Lukas 19:1-48
19 Txajũꞌ Jesusaꞌ Jeriko çxhabte paꞌjçxaꞌ, txãa çxhabsu skhẽuuçku yuꞌ.
2 Açaꞌ kxteꞌ teeçx piçthẽꞌj wala jiꞌphsa Zakeo yaasesak ũsuꞌ. Txãa yuꞌ gobierno jĩi vxyu pkhakhsa npiiçthẽꞌjsak yuꞌ.
3 Txãa Zakeoꞌ Jesus kimtewa jiyuyaꞌ puutx uy wẽeçxawa, nasaa wala ksxavxyteꞌ ãjãmeꞌ, txãa yuꞌ leꞌçxkuẽek yuꞌ naa paꞌga.
4 Saꞌ yaçte wuwuuçxa, sikómoro fxtũu tasxtek tejka Jesusaꞌs uyyaꞌ.
5 Açaꞌ Jesusaꞌ kxuy uykhẽuuççxaꞌ, fxtũu tasxte pagayçxa Zakeoꞌs weꞌwek:
—Dudçxáa txajũ miisaꞌj, adxaꞌ iidx yatte ãçxhíi paꞌjwaꞌj jiꞌpthu jĩteꞌ,
6 Zakeoꞌ dudçxáa saꞌjçxa, Jesusaꞌs weçxanak txajx yatte jxpaꞌga.
7 Txãꞌwẽ yũuteꞌ nasa jxukaysa açeweꞌwetx: Jesusaꞌ txãa piçthẽꞌj pkalsa yattek paꞌjyaꞌ uꞌj jĩna.
8 Txajũꞌ Zakeoꞌ yujuçxa naꞌjĩnak weꞌwe:
—Adx jiꞌphuniꞌs puupxãhn txuhdeçxa puupletx peesuꞌnja, saꞌ maaíitxiꞌs ĩsxĩiçxa jxthaakwe wáꞌntka vxyu kusaꞌj nawa kusaꞌjnite pahz us jxthaakwe kaasxweduꞌjuꞌnja jĩteꞌ,
9 Jesusaꞌ naꞌjĩk:
—Naa piçthẽꞌjaꞌ Abrahan jiꞌkh yuu naa paꞌga naa yatteweꞌsx ewte neeyũuwaꞌj en paꞌkh ãçxhaꞌ.
10 Dxus Nçxiꞌk Nasa Yuusaꞌ txãꞌwẽ vxituna ũssatx pakweçxa ewte nvxiht-yaꞌ íiçxáath kĩh jĩk.
Patron vxyuꞌs nuypenakahn selpisaatx nvxiitni
11 Jesus weꞌweniꞌs wẽsẽꞌjsa yuꞌ, naa sũhnatx ũsuꞌ: Jesusaꞌ Jerusalente paꞌjaçaꞌ naꞌ ãçxhaꞌ txãa jxkaahsa yuuna sũhnatx ũsuꞌ.
12 Naa paꞌga naꞌwẽk kwentuꞌjna ptaꞌsx:
—Teeçx piçthẽꞌj jxtuhthesa jxuꞌj kiwen uꞌkh, kxtee paꞌjçxa jxkaahsa yuuçxa kiꞌ sxawedxaꞌ.
13 Nawa uꞌjmey, diez selpisaatx paꞌyaçxa, kxazíitx txakweçxaçxáak vxyu ũsçxa naꞌjĩna neeweꞌwe: Adx sxawedna paꞌphkaçx naa vxyu yakh mjĩineꞌkwe nuypehnayaꞌ. Txãꞌjĩçxak jxkaahsa yuuyaꞌ jxuꞌj kiwen uꞌj.
14 Nawa txajx kiwete nasaꞌ jxkaahsa kiꞌpniꞌs waꞌlçxa, naꞌjĩnatx pãatxhĩꞌkhyaꞌ kaah txajx eꞌstey: Naa piçthẽꞌj kweꞌsxtxi jxkaahniꞌs peejxmeethaꞌw jĩtewa,
15 pejka jxkaahsa yuuçxa kiꞌ sxawedku txajx kiweníi. Saꞌ paꞌjçxaꞌ selpisaatx vxyu ũsneꞌ txãatx paꞌyak, nasa iisa maz nuypehnatewa jiyuyaꞌ.
16 Açaꞌ nyafxteweꞌsx kũhçxaꞌ naꞌjĩk: Iidx vxyu ũsgu txãate diezthu jxthaakwe nuypehna jĩteꞌ,
17 jxkaahsa pasçxaꞌ: Wala ew selpiig. Txãꞌwẽ walameekuẽsaꞌswa ew jxpeꞌphaꞌga, diez çxhabte jxkaahwaꞌjsa neꞌjweꞌsx kiꞌpuꞌnja jĩk.
18 Txajũꞌ vxitewa utxaaçxa naꞌjĩk: Iidx vxyu ũsgu txãate tahçthu jxthaakwe nuypehna jĩteꞌ,
19 jxkaahsa pasçxaꞌ: Idxaꞌ tahç çxhabte jxkaahwaꞌjsa neꞌjweꞌsx yuuneꞌga jĩk.
20 Txajũꞌ tekhteweꞌsxwa utxaaçxa naꞌjĩk: Iidx vxyu ũsgu txãꞌsaꞌ panxwelote yapçxa jxaawthu. Txãꞌ ayga ũsaꞌ.
21 Idxaꞌ wala juunaꞌ yuꞌg, txãꞌwẽ mjĩimeeçxawa vxyu pẽyiꞌg saꞌ iidx uuthasxmeetewa kxtee uꞌkaçxa jxuka pkhakheꞌg. Açaꞌ ũukhçxa iidx vxyuꞌsaꞌ kmãajiꞌjmeeth jĩteꞌ,
22 jxkaahsa pasçxaꞌ: Idxaꞌ seelpimeeg. Iidx yuweteyçxáa ewmeete neeyũuçgu. Adxaꞌ juunaꞌsaçxaꞌ mjĩimeeçxawa vxyu pẽjxna adx uuthasxmeetewa pkhakhsatewa jiiçxaꞌ,
23 ¿kĩh yũutega adx vxyuꞌsaꞌ bankoga jxaawmée? pehnate adx sxawedna paꞌjçxaꞌ jxthaakwe kutxiꞌkhan jĩk.
24 Saꞌ txãa jxkaahsaꞌ naꞌjĩnak weꞌwe kxtee ũssatx: Txãa vxyuꞌs kusaꞌjçxa diez vxyu jiꞌphsaꞌs meswe jĩteꞌ,
25 txãaweꞌsx pasçxaꞌ: Txãꞌ vxyu walayãꞌj jiꞌphaꞌ, açaꞌ ¿maꞌwẽ txãꞌsíiçxáa ũsukxthaꞌw? jĩtewa,
26 jxkaahsa pasçxa naꞌjĩk: Maawa jxpaꞌyakx jxpeꞌjçxa nuypenasaꞌs jxthaakwe ũswaꞌj yuuna. Nawa jxpeꞌjyaꞌ ãjãmeeçxa nuypenasameꞌs jxuka kusaꞌjwaꞌj yuuna, leꞌçxkuẽçxáa jiꞌphtewa.
27 Saꞌ adxaꞌs ahçeçxa jxkaahsa yuukahmén pãatxhĩꞌkhsaweꞌsxtxiꞌ ayte peꞌjna kũhçxa adx uyna ũste miikhwe jĩk.
Jesus Jerusalente uꞌkani
(Mt 21.1-11; Mr 11.1-11; Jn 12.12-19)
28 Txãa ejemploꞌs ptaꞌsxna jxãꞌjçxaꞌ, Jerusalente paꞌjyaꞌ uꞌkh.
29 Saꞌ Betfxagé vxiteꞌ Betania çxhab ũsuꞌtx Oliwos vxiç utxaga kxtee paꞌjyaꞌçxáa txãa yakh uꞌjusa eꞌzsatx kaakh
30 naꞌjĩna:
—Naaga çxhab ũsaꞌ kxtee meꞌjwe. Saꞌ kxtee paꞌjaççxaꞌ, teeçx buçxukuẽ uyuuneꞌkwe kim yuhwa aꞌjnimeesa tudni ũsna. Txãꞌsaꞌ jxũkhwedeçxa jxũna yuweeneꞌkwe.
31 Jxũna yuhteꞌ, maaíi yuꞌ pẽyiwáatxna açaꞌ: Kweꞌsxtxi jxpeꞌjsak nikxyaꞌ kaah jĩneꞌkwe.
32 Açaꞌ txãꞌjĩteꞌ uꞌjçxaꞌ, Jesus maꞌwẽneꞌ weꞌwe txãꞌwẽy uytxi.
33 Txajũꞌ buçxuꞌs jxũkhwedeçteꞌ, namuweꞌsxaꞌ pẽjxtxi:
—¿Kĩjxaꞌ buçxuꞌs jxũkhwedeçkwe? jĩteꞌ,
34 txãaweꞌsx pasçxaꞌ:
—Kweꞌsxtxi jxpeꞌjsak nikxyaꞌ kaah jĩtx.
35 Saꞌ Jesus tasxte jxũna kũhçxaꞌ, txãaweꞌsx atxhtxi pusçxa Jesusaꞌs kaꞌjaꞌjtx.
36 Txajũꞌ Jesus uꞌjwaꞌj dxiꞌjsu yaçtetx txãaweꞌsx atxhtxi pusna uꞌjweꞌ.
37 Saꞌ Oliwos vxiç eꞌskhẽ uꞌjweçpkaçxhaꞌ, Jesus yakh yuusa nasaꞌ Dxusaꞌs wala weçxana weyyaꞌ takhtxi txãꞌwẽ Jesusaꞌ kĩjkĩhwa ew yũuna uꞌjuniꞌs uyçxa.
38 Saꞌ naꞌjĩnatx weyiꞌ:
—¡Dxus kaahni wala yuh ew jxkaahwaꞌjsa yujaꞌ! ¡Dxus cieluteweꞌsxaꞌs weçxaaga wala ew yũupaꞌga! jĩꞌtx.
39 Txajũꞌ nasaa ksxavxyte yuusa fxariseoweꞌsxaꞌ naꞌjĩtx:
—Iidx eꞌste kuçx susna yuusatx mweꞌwe, sxuunaꞌ yuukahn jĩteꞌ,
40 Jesus pasçxaꞌ:
—Makwe txãaweꞌsx yuꞌ sxuunaꞌ yuutewa, kwetaꞌ Dxusaꞌs tuutheꞌjetxna jĩk.
41 Txajũꞌ Jerusalente utxa paꞌjçxaꞌ, çxhabaꞌs thegçxa ũꞌnek
42 naꞌjĩna:
—Iꞌkweꞌsxaꞌ wẽt kfxiꞌzeꞌjwaꞌjsaꞌs jiyuçxa naa ente jxpaꞌgawaçaꞌ, wala yuh ewna. Nawa iꞌkweꞌsxaꞌ jiimée ũsiꞌkwe naꞌ jxpaꞌgameeneꞌkwe.
43 Naa paꞌga iꞌkweꞌsxtxiꞌ nxuswaꞌj en paꞌjana, açaꞌ txãa enteꞌ çxhabaꞌs jxuka yupna ktadxiiçxa
44 çxhabaꞌs kĩh yuhwa nvxihtmée jxuka suwuutxna kxtee ũssatx ikhna. Saꞌ teeçx kwetçxáa yuhwa kẽeseꞌjnimée yuꞌ neeyũumeena, iꞌkweꞌsx ksxavxyte Dxus kĩhtewa, jxpaꞌgameeiꞌkwe naa paꞌga jĩk.
Dxuus yatte txweysaatx Jesus kasxisxni
(Mt 21.12-17; Mr 11.15-19; Jn 2.13-22)
45 Txajũꞌ Jesusaꞌ dxuus yatte uꞌkaçxa kxtee txweyna ũssatx jxuka eka kasxisxku
46 naꞌjĩna:
—Dxus librute naꞌwẽ fxiꞌjniꞌ: Adx yataꞌ Dxus yakh puutx weꞌwena ũswaꞌj yatçxáꞌ jĩna fxiꞌjniꞌ. Nawa iꞌkweꞌsx yuꞌ peswée pkhaakhena ũsni kafx naꞌwẽçxáa vxitçxa jiꞌphiꞌkwe jĩk.
47 Jesusaꞌ een isak dxuus yatte uꞌkaçxa kaapiyaꞌjaꞌ. Naapkaçxhaꞌ sacerdote npiiçthẽꞌjweꞌsx vxiteꞌ Dxus leyaꞌs kaapiyaꞌjsaweꞌsx vxiteꞌ çxhabte neꞌjweꞌsx txãaweꞌsx yuꞌ: ¿Maꞌwẽ yũuçxa ikhekxthaꞌw? jĩnatx puutx weꞌwena ũsuꞌ.
48 Nawa ikhyaꞌ yuꞌ ãjãꞌçmeetaꞌ, nasa jxukaysa Jesus juꞌguçxaçxáatx ũsuꞌ naa paꞌga.
