĩtxĩ fxiꞌzewaꞌjaꞌs jiꞌphukiꞌth? jĩteꞌ,
19 Jesusaꞌ naꞌjĩk:
—¿Kĩh yuupaꞌgaga adxaꞌs ewsa jĩꞌ? Naa kiweteꞌ teeçxçxáa yuhwa ewsa yuꞌ meetaꞌ? naasáa Dxus yuuçxáa ewsa ũsaꞌ.
20 Pçumée ĩtxĩ fxiꞌzewaꞌjaꞌs jiꞌphu wẽeçxaꞌ, Dxus jxkaahnitxiꞌ jiig txãatxiꞌ kxtey myuu. Txãꞌ naataꞌ: Ptamsayãꞌjaꞌ vxite yakh pkal yuuwaꞌjmeꞌ. Nasa ikhwaꞌjmeꞌ. Pesweewaꞌjmeꞌ. Vxitetx ĩsxĩina nuyweꞌwewaꞌjmeꞌ. Neyweꞌsxtxi peeygãhna ewçxáa yũuna fxiꞌzewaꞌjaꞌ jĩteꞌ,
21 txãa piçtakx pasçxaꞌ:
—Txãatxiꞌ leꞌçxkuẽjũjx jxuka kxtey yuunath waláa jĩk.
22 Açaꞌ Jesus wẽsẽꞌjçxaꞌ naꞌwẽk jxkaah:
—Txãꞌwẽtewa, nee peejiꞌ. Iidx jiꞌphuniꞌs jxuka txweyçxa, puuplesatx peesuneꞌga. Txãꞌwẽ yũuçxaꞌ, cielute jiꞌphsa yuuneꞌga. Txãꞌwẽ yũuçxa adx yakh myuh jĩteꞌ,
23 txãa piçtakxaꞌ wala nxusna neeyũuk, wala jiꞌphsa yuꞌk txãapaꞌga.
24 Txãꞌwẽ nxusteꞌ, Jesusaꞌ naꞌjĩnak weꞌwe:
—Maawa wala jiꞌphsa yakhaꞌ, wala yuh thẽyaꞌ Dxus jxkaahna ũsnite uꞌkawaꞌjaꞌ.
25 Açaꞌ txãꞌwẽ thẽysaꞌs yajkxte yuꞌ, kamelxo yuhwa thẽymée wáa yũz kafxga uꞌkayaꞌ ãjatxna.
26 Txãꞌjĩteꞌ, naꞌwẽtx weꞌwe:
—Txãꞌwẽ thẽyteꞌ, ¿kim ewte neeyũuyaꞌ ãjãkx? jĩꞌtx.
27 Açaꞌ Jesusaꞌ naꞌjĩk:
—Iꞌkweꞌsxçxáa yuꞌ ãjãmeeneꞌkwe. Nawa Dxus yakh yuꞌ, kĩh yuhwa thẽysa meeaꞌ jĩteꞌ,
28 Pedroꞌ naꞌwẽk weꞌwe:
—Kweꞌsxaꞌ idx yakh yujxaꞌ kweꞌsx jiꞌphuniꞌs jxuka nvxihtthaꞌw jĩk.
29 Açaꞌ Jesus pasçxaꞌ naꞌjĩk:
—Isath weꞌweꞌ: Dxus jxkaahniꞌs nwẽesẽꞌjyaꞌ maawa yat, neyweꞌsx, nyakhweꞌsx, nyu, nçxiꞌkweꞌsx txãꞌwẽsatx nvxihtçxaꞌ,
30 naa kiwete nee ũsíi txãa nvxiitnisate jxthaakwe jxpaꞌgatxna, saꞌ vxite kiweteꞌ pçumée ĩtxĩ fxiꞌzewaꞌjaꞌs jiꞌphutxna jĩk.
Jesusaꞌ txajx uuwaꞌjaꞌs kiꞌ ptaꞌsxni
(Mt 20.17-19; Mr 10.32-34)
31 Jesusaꞌ txãa yakh uꞌjusaweꞌsx docesatx fxiite paꞌyaçxa naꞌwẽk ptaꞌsx:
—Ãçxhaꞌ Jerusalente paꞌjyaꞌ uꞌjweçthaꞌw, açaꞌ Dxus yuwe ptaꞌsxsaweꞌsxaꞌ fxiꞌjtx Dxus Nçxiꞌk Nasa Yuusáꞌs maꞌwẽ yũuwaꞌthewa txãꞌ jxuka kxtey yuuna.
32 Dxus Nçxiꞌkaꞌs vxite nasatx dukh yaꞌwataꞌ, açaꞌ txãaweꞌsxaꞌ npeevxysxijkana wẽesxuuna fxneꞌsx avxythethna yũuyaꞌwataꞌ.
33 Saꞌ wala peçxujkwena yuuçxa ikhetxna. Nawa tekh enteꞌ kiꞌ ĩtxĩ yuuna jĩtewa,
34 txãa yakh uꞌjusaweꞌsxaꞌ weh yuhwa jiyumeetaꞌ saꞌ txãꞌwẽ kxtey yuutxna sũjũꞌçwameetaꞌ.
Teeçx piçthẽꞌj Jerikoteweꞌsx uyyaꞌ ãjasameꞌs Jesus nuykatxhini
(Mt 20.29-34; Mr 10.46-52)
35 Txajũꞌ Jesusaꞌ Jeriko çxhabte paꞌjaçteꞌ, teeçx piçthẽꞌj uysaméek dxiꞌj pukate kaçxçxa lmusxnu pẽjxna uꞌpuꞌ.
36 Saꞌ nasa wala skhẽwna susuçte wẽsẽꞌjçxaꞌ, pẽjxku:
—¿Kĩh yuuçna? jĩna.
37 Açaꞌ nasa pasçxaꞌ:
—Jesus Nasarethuweꞌsx aysu skhẽuuçaꞌ jĩteꞌ,
38 uysameꞌ naꞌjĩnak sus weꞌwe:
—¡Jesus, Davxid jiꞌj, adxaꞌs meen peeygãh! jĩna pxthaa weꞌweteꞌ,
39 nasa yaçte uꞌjsaweꞌsx yuꞌ:
—Sxuunaꞌ myuu jĩnatx wẽesxu weꞌwe. Nawa txãa yuꞌ jweeíiçxáak sus weꞌwe:
—¡Davxid jiꞌj, adxaꞌs meen peeygãh! jĩna.
40 Txajũꞌ Jesusaꞌ nee yujuçxa peꞌjyaꞌ kaakh. Saꞌ utxaana kũhteꞌ, naꞌjĩk:
41 —¿Kĩhga yũu jxthãasuꞌ? jĩteꞌ:
—Adxaꞌ uyyaꞌ ãjãꞌçmeeth, txãasath uy wẽjẽꞌ jĩk.
42 Açaꞌ Jesus weꞌweçxaꞌ:
—Kaauyuꞌjuna sũhçxaneꞌga adxaꞌs piꞌkx, txãa paꞌga ãçxhaꞌ uyna mneeyũu jĩçpkaçxhaꞌ,
43 txãa dudtey uyyaꞌ ãjãk, saꞌ Dxusna wala weçxana Jesus eꞌstey uꞌkh. Txãꞌwẽ uyyaꞌ ãjãte nasa uyçxaꞌ, txãaweꞌsxwa txãꞌwẽytxi Dxusaꞌs wala weçxa.
